Papela Ledzri Pfaka Ka Huvo Leyi Zrangelaka

Vamakwezru Lava Zrandzrekaka:

Hinkwezru hi gandzrelaka Yehovha ha dzri zrandzra Bibele. Ha tiyiseka leswaku leswi ku vulavuliwaka ha swone ka Zritu dzra Xikwembu Nkulukumba swi yentxekile hakunene, dzri ni swilayu leswi dumbekaka nakone dzri kombisa leswaku hinkwezru Yehovha a hi zrandzra ngopfu swinene. (Amapsalma 119:105; Luka 1:3; 1 Yohane 4:19) Hi swi navela ngopfu swinene ku pfuna vhanu hinkwavu akuva va tiva mintiyiso leyi ya ku xonga ya Bibele. Xileswo hi nyonxe ngopfu swinene hi ku lulamisela buku ledzri, ledzri nga ni nhlokomhaka leyi liki “Dondzra Hi Vhanu Va Le Bibeleni”. Ka Papela ledzri, hi ta mi dzrungulela switsrongo mayelanu na dzrone.

A buku ledzri dzri hambiwe na ku yanakanyiwa hi vatsrongwana, nambitanu dzri nga ha tizriseliwa ku pfuna lavakulu lava djulaka ku dondzra leswi yengetelekiki mayelanu ni Bibele. Swanga hi leswi buku ledzri dzri hambeliwiki vhanu hinkwavu, hinkwezru hi ta pfuneka hi leswi hi taka swi dondzra ka dzrone nakone leswo swi ta hi nyonxisa.

Dzri vulavula hi mintxhumu leyi yentxekiki leyi ku vulavuliwaka ha yone a Bibeleni. Ku hambiwe minzamu ya leswaku dzri dondzreka ni ku twisiseka hi ku nabyala nakone a swiyentxakalu leswi ku vulavuliwaka ha swone swi longoloxiwe hi ku ya hi leswi humelelisiki xiswone.

Nambitanu, a buku ledzri a dzri vulavuli hi wudzrunguli bya le Bibeleni ntsena. A wudzrunguli kun’we ni mafoto leswi swi nga ka buku ledzri, swi yentxeliwe ku pfuna mudondzri akuva a swi vona hi matihlo ya miyanakanyu leswi swi yentxekiki a nkameni wolowo.

A buku ledzri dzri vulavula hi vhanu va le Bibeleni lava yingisetiki Yehovha ni lava va kalaka va nga mu yingisetanga. Dzri ta hi pfuna ku vona leswi hi nga swi dondzraka ka vhanu volavo. (Varoma 15:4; 1 Vakorinte 10:6) Dzri yaviwe hi 14 wa swiyenge. A ku sunguleni ka xiyenge xin’wana ni xin’wana ku ni nkatsrakanyu wa leswi swi taka dondzriwa ka xiyenge xolexo.

Loko u li mupswali, dondzra dzrungula ledzro ni n’wanaku u gama u bula na yene mayelanu ni mafoto lawa ma fambisanaka ni leswi a mi dondzra swone. Ntsrhaku ka leswo mi nga dondzra xikan’we tindzrimana ta Bibele leti kumekaka a wugan’wini bya dondzro. Pfuna n’wanaku akuva a twisisa leswaku a tindzrimana leto ta yelana ni dondzro leyi a mi dondzra yone.

Hi navela leswaku buku ledzri dzri pfuna vhanu hinkwavu, lavakulu ni lavatsrongo, akuva va dondzra swa kukazri a Zritwini dzra Xikwembu Nkulukumba ni ku hanya hi leswi Bibele dzri swi dondzrisaka. Hi ndlela leyo, na vone va ta kota ku gandzrela Yehovha swanga swizro swa ndangu wake lowu a wu zrandzraka ngopfu swinene.