XIDONDZRO 26
Ha Yini Ku Ni Wubihi Ni Ku Xaniseka?
Loko ku humelela ntxhumu wa ku biha, hi tolovela ku tivutisa leswi: “Ha yini mintxhumu leyi yi humelela?” Lexi nyonxisaka hi leswaku Bibele dzri ni nhlamulo!
1. Xana Sathana a byi vangise kuyini wubihi a misaveni?
Sathana Diyavulosi a pfukele Xikwembu Nkulukumba. Sathana a a djula ku fuma vhanu, xileswo a hlohlotele vhanu va ku sungula, Adamu na Evha, akuva va tipatsra na yene a ku pfukeleni ka Xikwembu Nkulukumba. Sathana a yentxe leswo hi ku hembela Evha. (Genesis 3:1-5) A yentxe Evha a pimisa leswaku Yehovha a a mu tsrona mintxhumu ya yinene. Sathana a va yentxe va yanakanya leswaku a va to kuma ku nyonxa loko va nga mu yingiseti Xikwembu Nkulukumba. Madzrimi ya ku sungula ya Sathana lawa a ma byeliki Evha, ma ve ya leswaku Evha a a nge ti fa. Hi yo mhaka leyo Bibele dzri mu vitanaka ‘muhembi, tatana wa ku hemba’.—Yohan 8:44.
2. Xana Adamu na Evha va lange ku yentxa yini?
Yehovha a nga va tsronanga ntxhumu Adamu na Evha. Xikwembu Nkulukumba a te va nga tidela mihandzru ya minsinya hinkwayu ya xizramba xa Edeni, kambe a va nga fanelanga ku da mihandzru ya nsinya wun’we ntsena. (Genesis 2:15-17) Nambiloko va byeliwe leswo, vone va lange ku da ni mihandzru ya nsinya wolowo. Evha ‘a ku khaya mihandzru ya wone, a da’. Ntsrhaku ka leswo, Adamu, “na yene a da”. (Genesis 3:6) Adamu na Evha a va li vhanu lava hetisekiki, a swi va nabyalela ku yentxa leswi nga swinene. Kambe ha wubidzri byavu va lange ku kala va nga mu yingiseti Yehovha. Hi ku va va yentxe leswo, va dohile va tlhela va kombisa leswaku a va nga swi djuli ku fumiwa ha Yehovha. A xiboho lexi va xi tekiki, xi va vangele ku xaniseka lokukulu.—Genesis 3:16-19.
3. Xana hine hi nghena kwini ka leswi Adamu na Evha va swi yentxiki?
Loko Adamu na Evha va dohile, ku hetiseka loku a va li na kone ku nyamalalile, kutani va tluleta vanavu hinkwavu ku kala ku hetiseka. A Bibele dzri hlaya leswi ha Adamu: ‘Swanga hi leswi ha mhunu mun’we a xihono xi nga nhingena misaveni, ni hi xo xihono ka nhingeni ku fa, hi swoswo a ku fa ku tluleli vhanu hinkwavu.’—Ba-le-Roma 5:12.
I swinyingi leswi hi yentxaka hi xaniseka. Minkama yimbeni hi xaniseka hi leswi hi tekaka swiboho leswi hoxiki. Minkama yin’wana hi xaniseka hi leswi van’wana va tekaka swiboho leswi hoxekiki. Kasi hi minkama yimbeni hi xaniseka hi leswi hi nga ha kumekaka mbangwini lowu ngeke wunene ni hi nkama lowu ngeke wunene.—Dondzra Eklesiasta 9:11.
KELISISA
Vona leswaku ha yini Xikwembu Nkulukumba a nge na nandzru hi wubihi ni ku xaniseka loku nga kone a misaveni namunhla. Tlhela u vona ndlela leyi a titwaka ha yone loko hi xaniseka.
4. Xana i mani lweyi a yentxaka leswaku hi xaniseka?
Vhanu vanyingi va pimisa leswaku Xikwembu Nkulukumba hi yene a fumaka misava hinkwayu. Xana swoleswo i ntiyiso? Vonani VHIDIYU.
Dondzrani Yakob 1:13 na 1 Yohan 5:19, mi gama mi bulisana hi xivutiso lexi landzrelaka:
Xana Xikwembu Nkulukumba hi yene a vangaka wubihi ni ku xaniseka?
5. Vona leswi yentxekiki ku sukela loko Sathana a sungule ku fuma misava
Dondzrani Genesis 3:1-6, mi gama mi bulisana hi swivutiso leswi landzrelaka:
He wani madzrimi lawa Sathana a ma hlayiki?—Vona tindzrimana 4, 5.
Xana Sathana a yentxe kuva vhanu va pimisa leswaku Yehovha a va tsrona swa kukazri hi ndlela yini?
Hi ku ya hi Sathana, xana vhanu swi nga va fambela ha hombe loko va fumiwa hi Xikwembu Nkulukumba?
Dondzrani Eklesiasta 8:9, mi gama mi bulisana hi xivutiso lexi landzrelaka:
Leswi Yehovha a kalaka a nga li mufumi wa misava, i mpswini leswi yentxekaka?
Adamu na Evha a va hetisekile nakone a va tsrhama Paradeyisini. Kambe va yingisete Sathana kutani va pfukela Yehovha
Ntsrhaku ka wupfukeli, a misava yi ve ni xidoho, ku xaniseka ni lifu
Yehovha a ta helisa xidoho, ku xaniseka ni lifu. A vhanu va ta tlhela va va lava hetisekiki ni ku hanya a Paradeyisini
6. Yehovha a ni mhaka na hine loko hi xaniseka
Xana Xikwembu Nkulukumba a ni mhaka na hine loko hi xaniseka? Vona leswi Hosi Davhida na mupostola Petro va swi hlayiki. Dondzrani Amapsalma 31:7 ni 1 Petros 5:7, mi gama mi bulisana hi xivutiso lexi landzrelaka:
Xana u titwisa kuyini hi ku tiva leswaku Yehovha awa hi vona a tlhela a va ni mhaka na hine loko hi xaniseka?
7. Xikwembu Nkulukumba a ta helisa ku xaniseka hinkwaku
Dondzrani Ezaya 65:17 ni Apfuletelo 21:3, 4, mi gama mi bulisana hi xivutiso lexi landzrelaka:
Ha yini swi txhavelela ku tiva leswaku Yehovha a ta susa hinkwaswu leswi xanisaka vhanu?
A wu swi tiva?
Loko Sathana a hlaye madzrimi ya ku sungula, a ntxhimise vito dzra Yehovha. Sathana a yentxe leswo hi ku hlaya leswaku Yehovha a hi mufumi munene nakone a nga na lizrandzru. Ku nga li khale, Yehovha a ta helisa ku xaniseka hinkwaku ka vhanu a tlhela basisa a vito dzrake. Hi mazritu man’wana, a ta kombisa leswaku ko va yene ntsena lweyi a fumaka hi ndlela leyinene. A ku basisiwa ka vito dzra Yehovha i ntxhumu wa lisima ngopfu swinene.—Matewu 6:9, 10.
VAN’WE VA LI: “Loko hi xaniseka ho dzringiwa hi Xikwembu Nkulukumba.”
Wene u li yini?
NKATSRAKANYU
Sathana Diyavulosi kun’we ni vhanu va ku sungula Adamu na Evha, hi vone va vangiki wubihi a misaveni hinkwayu. Yehovha a ni mhaka na hine loko hi xaniseka, nakone ku nga li khale a ta helisa ku xaniseka hinkwaku.
Mpfuxeto
He wani madzrimi lawa Sathana Diyavulosi a ma byeliki Evha?
Xana wupfukeli bya Adamu na Evha byi hi khumba hi ndlela yini?
Hi swi tivisa kuyini leswaku Yehovha a ni mhaka na hine loko hi xaniseka?
HANDZRISISA
Xana xidoho i yini? Vona ntlhamuxelo lowu pfaka Bibeleni.
Dondzra leswi yengetelekiki mayelanu ni mhaka leyi Sathana Diyavulosi a yi tlakuxiki a xizrambeni xa Edeni.
Twana tinhlamulo leti txhavelelanaka ta xivutiso xa lisima swinene.
Vona leswi wanuna wa kukazri a swi dondzriki mayelanu ni ku xaniseka loku a a ku vona.