XIDONDZRO 42
Xana Bibele Dzri Li Yini Hi Ku Txhata Ni Ku Tsrhama U Nga Txhatanga?
A mimbangwini yimbeni, vhanu va kholwa leswaku mhunu a nge nyonxi na a nga txhatanga. Nambitanu, a hi hinkwavu lava txhatiki va nyonxiki, nakone a hi hinkwavu lava kalaka va nga txhatanga va nga nyonxangakiki. Ku hlaya ntiyiso, Bibele dzri li ku txhata ni ku tsrhama u nga txhatanga, hinkwaswu i swinene ka Yehovha.
1. He wani mabindzru ya ku tsrhama u nga txhatanga?
A Bibele dzri li: “Ni lweyi a txhataka a yentxa swone, kambe lweyi a tsrhamaka na a nga txhatanga, a yentxa swone hi ku tlulisa.” (Dondzra 1 Ba-le-Korinte 7:32, 33, 38, TNM.) Xana lweyi a kalaka a nga txhatanga a nga “yentxa swone hi ku tlulisa” hi tindlela tini? Vakriste lava kalaka va nga txhatanga a va vileli ku hlayisa vakatavu. Hi ndlela leyo, va ni ntsrhunxeko lowu yengetelekiki. Hi xikombiso, vambeni va kota ku yengesela ntizro wavu wa nsimu hi ndlela ya ku nyonxisa swinene, ya ku fana ni ku zruzrela a mbangwini wumbeni leswaku va ya zrezra madzrungula lamanene. A henhleni ka hinkwaswu, va nga kota ku heta nkama wunyingi na va kulisa wuxaka byavu na Yehovha.
2. He wani mabindzru ya ku tekana hi nawu?
Ku nghenela wukati swi ni mabindzru ya swone, ku fana ni leswi kuva ngwendza swi nga ni mabindzru ya swone. A Bibele dzri li ‘vabidzri va tlula mun’we’. (Eklesiasta 4:9) Vakriste lava tizrisaka minsinya ya milawu ya Bibele a wukatini byavu hi vone va pfunekaka ngopfu a mhakeni leyi. Wanuna ni wansati lava tekanaka hi nawu va funga ku zrandzranana, ku kombisana xitxhavu ni ku hlayisana. Xileswo va twa wukati byavu na byi tiyile ku tlula lava vo ko hanya xikan’we ntsena. Ntlhantakubidzri, mutxhatu wu yentxa leswaku a vana va kulela mbangwini lowu sizrelelekiki.
3. Xana Yehovha a byi vonisa kuyini wukati?
Loko Yehovha a simeka wukati, a te: ‘Wanuna a ta siya tatana wakwe ni mamana wakwe, a ta namazrela nsatini wakwe.’ (Genesis 2:24) Yehovha a djula leswaku nuna ni nsati va zrandzranana va tlhela va hanya xikan’we wutomi byavu hinkwabyu. Awa pfumela leswaku wukati byi dlayiwa loko ku va ni wumbuye. Ka swiyimu leswo, Yehovha a nyika lweyi a doheliwiki mfanelo ya ku hlawula ku dlaya wukati kumbe im-him.a (Matewu 19:9) Yehovha a nga va pfumeleli vakriste ku tekana ni vhanu vabidzri kumbe ku tlula.—1 Timoteo 3:2.
KELISISA
Tiva leswi u nga swi yentxaka akuva u nyonxa u tlhela u nyonxisa Yehovha, nambi u txhatile kumbe u nga txhatanga.
4. Yi tizrise ha hombe nyiko ya ku tsrhama u nga txhatanga
Yesu a a vona ku tsrhama u nga txhatanga na ku li nyiko. (Matewu 19:11, 12) Dondzrani Matewu 4:23, mi gama mi bulisana hi xivutiso lexi:
Xana Yesu a yi tizrisise kuyini nyiko ya ku tsrhama na a nga txhatanga akuva a tizrela Papayi wake ni ku pfuna vambeni?
Vakriste va nga tikholisa hi ku tizrisa wunghwendzra byavu, ku fana na Yesu. Vonani VHIDIYU, mi gama mi bulisana hi swivutiso leswi landzrelaka.
Xana vakriste va nga pfuneka hi loko va tizrisa wunghwendzra byavu hi tindlela tini?
A wu swi tiva?
Bibele a dzri vulavuli hi ntanga leyi mhunu a fanelaka ku txhata ha yone. Nambitanu, dzri kutxa mhunu ku yimela ku txhata ‘loko a khaluteliwe hi nkama wa vumpshwa byakwe’, ku nga nkama lowu a ntamu wa ku navela ka timhaka ta tinku-ku wu nga yentxaka mumpshwa a teka xiboho hi magugu.—1 Ba-le-Korinte 7:36.
5. Hlawula lweyi u djulaka ku txhata na yene hi wutlhazri
Ku hlawula mhunu lweyi u taka txhata naye i xin’wana xa swiboho swa lisima swinene leswi u taka swi yentxa a wuton’wini. Dondzrani Matewu 19:4-6, 9, mi gama mi bulisana hi xivutiso lexi:
Ha yini mukriste a nga fanelanga ku gigisekela ku txhata?
Bibele dzri nga ku pfuna ku tiva leswi u fanelaka ku swi kambisisa loko u djula nuna kumbe nsati. Ku tlula hinkwaswu, djula nuna kumbe nsati lweyi a zrandzraka Yehovha.b Dondzrani 1 Ba-le-Korinte 7:39 na 2 Ba-le-Korinte 6:14, mi gama mi bulisana hi swivutiso leswi:
Ha yini hi fanela ku txhata ntsena ni mukristekulozri?
U vona leswaku Yehovha a nga titwisa kuyini loko ho txhata ni mhunu lweyi a nga mu zrandzrikiki?
Loko swihazri swibidzri leswi hambaniki swinene swi kangiwa xikan’we, swi ta xaniseka. Hi ku fanana, mukriste lweyi a tekanaka ni lweyi a nga zrandziriki Yehovha a ta va ni swikazratu swinyingi
6. Vona wukati hi ndlela leyi Yehovha a byi vonaka ha yone
A Israyeleni wa khale, vanuna vambeni a va tsrhika vasati vavu hi swivangelo leswi nga twalikiki. Dondzrani Malaki 2:13, 14, 16, mi gama mi bulisana hi xivutiso lexi:
Ha yini Yehovha a hambula ku dlaya wukati loku nga seketeliwangakiki Bibeleni?
Wumbuye ni ku dlaya wukati swi hlomula mbilu ya lweyi a doheliwiki ni ya vatsrongwana
Vonani VHIDIYU, mi gama mi bulisana hi xivutiso lexi landzrelaka.
Loko u tekane ni mhunu lweyi a nga mu zrandzrikiki Yehovha, u nga yentxa yini leswaku wukati byenu byi nyonxisa?
7. Yingiseta milawu ya Yehovha mayelanu ni wukati
Swi nga ha djula kuva mhunu a tikazrata swinene leswaku a tizrisa milawu ya Yehovha mayelanu ni wukati.c Kambe Yehovha awa va tovokisa lava yentxaka tanu. Vonani VHIDIYU.
Dondzrani Ba-Heberu 13:4, mi gama mi bulisana hi swivutiso leswi:
U swi vonisa kuyini, xana swa koteka ku landzra milawu ya Yehovha mayelanu ni wukati? Ha yini?
Yehovha a langusele leswaku vakriste va txhata kumbe ku dlaya wukati hi nawu, swanga hi leswi i nga nawu wa mfumu a matikweni manyingi. Dondzrani Tito 3:1, mi gama mi bulisana hi xivutiso lexi:
Xana u txhatile? Loko u txhatile, u wu tsralisile hi ku ya hi nawu wa mfumu?
LOKO MHUNU A KU VUTISA LESWI: “Ha yini ni fanela ku tsralisa mutxhatu? Xana wanuna ni wansati va nge tekani va tsrhama xikan’we na va nga tsralisanga muxhatu?”
U nga hlamulisa kuyini?
NKATSRAKANYU
Ku txhata ni kuva u nga txhati, i nyiko ya Yehovha. Swiyimu ha swibidzri swi nga yentxa mhunu a nyonxa loko a landzra milawu ya Yehovha.
Mpfuxeto
Xana mhunu a nga xi tizrisisa kuyini hi ndlela leyinene xiyimu xake xa kuva a nga txhatanga?
Ha yini Bibele dzri ku u fanela ku txhata ntsena ni mukristekuloni?
Hi ku ya hi Bibele, he xini xivangelo xin’we ntsena xa ku dlaya wukati?
HANDZRISISA
Swi hlaya yini ku txhata “ntsena . . . Hosini”?
“Swivutiso Swa Vadondzri” (Xihondzro Xa Ku Zrindzra, 1 ka Julhu wa 2004)
Hlalela mavhidiyu mabidzri ya ku goma lawa ma nga ku pfunaka ku teka swiboho leswinene mayelanu ni ku gangisana ni mutxhatu.
Gungula leswaku ha yini makwezru wa kukazri wa xinuna a vona leswaku leswi Yehovha a mu nyikiki swone swi ni lisima dzrikulu ku tlula yini na yini leswi a swi tsrhikiki.
I mintxhumu muni leyi lweyi a djulaka ku dlaya wukati kumbe ku tsravukana a fanelaka ku zranga a pimisa ha yone?
“Hlonipha Leswi Tlhanganisiwiki Ha Nkulukumba” (Xihondzro Xa Ku Zrindzra, Dezembru wa 2018)
a Vona Dondzra Swin’wana 4 mayelanu ni ku tsravukana na ku nga vanga na wumbuye.
b A mimbangwini yimbeni, a vapswele hi vone va hlawulelaka vanavu nuna kumbe nsati. Loko kwaku swi li tanu, vapswele lava nga ni lizrandzru va nge ti zrangisa mali kumbe ndhuma ya nsati kumbe nuna lweyi va ku hlawulelaka yene, kambe va ta kambisisa leswaku awa mu zrandzra Yehovha kumbe im-him.
c Loko ku li leswaku u hanya ni mhunu lweyi mi kalaka mi nga tsralisanga mutxhatu, i xiboho xenu ku tsrhikana kumbe ku tsralisa.