XIDONDZRO 47
Xana U Lulamele Ku Babatisiwa?
A ndzreni ka xidondzro xaku xa Bibele, u dondzre swinyingi mayelanu na Yehovha. Kumbexana u tlhele u tizrisa leswi u swi dondzriki akuva u txintxa swa kukazri a wuton’wini byaku. Kambe, swi nga ha yentxeka ku ni swa kukazri swi ku sivelaka ku tinyiketela ka Yehovha ni ku babatisiwa. Xidondzro lexi xi ta vulavula hi swin’wana swa swikazratu leswi talisaka ku sivela vhanu ku babatisiwa ni ndlela leyi u nga swi hlulaka ha yone.
1. Xana u fanela ku va ni wutivi bya ku tlhasa kwini na u nga si na babatisiwa?
Akuva u babatisiwa, u fanela ku ‘tlhasa ku tiveni ka xihlayelamfuzri’. (1 Timoteo 2:4) Leswi a swi djuli ku hlaya swone leswaku na u nga si na babatisiwa u fanela ku tiva tinhlamulo ta swivutiso hinkwaswu swa Bibele. Nambi vakriste lava ku nga khale na va babatisiwile, va ha ya mahlweni va dondzra. (Ba-le-Kolosa 1:9, 10) Kambe swi djula kuva u twisisa tindondzro ta masungulo ta Bibele. Vakulu va bandla va ta ku pfuna ku tikambela kumbe u ni wutivi lebyi yanelaka.
2. Xana i yini leswi u fanelaka ku swi yentxa na u nga si na babatisiwa?
Na u nga si na babatisiwa, u fanela ku ‘tisola u ndzruluka’. (Dondzra AmintirBo 3:19.) Leswi swi hlaya leswaku u fanela ku tisola na swi sukela mbilwini hi kola ka swidoho leswi u samiki u swi yentxa u tlhela u kombela Yehovha a ku dzrivalela. U fanela ku tiyimisela hi mbilu hinkwayu ku tsrhika mahanyela ya ku biha u tlhela u tiyimisela ku hanya hi ndlela leyi nyonxisaka Xikwembu Nkulukumba. Ku yengesela ka leswo, u fanela ku sungula ku hlalela mintlhanganu u tlhela u zrezra ni bandla swanga muzrezri lweyi a nga siki na babatisiwa.
3. Ha yini u nga fanelanga u pfumelela ku txhava ku ku sivela?
Van’we va txhava leswaku va nge ti swi kota ku yentxa leswi va dumbisiki Yehovha. I ntiyiso leswaku u ta pfana u yentxa swihoxo. Nambi va-vanuna ni vavasati va ku dumbeka lava tsraliwiki a Bibeleni va swi yentxile. Kambe Yehovha a nga yimelanga leswaku malandzra yake ma va lama hetisekiki. (Dondzra Amapsalma 103:13, 14.) Awa nyonxa loko u yentxa leswi u nga swi kotaka! A ta ku pfuna. Ku hlaya ntiyiso, Yehovha a hi dumbisa leswaku ‘a ku na xa ntxhumu lexi taka kota ku hi tsravukanisa ni lizrandzru [dzrake]’.—Dondzra Ba-le-Roma 8:38, 39.
KELISISA
Vona leswaku u nga xi hlulisa kuyini xihinga xini na xini lexi nga ku sivelaka ku babatisiwa hi ku tiva Yehovha ku yampswa u tlhela u pfumela mpfunu wake.
4. Tiva Yehovha ku yampswa
Xana u fanela ku mu tiva ku tlhasela kwini Yehovha na u nga si na babatisiwa? U fanela ku mu tiva ku yampswa akuva u ta mu zrandzra u tlhela u djula ku mu nyonxisa. Vonani VHIDIYU akuva mi vona leswi lava dondzreliwaka Bibele a misaveni hinkwayu va swi yentxisaka xiswone leswo. Ntsrhaku, bulisananani hi xivutiso lexi landzrelaka.
Ka vhidiyu, xana van’we va pfuniwe ha yini akuva va lulamela ku babatisiwa?
Dondzrani Ba-le-Roma 12:2, mi gama mi bulisana hi swivutiso leswi:
Xana u ni ku ganaganeka ka kukazri mayelanu ni leswi Bibele dzri swi dondzrisaka kumbe wa ganaganeka leswaku Timboni ta Yehovha ti dondzrisa ntiyiso?
Loko swi li tanu, u nga yentxa yini?
5. Hlula swihinga leswi nga ku sivelaka ku babatisiwa
Loko hi hlawula ku tinyiketela ka Yehovha hi va hi babatisiwa, hinkwezru hi kumana ni swikazratu. Akuva u vona xin’we xa swikombiso, vonani VHIDIYU, mi gama mi bulisana hi swivutiso leswi landzrelaka.
Ka vhidiyu, he swini swikazratu leswi Narangerel swi djuliki a swi hlula akuva a tizrela Yehovha?
Ku zrandzra Yehovha swi mu pfunise kuyini ku hlula swikazratu swake?
Dondzrani Amaproverbia 29:25 na 2 Timoteo 1:7, mi gama mi bulisana hi xivutiso lexi:
I yini xi hi nyikaka xixixi xa ku hlula swikazratu?
6. Dumba mpfunu wa Yehovha
Yehovha a ta ku pfuna akuva u mu nyonxisa. Vonani VHIDIYU, mi gama mi bulisana hi swivutiso leswi landzrelaka.
Ka vhidiyu, i yini a xi yentxa xidondzro xa Bibele xi txhava ku babatisiwa?
I yini a swi dondzriki leswi mu pfuniki ku tiyisa dumbo dzrake ka Yehovha?
Dondzrani Ezaya 41:10, 13, mi gama mi bulisana hi xivutiso lexi:
Ha yini u nga dumbaka leswaku u nga swi kota ku hetisisa leswi u swi dumbisaka loko u tinyiketela?
7. Tama u tlangela lizrandzru ledzri Yehovha a ku kombaka dzrone
Loko u ya u yanakanya hi ndlela leyi Yehovha a ku zrandzraka ha yone, u ta ya u mu tlangela u tlhela u navela ku mu tizrela hi la ku nga helikiki. Dondzrani Amapsalma 40:5, mi gama mi bulisana hi xivutiso lexi:
He wani matovoko ya Yehovha lawa u ma tlangelaka ngopfu?
Muprofeta Yeremiya a a zrandzra Yehovha ni Zritu dzrake, nakone a a dzri tlangela ngopfu tovoko dzra ku tizrela Yehovha. A te: ‘A mazritu yaku ma vi ku mine ku nyonxa ni ku tsrhava ka mbilu yanga; hikusa dzri txhuliwi hi vito dzraku, we Yehovha, Xikwembu Nkulukumba.’ (Yeremiya 15:16) Hlamula swivutiso leswi:
Ha yini ku li ndjombo ya ku hlawuleka ku va mun’we wa Timboni ta Yehovha?
Xana wa swi djula ku babatisiwa swanga mun’we wa Timboni ta Yehovha?
A nga va leswaku ku ni lexi ku sivelaka ku yentxa leswo?
U yanakanya leswaku u fanela ku yentxa yini akuva u tlhasela kungu dzra ku babatisiwa?
VAN’WE VA LI: “Ni txhava leswaku ni nga ti swi kota ku yentxa hinkwaswu leswi ni taka swi dumbisa loko no babatisiwa.”
Xana u titwisa xileswo?
NKATSRAKANYU
Hi ku pfuniwa ha Yehovha, u nga hlula xihinga xini na xini lexi ku sivelaka ku babatisiwa.
Mpfuxeto
Xana u fanela ku va ni wutivi bya ku tlhasela kwini hi Bibele akuva u babatisiwa?
He kwini ku txintxa loku swi nga ha djulaka u ku yentxa na u nga si na babatisiwa?
Ha yini u nga fanelanga ku pfumelela ku txhava ku ku sivela?
HANDZRISISA
Kambisisa leswaku xiboho xaku xa ku djula ku babatisiwa xi seketeliwe kwini.
“Xana U Lulamele Ku Babatisiwa?” (Xihondzro Xa Ku Zrindzra, Marsu wa 2020)
Vona leswaku u nga swi hlulisa kuyini swihinga swa kukazri leswi ku sivelaka ku babatisiwa.
“I Yini Xi Ni Sivelaka Ku Babatisiwa?” (Xihondzro Xa Ku Zrindzra, Marsu wa 2019)
Vona leswaku wanuna wa kukazri a swi hlulise kuyini swin’we swa swihinga leswikulu akuva a tlhasela ku babatisiwa.
A ku sunguleni, wanuna lwa vitaniwaka Ataa, a a ganaganeka ku babatisiwa. Vona leswaku i yini xi nga mu yentxa a za a teka xiboho lexi xa lisima.