XIDONDZRO 53
Hlawula Swihungatiso Leswi Nyonxisaka Yehovha
Yehovha i “Xikwembu Nkulukumba lwa tsrhaviki”. (1 Timoteo 1:11, Tradução do Novo Mundo, TNM) A djula hi nyonxa hi tlhela hi tikholisa hi wutomi. Awa nyonxa loko hi tizra na hi tisiyela nkama wa ku wisa. Ka xidondzro lexi, hi ta vona leswaku hi nga wu tizrisa hi ndlela yini nkama wa ku hungata hi ndlela leyi yi hi nyonxisaka ni leyi nyonxisaka na Yehovha.
1. Xana hi fanela ku pimisa ha yini loko hi hlawula xihungatiso?
U zrandzra ku yentxa yini hi nkama wa ku wisa? Van’we va zrandzra ku titsrhamela kaya lomu ku zruliki va tidondzrela buku, va yingisetela wunanga, va hlalela filme, kumbe va valanga internet. Nakasi vambeni va zrandzra ku yentxa swa kukazri ni vanghanu, va famba hi mabisikleta, va hlambeta kumbe va tha gemi dzra kukazri. Nambi hi hlawula ku hungata hi yini, hi fanela ku tiyiseka hi ‘leswi tsrhavisaka Hosi’. (Ba-le-Efesa 5:10) I swa lisima kuva hi twisisa mhaka leyi hikusa swihungatiso swinyingi leswi tolovelekiki swi yelana ni mintxhumu leyi Yehovha a yi hambulaka, ya ku fana ni wugevenga, swiyentxo swa tingana hi tlhelo dzra tinkuku kumbe wungoma. (Dondzra Amapsalma 11:5.) I yini xi taka hi pfuna ku hlawula swihungatiso hi wutlhazri?
Loko hi hlawula vanghanu lava zrandzraka Yehovha, va ta hi susumetela ka leswinene va tlhela va hi pfuna ku hlawula swihungatiso leswinene. Hi lani hi dondzriki ha kone ka ndzrima yimbeni leyi khalutiki, ‘lwa fambaka ni tintlhazri a ta tlhazriha’. Hi tlhelo dzrimbeni, loko hi ni xihena xa ku heta nkama ni vhanu lava nga yi zrandzrikiki milawu ya Xikwembu Nkulukumba, hi ta “honeka”.—Amaproverbia 13:20.
2. Ha yini swi ni lisima ku pimela nkama lowu hi wu hetaka a ku hungateni?
Nambiloko hi hungata hi mintxhumu leyi basiki, hi fanela ku tivonela ku da nkama wunyingi a ku hungateni. Loko hi ngo yentxa leswo, hi ta pfumala nkama wa ku yentxa mintxhumu ya lisima dzrikulu. Bibele dzri hi kutxa ku tiva ku ‘tamelisisa nkama’ wezru.—Dondzra Ba-le-Efesa 5:15, 16.
KELISISA
Dondzra leswaku u nga tekisa kuyini swiboho leswinene loko u hlawula swihungatiso.
3. Tingawula swihungatiso swa ku biha
Ha yini hi fanela ku hlawula swihungatiso swezru hi wunyaminyami? Vonani VHIDIYU, mi gama mi bulisana hi swivutiso leswi landzrelaka.
Xana swihungatiso swa le khale ka Roma swi fanisa kuyini ni swimbeni swa masikwana lawa?
Ka vhidiyu, xana Danny a dondzre yini mayelanu ni swihungatiso?
Dondzrani Ba-le-Roma 12:9, mi gama mi bulisana hi xivutiso lexi landzrelaka:
Xana ndzrimana leyi yi nga ku pfunisa kuyini ku hlawula swihungatiso leswinene?
He yini mintxhumu yimbeni leyi Yehovha a yi vengaka? Dondzrani Amaproverbia 6:16, 17 ni Ba-le-Galatia 5:19-21. Ntsrhaku ka ku dondzra tsralwa ha dzrin’we, bulani hi xivutiso lexi landzrelaka:
Ka mintxhumu leyi boxiwiki ka tindzrimana leti, he yini leyi tolovelekiki ka swihungatiso swa masikwana lawa?
Swivutiso leswi nga ku pfunaka ku hlawula swihungatiso swaku hi wutlhazri
Tivutise leswi:
Ni yentxa yini? Xana xihungatiso lexi xi ni ntxhumu lowu Yehovha a wu vengaka?
Loko swi te yini? Xana xi ni yivela nkama wa mintxhumu ya lisima?
Na mani? Xana xi ni tlhanganisa ni vhanu lava nga mu zrandzrikiki Yehovha?
A swi ta va swinene ku fambela kule hi lani u nga kotaka ha kone ni nghozi. Kutani hi leswi swi hi yentxaka hi fambela kule ni swihungatiso swin’wana ni swin’wana leswi hi swi vonaka swi nga li swinene
4. Tizrisa nkama waku hi wutlhazri
Vonani VHIDIYU, mi gama mi bulisana hi xivutiso lexi landzrelaka.
Nambileswi makwezru lweyi a kombisiwiki ka vhidiyu a a nga li ku hlaleleni ka mintxhumu leyi bihiki, xana ndlela leyi a a tizrisa nkama wa ku tihungata ha yone a yi mu khumbisa kuyini?
Dondzrani Ba-le-Filipi 1:10, mi gama mi bulisana hi xivutiso lexi landzrelaka:
Xana ndzrimana leyi yi nga hi pfunisa kuyini ku pimela nkama lowu hi wu hetaka a ku hungateni?
5. Hlawula swihungatiso leswi basiki
Nambileswi swihungatiso swimbeni swi nyenyentsaka ka Yehovha, ku ni mintxhumu yinyingi ya ku nyonxisa leyi nga mu khunguvanyisiki. Dondzrani Eklesiasta 8:15 ni Ba-le-Filipi 4:8, mi gama mi bulisana hi xivutiso lexi landzrelaka:
U zrandzra ku hungata hi mintxhumu muni leyi basiki?
U nga swi kota ku hlawula swihungatiso leswinene u tlhela u tikholisa ha swone
VAN’WE VA LI: “A ku na xa ku biha hi swihungatiso leswi nga ni swibakela, swiyentxo swa tingana hi tlhelo dzra tinkuku kumbe wudemona, a xikulu i kuva ni nga swi yentxi.”
U nga ku yini?
NKATSRAKANYU
Yehovha a djula hi hlawula swihungatiso leswinene hi tlhela hi tikholisa ha swone.
Mpfuxeto
Xana vakriste va fanela ku bakanya swihungatiso muni?
Ha yini hi fanela ku tivonela ka nkama lowu hi wu hetaka na hi hungata?
Ha yini u djula ku hlawula swihungatiso leswi nyonxisaka Yehovha?
HANDZRISISA
Kambisisa leswaku i mani a nga ni wutiyanguleli bya ku hi hlawulela swihungatiso.
Vona ndlela ya ku teka swiboho leswinene a mhakeni ya swihungatiso.
“Xana Swihungatiso Swaku Swa Pfuna?” (Xihondzro Xa Ku Zrindzra, 15 ka Otubru wa 2011)
Ka mfambu lowu liki “Ni Kote Ni Ku Hlula Moya Wa Xihlawuhlawu” vona leswi susumeteliki wanuna wa kukazri ku txintxa swihungatiso swake.
“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Fevhereru wa 2010)
Vona leswi mamana wa kukazri a tekisaka xiswone xiboho xa wutlhazri mayelanu ni swihungatiso leswi nga ni wungoma.