Matizrisela Ya Swikombiso Swa Ku Bula Hi Bibele

Ku sukela hi Janeru wa 2018, a swikombiso swa ku bula hi Bibele swi sungule ku kumeka ka kapa dzra Xibukwana Xa Ntlhanganu Wa Wutomi Ni Wutizreli Byezru Bya Wukriste. Hi nga swi tizrisisa kuyini?

Loko U Hetisisa Xiyavelo Xaku: U fanela ku tizrisa xivutiso, tsralwa, u gama u siya xivutiso lexi nga ka kapa dzra xibukwana xa ntlhanganu. Nambitasu a swi hlayi swone swaku u fanela ku xikolekole u tizrisa mazritu lama nga ka vídeo. U nga ha tizrisa xingheniso, kumbe mayandlalela ya mhaka ya ku hambana ni lama kombisiwiki. U nga tlhela u nyikela dzrin’we dzra mabuku lama hambaka xiyenge ka Switizro Swezru Swa Ku Dondzrisa Haswone, nambiloko swi nga hlayiwanga ka xiyenge xaku.

Loko U Li Nsin’wini: A swikombiso swa ku bula hi Bibele swi hambeliwe ku hi pfuna ntizrweni wa ku zrezra. Loko mhunu a nyonxela dzrungula dzrezru nakone a djula ku tiva leswi yengetelekiki u nga tama u bula nayene. Leswo u nga swi yentxa hi ku tizrisa xivutiso xa ku hamba mpinda. Swikombiso leswo u nga ha swi txintxanyana kumbe u vhela u swi tixntxa hi ku helela. Xana mhaka ya wheti leyi khalutiki kumbe tsralwa dzrimbeni dzri nga pfuna ka vhanu va ka nsimu yaku? Xana vhanu va ka nsimu yaku va nyonxela ngopfu ku bula hi leswa ha ka ku yentxeka kumbe leswi kutani swi yentxekiki? U nga ha hlawula leswi nga tizraka nsin’wini yaku, kambe nkongometo waku wu fanela ku va ku ‘yentxa leswo hi nkonta ya evhangeli, akuva u ta va ni ku yaveliwa swa dzrone’.​—1Ko 9:22, 23.