Hi Nga Pfunisa Hi Ndlela Yini Ntsrhaku Ka Loko Ku Humelele Mhangu?

A masikwini lawa hi hanyaka ka wone, a timhangu ta ntumbuluku ti ya ti pfisa. Loko ku humelela mhangu ya ntumbuluku, ku fanela ku nyikeliwa mpfuno hi ku kahlula ni hi ndlela leyi hlelekiki. Akuva leswo swi koteka Huvo Leyi Zrangelaka yi hambe malulamiselo ya kuva ku va ni Ndzrawulo Ya Ku Pfuna Lava Weliwiki Hi Timhangu ka zrwavi dzrin’wana ni dzrin’wana.

Loko vamakwezru va ndzrawulo leyi va twa leswaku ku humelele mhangu, hi ku kahlula va bulisana ni vakulu va mbangu lowo akuva va tiva leswaku xana ku ni vamakwezru lava vilelaka mpfunu. Loko leswi honekiki swi li swikulu lakakuva vamakwezru va nga swi koti ku tilulamisela hi wuswavu, lanu ke a zrwavi dzri hlawula vamakwezru lava fanelekaka akuva va zrangela ntizro lowo. Vamakwezru lavo, va nga ha kombela vamakwezru lava swi navelaka akuva va ya pfunisa kumbe ku hanana hi mintxhumu ya kukazri leyi kongomiki, kumbe ku xava ni ku zrumela leswi vilelekaka a mbangwini lowo.

Mayentxela lawa ma pfuna ngopfu kuva ntizro wu hleleka, ku nga vi na mpfilumpfilu, hi nga luzi mali ni switizro, ku nga leswi tolovelaka ku yentxeka loko vamakwezru va tihambela hi wuswavu na va nga hlelanga.

Vamakwezru lava hlawuliwiki hi zrwavi, hi vone va nga ha hlayaka leswaku i mali muni ni leswaku ku vileleka vatizri vangani ku ya pfunisa lomu ku humeleliki mhangu. Va nga ha bulisana ni wuhosi bya mbangu lowo, akuva byi hi pfuna ku hamba ntizro lowo hi ku kahlula. Xileswo, a u fanelanga u teka xiboho xa ku hlengisela vhanu mali, ku zrumela xipfunu xa swakuda kumbe swin’wana nambi hi ku zruzrela ka mbangu lowu ku humeleliki mhangu na u nga kombeliwanga ku yentxa leswo.

Nambitanu, loko ku humelela mhangu hi djula ku ya pfunisa. (Hb 13:16) Ha va zrandzra vamakwezru! Hi nga yentxa yini? Xa lisima ngopfu, hi nga khongotelela vamakwezru lava weliwiki hi timhangu kun’we ni lava va va pfunaka. Hi nga tlhela hi nyikela swihanano ka ntizro wa misava hinkwayu. Hi ku kongomisiwa hi Huvo Leyi Zrangelaka, a mazrwavi ma swi kota ku yi tizrisa ha hombe mali lomu ku nga ni xivileleko lexikulu ngopfu. Nakone loko hi djula ku tinyikela akuva hi ya pfunisa, hi nga ha tsrala petisawu dzra Mutizri Wa Ku Tizrandzrela Wa Ku Dezenyara Ni Ku Yaka (DC-50).

HLALELANI VHIDIYU LEDZRI LIKI NDHAMBHI LEYIKULU LEYI HONETELIKI A BRAZIL, MI GAMA MI HLAMULA XIVUTISO LEXI LANDZRELAKA:

I yini lexi ku nyonxisiki ka ntizro lowu Timboni Ta Yehovha ti wu yentxiki a Brazil ntsrhaku ka ndhambhi leyikulu hi 2020?