Leswi Yesu A Swi Hlayiki Mayelanu Ni Nkama Wa Ku Hela Ka Misava

YANAKANYA HI TIMHAKA TIBIDZRI LETI YESU A TI HLAYIKI MAYELANU NI WUGAMU:

“Kutani tsrhamani na mi zrindzrile, hikusa a mi dzri tivi siku nambi nkama wa kone.”—MATEWU 25:13.

‘Lavisani, n’wi hiteka, n’wi khongota, hikusa a n’wi tivi leswaku nkama wu ta va wini.’—MARKA 13:33.

Xileswo, a ku na mhunu lani misaveni a tivaka hi ku kongoma leswaku a wugamu bya misava leyi byi ta tlhasa siku muni. Nambitanu, Xikwembu Nkulukumba a beke “siku” ni “nkama wa kone” hi ku kongoma—akuva wugamu byi tlhasa. (Matewu 24:36) Xana leswo swi hlaya leswaku a ku na ndlela ya ku tiva leswaku a wugamu byi kusuhi? Nikatsrongo. Yesu a byele vadondzrisiwa vake akuva va xiyisisa mintxhumu leyi a yi ta komba leswaku a wugamu byi kusuhi.

XIKOMBISO

Mintxhumu leyi a yi ta yentxeka a yi ta va xikombiso xa “ku hela ka xiyimu lexi xa misava”. Yesu a te: “A tiko dzri ta lwisana ni tiko dzrimbeni, ni mfumu wu ta lwisana ni mfumu wumbeni, ku ta pfumaleka swakuda, nakone ku ta va ni ku tsrekatsreka ka misava a mimbangwini ya ku siyanasiyana.” (Matewu 24:3, 7) A tlhele a hlaya leswaku a ku ta va ni “mintungu”—ku nga mavabyi lama tlulelanaka hi ku kahlula. (Luka 21:11) Wa swi vona leswaku leswi Yesu a swi profetiki swa yentxeka?

Namunhla wa siku, vhanu vanyingi va xaniseka hi kola ka tiyimpi leti txhavisaka, tindlala, ku tsrekatsreka ka misava ni mavabyi lama dlayaka. Hi xikombiso, hi 2004, ku tsrekatsreka lokukulu ka misava a Oceano Índico, ku vange tsunami ledzri dlayiki kusuhi ni 225.000 wa vhanu. Ndzreni ka lembe ni ku tlulanyana, a ntungu wa COVID-19 wu dlaye kolomu ka  2.600.000 wa vhanu a misaveni hinkwayu. Yesu a te mintxhumu ya ku fana ni leyi a yi ta komba leswaku a wugamu bya misava leyi byi kusuhi.

“MASIKU YA WUGAMU”

Bibele dzri hlaye leswaku na ku hela ka xiyimu lexi xa misava ku nga si na tlhasa, a hi ta hanya ka nkama lowu vitaniwaka ‘masiku ya wugamu’. (2 Petros 3:3, 4) Hi ku ya hi 2 Timoteo 3:1-5, masiku ya wugamu a ma ta tikomba hi ku hohloka ka mahanyela. (Vona bokisi ledzri liki “Kusuhi ni ku hela ka xiyimu xa misava.”) Xana namunhla wa va vona vhanu lava kombisaka moya wa ku tiyanakanyela, magolo, ku leva ni livengo? Leswi na swone swi komba leswaku hi hanya kusuhi swinene ni ku hela ka misava.

Xana masiku ya wugamu ma ta va ni kama wa ku gama kwini? Hi ku ya hi Bibele, i ‘nkama wutsrongo ntsena’. Hi wugamu, Xikwembu Nkulukumba a ta ‘helisa lava va helisaka misava’.—Apfuletelo 11:15-18; 12:12.

MISAVA LEYI NGA PARADEYISI YI KUSUHI!

Xikwembu Nkulukumba kutani a bekise siku ni nkama wa kuva a helisa xiyimu lexi xa misava xa ku biha. (Matewu 24:36) Kambe ka ha ni madzrungula mambeni lamanene! Xikwembu Nkulukumba “a nga naveli leswaku ni mun’we a helisiwa”. (2 Petros 3:9, Tradução do Novo Mundo) Xileswo, a nyika vhanu a mukhandlu wa kuva va hanya hi ku landzra milawu yake. Ha yini? Hikusa a djula leswaku hinkwezru hi huluka loko misava leyi yi helisiwa, hi va hi hanya ka misava leyimpswha loko yi ndzrulutiwe paradeyisi.

A misaveni hinkwayu, Xikwembu Nkulukumba a pfuna vhanu kuva va dondzra ndlela ya ku hanya ka misava leyimpswha hansi ka Mfumu wake. Yesu a te: “Madzrungula lamanene ya Mfumu ma ta zrezriwa a misaveni hinkwayu.” (Matewu 24:14) Hi 2019, a misaveni hinkwayu, Timboni ta Yehovha ti hete ku tlula 2.000.000.000 wa mawora na ti zrezra ni ku dondzrisa vhanu dzrungula dzra Bibele ledzri nyikanaka dumbo. Yesu a te ntizro lowo wa ku zrezra a wu ta yentxiwa a misaveni hinkwayu na wugamu bya misava byi nga si na tlhasa.

Mimfumu ya vhanu yi saleliwe hi nkama wutsrongo. Kambe hi leyi ndzrava ya ku nyonxisa: U nga huluka loko misava leyi yi helisiwa u va u hanya ka misava leyi nga paradeyisi, leyi Xikwembu Nkulukumba a yi dumbisiki. Nhlokomhaka leyi landzrelaka yi ta ku pfuna ku vona leswaku u nga yentxa yini akuva u hanya ka misava leyimpswha.