Swivutiso Swa Vadondzri

Xana Pawulo a a djula ku hlaya swa ku yini loko a ku: ‘Hi nawu ndzri fili ku nawu?’​—Ga 2:19.

Pawulo a tsrale leswi: ‘Hi nawu ndzri file ku nawu, akuva ndzri hanya ku Xikwembu Nkulukumba.’​—Ga 2:19.

Leswi Pawulo a swi tsraliki a swi fambisana ni leswi a a swi tlhamuxela mabandla ya le Galatiya. Vakriste van’wana a va kutxeteliwa hi vadondzrisi va madzrimi. Vavanuna volavu a va dondzrisa leswaku akuva mhunu a huluka a a fanela ku landzra nawu wa Moxe, ngopfungopfu a mhakeni ya ku soka. Kambe Pawulo a a swi tiva leswaku ka Xikwembu Nkulukumba a swi nga ha sindzrisi kuva vakriste va soka akuva va yamukeleka ka Xikwembu Nkulukumba. Hi ndlela leyi kholwisaka, Pawulo a beke a livaleni tindondzro ta madzrimi a tlhela a tiyisa lipfumelo dzra vamakwavu ka gandzrelo dzra Yesu Kriste.​—Ga 2:4; 5:2.

A Bibele dzri swi beka a livaleni leswaku mhunu lweyi a fiki a nga tivi ntxhumu, nakone mintxhumu leyi yentxekaka a yi mu kutxeteli. (Ekl 9:5) Loko Pawulo a hlaye leswaku: ‘Mine hi nawu ndzri file’, a a djula ku hlaya leswaku a a nga ha landzreleli nawu wa Moxe. Hi ntiyiso wa kone, Pawulo a a tiyiseka leswaku lipfumelo dzrakwe ka xitizrulo hi dzrone a dzri mu yentxa leswaku a hanya ka Xikwembu Nkulukumba.

Ku txintxa ka xiyimu xa Pawulo, ku yentxeke hi kola ka nawu. Hi ndlela yini? Na a nga si na hlaya mazritu lawa, Pawulo a a tlhamuxele leswaku ‘a mhunu a nga hlayiwi mululami hi mintizro ya nawu ka ku va hi ku pfumela ku Kriste Yesu’. (Ga 2:16) I ntiyiso leswaku a nawu wu hetisise xiyenge xa lisima. Xileswo, Pawulo a tsrale a ku: ‘Ve ku yengeteleliwa wone hi nkonta ya swihono ku kondzra ku tlhasa lixaka lolu faka li nyikiwi xidumbiso.’ (Ga 3:19) A nawu a wu swi beka a livaleni leswaku vhanu lava kalaka va nga hetisekanga a ve nge te swi kota ku va va hetisisa nawu hi ndlela leyi hetisekiki. A va vilela gandzrelo ledzri hetisekiki ni dzra hi lani ku nga helikiki. Hi ntiyiso wa kone, a nawu wu tizre akuva a vhanu va tiva Kriste. Mhunu lweyi a a ta kombisa lipfumelo ka Yesu Kriste a a ta hlayiwa mululami hi Xikwembu Nkulukumba. (Ga 3:24) Pawulo vitaniwe mululami hikusa hi kola ka nawu a pfumele Yesu nakone a ve ni lipfumelo kwakwe. Hi mhaka ya leswo, Pawulo a ‘file ku nawu’ nakone a ‘hanye na Xikwembu Nkulukumba’. Pawulo a a nga ha a landzre nawu kambe a a landzra Xikwembu Nkulukumba.

Pawulo a a hlaye mazritu lama fanaka ka mazritu lawa a ma tsraleliki va le Roma. A hlaye leswi: ‘Vamakwezru, na n’wine mi file nawini hi mizri ya Kriste . . . kutani hi ntxhuxiwile nawini, leswi hi fiki ku nawu lowu faka hi bohiwi ku wone.’ (Ro 7:4, 6) Nambi ka ndzrimana leyi, nambi ka Ba-le-Galatia 2:19, Pawulo a a nga khaneli hi ku fa swanga mudohi lweyi a yavanyisiwiki hi nawu. A matsrhan’wini ya leswo, a khanela hi ku ntsrhunxiwa. A nawu a wu nga ha na ntamu kwakwe ni ka van’wana lava fanaka na yene. Hinkwavu a va ntsrhunxiwile hi kola ka gandzrelo dzra Yesu Kriste.