Ndlela Ya Ku Tama Hi Kulisa Lizrandzru Dzrezru Hi Vamakwezru

1-2. a) Ha yini mupostola Pawulo a hlaye leswaku ‘lexikulu ngopfu i lizrandzru’? b) He swini swivutiso leswi hi taka swi hlamula?

LOKO Pawulo a khanela hi lipfumelo, dumbu ni lizrandzru, a gamise hi ku hlaya leswaku “kambe lexikulu ngopfu ka leswizrazru i lizrandzru.” (1 Kor. 13:13) Kambe ha yini Pawulo a hlaye mazritu lawa? Hikusa a nkameni lowu taka swi nga ha ti vileleka kuva hi va ni lipfumelo ka swidumbiso swa Xikwembu Nkulukumba mayelanu ni misava leyimpshwa kumbe dumbu dzra leswaku swidumbiso swoleswo swi ta hetiseka, hikusa swi tava na swi hetisekile. Kambe minkama hinkwayu swa ha ta tama swi vileleka kuva hi zrandzra Yehovha kun’we ni vhanu. Handle ka ku ganaganeka lizrandzru dzrezru dzri ta tama dzri kula hi lani ku nga helikiki.

² Swanga hi leswi swa ha taka vileleka kuva hi kombisa lizrandzru, a hi kambisiseni swivutiso leswi swizrazru. Xa ku sungula, ha yini hi fanela ku zrandzra van’wana? Xa wubidzri, hi swi kombisa hi tindlela tini leswaku ha va zrandzra van’wana? Xa wuzrazru, hi nga tama hi tiyisa lizrandzru dzrezru hi van’wana hi ndlela yini?

HA YINI HI FANELA KU ZRANDZRA VAN’WANA?

3. He swini swivangelo leswi hi nga naswone swa kuva hi zrandzra van’wana?

³ Ha yini swi li swa lisima kuva hi zrandzra van’wana? Hikusa loko hi zrandzra van’wana hi kombisa leswaku hi Vakriste va ntiyiso. Yesu a byele vapostola vake a ku: “Hinkwavu va ta swi tiva leswaku mi vadondzrisiwa vanga loko mi zrandzrana.” (Yoh. 13:35) Ku zrandzra van’wana swi hi pfuna ku va ni wumun’we. Pawulo a hlaye leswaku “a lizrandzru dzri yentxa leswaku vhanu hinkwavu va twanana hi ku helela.” (Kol. 3:14) Kambe, ka ha ni xivangelo xin’wana lexi hi yentxaka hi tama hi zrandzra van’wana. Mupostola Yohane a tsralele vapfumelikulobye a ku: “Lweyi a zrandzraka Xikwembu Nkulukumba a fanela ku zrandzra ni makwavu.” (1 Yoh. 4:21) Loko hi kombisa lizrandzru ka van’wana hi va na hi kombisa leswaku ha mu zrandzra Xikwembu Nkulukumba.

4-5. Lizrandzru dzrezru ha Yehovha dzri yelana hi ndlela yini ni ndlela leyi hi va zrandzraka ha yone van’wana? Nyikela xikombiso.

⁴ Lizrandzru ledzri hi nga na dzrone hi Xikwembu Nkulukumba dzri yelana hi ndlela yini ni lizrandzru ledzri hi nga na dzrone hi vamakwezru? Akuva hi swi twisisa, a hi kambisiseni ku yelana loku nga kone ka mbilu yezru ni swizru swin’wana swa mizri wezru. Minkama yinyingi vadotori va beka xa kukazri ka voko dzra lweyi a vabyaka akuva va twa mabela ya mbilu, leswo swi va pfuna ku tiva leswaku mbilu yi le ka xiyimu lexinene kumbe im-him. Kutani a nsinya lowu wa nawu hi nga wu yelanisa hi ndlela yini ni nhlokomhaka leyi hi bulaka ha yone ya lizrandzru?

⁵ Swanga hi leswi dotori a kotaka ku tiva leswaku mbilu yezru yi hanye ha hombe kumbe im-him, hi ku tizrisa voko dzrezru, hi ndlela leyi fanaka hi nga tiva leswaku a lizrandzru dzrezru ha Yehovha dzri le ka matsrhamela wani ka ndlela leyi hi vazrandzraka ha yone van’wana. Loko hi gungula leswaku lizrandzru dzrezru hi vamakwezru dzri holile leswo swi nga ha hlaya leswaku na dzrone lizrandzru dzrezru ha Yehovha dzri pumbekile, kambe ku tama hi kombisa lizrandzru ka vamakwezru swi kombisa leswaku lizrandzru dzrezru ha Xikwembu Nkulukumba dzri tiyile.

6. Ha yini hi fanela ku kazrateka loko lizrandzru dzrezru hi vamakwezru dzri hola? (1 Yoh. 4:7-9, 11)

⁶ Hi fanela ku kazrateka loko lizrandzru dzrezru hi vamakwezru dzri hola. Ha yini? Hikusa swi nga ha hlaya leswaku hi le nghozini hi tlhelo dzra moya. Mupostola Yohane a swi khanyise ha hombe loko a hi dzrimuxa leswaku “Lweyi a kalaka a nga mu zrandzri makwavu lweyi a mu vonaka, a nge mu zrandzri Xikwembu Nkulukumba lweyi a kalaka a nga mu voni.” (1 Yoh. 4:20) Hi dondzra yini? Hi kota ku nyonxisa Yehovha ntsena loko hi ‘zrandzranana.’—Dondzra 1 Yohane 4:7-9, 11.

HI SWI KOMBISA HI TINDLELA TINI LESWAKU HA VA ZRANDZRA VAN’WANA?

7-8. He tini tin’we ta tindlela leti hi nga kombisaka ha tone leswaku ha va zrandzra van’wana?

⁷ Makhambi manyingi ka Zritu dzra Xikwembu Nkulukumba hi kuma nawu lowu liki “Zrandzrananani.” (Yoh. 15:12, 17; Rom. 13:8; 1 Tes. 4:9; 1 Pet. 1:22; 1 Yoh. 4:11) Kambe, a lizrandzru i tsrhamela ledzri pfaka he mbilwini, kumbe mhunu wa le ndzreni, nakone a ku na mhunu lweyi a nga kotaka ku vona leswi nga mbilwini yezru. Kutani hi nga kombisa lizrandzru dzrezru ka van’wana hi ndlela yini? Hi mazritu yezru ni hi swiyentxo swezru.

⁸ Ku ni tindlela tinyingi leti ha tone hi nga kombisaka leswaku ha va zrandzra vamakwezru. Tin’wana ta tone hi leti: ‘Mun’wana ni mun’wana a a hlaye xihlayelamfuzri ku wa kwavu.’ (Zek. 8:16) “Mi hanyisana hi ku zrula ni van’wana.” (Mar. 9:50) “Vanani va ku sungula ka ku kombisa van’wana xitxhavu.” (Rom. 12:10) “Yamukelananani.” (Rom. 15:7) “Yanani mahlweni . . . mi dzrivalelana.” (Kol. 3:13) “Yanani mahlweni mi zrwalelana mintsrhwalu.” (Gal. 6:2) “Yanani mahlweni mi txhavelelanana.” (1 Tes. 4:18) “Yanani mahlweni mi tiyisanana.” (1 Tes. 5:11) “Mi khongotelelana.”—Yak. 5:16.

9. Ha yini ku txhavelela van’wana ku li ndlela ya lisima ya ku kombisa lizrandzru dzrezru? (tlhela u vona xifaniso.)

⁹ A hi kambisiseni yin’we ya tindlela ta ku kombisa lizrandzru leyi hi yi voniki ka yava ledzri khalutiki. Pawulo a te: “Yanani mahlweni mi txhavelelanana.” Ha yini ku txhavelela van’wana ku li ndlela ya lisima ya ku kombisa lizrandzru dzrezru hi van’wana? Hi ku ya hi ntlhamuxelo wa kukazri wa Bibele, zritu ledzri Pawulo a dzri tizrisiki swa nga ku “txhavelela” dzri tlhamuxela ku “tiyisa mhunu loko a kumana ni mindzringo ya ku kazrata.” Hi ndlela leyo loko hi txhavelela mupfumelikulozri loko a kumana ni swikazratu hi mu pfuna ku tama a yima ni ku tama a famba a ndleleni ya Xikwembu Nkulukumba. Minkama hinkwayu leyi hi vaka ni vamakwezru a ku dzrileni kwavu hi va na hi kombisa ndlela leyi hi va zrandzraka ha yone.—2 Kor. 7:6, 7, 13.

10. He kwini ku yelana loku nga kone a makazri ka ntwela wusiwana ni ntxhavelelo?

¹⁰ Ku ni ku yelana a xikazri ka ntwela wusiwana ni ku txhavelela van’wana, hi ndlela yini? Mhunu lweyi a nga ni ntwela wusiwana a susumeteleka ku txhavelela van’wana ni ku va pfuna loko va kumana ni swikazratu. Leswi liki, ku sungula hi va twela wusiwana ntsrhaku hi va txhavelela. Vona ndlela leyi Pawulo a wu yelanisiki ha yone ntwela wusiwana ni ntxhavelelo lowu Yehovha a hi nyikaka wone. Pawulo a tlhamuxela Yehovha swanga “Papayi lweyi a taliki hi timpswalu nakone a nga Xikwembu Nkulukumba wa ntxhavelelo hinkwawu.” (2 Kor. 1:3) Ka nota de estudo ya ndzrimana leyi Pawulo a tizrisa xiga lexi liki “taliki hi timpswalu” akuva a tlhamuxela ndlela leyi hi titwaka ha yone hi van’wana. Xikwembu Nkulukumba a vitaniwa “Papayi lweyi a taliki hi timpswalu” hi mhaka ntwela wusiwana lowu a nga na wone hi vhanu. A ntwela wusiwana lowo wu mu susumetela ku hi txhavelela “ka swikazratu hinkwaswu.” (2 Kor. 1:4) Swanga hi leswi a mati ya ku titimeta manyikaka ntamu lweyi a nga ni tozra, Yehovha awa hi txhavelela ni ku hi nyika ntamu loko hi li ndzreni ka swikazratu. Xana hi nga mu yetiselisa ku yini Yehovha hi va hi kombisa ntwela wusiwana ni ku txhavelela van’wana? Yin’we ya tindlela i kuva hi txutxela matsrhamela lawa ma taka hi pfuna ku txhavelela van’wana. He wani man’we ya matsrhamela wolawo?

11. Hi ku ya hi Vakolosa 3:12 na 1 Petro 3:8, he wani matsrhamela lawa hi fanelaka ku va na wone akuva hi tama hi zrandzra vamakwezru?

¹¹ I yini lexi taka hi pfuna kuva siku dzrin’wana ni dzrin’wana hi “tama hi txhavelela vambeni” ni ku va zrandzra? Hi fanela ku txutxela man’we ya matsrhamela lawa: Ku twela vambeni, lizrandzru dzra wumakwezru ni wunene. (Dondzra Vakolosa 3:12; 1 Petro 3:8.) Xana matsrhamela lawa ma ta hi pfuna hi ndlela yini? Loko hi kombisa ntwela wusiwana ka vamakwezru hi tlhela hi zron’weka hakunene, hi ta va ni ku navela lokukulu ka ku va txhavelela loko va kumana ni swikazratu. Hi lani Yesu a hlayiki ha kone a ku: “A nomu wu vulavula leswi taliki mbilwini. Mhunu lwenene a humesa mintxhumu leyinene a wukosini byake.” (Mat. 12:34, 35) Ku txhavelela vamakwezru lava lavisanaka ni swiyimu swa ku kazrata i ndlela ya lisima leyi kombisaka leswaku ha va zrandzra.

HI NGA YA MAHLWENI HI KOMBISA LIZRANDZRU DZREZRU HI VAMAKWEZRU HI NDLELA YINI?

12. a) Hi fanela ku tivonela ka yini? b) He swini swivutiso leswi hi taka bula ha swone?

¹² Hinkwezru hi djula ku ‘tama hi zrandzrana.’ (1 Yoh. 4:7) Kambe, hi fanela ku dzrimuka leswi Yesu a swi hlayiki loko a ku “a lizrandzru dzra vhanu vanyingi dzri ta hola.” (Mat. 24:12) Kambe Yesu a a nga djuli ku hlaya swone leswaku ntalu wa vadondzrisiwa vake a va ta tsrhika ku kombisana lizrandzru. Kambe hi fanela ku tivonela leswaku ku kala lizrandzru ka misava leyi ku nga kutxeteli ndlela leyi hi hanyisanaka ha yone ni vamakwezru. Na ha ha ni leswo miyanakanywini a hi voneni xivutiso xin’wana xa lisima. Hi nga swi vonisa kuyini loko a lizrandzru dzrezru hi vamakwezru dzri tiyile?

13. I yini leswi nga dzringaka lizrandzru dzedzru hi vamakwezru?

¹³ Yin’we ya tindlela ta ku kambela leswaku hakunene a lizrandzru dzrezru hi vamakwezru dzri tiyile i ku yanakanyisisa hi ndlela leyi hi tikhomaka ha yone loko hi ni xikazratu xa kukazri ni makwezru. (2 Kor. 8:8) Leswo swi tikomba hi leswi Petro a swi hlayiki loko a ku: “Henhla ka hinkwaswu, zrandzrananani ngopfu swinene, hikusa a lizrandzru dzri funeketa swidoho swinyingi.” (1 Pet. 4:8) Leswi liki a ku tsrana ni ku kala ku hetiseka ka vambeni ku nga ha dzringa ndlela leyi hi va zrandzraka ha yone vamakwezru.

14. Hi ku ya hi 1 Petro 4:8, he wini muxaka wa lizrandzru ledzri hi fanelaka ku va na dzrone? Nyikela xikombiso.

¹⁴ A hi swi voneni he kusuhi leswi Petro a swi hlayiki. A xiyenge xa ku sungula xa ndzrimana 8 xi khanela hi muxaka wa lizrandzru lowu hi fanelaka hi va na wone, ku nga ku “zrandzranana ngopfu.” A zritu ledzri Petro a dzri tizrisiki dzra ku “ngopfu” hi ku kongoma dzri tlhamuxela ku “ndlandlamuxa.” A xiyenge xa wubidzri xa ndzrimana xi khanela hi leswi hi taka swi yentxa loko hi va zrandzra ngopfu van’wana, hi ta funeketa kumbe ku swi tsrhika swi khaluta swihoxo swa vamakwezru. Hi nga fanisa lizrandzru ni panu ledzri nwevukaka, ledzri hi nga dzri gwimbaka ku ko dzri tlhasela lani dzri funeketaka “swidoho swinyingi” ku nga li xin’we kumbe swibidzri, hi ndlela leyo a ku funeketa a swi ta fana ni ku “dzrivalela”, swanga hi leswi panu dzri nga ha tlhotaka mabatibati a menzeni, a lizrandzru dzrezru na dzrone dzri funeketa ku tsrana ni ku kala ku hetiseka ka vamakwezru.

15. I yini leswi hi taka swi yentxa loko lizrandzru dzredzru hi vamakwezru dzri li dzrikulu? (Vakolosa 3:13)

¹⁵ A lizrandzru dzrezru dzri fanela ku va ledzrikulu lakakuva hi kota ku dzrivalela swihoxo swa vamakwezru nambiloko minkama yin’wana swi djula hi tikazrata ngopfu. (Dondzra Vakolosa 3:13.) Loko hi kota ku dzrivalela van’wana hi ta kombisa leswaku a lizrandzru dzrezru dzri tiyile nakone hi ta nyonxisa Yehovha. Kambe i yini leswi taka hi pfuna ku tsrhika swihoxo swa vamakwezru swi khaluta?

16-17. He swini swin’wana leswi nga hi pfunaka ku tsrhika swihoxo swa vamakwezru swi khaluta? He swini swikombiso leswi nga hi pfunaka ku twisisa leswo? (tlhela u vona xifaniso.)

¹⁶ Hi fanela ku vona leswinene ka vamakwezru ku nga li swihoxo swavu. Hi xikombiso, pimisa hi loko u le ka xinkhubyana ni ntlawa wa kukazri wa vamakwezru na mi tikholisa, loko nkhuvu wu hela mi susa foto hi ntlawa, swi nga ha yentxeka mi susa mafoto mazrazru ku yentxela leswaku loko dzrin’we dzri nga mi nyonxisanga mi ta sala ni lawa mambeni. Kutani swoswi u ni mafoto mazrazru kambe ka dzrin’we dzra wone u xiye leswaku a wuso dzra makwezru wa kukazri a dzri humanga ha hombe. A wu ta yentxa yini hi foto ledzro? U nga dzri tima foto ledzro hikusa wa ha ni mabidzri nakone ka mafoto lawo hinkwenu, ku patsra ni makwezru lweyo, mi le ku hlekeni nakone mi hume ha hombe.

¹⁷ Kutani fananisa mafoto lawa u ma susiki ni lawa a wu li na wone hi khale. Handle ka ku ganaganeka a ve minkama ya ku nyonxisa leyi u viki na yone ni vamakwezru, kambe swi nga yentxeka ka swiyimu swoleswo ku veni makwezru wa kukazri lweyi a hlayiki ntxhumu wa kukazri lowu kalaka wu nga ku nyonxisanga. A wu ta yentxa yini ntsrhaku ka ku dzrimuka leswo? Ha yini u nga swi tsrhiki swi khaluta hi lani u timiki hakone mufoto lowu kalaka wu nga humanga ha hombe? (Amapr. 19:11; Efe. 4:32) Loko u yanakanyisisa hi minkama ya ku nyonxisa leyi u viki na yone ni mhunu lweyo, leswo swi ta ku yentxa u kahlula u dzrivala xihoxo xa xitsrongo lexi a ku yentxeliki xone. A minkama leyo ya ku nyonxisa, hi yone hi djulaka ku yi bekisa.

HA YINI LIZRANDZRU DZRI LI DZRA LISIMA NAMUNHLA?

18. Ka xidondzro lexi u dondzre yini mayelanu ni lizrandzru?

¹⁸ Ha yini hi djula ku ya mahlweni hi kulisa lizrandzru ledzri hi nga na dzrone hi vambeni? Hi lani hi swi voniki ha kone, loko hi zrandzra vamakwezru hi va na hi kombisa leswaku ha mu zrandzra Yehovha. Hi nga kombisa lizrandzru dzredzru hi vamakwezru hi ndlela yini? Yin’we ya tindlela ta ku yentxa leswo i kuva txhavelela. Nakone a ntwela wusiwana wu ta hi pfuna ku “tama hi txhavelelana”. Hi nga yentxa yini akuva hi tiyisa a lizrandzru dzrezru hi van’wana? Hi ku dzrivalela vamakwezru hi lani hi nga kotaka ha kone nambiloko ku yentxa leswo swi kazrata.

19. Ha yini swoswi swi li swa lisima ngopfu ku kombisa lizrandzru ka van’wana?

¹⁹ Ha yini namunhla swi li swa lisima ngopfu ku kombisa lizrandzru hi van’wana? Petro a hlaye xivangelo xa kone loko a ku: “Kambe a wugamu bya mintxhumu hinkwayu byi le kusuhi. Xileswo, . . . zrandzrananani ngopfu swinene.” (1 Pet. 4:7, 8) A ku hela ka misava leyi ya ku biha ku le kusuhi. Na hi ni leswo miyanakanywini, i yini leswi hi fanelaka ku swi yimela? Yesu a basopise vadondzrisiwa vake a ku: “Mi ta nyenyiwa hi matiko hinkwawu hi mhaka ya vito dzranga.” (Mat. 24:9) Akuva hi kota ku tiyisela swi djula hi va ni wumun’we. Hi ku yentxa leswo Sathana a nge te swi kota ku hi tsravukanisa hikusa hi ta va na hi tlhanganisiwe hi lizrandzru. “A lizrandzru dzri yentxa leswaku vhanu hinkwavu va twanana hi ku helela”.—Kol. 3:14; Filp. 2:1, 2.