Xana Yehovha A Ta Swi Hlamula Swikhongoto Swanga?

1-2. Ha yini hi nga ha vonaka ingiki Yehovha a nga swi hlamuli swikhongoto swezru?

‘TITSRHAVELI ku Yehovha, a ta ku nyika leswi djuliwaka hi mbilu yaku.’ (Amaps. 37:4) Mawaku ku xonga ka xidumbiso lexi! Kambe hi fanela ku yimela kuva Yehovha a tekela ku hi nyika hinkwaswu leswi hi swi kombelaka? Ha yini hi fanela ku tivutisa leswo? Yanakanyisisa hi swiyimu leswi landzrelaka: Makwezru wa xisati lweyi a kalaka a nga txhatanga a khongota kuva a zrambiwa ka Xikole xa vazrezri va Mfumu, kambe ku khaluta malembe manyingi na a nga zrambiwi. Makwezru wa xinuna a khongota ka Yehovha akuva a hanya ka mavabyi lawa a nga na wone akuva a kota ku yentxa leswi yengetelekiki a bandleni, kambe mavabyi yake a ma khalutanga. Vapswali lava va nga vakriste va khongota kuva n’wanavu a tama a va ntiyisweni, kambe n’wana lweyo a tibohela ku yima ku tizrela Yehovha.

² Swi nga yentxeka na wene u kombele ntxhumu wa kukazri ka Yehovha, kambe a wu si wu yamukela. Xileswo u nga ha tlhaselela wugamu bya leswaku Yehovha a hlamula swikhongoto swa van’wana kambe a nga swi hlamuli swaku, kumbe u pimisa leswaku u yentxe ntxhumu wa kukazri wa ku biha. Makwezru wa xisati lweyi a vitaniwaka Janiceb a titwe hi ndlela leyi fanaka. Yene ni nuna wake va khongote hi ku navela kwavu ka ku djula ku ya tizrela a Betele. A li: “A hi tiyiseka leswaku a swi nge te hlwela kuva hi zrambiwa ku ya tizra a Betele.” Kambe ku khalute malembe na va nga si na zrambiwa ku ya tizra a Betele. Janice a li: “Ni vavisekile ni tlhela ni pfilunganyeka, a ni tivutisa leswaku ni yentxe yini lexi khunguvanyisiki Yehovha. Ni khongote ngopfu mayelanu ni ku ya tizra a Betele. Ha yini Yehovha a nga swi hlamulanga swikhongoto swanga?”

3. Hi ta kambisisa yini ka xidondzro lexi?

³ Minkama yin’wana, hi nga ha tivutisa leswaku xana Yehovha hakunene awa swi yingiseta swikhongoto swezru. Phela, nambi vavanuna va ku dumbeka va khale va kumane ni swikazratu leswi fanaka. (Yb. 30:20; Amaps. 22:2; Hab. 1:2) I yini leswi nga ku tiyisekisaka leswaku Yehovha a ta swi hlamula swikhongoto swaku? (Amaps. 65:2) Akuva swi hi pfuna ku hlamula xivutiso lexi, a hi zrangeni hi ku kambisisa swivutiso leswi landzrelaka: 1) Hi nga yimela yini ka Yehovha? 2) I yini leswi Yehovha a swi yimelaka kwezru? 3) Ha yini hi fanela ku kambela swikombelo swezru?

HI NGA YIMELA YINI KA YEHOVHA?

4. Hi ku ya hi Yeremiya 29:12, Yehovha a dumbisa ku yentxa yini?

⁴ Yehovha a dumbisa ku yingiseta swikhongoto swezru. (Dondzra Yeremiya 29:12.) Yehovha a ma zrandzra ngopfu malandzra yake hikusa ma mu tizrela hi ku dumbeka, xileswo minkama hinkwayu a ta yingiseta swikhongoto swa wone. (Amaps. 10:17; 37:28) Kambe, leswo a swi hlayi swone leswaku a ta hi nyika hinkwaswu leswi hi swi kombelaka. Swin’wana swa leswi hi swi kombelaka hi to swi kuma ntsena a misaveni leyimpshwa.

5. I yini leswi Yehovha a nga na swone miyanakanywini loko a hlamula swikhongoto swezru? Tlhamuxela.

⁵ Yehovha a yingiseta swikhongoto swezru na a ni nkongometo wake a miyanakanywini. (Eza. 55:8, 9) Wun’we wa minkongometo yoleyo i ku tata misava hi vhanu lava nyonxiki va tlhela va va ni wumun’we hansi ka Mfumu wake. Kambe Sathana a hlaya leswaku vhanu a va ta nyonxa loko a vo ti kongomisa ha wuswavu. (Gen. 3:1-5) Ku kombisa leswaku leswi Sathana a swi hlayiki i madzrimi, Yehovha a pfumelele vhanu leswaku va tifuma. Hi nkota ya leswo, minfumu ya vhanu yi vanga swikazratu swinyingi leswi hi kumanaka na swone namunhla. (Ekles. 8:9) Ha swi twisisa leswaku Yehovha a nge te susa swikazratu leswi hinkwaswu swoswi. Loko a o yentxa leswo, vhanu a va ta tlhasela wugamu bya leswaku va nga swi kota ku tisusela swikazratu leswi va nga na swone.

6. Ha yini hi fanela ku tiyiseka ka leswaku minkama hinkwayu Yehovha a ta hlamula swikhongoto swezru hi ndlela ya lizrandzru ni ya ku lulama?

⁶ Yehovha a nga ha hlamula xikombelo xo xa xin’we hi tindlela ta ku hambanahambana. Hi xikombiso, nkama lowu Hosi Ezekiya a a vabya ngopfu, a kombele leswaku Yehovha a mu hanyisa. Yehovha a hlamule xikhongoto xake hi ku mu hanyisa. (2 Tih. 20:1-6) Kambe loko mupostola Pawulo a kombela leswaku Yehovha a mu susa “mutwa a nyameni,” lowu a wu mu vangela xikazratu xa lihanyu, Yehovha a nga swi yentxanga leswo. (2 Kor. 12:7-9) Tlhela u vona xikombiso xa mupostola Yakobe na Petro. Hosi Heroda a a djula ku va dlaya ha wubidzri byavu. A bandla dzri khongotelele Petro na Yakobe, nambitasu Yakobe a dlayiwile. Kambe Petro a huluxiwile hi ntsrumi. (Mint. 12:1-11) Hi nga ha tivutisa leswi: ‘Ha yini Yehovha a huluxe Petro kambe a pfumelele leswaku Yakobe a dlayiwa?’ A Bibele a dzri hi byeli leswo.c Lexi hi nga tiyisekaka ha xone hi leswaku tindlela ta Yehovha “ti lulamile.” (Deut. 32:4) Kambe ha swi tiva leswaku Yehovha a a va zrandzra ha wubidzri byavu. (Mpful. 21:14) Minkama yin’wana Yehovha a nga hlamula swikhongoto swezru hi minkama leyi a hi nga yi yimelanga. Kambe leswi hi dumbaka leswaku Yehovha a ta hlamula swikhongoto swezru hi ndlela ya lizrandzru ni leyi lulamiki, a hi ganaganeki hi ndlela leyi a hlawulaka ku hi hlamula ha yone.—Yb. 33:13.

7. I yini leswi hi kalaka hi nga fanelanga ku swi yentxa, nakone ha yini?

⁷ I swinene kuva hi nga fananisi swiyimu swezru ni swa van’wana. Hi xikombiso, swi nga ha yentxeka hi kombela Yehovha akuva a hi pfuna hi ntxhumu wa kukazri lowu kongomiki, kambe a nga swi yentxi leswo. Ku nge kungani hi gungula leswaku mhunu mun’wana a hambe xikombelo lexi fanaka kambe Yehovha a mu hlamulile. Makwezru lweyi a vitaniwaka Anna swi mu humelelile leswo, a khongote leswaku nuna wake Matewu a hanya ka mavabyi lawa a a li na wone ya Kankru, kambe hi nkama wu li wun’we a ku ni vamakwezru vabidzri va xisati lava na vone a va vabya hi kankru. Anna a khongote hi ku hiseka kuva vamakwezru lava ni nuna wake va hanya. Vamakwezru lava va hanyile, kambe Matewu a file. A ku sunguleni Anna a tivutise leswi: Xana vamakwezru lava va hanye hi mpfunu wa Yehovha? Loko swili hi ndlela leyo, ha yini a nga mu pfunanga Matewu? A hi nge swi tivi leswaku ha yini vamakwezru lavabidzri va hanyile. Lexi hi xi tivaka hi leswaku Yehovha a ta helisa ku xaniseka hinkwaku, nakone a ta pfuxa vanghanu vake lava fiki.—Yb. 14:15.

8. a) Hi ku ya hi Ezaya 43:2, Yehovha a hi seketela hi ndlela yini? b) Xana xikhongoto xi nga hi pfuna hi ndlela yini loko hi kumana ni swikazratu? (Vona vhidiyu ledzri liki Xikhongoto Xi Hi Pfuna Ku Tiyisela.)

⁸ Minkama hinkwayu Yehovha a ta hi seketela. Swanga Papayi wezru lweyi a nga ni lizrandzru, Yehovha a nga swi zrandzri ku hi vona na hi xaniseka. (Eza. 63:9) Nambitanu, Yehovha a nga siveli kuva mindzringo hinkwayu, leyi nga ha fanisiwaka ni milambu kumbe ndzrilo, yi nga hi humeleli. (Dondzra Ezaya 43:2.) Kambe Yehovha a dumbisa leswaku a ta hi pfuna ku “khaluta ka mindzringo” yoleyo. Nakone a nge te pfumelela leswaku mindzringo yoleyo yi hi sivela ku mu tizrela. Futshi Yehovha a tlhela a hi nyika moya wake wa ku xwenga akuva wu hi nyika ntamu wa ku tiyisela. (Luk. 11:13; Filp. 4:13) Xileswo, hi nga tiyiseka leswaku minkama hinkwayu hi ta va ni leswi hi swi vilelaka akuva hi tiyisela ni ku tama hi dumbeka kwake.d

I YINI LESWI YEHOVHA A SWI YIMELAKA KWEZRU?

9. Hi ku ya hi Yakobe 1:6, 7, ha yini hi fanela ku kholwa ka leswaku Yehova a ta hi pfuna?

⁹ Yehovha a yimela leswaku hi mu dumba. (Heb. 11:6) Minkama yin’wana swikazratu swezru swi nga ha tikomba swi li swikulu, kutani hi nga ha sungula ku ganaganeka leswaku Yehovha a ta hi pfuna kumbe im-him. Kambe Bibele dzri hi tiyisekisa leswaku hi ntamu wa Xikwembu Nkulukumba hi nga tlula nambi “pangu” kumbe muru. (Amaps. 18:29) A matsrhan’wini ya kuva hi pfumelela ku ganaganeka koloko ku kula a mbilwini yezru, hi fanela ku khongota na hi ni ku dumba loku heleliki ka leswaku Yehovha a ta hi hlamula.—Dondzra Yakobe 1:6, 7.

10. Nyikela xikombiso xa leswaku hi nga yentxa xa kukazri hi ndlela yini mayelanu ni leswi hi swi khongotiki.

¹⁰ Yehovha a yimele leswaku hi yentxa xa kukazri mayelanu ni lexi hi khongotiki ha xone. Hi xikombiso, makwezru wa kukazri a nga ha khongota ka Yehovha a kombela kuva mutholi wake a mu nyika mpfumelelo wa ku ya a kongresu. Yehovha a nga xi hlamulisa kuyini xikhongoto lexo? A nga ha mu nyika xixixi lexi vilelekaka akuva a khanela ni mutholi wake. Kambe makwezru lweyi swa ha ta djula kuva a famba a ya khanela ni mutholi wake, nakone swi nga ha djula kuva a yentxa xikombelo lexo hi makhambi manyingi. Minkama yimbeni swi nga ha djula a txintxana masiku ya ku tizra ni mutizri kulobye. Nakone loko swi vileleka a nga ha kombela folga kumbe maferiya ya ku kala a nga holi.

11. Ha yini hi fanela ku khongota hi ku phindhaphindha mayelanu ni mhaka leyi yi hi kazrataka?

¹¹ Yehovha a yimela leswaku hi khongota hi ku phindhaphindha mayelanu ni leswi swi hi kazrataka. (1 Tes. 5:17) Hi lani Yesu a hlayiki ha kone, swikombelo swezru a swi nge ti tekela ku hlamuliwa. (Luk. 11:9) Xileswo, u nga kazrali! Khongota hi ku phindhaphindha na swi sukela mbilwini. (Luk. 18:1-7) Loko hi tama hi khongota hi mhaka ya kukazri, hi komba Yehovha leswaku leswi hi mu kombelaka swone i swa lisima kwezru, nakone hi va na hi kombisa lipfumelo ka leswaku a ta hi pfuna.

HA YINI HI FANELA KU KAMBELA SWIKOMBELO SWEZRU?

12. a) He xini xivutiso lexi hi fanelaka ku tihamba xone mayelanu ni swikombelo swezru, nakone ha yini? b) Hi nga tiyiseka hi ndlela yini leswaku swikhongoto swezru swi kombisa xitxhavu ka Yehovha? (Vona Bokisi ledzri liki “Xana Swikombelo Swanga Swi Kombisa Xitxhavu Ka Yehovha?”)

¹² Loko swikhongoto swezru swi nga hlamuliwi, hi nga ha tihamba swivutiso leswi swizrazru. Xa ku sungula, ‘Xana leswi ni khongotaka ha swone na swi vilela hakunene?’ Minkama yinyingi hi yanakanya leswaku ha swi tiva leswi a nga swinene ku hine, kambe ku hlaya ntiyiso swi nga yentxeka mintxhumu yoleyo hi nga yi vileli. Loko a li leswaku hi khongota hi mhaka ya kukazri leyi yi hi kazrataka, swi nga yentxeka ku ni ndlela ya ku yampswa ya ku tlhantlha xikazratu lexo ku tlula leyi hi yi kombelaka. Nakone swin’wana swa leswi hi swi kombelaka swi nga yentxeka swi nga yelani ni ku zrandzra ka Yehovha. (1 Yoh. 5:14) Dzrimuka xikombiso xa vapswele lava hi buliki ha vone a ku sunguleni, lava kombeliki kuva Yehovha a pfuna n’wanavu kuva a nga tsrhiki ntiyiso. Lexo a xi tikomba ku li xikombelo lexinene. Kambe Yehovha a nge te sindzrisa ni mun’we kwezru ku va a mu tizrela, a djula leswaku hinkwezru, ku patsra ni vanezru, hi hlawula ku mu tizrela. (Deut. 10:12, 13; 30:19, 20) Xileswo a swi ta yampswa loko a ve khongota ka Yehovha va kombela leswaku a khumba mbilu ya n’wanavu akuva a kota ku zrandzra Yehovha ni kuva munghanu wake.—Amapr. 22:6; Efe. 6:4.

13. Hi ku ya hi Vaheberu 4:16, he dzrini lani Yehovha a taka hi pfuna kone? Tlhamuxela.

¹³ Xa wubidzri, ‘Xana lowu i nkama lowunene wa kuva Yehovha a hlamula xikhongoto xanga?’ Minkama yimbeni hi nga ha vona leswaku swikhongoto swezru swi fanela ku hlamuliwa hi ku kahlula. Kambe, Yehovha a tiva nkama lowunene wa ku hi hlamula. (Dondzra Vaheberu 4:16.) Loko swikhongoto swezru swi nga tekeli ku hlamuliwa, hi nga ha pimisa leswaku nhlamulo ya Yehovha i im-him, kambe swi nga yentxeka wo kala wu nga si tlhasa nkama. Hi xikombiso, yanakanya hi makwezru lweyi hi buliki ha yene ku sunguleni, lweyi a khongotiki a kombela kuva a hanyisiwa ka mavabyi yake. Loko Yehovha a e mu daha hi ndlela ya hlolana, n’waninkama Sathana a a tava a hlaye leswaku makwezru lweyi a o tama a tizrela Yehovha hi leswi a mu dahiki. (Yb. 1:9-11; 2:4) Kambe Yehovha a bekise nkama lowu a taka helisa mavabyi hinkwawu ha wone. (Eza. 33:24; Mpful. 21:3, 4) Na nkama lowo wu nga si tlhasa, a hi nge yimeli leswaku Yehovha a hi daha hi hlolana. Kutani makwezru a a fanela ku kombela Yehovha a mu tiyisa ni ku mu nyika ku zrula ka miyanakanyu, akuva a tiyiselela mavabyi ni ku tama a tizrela Yehovha hi ku dumbeka.—Amaps. 29:11.

14. U dondzra yini ka xikombiso xa Janice?

¹⁴ Dzrimuka xikombiso xa Janice, lweyi a khongotiki mayelanu ni ku ya tizra a Betele. Ntsrhaku ka ntlhanu wa malembe hi kone a swi voniki leswaku Yehovha a a hlamulile xikombelo xake kambe hi ndlela leyi hambaniki. Yene a li: “Yehovha a tizrise nkama luwani leswaku a ni pfuna kuva mukriste lwenene. A ni fanela ku yengetela ndlela leyi a ni mu dumba ha yone Yehovha, ku yampswisa dondzro ya ximhunu ni ku va ni nyonxa hi kun’wana ni kun’wana lomu ni mu tizrelaka kone.” Ntsrhaku ka leswo, Janice ni nuna wake va zrambiwe ku ya tizra swanga valaviseli va muganga. Loko a dzrimukela Janice a li: “Yehovha a xi hlamulile xikhongoto xanga kambe hi ndlela leyi a ni nga yi yimelanga. Swi teke nkama ku va ni vona leswaku nhlamulo ya Yehovha a ve xihananu xa ku xonga ngopfu swinene, ni tlangela ngopfu hi kuva ni va ni mukhandlu wa ku vona wunene bya Yehovha.”

15. Ha yini loko hi khongota hi nga fanelanga ku hlaya leswi hine hi swi djulaka ntsena? (Tlhela u vona xifaniso)

¹⁵ Xa wuzrazru, ‘Xana ni fanela ku khongota hi ntxhumu wun’wana?’ I swinene ku va lava kongomiki loko hi hamba xikhongoto, kambe minkama yin’wana i swinene kuva hi nga hlayi leswi hine hi swi djulaka kambe hi nyika Yehovha mukhandlu wa ku yentxa leswi a swi djulaka. Vona xikombiso xa makwezru wa xisati lweyi a khongotiki kuva a ya ka Xikole xa vazrezri va Mfumu, a a djula ku ya ka xikole lexi akuva a ya tizra lomu ku nga ni xivileleko lexikulu. Nkama lowu a a khongota ku va a zrambiwa ka xikole lexi, inhaka a kombele Yehovha akuva a mu pfuna ku vona mikhandlu yin’wana ya ku yandzrisa ntizro wake. (Mint. 16:9, 10) Kutani a a ta yentxa xa kukazri lexi fambisanaka ni xikhongoto xake hi ku vutisa mulaviseli wa muganga leswaku a ku na bandla lomu kusuhi dzri vilelaka maphayona, kumbe a tsralela xikritori xa Betele a vutisa leswaku he kwini ku nga ni xivileleko xa vazrezri.e

16. Hi nga tiyiseka hi yini?

¹⁶ Hi lani hi dondzriki ha kone, hi nga tiyiseka leswaku Yehovha a ta hlamula swikhongoto swezru hi ndlela ya lizrandzru ni leyi lulamiki. (Amaps. 4:3; Eza. 30:18) Swi nga yentxeka minkama yimbeni hi nga kumi hlamulu leyi hi yi yimelaka kambe Yehovha a nge swi bi hi makatla swikhongoto swezru. Yehovha a hi zrandzra ngopfu nakone a nge te hi tsrhika. (Amaps. 9:10) Xileswo “tama u dumba Xikwembu Nulukumba masiku hinkwawu,” u mu pfulela mbilu yaku hi xikhongoto.—Amaps. 62:8.