Xana U Ni Lipfumelo?

Akuva hi nyonxisa Yehovha, hi fanela ku va ni lipfumelo. Kambe Bibele dzri li “a hi vhanu hinkwavu va nga ni lipfumelo”. (2 Tes. 3:2) Loko mupostola Pawulo a hlaya mazritu lawa a a vulavula hi “vhanu lava vavisaka vhanu van’wana ni vhanu lava bihiki”, lava a va mu xanisa. Kambe leswi a swi hlayiki mayelanu ni lipfumelo swa tizra ni le ka vambeni. Vhanu van’wana a va swi djuli ku kholwa leswaku ku na Xikwembu Nkulukumba lweyi a vumbiki mintxhumu hinkwayu. (Rom. 1:20) Van’wana va nga ha va kholwa leswaku ku ni lweyi a nga ni ntamu lowukulu ngopfu swinene. Kambe leswo, a swi yanelanga akuva hi nyonxisa Yehovha hikusa ku kholwa koloko a hi ku va ni lipfumelo dzra ntiyiso.

Hi fanela ku kholwa leswaku Yehovha a kone ni leswaku a “hakela” hinkwavu lava nga ni lipfumelo ledzri tiyiki kwake. (Heb. 11:6) Lipfumelo i xiyenge xa mihandzru ya moya. Akuva hi yamukela moya wa ku xwenga, hi fanela ku khongota ka Yehovha akuva a hi nyika wone. (Luk. 11:9, 10, 13) Ndlela yin’wana ya kuva hi yamukela moya wa ku xwenga i kuva hi dondzra Zritu dzra Xikwembu Nkulukumba ledzri huhuteliwiki. Nakone i swa lisima kuva hi yanakanyisisa hi leswi hi swi dondzraka ni ku hanya ha swone. Hi ku yentxa leswo, moya wa ku xwenga wa Yehovha wu nga kongomisa wutomi byezru ni ku hi pfuna ku va ni lipfumelo ledzri nyonxisaka Yehovha.