Titsrongahati Loko Ku Ni Leswi U Kalaka U Nga Swi Tivi

1. He byini wuswikoti lebyi Yehovha a hi nyikiki byone nakone ha yini?

YEHOVHA a hi vumbe hi ndlela ya ku hlamalisa. Hi ni wuswikoti bya ku pimisa, bya ku dondzra mintxhumu leyimpshwa ni ku tizrisa leswi hi swi dondzraka. Ha yini a hi vumbe hi ndlela leyi? Leswaku hi ‘tiva Xikwembu Nkulukumba’ hi tlhela hi mu tizrela.—Amapr. 2:1-5; Rom. 12:1.

2. a) Xana hi fanela ku twisisa yini mayelanu na hine vhanu? (Yob 37:23, 24) (Tlhela u vona ni mufoto.) b) Ha yini swi li swa lisima ku twisisa leswaku a swi sindzrisi ku tiva hinkwaswu?

² Nambileswi hi nga ni wuswikoti bya ku dondzra mintxhumu yinyingi, a hi hinkwaswu leswi hi swi tivaka. (Dondzra Yob 37:23, 24.) Yanakanyisisa hi xikombiso xa Yobe. Yehovha a mu hambe swivutiso swinyingi akuva a mu pfuna ku twisisa leswaku a ku ni leswi a a nga swi tivi. Bulu ledzri Yobe a viki na dzrone na Yehovha dzri mu pfune ku twisisa leswaku a a fanela ku titsrongahata a tlhela a txintxa ndlela leyi a a yanakanya ha yone. (Yb. 42:3-6) Na hine ha pfuneka loko hi ku titsrongahata hi pfumela leswaku a hi tivi hinkwaswu. Ku tiva leswo, swi hi yentxa hi dumba leswaku nakunene Yehovha a ta hi pfuna akuva hi teka swiboho swa wutlhazri.—Amapr. 2:6.

3. Hi ta kambisisa yini ka xidondzro lexi?

³ Ka xidondzro lexi, hi ta kambisisa yin’we ya mintxhumu leyi hi kalaka hi nga yi tivi ni leswaku ku kala hi nga yi tivi mintxhumu yoleyo swi nga yentxa wutomi byezru byi kazrata hi ndlela yini. Hi ta tlhela hi vona leswaku ha yini swi li swinene kuva hi nga yi tivi mintxhumu ya kukazri. Ku kambisisa tinhla leti swi ta hi pfuna ku dumba leswaku Yehovha lweyi a ‘hetisekiki a vutlhazrini’ a hi byela leswi nakunene hi fanelaka ku swi tiva.—Yb. 37:16.

A HI SWI TIVI LESWAKU WUGAMU BYI TA TLHASA SIKU MUNI

4. Hi ku ya hi buku dzra Matewu 24:36, i yini leswi hi kalaka hi nga swi tivi?

⁴ Dondzra Matewu 24:36. A hi swi tivi leswaku wugamu bya xiyimu lexi xa misava byi ta tlhasa siku muni. Nambi Yesu, nkama lowu na a ha li lani misaveni, a a nga tivi ntxhumu mayelanu ni “siku ledzro ni nkama”.a Hi ku famba ka nkama, Yesu a byele valandzreli vake leswaku Yehovha lweyi a nga Mubekisi wa nkama a “tiva minkama kumbe tinguva” ta swiyentxakalu. (Mint. 1:6, 7) Yehovha a kunguhate nkama lowu xiyimu lexi xi taka hela ha wone, kambe hine a hi nge swi koti ku tiva siku ledzro.

5. Leswi hi kalaka hi nga swi tivi leswaku a wugamu byi ta tlhasa siku muni, hi khumbeka hi ndlela yini?

⁵ Hi ku ya hi leswi Yesu Kriste a swi hlayiki, a hi swi tivi leswaku swi ta djula hi tsrhama nkama wa ku gama kwini na ha ha yimela leswaku wugamu byi tlhasa. Hi kola ka leswo, hi nga ha hela mbilu kumbe hi godola ngopfungopfu loko a li leswaku hi buya na hi yimela siku dzra Yehovha hi malembe. Hi nga tlhela hi hela ntamu loko maxaka yezru kumbe vhanu van’wana va hi hleka hi leswi wugamu byi nga siki na tlhasa. (2 Pet. 3:3, 4) Hi nga ha yanakanya leswaku loko a hi dzri tiva siku ledzri wugamu byi taka tlhasa ha dzrone, a swi ta hi nabyalela ku lehisa mbilu ni ku tiyisela loko hi poyileliwa.

6. Ha yini swi li swinene kuva hi nga swi tivi leswaku siku dzra Yehovha dzri ta tlhasa siku muni?

⁶ Ku hlaya ntiyiso, leswi Yehovha a kalaka a nga hi byelanga leswaku wugamu byi ta tlhasa siku muni, a hi pfulele mukhandlu wa ku kombisa leswaku hi mu tizrela hi leswi hi mu zrandzraka ni hi kola ka leswi hi mu dumbaka. Hi djula ku tizrela Yehovha hi lani ku nga helikiki, ku nga li ntsena ku ya tlhasa wugan’wini bya xiyimu lexi. A matsrhan’wini ya ku beka miyanakanyu yezru ka leswaku a “siku dzra Yehovha” dzri ta tlhasa siku muni, swi ta va swinene ku yanakanya hi mintxhumu leyinene leyi taka yentxeka loko siku ledzro dzri ta va na dzri khalutile. Leswo swi ta hi pfuna kuva hi tsrhindzrekela kusuhi na Yehovha, hi mu dumba hi tlhela hi yentxa hinkwaswu leswi hi nga swi kotaka akuva hi mu nyonxisa.—2 Pet. 3:11, 12.

7. I yini leswi hi swi tivaka?

⁷ Hi yentxa swone loko hi beka miyanakanyu yezru ka leswi hi swi tivaka ku nga leswaku masiku ya wugamu ma sungule hi 1914. A Bibeleni Yehovha a tsrale wuprofeta lebyi a byi komba leswaku masiku ya wugamu a ma ta sungula hi 1914. A tlhele a hi nyika wutsrhokotsrhoko byinyingi mayelanu ni ndlela leyi misava a yi ta va xiswone ku sukela hi lembe ledzro. Leswi wuprofeta lebyo byi hetisekaka, swi hi yentxa hi tiyiseka leswaku “a siku ledzrikulu dzra Yehovha dzri le kusuhi”. (Sof. 1:14) Hi tlhela hi wu tiva ntizro lowu Yehovha a djulaka kuva hi wu hetisisa ku nga ku “zrezra madzrungula lamanene ya Mfumu” ka vhanu vanyingi hi lani hi nga kotaka ha kone. (Mat. 24:14) Dzrungula ledzri dzri zrezriwa ka matiko lawa ma dzringanaka 240 wa wone ni hi ku tlula 1.000 wa tindzrimi. A swi vileli kuva hi tiva “siku ni nkama” akuva hi tizra hi nkhinkhi ka ntizro lowu wa lisima.

A HI YI TIVI NDLELA LEYI YEHOVHA A NGA HA YENTXAKA MINTXHUMU HA YONE

8. Xana i yini ‘ntizro wa Xikwembu Nkulukumba’ lowu ku vulavuliwaka ha wone lani? (Ekleziasta 11:5)

⁸ A hi minkama hinkwayu hi tivaka ‘ntizro wa Xikwembu Nkulukumba’. (Dondzra Ekleziasta 11:5.) Mazritu lawa ma tlhamuxela leswi Yehovha a swi yentxaka kumbe leswi a pfumelaka kuva swi yentxeka leswaku a hetisisa ku zrandzra kwake. A hi nge swi tivi hi ku kongoma leswi yentxaka Yehovha a pfumelela ntxhumu wa kukazri kumbe leswi a swi yentxaka akuva a hi pfuna. (Amaps. 37:5) A Bibele dzri fananisa kuva hi nga tivi ‘ntizro wa Xikwembu Nkulukumba’ ni ndlela leyi xibebetana xi kulaka ha yone a khuzrini dzra mamana wa xone. Nambi tintlhazri a ti yi twisisi hi ku helela ndlela leyi xibebetana xi kulaka ha yone a khuzrini dzra mamana wa xone. Hi lani ku fanaka, a hi yi tivi ndlela leyi Yehovha a taka yentxa mintxhumu ha yone.

9. Leswi hi kalaka hi nga swi tivi hi kongoma leswi Yehovha a swi yentxaka, xana hi nga sungula ku pimisa yini?

⁹ Kuva hi nga swi tivi leswi Yehovha a taka swi yentxa, swi nga yentxa hi va ni ku ganaganeka ka kukazri loko hi djula ku teka swiboho. Kumbexana hi nga ha ganaganeka ku yentxa leswi yengetelekiki akuva hi yengesela wutizreli byezru, swa ku fana ni ku nabyalisa wutomi kumbe ku zruzrela ka mimbangu leyi ku nga ni xivileleko lexikulu xa vazrezri va Mfumu. Kumbexana hi nga ha yanakanya leswaku Xikwembu Nkulukumba a nga hi yamukeli loko hi nga ma tlhaseleli makungu yezru ya moya, loko hi tikazrata a ntizrweni wa nsimu kambe hi pfumala ni xidondzro ni loko hi tizra hi nkhinkhi ka mintizro ya nhlengeletanu kambe hi kumana ni swikazratu. Loko leswo swi hi humelela, hi nga ha sungula ku yanakanya leswaku Yehovha a nga hi nyonxeli.

10. He wani matsrhamela ya lisima lawa hi nga ma txutxelaka loko hi nga swi tivi leswi Yehovha a taka swi yentxa?

¹⁰ Ku hlaya ntiyiso, ku kala hi nga swi tivi leswi Yehovha a taka swi yentxa swi hi pfuna ku txutxela matsrhamela lamanene ya ku fana ni ku titsrongahata ni ku dzringanisela. Swi tlhela swi hi pfuna ku twisisa leswaku Yehovha awa swi tiva leswi nga swinene kwezru. (Eza. 55:8, 9) Nakone hi dondzra ku mu dumba hi ku helela Yehovha hi tlhela hi tiyiseka hi ku helela leswaku a ta hi pfuna. Loko hi vona mihandzru leyinene ka ntizro wezru wa ku zrezra kumbe mintizro yimbeni ya nhlengeletanu, hi yisa lidzrumu ledzri fanelaka Yehovha. (Amaps. 127:1; 1 Kor. 3:7) Loko mintxhumu yi nga yentxeki hi lani a hi yimele ha kone hi fanela ku dzrimuka leswaku Yehovha a tiva hinkwaswu. (Eza. 26:12) Hi yentxa hinkwaswu leswi hi nga swi kotaka ni ku tlhela hi dumba leswaku minkama hinkwayu Yehovha a ta hi pfuna. Ha tiyiseka leswaku a ta hi kongomisa nambiloko a nga swi yentxi hi ndlela ya hlolana ku fana ni leswi a a swi yentxisa xiswone a minkameni ya khale.—Mint. 16:6-10.

11. He yini mintxhumu ya lisima leyi hi yi tivaka?

¹¹ Ha swi tiva leswaku minkama hinkwayu Yehovha a hi khoma hi ndlela ya lizrandzru, a lulamile nakone a ni wutlhazri. Nakone ha swi tiva leswaku a hi zrandzra ngopfu swinene hi leswi hi mu yentxelaka swone ni leswi hi swi yentxelaka vamakwezru a bandleni. Nakone a hi ganaganeki leswaku minkama hinkwayu Yehovha awa va hakela lava dumbekaka kwake.—Heb. 11:6.

A HI SWI TIVI LESWI TAKA YENTXEKA MUNDZRUKU

12. Hi ku ya hi Yakobe 4:13, 14, i yini leswi hi kalaka hi nga swi tivi?

¹² Dondzra Yakobe 4:13, 14. Ntiyiso wa mhaka hi leswaku a hi swi tivi leswi taka hi yentxekela mundzruku. Ka xiyimu lexi xa misava, ‘nkama ni humelelo’ [swiyentxakalu leswi a hi nga swi yimelanga] swi nga ha hi humelela. (Ekles. 9:11) Xileswo hi nge swi tivi leswaku makungu yezru ma ta hetiseka kumbe hi ta hanya lakakuva hi kota ku ma hetisisa hinkwawu.

13. Xana akuva hi nga swi tivi leswi taka yentxeka a nkameni lowu taka swi nga hi khumba hi ndlela yini?

¹³ Swi nga ha hi kazratela ku tiyiselela swikazratu swa wutomi hikusa a hi swi tivi leswi taka hi yentxekela mundzruku. Hi ndlela yini? Loko hi tsrhamela ku vilela ngopfu hi leswi taka hi humelela, hi nga ha lahlekeliwa hi ku nyonxa. Wutomi byezru byi nga ha txintxa hi ndlela leyi a hi nga yi yimelanga kumbe hi humeleliwa hi mintxhumu ya ku biha swa kola ni kola nakone leswo swi nga hi yentxa hi xukuvala hi tlhela hi pfilunganyeka. Nakone loko mintxhumu yi nga yentxeki hi lani a hi yimele ha kone hi nga ha hela ntamu.—Amapr. 13:12.

14. I yini leswi hi fanelaka ku swi yentxa ni ku swi tiva akuva hi nyonxa hi lani ku nga helikiki? (Tlhela u vona ni mifoto.)

¹⁴ Loko hi tiyiselela swikazratu hi va na hi kombisa leswaku hi tizrela Yehovha hi leswi hi mu zrandzraka ku nga li hi leswi hi yimelaka ku kuma swa kukazri. A wudzrunguli bya le Bibeleni byi hi komba leswaku a hi fanelanga hi yimela kuva Yehovha a hi sizrelela ka swikazratu hinkwaswu leswi hi nga ha kumanaka na swone nakone a nga kunguhati leswi taka yentxeka hi wutomi byezru. Awa swi tiva leswaku ku nyonxa kwezru a ku yi hi leswi taka yentxeka hi wumundzruku. A matsrhan’wini ya leswo, ku nyonxa kwezru ku tiseketele ka ku djula nkongomiso wake ni ku mu yingiseta. (Yer. 10:23) Loko hi tsrutsrumela kwake loko hi djula ku teka swiboho, hi va na hi hlaya leswi ha yene: “Loko Yehovha a swi zrandzra, hi ta hanya, hi yentxa leswi kumbe leswiya.”—Yak. 4:15.

15. Hi tiva yini mayelanu ni leswi taka yentxeka a nkameni lowu taka?

¹⁵ Nambileswi hi kalaka hi nga swi tivi leswi taka yentxeka ka siku dzrin’wana ni dzrin’wana, ha swi tiva leswaku Yehovha a hi dumbise wutomi lebyi ka helikiki ku nga ha va matilweni kumbe kola misaveni. Ha swi tiva leswaku Yehovha a nge txhuki a hemba nakone ha swi tiva leswaku a xi kone lexi nga mu sivelaka ku hetisisa xidumbiso xake. (Tit. 1:2) Ko va Yehovha ntsena lweyi a nga kotaka ku hlaya a ku: ‘Ndzri tivisa ke he ku sunguleni leswi taka humelela a vugan’wini, ndzri tivisa ni le ku zrangeni leswi nga siki yentxeka.’ Mazritu lawa ma hetisekile a nkameni lowu khalutiki nakone ma ta tlhela ma hetiseka a nkameni lowu taka. (Eza. 46:10) Ha swi tiva leswaku a xi kone lexi nga sivelaka kuva Yehovha a hi zrandzra. (Rom. 8:35-39) Yene a ta hi nyika wutlhazri, ntxhavelelo ni ntamu lowu hi wu vilelaka akuva hi tiyiselela swikazratu leswi nga ha humelelaka a wuton’wini byezru. Hi nga tiyiseka leswaku Yehovha a ta hi pfuna ni ku hi tovokisa.—Yer. 17:7, 8.

A HI NGE YI TWISISI HI KU HELELA NDLELA LEYI YEHOVHA A HI TIVAKA HA YONE

16. Hi lani swi tsraliwiki ha kone ka Amapsalma 139:1-6, i yini leswi Yehovha a swi tivaka ha hine nakone ku tiva leswo swi ku yentxa u titwisa kuyini?

¹⁶ Dondzra Amapsalma 139:1-6. Yehovha Mutumbuluxi wezru a tiva hinkwaswu ha hine, a tiva leswi hi yentxaka hi yanakanya ni ku yentxa mintxhumu hi ndlela ya kukazri. Handle ka leswo, a tiva leswi hi swi hlayaka ni leswi nga timbilwini tezru. Nakone a tiva hinkwaswu leswi hi swi yentxaka ni leswi hi susumetelaka ku yentxa mintxhumu hi ndlela leyo. Hi lani Hosi Davhida a hlayiki ha kone, Yehovha minkama hinkwayu a lulamele ku hi pfuna. Swa hlamalisa ku tiva leswaku Yehovha Hosi ya wuyaku hinkwabyu, Lwe wa ntamu hinkwawu ni Muvumbi wa tilo ni misava a zron’weka ngopfu ha hine! Davhida a te: ‘A mativela lawo i mahlolana ku mine. Ma tlakukile, ndzra hluleka ku ma kuma.’—Amaps. 139:6.

17. Ha yini swi nga hi kazratelaka ku pfumela leswaku Yehovha a hi tiva hi lani ku heleliki?

¹⁷ Swi nga yentxeka hi kola ka ndlela leyi hi kulisiwiki ha yone, mahanyela yezru ni leswi a hi swi kholwa swi hi kazratela ku vona Yehovha swanga Papayi lweyi a nga ni lizrandzru lweyi a zron’wekaka ha hine. Kumbexana hi kola ka swihoxo leswi hi swi yentxiki nkameni lowu khalutiki hi nga ha yanakanya leswaku Yehovha a nga swi djuli ku hi tiva nakone a le kule na hine. Nambi Hosi Davhida minkama yin’wana a a titwa hi ndlela leyo. (Amaps. 38:18, 21) Mhunu lweyi a tikazrataka akuva a txintxa ndlela leyi a hanyaka ha yone akuva a hanya hi ku landzra minsinya ya milawu ya Xikwembu Nkulukumba, a nga ha tivutisa leswi: ‘Loko Yehovha nakunene a ni twisisa, ha yini a yimela kuva ni txintxa ndlela leyi ni yi vonaka yi yampswa yi tlhela yi ni nabyalela kuva ni hanya ha yone?’

18. Hi pfunekisa kuyini hi ku tiva leswaku Yehovha a hi tiva ku yampswa ku tlula ndlela leyi hi titivaka ha yone? (Tlhela u vona ni mifoto.)

¹⁸ Hi nga dondzra ku pfumela leswaku Yehovha a hi tiva ku yampswa ku tlula hine vinyi ni leswaku a vona leswinene kwezru ni leswi hine hi kalaka hi nga swi voni. Nambileswi a vonaka swihoxo swezru a tlhela a twisisa ndlela leyi hi titwaka ha yone ni ndlela leyi hi yentxaka mintxhumu ha yone, awa hi zrandzra. (Rom. 7:15) Loko hi twisisa ndlela leyi Yehovha a hi tivaka ha yone ni ku vona leswi hi kotaka ku swi yentxa, leswo swi hi nyika ntamu wa kuva hi mu tizrela hi ku dumbeka na hi nyonxile.

19. I yini leswi hi tiyisekaka ha swone mayelanu na Yehovha?

¹⁹ A hi na ku ganaganeka leswaku Yehovha i lizrandzru. (1 Yoh. 4:8) Hinkwaswu leswi a hi byelaka kuva hi swi yentxa kumbe kuva hi nga swi yentxi, a hi byela hi kola ka leswi a hi zrandzraka ni hi kola ka leswi a djulaka leswaku hi va ni wutomi bya ku nyonxisa. Ha swi tiva leswaku Yehovha a djula leswaku hi va ni wutomi lebyi nga helikiki. Akuva a yentxa leswo swi koteka, a hi hambele lulamiselo dzra xitizrulo. Lulamiselo ledzro dzri hi tiyisekisa leswaku nambileswi hi nga vhanu va ku kala ku hetiseka, hi nga swi kota ku tizrela Yehovha hi ndlela leyi mu nyonxisaka. (Rom. 7:24, 25) Ha swi tiva leswaku “Xikwembu Nkulukumba i mukulu ku tlula timbilu tezru nakone a tiva mintxhumu hinkwayu”. (1 Yoh. 3:19, 20) Yehovha a vona hinkwaswu leswi swi hi humelelaka nakone awa tiyiseka leswaku hi nga swi kota ku yentxa ku zrandzra kwake.

20. I yini leswi taka hi pfuna kuva hi nga kazrateki ngopfu hi leswi hi kalaka hi nga swi tivi?

²⁰ Yehovha a hi byela hinkwaswu leswi hi fanelaka ku swi tiva. Xileswo a hi fanelanga ku kazrateka hi leswi hi kalaka hi nga swi tivi, a matsrhan’wini ya leswo hi fanela ku beka miyanakanyu yezru ka leswi nga swa lisima hakakunene. Loko hi yentxa leswo hi va na hi kombisa leswaku ha mu dumba Yehovha, ‘lweyi a hetisekiki a ku tiveni’. (Yb. 36:4) Nambileswi hi kalaka hi nga tivi mintxhumu yinyingi swoswi, hi yimela ku kuma wutomi lebyi nga helikiki lani hi taka dondzra mintxhumu leyimpshwa mayelanu ni Xikwembu Nkulukumba wezru.—Ekles. 3:11.