I Mani Lweyi A Vumbiki Xikwembu Nkulukumba?

Yanakanya hi tatana lweyi a nga ku buleni ni n’wanake wa 7 wa malembe. A mu byela leswi: “Khale ngopfu swinene Xikwembu Nkulukumba a tumbuluxe misava ni hinkwaswu leswi nga ka yone, dambu, n’weti ni tinyeleti.” A ntsrhakunyana ka loko n’wana lweyi a yanakanyisise ha hombe hi leswi a byeliwiki swone a hambela tatana wake xivutiso xa ku fana ni lexi: “Tatana, Xikwembu Nkulukumba ke, hi mani lweyi a mu vumbiki?”

“Hi loko tatana wake a mu hlamula a ku: Xikwembu Nkulukumba a nga vumbiwanga hi mhunu.” “Yene a ve kone ku sukela khale.” Ntlhamuxelo lowo wu nga ha yanelisa ntsrongwana lweyo hi nkama wolowo. Kambe loko a ya a kula xivutiso lexo xi nga ha mu kazrata. A nga swi twisisi leswaku swi nga kotekisa kuyini akuva ntxhumu wa ku kazri wu nga li na masungulo. Nambi wuyaku byi ve ni masungulo. Hi loko a ya a tivutisa a ku: ‘Xikwembu Nkulukumba ke a pfa kwini?’

He yini hlamulu ya Bibele? Ya fana ni leyi tatana a yi nyikeliki ka n’wanake. Moxe a tsrale a ku: ‘Yehovha, . . . a tinhava ti nga si na tumbuluka na misava mi nga si va kone, wene u Nkulukumba hi minkama ni hi laha ku nga helikiki.’ (Amapsalma 90:1, 2) Hi lani ku fanaka muprofeta Ezaya a te: ‘Xana a ku swi tivanga, a ku swi yingelanga xana? Yehovha i Xikwembu Nkulukumba lweyi wa ku ka a nga heli.’ (Ezaya 40:28) Hi lani ku fanaka papela dzra Yuda dzri tlhamuxela Xikwembu Nkulukumba lweyi a ‘nge ke na ku hela.’—Yuda 25.

Tindzrimana leti ti hi komba leswaku Xikwembu Nkulukumba i ‘Hosi ya minkama’, hi lani Pawulo a tsraliki ha kone. (1 Timoteo 1:17) Swi tlhamuxela yini leswo? Leswo swi tlhamuxela leswaku Xikwembu Nkulukumba a ve kone, swi nge na mhaka ni leswaku ku ni mintxhumu leswi vumbiwiki khale ngopfu swinene. Nakone a ha ta tama a va kone. (Apfuletelo 1:8) Hi ndlela leyo a vitaniwa lwe wa ntamu hinkwawu hi kola ka leswi a nga kone hi minkama.

Ha yini swi hi bindzrela ngopfu kuva hi twisisa mhaka leyi? Swi hi bindzrela hikusa leswi wutomi byezru byi gomiki swi hi yentxa leswaku hi vona nkama hi ndlela leyi hambaniki ni leyi Yehovha a wu vonisaka xiswone. Swanga hi Xikwembu Nkulukumba lweyi a nge ke na wugamu, 1.000 wa malembe i siku dzrin’we ka yene. (2 Petros 3:8) Hi xikombiso a ntente lowu wo ko hanya kolomu ka 59 wa masiku xana wu nga swi twisisa leswaku a vhanu va hanya kolomu ka 70 ku ya ka 80 wa malembe? Nikutsrongo. Xileswo, Bibele dzri tlhamuxela leswaku loko hi dzringanisiwa ni muvumbi wezru lwenkulu hi fanisiwa ni mintete. Nambi ndlela leyi hi pimisaka ha yone a hi nge yi dzringanisi ni ndlela leyi Yehovha a pimisaka ha yone. (Ezaya 40:22; 55:8, 9) Swa twala loko ku ni mintxhumu yin’wana leyi hi nga yi twisisiki ha hombe mayelanu na Yehovha.

Nambi leswi swi kazrataka ku swi twisisa, a mhaka ya leswaku ku ni muvumbi ya twala. Loko ku li leswaku ku ni lweyi a vumbiki Xikwembu Nkulukumba, mhunu lweyo hi ye mutumbuluxi. Kambe, hi lani Bibele dzri hlayaka ha kone, i Yehovha ‘mutumbuluxi wa hinkwaswu.’ (Apfuletelo 4:11) Handle ka leswo, ha swi tiva leswaku a wuyaku byi ve ni masungulo. (Genesis 1:1, 2) Xana wuyaku byi pfa kwini? Muvumbi wa byone a a fanela ku va kone ku sungula. Nakone a ve kone na swivumbiwa leswi tlhazrihiki swi nge si va kone, swa ku fana ni n’wanake kun’we ni tintsrumi. (Yob 38:4, 7; Ba-le-Kolosa 1:15) Swa twala leswaku na a nga si na sungula ku vumba mintxhumu a a li wuswake. Hi ndlela leyo a swi nge twali ku hlaya leswaku ku ni ntxhumu lexi mu vumbiki hikusa a ku nge na ntxhumu lexi a xi ta mu vumba.

Ku va kone kwezru ku patsra ni wuyaku hinkwabyu i wumboni bya leswaku ku na Xikwembu Nkulukumba wa hi lani ku nga helikiki. Lweyi a vumbiki wuyaku hinkwabyu a tlhela a byi nyika milawu leyi yi byi fambisaka, hikusa yene a kone hi lani ku nga helikiki. Hi yene ntsena a nga ni wuswikoti bya nyika wutomi swivumbiwa hinkwaswu.​—Yob 33:4.