NDZRIMA 35

Ni nga va munghanu wa Xikwembu Nkulukumba hi ndlela yini?

Ntsrhaku ka loko a humeleliwe hi nghozi, Jeremy a vone a lisima dzra kuva munghanu wa Xikwembu Nkulukumba. A te: “Loko ni tlhanganise 12 wa malembe, Papayi a tsrukule ndangu. Wusiku byin’wana ni khongotile na nili a mubedweni, ni kombela Yehovha a pfuna Papayi akuva a tlhelela a kaya.”

Na a nge he na dumbu, Jeremy a sungule a ku dondzra Bibele. A nyonxe ngopfu loko a gungule a dzrungula ledzri nga ka Amapsalma 10:14. A ndzrimana leyo yi hlaya leswi ha Yehovha: ‘Lwa nga ni khombo a tidumbelile wene, hi wene lwa nga muyimeli wa swizrombe.’ Jeremy a te: “Ni twe Yehovha a khanela na mine, a ni komba leswaku a djula ku ni pfuna, swanga Papayi wanga. Hi wini Papayi wa ku yampswa ku tlula yene lweyi a ta va na yene?”

SWI nga yentxeka u li ka xiyimu xa ku fana ni xa Jeremy kumbe im-him. A Bibele dzri komba leswaku Yehovha a djula leswaku wene u va munghanu wake. Hi lani ku fanaka a Bibele dzri li: ‘Tsrhindzrekelani ka Xikwembu Nkulukumba; na yene a ta tsrhindzrekela ku wine.’ (Yakob 4:8) Yanakanya hi leswi mazritu lawa ma tlhamuxelaka swone: Nambiloko u nga koti ku mu vona​—ni loko a nga fani na wene hi matlhelo hinkwawu​—Yehovha Xikwembu Nkulukumba a ku zramba leswaku u va munghanu wake!

Kambe akuva u va munghanu wake swi djula u tikazrata. Hi xikombiso: Loko u byale xiluva a xi nge kuli ha wuswaxone. Akuva xi kula, u fanela ku xi txheletela, u xi beka mbangwini lowu xi ta kulaka hi ndlela leyinene. Swi hi lani ku fanaka ni wunghanu byaku na Xikwembu Nkulukumba. U nga yentxa yini akuva wunghanu lebyi byi ya byi kula?

Lisima dzra ku dondzra Bibele

A wunghanu byi patsra mintxhumu yibimdzri​—ku yingiseta ni ku khanela. Swi hi lani ku fanaka ni wunghanu na Xikwembu Nkulukumba. Ku dondzra ni ku yanakanyisisa hi Bibele i yin’wana ya tindlela ta ku yingiseta leswi Xikwembu Nkulukumba a djulaka ku hi byela swone.​—Amapsalma 1:​2, 3

I ntiyiso leswaku ku dondzra ku nga va ntxhumu lowu u nga wu zrandzrikiki ku wu yentxa. Vampswha vanyingi va zrandzra ku sixtira televhizawu, ku tha magemi, nambi ku heta nkama ni vanghanu. Kambe loko wene u djula ku txutxela wuxaka byaku na Xikwembu Nkulukumba a ku na ndlela yimbeni. Swi ta djula u mu yingiseta hi ku dondzra a zritu dzrakwe.

U nga kazrateki, kambe a ku dondzra Bibele a swi fanelanga swi va ntsrhwalu. U nga swi zrandzra ku dzri dondzra​—nambi loko u tivona na u nga li mhunu lweyi a zrandzraka ku dondzra. A ntxhumu wa ku sungula lowu u faneliki u wu yentxa i ku timbekela nkama akuva u dondzra Bibele. “Ni tihambele xiyimiso”, ku hlaya mumpswha lweyi a vitaniwaka Laís. “A ntxhumu wa ku sungula lowu ni wu yentxeka loko dzri xile i ku dondzra ndzrima ya Bibele.” Maria lweyi a nga ni 15 wa malembe a a ni xiyimiso lexi hambaniki. Yene a li: “Siku dzrin’wana ni dzrin’wana na ni nge si na yetlela ni dondzra xiyenge xa Bibele.”

Akuva u sungula xiyimiso xa ku dondzra, vona bokisi ledzri nga ka tluka 292. U gama, u hlawula nkama lowu u taka wu heta 30 minuto na wu dondzra a Zritu dzra Xikwembu Nkulukumba.

․․․․․

Ku yentxa xiyimiso ko va masungulo ntsena. Nkama lowu wene u sungulaka ku dondzra u nga xiya leswaku a hi minkama hinkwayu swi nabyalaka ku dondzra Bibele. Swi nga yentxeka u pfumelelana ni mazritu ya Jezreel, lweyi a nga ni 11 wa malembe lweyi a swi hlayaka na swi sukela mbilwini. A te: “Swiyenge swin’wana swa Bibele swa kazrata ku swi dondzra nakone a swi nyonxisi.” Loko na wene u pimisa hi ndlela leyi fanaka u nga godoli. Dondzra Bibele siku ni siku na wu dzrimuka leswaku lowu i nkama lowu u tibekiseliki akuva u yingiseta Yehovha Xikwembu Nkulukumba munghanu waku. Loko u ya u tikazrata, a dondzro ya Bibele yi ta va leyi nyonxisaka yi tlhela yi ku tisela mabindzru!

Xikhongoto I Xa Lisima

Hi vulavula na Xikwembu Nkulukumba hi ku tizrisa xikhongoto. Yanakanya hi nyiko ya lisima ku nga xikhongoto. U nga vulavula na Yehovha nkama wun’wana ni wun’wana, a nhlikanini kumbe a wusikwini. Minkama hinkwayu Yehovha a wa kumeka. Handle ka leswo, a djula ku twa leswi wene u djulaka ku mu byela.Hi mhaka leyo, Bibele dzri ku kutxaka dzri ku: “A timhakeni hinkwatu a ku kombela kwenu a ku tibyiwe hi Xikwembu Nkulukumba, hi ku khongota , ni ku kombela ni ku tlangela.” ​—Ba-le-Filipi 4: 6.

Leswo swi nga patsra swikazratu swaku ni swivileleko swaku ni mintxhumu leyi u nga tlangelaka ha yone. Xana a hi ntiyiso leswaku wa va tlangela vanghanu va ku hi mintxhumu leminene va ku yentxelaka yone? Kutani ke tlangela na Yehovha lweyi a ku yentxeliki mintxhumu ya ku tala ku tlula ntxhumu wini na wini lowu munghanu wa ku a a ta ku yentxela wone.​—Amapsalma 106:1.

Swanga hi lani ndzrimana leyi yi kombaka ha kone ku ni swa ku tala u nga bulaka na Yehovha ha swone.

․․․․․

Handle ka ku ganaganeka minkama yinyingi u bindzriwa hi ku hlatiyela ni ku txhava. Amapsalma 55:22 dzri li: ‘Nyiketa Yehovha manhayela yaku yene a ta ku seketela; a nga ka a nga pfumeli leswaku mululami a tsrekatsrekisiwa.’

Longoloxa mintxhumu yin’wana leyi Yehovha a ku yonxisaka ha yone.

․․․․․

Lani hansi tsrala swikazratu swaku leswi u nga swi hlayaka ka xikhongoto.

Leswi Hi Tlhangavetanaka Na Swone

Ka wunghanu byaku na Xikwembu Nkulukumba ku ni ntxhumu lowu nga fanelangakiki ku wu dzrivala. Mupsalma Davhida a tsrale a ku: ‘Nampswani ,mi vona leswaku Yehovha i munene.’ (Amapsalma 34:8) Loko Davhida a tsrale Amapsalma 34 a ha ku khaluta ka xiyimu lexi txhavisaka. A a tsrutsruma hosi Sawulo lweyi a a djula ku mu dlaya​—lowu a ku li ndzringo lowukulu kambe ntsrhaku a vone swi yampswa ku ya tumbela ka valala vake ku nga Vafilista. Leswi a a langusane ni lifu, hi wutlhazri a tiyentxe xiphumta xileswo a kote ku huluxa wutomi byake.​—1 Samuel 21:10-​15.

A ku sale kutsrongo akuva va mu dlaya Davhida, kambe a nga yanakanyanga leswaku a ku huluka koloko ku ve hi wutlhazri byake. A lidzrumu hinkwadzru a dzri nyikele ka Yehovha. Loko buku dzra Amapsalma ledzri hi khaneliki ha dzrone hala henhla dzri sungula dzri li: ‘Ndzri djulile Yehovha kutani a ni yangulile, a ndzri huluxile a ku txhaveni kwanga hinkwaku.’ (Amapsalma 34:4) Ku ve hi leswi mu yentxekeliki Davhida, a kutxiki vambeni a ku ‘nampswani mi vona leswaku Yehovha i munene.’a

Xana ku ni leswi u tlhangavetanaka na swone a wuton’wini, swi ku yentxaka u tiyiseka leswaku Yehovha awa ku hlayisa? Loko ku li ina, tsrala hi mhaka leyo lani hansi. Kambe mimfambu leyo a yi fanelanga yi va leyi tlulaka mpimu. Yanakanya hi matovoko ya siku ni siku lawa u ma kumaka, mambeni ma nga ha khaluta na u nga swi xiyanga.

․․․․․

Swi nga yentxeka na vapswele vaku va ku dondzrisile Bibele. Loko swilitanu ledzro ku ve tovoko. Nambitanu wene ha byaku u fanela ku titxutxelela wunghanu byaku na Xikwembu Nkulukumba. Loko u nge si na swi yentxa leswo, a madzrungula ma nga ka nhlokomhaka leyi ma nga ku pfuna akuva u sungula. Yehovha a ta ku tovokisa a ku tikazrata kwaku. A Bibele dzri li : “Yanani mahlweni mi kombela, kutani mi ta nyikiwa; yanani mahlweni mi djuletela kutani mi ta swi kuma.”​—Matewu  7:7.

LOKO U DJULA KU TIVA LESWI YENGETELEKIKI MAYELANU NI MHAKA LEYI VONA XIYENGE 1 TINDZRIMA 38 NI 39

[Ntlhamuxelo wa le hansi]

TSRALWA

“Va nyonxa lava tikazratelaka ku va ni wuxaka na Xikwembu Nkulukumba.”​—Matewu 5:3.

XIDZRINGANYETO

Dondzra ntsena mune wa matluka ya Bibele hi siku ,xileswo u ta dzri heta ndzreni ka lembe dzrin’we.

XANA A WU SWI TIVA . . . ?

Leswi u dondzraka a buku ledzri nakone u pfumelelanaka ni milawu ya dzrone leyi kumekaka ka Bibele, swi kombisa leswaku Yehovha awa zron’weka hi wene.​—Yohan 6:44.

LESWI NI TIYIMISELIKI KU SWI YENTXA!

Akuva ni susa londzrovoto ka dondzro yanga ya Bibele ni ta ․․․․․

Akuva ni hamba swikhongoto swanga siku ni siku ni ta ․․․․․

A ni nyonxela ku vutisa vapswele vanga mayelana ni mhaka leyi ․․․․․

A WU TA HLAMULISA KUYINI?

● U nga yentxa yini akuva dondzro yaku ya Bibele yi va leyi nyonxisaka?

● Ha yini Yehovha a djula ku yingela swikhongoto swa vhanu va ku kala ku hetiseka?

● U nga yentxa yini akuva u yampswisa swikhongoto swaku?

[Ntlhamuxelo wa ku koka mahlo]

A nkama lowu a ni li mumpswha, ka swikhongoto swanga a no tsrhamela ku hlaya swo swa swin’we. Swoswi ni tsrhamela ku khongota hi mintxhumu ya yinene ni ya ku biha leyi ni humelelaka siku dzrin’wana ni dzrin’wana. Masiku a ma fani, leswo swi ni pfuna akuva ni nga hlayi mintxhumu yo ya yin’we ka swikhongoto swanga.’’​—Eve

[Bokisi/Mufoto]

Kambisisa Bibele dzraku

1. Langa wudzrunguli dzra Bibele ledzri u nyonxelaka ku dzri dondzra. Khongota u kombela wutlhazri akuva u twisisa mhaka.

2. Dondzra dzrungula hi wunyaminyami. U nga tsrutsrumi a nkama lowu u dondzraka, yanakanya hi leswi yentxekiki. Swi voni hi mahlo ya miyanakanyu leswi yentxekaka: Zama ku vona leswi yentxekaka, ku yingela mazritu ya vhanu, ku twa nun’hwelo wa moya lowu hungaka, swakuda ni swin’wana. Yentxa dzrungula dzri va ledzri hanyaka

3. Yanakanya hi leswi u hetiki ku swi dondzra. Tihambe swivutiso swa ku fana ni leswi:

● Ha yini Yehovha a patsre a dzrungula ledzro a zritwini dzrake?

● Hi vani vhanu lava va fanelaka ku yetiseliwa, nakone hi swini a swikombiso hi basopisiwaka ka swone?

● Hi tini tidondzro ta lisima leti ni nga ti susaka a ku dondzreni?

● Xana a dzrungula ledzro dzri ni dondzrisa yini ha Yehovha ni ndlela leyi a yentxaka mintxhumu ha yone?

4. Hamba xikhongoto xa ku goma ka Yehovha. Mu byele leswi u swi dondzriki ni ndlela leyi u djulaka ku dzri tizrisa a wutivi bya kone a wuton’wini byaku. Nkama hinkwaswu tlangela Yehovha hi nyiko leyi a ku hananiki yone​—ku nga Zritu dzrake, a Bibele dzra ku Xwenga!

[Mufoto]

‘A zritu dzraku i motsre a milengeni yanga, ni ku vaninga a ndleleni yanga.’​—Amapsalma 119:105.

[Bokisi/Mufoto]

Zrangisa swa lisima ngopfu

U pfumala nkama wa ku Khongota? A wu na nkama wa ku dondzra Bibele? Hi ntolovelo leswo swi ya hi leswi u swi zrangisaka wuton’wini.

Dzringisa ku yentxa leswi: Txhela mazribye ya makulu, ya ku hambana hambana a bakitini. Txhela misava dzri za dzri tala. Swoswi u ni bakiti ledzri taliki hi mazribye ni misava.

Swoswi swi halati, kambe hlayisa mazribye ni misava yoleyo hi tlhelo. Swoswi zranga hi misava: Txhela misava ka bakiti u gama nghenisa mazribye. A ku salanga wumbangu, a hi swone? Hi mhaka ya leswi u nga zranga hi ku txhela misava.

Hi nga dondzra yini? Bibele dzri li: ‘Hlawula leswi swa ku lulama.’ (Ba-le-Filipi 1:10) Loko u zrangisa mintxhumu leyitsrongo wuton’wini, ya ku fana ni ku hungata swi ta voneka ingiki a wu na nkama lowu dzringanaka wa ku wu tizrisela mintxhumu ya lisima—mintizro ya moya. Loko u landzrela xilayelo lexo xa Bibele u ta gungula leswaku u ni nkama wa ku wu tizrisela timhaka ta Mfumu ni wa ku hungata. Swo djula ntsena u tiva lexi u fanelaka ku xi zrangisa a bakitini!

[Mufoto]

Ku fana ni xiluva, wunghanu byezru na Xikwembu Nkulukumba dzri djula ku txutxeliwa akuva dzri kula