A Ni Fambafamba Ni Xibalesa

WUTOMI BYANGA BYA KHALE:

Ni pswaliwe ni tlhela ni kulela ka swidoropana swa Roma, a mbangwini lowu a ku ni swisiwana leswi a swi hamba mintizro ya ku dzreleka. Wutomi a byi bindzra. A ni zanga ni mu tiva mamana nakone tatana na mine a hi nga twanani. Loko ni ya ni kula, ni dondzre ndlela ya ku tihanyisa nambi loko xiyimu xi bindzra.

Loko ni ve ni 10 wa malembe ni sungule ku yiva. Loko ni ve ni 12 wa malembe, ni suke kaya hi khambi dzra ku sungula. Tatana a ni landzre makhambi manyingi a xikwadra xa mapholisa a ni buyisa kaya. Hakanyingi a ni holovisana nakone a ni li mhunu wa tihanyi ni tlhela ni hlundzrukela vhanu hinkwavu. Loko ni ve ni 14 wa malembe ni zruzre a kaya. Ni sungule ku tizrisa swidzrahadzrahana ni va ni ya hanya xitaratwini. Leswi a ni nge na ka ku yetlela, a ni pandzra mimovha ya vhanu kutani ni yetlela ka yone dzri za dzri xa. Kutani ni pfuka ni famba ni djuletela mati akuva ni hlamba.

Ni ve muyivi lwenkulu swinene, a ni wutlela vhanu minkwama ni tlhela ni hlasela mimiti wusikwini. Ni sungule ku va ni ndhuma ya ku biha nakone hi ku kahlula ni vitaniwile leswaku ni tipatsra ni ntlawa lowu a wu dumile hi ku yiva, lowu yentxiki leswaku ni sungula ku hlasela mabanku. Hikola ka xixixi lexi a ni li na xone, hi ku kahlula va sungule ku ni bekela xitxhavu ka ntlawa wolowo. Minkama hinkwayu a ni fambafamba ni xibalesa xanga, a ni xi beka hansi ka xidamu loko ni yetlela. Wugevengu, swidzrahadzrahana, ku yiva, nhlambha ni mahanyela ya ku biha, swi ndzruluke mukhuva a wuton’wini byanga. Mapholisa a ma tsrhamela ku ni hlota. Ni pfaleliwe makhambi ya ku hlawanyana nakone ni hete malembe na ni li djele.

NDLELA LEYI BIBELE DZRI TXINTXIKI WUTOMI BYANGA HA YONE:

Siku dzrin’wana loko ni humexiwe djele, ni yendzrele titiya wanga lwentsrongo makwavu wa mamana. Lexi a ni nga xi tivi hi leswaku yene ni vanakwe vabidzri a va li Timboni ta Yehovha. Va ni zrambile leswaku ni famba na vone a mintlhanganwini. Hi kola ka ku navela ku swi tiva, ni fambe na vone. Loko hi tlhasa a Ndlwini ya Wugandzreli, ni sindzrise leswaku ni tsrhama kusuhi ni nyangwa akuva ni ta kota ku vona lava nghenaka ni lava humaka. A ni fambe ni xibalesa xanga.

Ntlhanganu wolowo wu txintxe wutomi byanga. Ni titwe ingi hi loko no va ka planeta dzrin’wana. Vhanu va kone a va ni lizrandzru, xinakulobye nakone a va n’wayitela loko va ni losa. Na ha yi dzrimuka ha hombe ndlela leyi Timboni ti ni khomiki ha yone. Nakunene, a ni li mbangwini lowu a wu hambane swinene ni leyi a ni yi tolovelile.

Ni sungule ku dondzra Bibele ni Timboni ta Yehovha. Loko ni ya ni dondzra, ni ye ni xiya leswaku a ni fanela ku txintxa hi ku helela ndlela leyi a ni hanya ha yone. Ni yingisete xilayu lexi tsraliwiki ka Amaproverbia 13:20 lexi liki: ‘Lwa fambaka ni tintlhazri a ta tlhazriha; kambe lwa tolovelanaka ni swihunguki a ta honeka.’ Ni swi vonile leswaku a ni fanela ku titsravuxa ni ntlawa luwa wa vayivi. A swi nga nabyali ku yentxa leswo kambe hi ku pfuniwa hi Yehovha ni swi kotile.

Nakone ni tlhele ni tibasisa mizrini. Ntsrhaku ka ku yentxa minzamu leyo, ni tsrhike ku dzraha fole ni swidzrahadzrahana swin’wana. Ni tsremete misisi yanga, ni txukumeta switlan’wana swanga swa tindleve nakone ni tsrhike ku vulavula nhlambha. Ledzro a a li khambi dzra ku sungula wuton’wini byanga ni nga kota ku lawula swiyentxo swanga.

Swanga hi leswi a ni ngi ngi dondzra, a swi ni bindzrela swinene ku yingiseta loko ni li kazri ni dondzra Bibele. Nambitanu, loko ni ya ni hamba ku tikazrata, hakutsrongotsrongo ni sungule ku zrandza Yehovha nakone swin’wana swi sungule ku txintxa ndzreni kwanga—ni sungule ku kingindzriwa hi lipfalu. Hakanyingi, a ni tivona hi ndlela leyi bihiki, a ni nga dumbi leswaku Yehovha a ta txhuka a ni dzrivalela ka hinkwaswu swa ku biha leswi ni swi yentxiki. Hi nkama wolowo, ni txhaveleleke swinene loko ni dondzra hi mhaka ya loko Yehovha a dzrivalela Hosi Davhida ntsrhaku ka loko a hambe swidoho leswikulu.​—2 Samuel 11:​1–12:​13.

Xikazratu xin’wana lexi a ni li na xone, a a li ku nghena hi muti ni muti ni zrezrela van’wana tindondzro leti a ni pfumela ka tone. (Matewu 28:19, 20) A ni txhava leswaku ni ta tlhangana ni mhunu lweyi ni samiki ni mu vavisa kumbe lweyi ni mu khunguvanyisiki hi ndlela ya kukazri nkameni lowu khalutiki. Kambe hakutsrongotsrongo, ni kote ku hlula ku txhava. Ni kume ku yaneliseka ka ntiyiso loko ni li kazri ni pfuna van’wana ku dondzra hi Tatana wezru wa le tilweni lweyi a dzrivalelaka hi ku helela.

NDLELA LEYI NI PFUNEKIKI HA YONE:

Ku dondzra hi Yehovha swi huluxe wutomi byanga. Vanyingi va khale ka vanghanu vanga va file kumbe va le djele, kambe mine ni hanya wutomi bya ku nyonxisa hakunene, nakone ku ni wumundzruku lebyi ni byi yimeliki hi manyawu. Ni dondzre ku titsrongahata ni ku yingiseta nakone ni kote ku lawula mahlundzru yanga. Xileswo, ni ni wuxaka lebyinene ni vhanu van’wana. Ni tekane na Carmen, nkatanga wa ku xonga nakone hi nyonxile. Hawubidzri byezru, hi kume ku nyonxa lowukulu loko hi li kazri hi pfuna van’wana leswaku va dondzra Bibele.

Swoswi ni hanya hi nyuku wanga nakone minkama yin’wana ntizro lowu ni wu yentxaka wu patsra ku kukula mabanku kambe a na ha ma hlaseli!