Mintlhamuxelo Ya Xibukwana Xa Wutomi Ni Wutizreli Byezru
2-8 KA SETEMBRU
WUKOSI BYI NGA BIBELENI | BA-HEBERU 7-8
“Muprista Hi Laha Ku Nga Helikiki Hi Nawu Wa Melkizedeki”
Perspicaz vol-2 p. 798 §§ 1-2
Melkizedeki
Hosi ya khale ka muti wa Salem tlhelo ‘muprista wa Xikwembu Nkulukumba Lwa Nga Henhla-Henhla,’ Yehovha. (Gn 14: 18, 22) Bibele dzri vulavulaka ha yene swanga muprista hi khambi dzra ku sungula; a ve ka xikhundla lexo ku nga si na tlhasa lembe dzra 1933 mahlweni ka N.Y.. Leswi Melkizedeki a a li hosi ya Salem, leswi tlhamuxelaka ‘Ku Zrula’, mupostola Pawulo a te i ‘Hosi Ya Ku Zrula’ nakone hi ku ya hi vito dzrakwe i ‘Hosi Ya Wululami’. (Hb 7:1, 2) Muti wa khale wa Salem wu tiviwa na wu li wone wu nga va ntsindzra wa doropa ledzri ntsrhaku dzri tiviwiki swa nga Yerusalema, nakone vito dzra wone minkama min’wana dzri vitaniwe swanga ‘Salem.’—Ps 76:2.
Ntsrhaku ka loko Abrahamu a hlule Kedor-Laomer ni tihosi leti afaka e natu, mupatriarka Abrahamu a ye a nkhinsini wa Xave, kumbe ‘nkhisini lowu nga wa hosi’. A nkhisini lowo, Melkizedeki a ‘buyise kati ni vhinya’ a tlhela a tovokisa Abrahamu a ku: ‘A ku tovokisiwe Abrahamu hi Xikewmbu Nkulukumba lwa nga Henhla-Henhla, a n’winyi wa matilu ni misava; a ku tovokisiwe Xikwembu Nkulukumba lwa nga Henhla-Henhla, lwa nyiketiki valala va ku a mavokweni yaku’. Abrahamu a nyike hosi-muprista a ‘swa wukhume ku hinkwaswu’ ku nga swa ‘xisangwana [ku phangiwa]’ leswi a swi kumiki loko a hlule tihosi leti afaka e natu.—Gn 14:17-20; Hb 7:4.
Perspicaz vol-2 p. 799 § 3
Melkizedeki
Xana Melkizedeki afa ‘a nge na ku sungula ka masiku, a nge na wugamu bya wutomi’ hi ndlela yini?
Pawulo vulavule hi ntxhumu lowu xiyekaka mayelanu na Melkizedeki loko a ku: ‘Lwe faka a nge na tatana, a nge na mamana, a nge na ku hlayeliwa vakokwana, a nge na ku sungula ka masiku, a nge na bugamu bya wutomi, a fanisiwe ni N’wana wa Xikwembu Nkulukumba, a tsrhama e muprista hi laha ku nga helikiki.’ (Hb 7:3) Hi ku fanana ni vhanu van’wana, Melkizedeki a pswaliwile nakone hi wugamu a file. Nambitanu, mavito ya vapswele vakwe a ma hlayiwi, vakokwana vakwe mfuzri a va boxiwi nakone Bibele a dzri hlayi ntxhumu hi masungulu ni wugamu bya wutomi byakwe. Xileswo, Melkizedeki afa a ta mu yimela ha hombe Yesu Kriste, lweyi a nga muprista hi la ku nga gamikiki. Swanga hi leswi Melkizedeki afa a nge na vakokwana nambi vana ka wuprista byakwe, na yene Yesu a nga vanga na lweyi a viki muprista lwenkulu ku fana na yene. Bibele dzri tlhela dzri hlaya leswaku a ku nga ti va na mumbeni lwa taka mu pfaleta. Ntlhantakubidzri, nambi leswi Yesu a pswaliwiki ka lixaka dzra Yuda ni ka ndangu wa wuhosi wa Davhida, vakokwana vakwe va nyama a va na xiyenge ka wuprista byakwe nakone a ka vanga hi ku zrandzra ka mhunu leswaku a gqoviwa swanga hosi tlhelo muprista hi nkama wun’we. Leswi swi kotekile hi leswi Yehovha a hlambanyiki.
Perspicaz vol-2 p. 798 § 3
Xikombiso Xa Wuprista Bya Kriste. Ka wuprofeta byin’wana bya Wumesiya, Yehovha a hlambanyele “Hosi” ya Davhida a ku: ‘U muprista ku kondzra ku ya va ha khale, hi mayentxela ya Melkizedeki.’ (Ps 110:1, 4) Mazritu lawa ma yentxe va Heberu va twisisa leswaku Mesiya afa a li yene lweyi a a ta nyikiwa wuprista ni wuhosi hi nkama wun’we. Mupostola Pawulo, ka papela dzrawe ka va Heberu, a suse ku ganaganeka hinkwaku mayelanu ni lweyi ku profetiwiki ha yene, loko a khanela hi ‘Yesu . . . a nga yentxiwa muprista lwenkulu hi laha ku nga helikiki hi nawu wa Melkizedeki.’—Hb 6:20; 5:10; vona PACTO.
Djulisisa Tindzralama Ta Moya
Sentinela 15/08/2000 p. 14 § 11
Switlhavelo Leswi Nyonxisaka Yehovha
Mupostola Pawulo a tsrale a ku: ‘A muprista wini ni wini lwenkulu a bekiwa akuva a humexa timhamba ni switlhavelo.’ (Ba-Heberu 8:3) Pawulo a hambanise magandzrelo lawa a ma yentxiwa hi muprista lwenkulu hi swiyenge swibidzri, ku nga ‘timhamba’ ni ‘switlhavelo’, kumbe ‘timhamba hi nkonta ya swihono’. (Ba-Heberu 5:1) Hi ntolovelo vhanu va nyikela swihiwa akuva va kombisa lizrandzru kumbe ku tlangela. Nakone van’wana va yentxa leswo kuva va txutxela xinghanu kumbe va djula ku yamukeliwa. (Genesis 32:20; Amaproverbia 18:16) Hi ku fanana, tinyiko tinyingi leti a ti tlhamuxeliwa hi Nawu a ti voniwa swanga ‘timhamba’ leswaku mhunu a kuma ku yamukeliwa ha Xikwembu Nkulukumba. Mhunu a a fanele ku hakela loko a tlule Nawu, nakone a a humexa ‘switlhavelo hi nkonta ya swihono’ akuva a lulamisa leswi a swi honiki. Mabuku ya Ntlhanu ya ku sungula ya Bibele, ngopfu-ngopfu buku dzra Eksoda, dzra Levitika ni dzra Atinhlayo, ma tlhamuxela swinyingi mayelanu ni switlhavelo ni magandzrelo ya mixaka-xaka. Nambi leswi swi nga ha hi bindzrelaka ku dzrimuka timhaka leti hinkwatu mayelanu ni switlhavelo, swi djula hi swi zronyelisisisa.
Perspicaz vol-3 p. 156 § 5
Xipfumelelano
Xana xipfumelelano xa Nawu xi ve xa ‘khale’ hi ndlela yini?
Xipfumelelano xa Nawu xi ve xa ‘khale’ loko Xikwembu Nkulukumba a tivise leswaku ku ta va ni xipfumelelano, hi ku tizrisa Yeremiya. (Yr 31:31-34; Hb 8:13) Hi 33 Nguveni Yezru, xipfumelelano xa Nawu xi helisiwile hi kola ka lifu dzra Kriste a mhandzrini ya nxanisa (Kl 2:14), xipfumelelano leximpshwa xi xi sivile.—Hb 7:12; 9:15; Min 2:1-4.
9-15 KA SETEMBRU
WUKOSI BYI NGA BIBELENI | BA-HEBERU 9-10
“Ntsrhuti Wa Matovoko Lama Taka”
Perspicaz vol-3 p. 242 § 2
Ku dzrivaleliwa
Hi ku ya hi nawu wa Xikwembu Nkulukumba lowu nyikiwiki va-Israyele, akuva mhunu a kota ku dzrivaleliwa xidoho ha Xikwembu kumbe hi makwavu, xa ku sungula a a fanela ku lulamisa xihoxo, hi ku ya hi leswi Nawu a wu swi hlaya, kutani ntsrhaku a ta nyikela mhamba ya ngati ka Yehovha. (Lv 5:5–6:7) Hi mhaka leyo nsinya wa nawu lowu Pawulo a wu hlayiki wu liki: ‘Mfuzri, hi nawu, ingi hinkwaswu swi basisiwa hi ngati; a handle ka ku halatiwa ka ngati, a ku na ku dzrivaleliwa ka swihono.’ (Hb 9:22) Hi ntiyiso wa kone, switlhavelo swa swihazri a swi nga ti susa xidoho ni ku hi nyika lipfalu ledzri basiki. (Hb 10:1-4; 9:9, 13, 14) Ku hambana ni leswo, a xipfumelelano leximpswha xi yentxe leswaku hi dzrivaleliwa swihono hi kola ka xitlhavelo xa xitizrulo xa Yesu Kriste. (Yr 31:33, 34; Mt 26:28; 1Ko 11:25; Ef 1:7) Loko a ve la misaveni, Yesu, a hanyisi lwa wonyaniki swizro, a kombisa leswaku a ni wuswikoti bya ku dzrivalela swihono.—Mt 9:2-7.
Mulandzeri Wa Mina p. 183 § 4
“Yana Mahlweni U Ni Landzrela”
A matsralwa a ma hi byeli txhumu hi loko Yesu a tlhasa matilweni, ndlela leyi a yamukeliwiki ni ku nyonxa ha yone loko a tlhela a vonana ni Tatana wakwe. Nambitanu, Bibele dzri hi byele ka ha li mahlweni leswi a swi ta yentxeka a matilweni ntsrhaku ka loko Yesu a tlhelelile. Ko lomu ka 15 wa madzana ya malembe lama khalutiki, va-Yuda a va tlangela a nkhuvu wa ku xwenga. Siku dzrin’we, lembe ni lembe, Muprista Lwenkulu afa a nghena a mbangwini wa ku xwenga ngopfu a tempeleni a xuva ngati ya switlhavelo swa Siku dzra ku Kombela ku Dzrivaleliwa mahlweni ka areka ya xipfumelelano. Hi siku ledzro, muprista lwenkulu a yimela Mesiya. Yesu a hetisisi xiprofeto xa nkhuvu lowo hi laha ku heleliki loko a tlhelela a matilweni. A nghene matilweni ku phatimeni lokukulu ka Yehovha—mbangu wa ku xwenga ngopfu a wuyakwini hinkwabyu—Kutani a nyika Tatana wakwe lisima dzra gandzrelo dzra xitizrulo xakwe ledzri a dzri humexiki. (Ba-Heberu 9:11, 12, 24) Xana Yehovha a dzri yamukelile?
Perspicaz vol-3 pp. 245-246 § 8
Ku Hetiseka
Ku Hetiseka ka Nawu Wa Moxe. A nawu lowu Moxe a nyikiki va-Israyele a wu patsra malulamiselo ya ku bekiwa ka mupsrista ni ku nyikeliwa ka switlhavelo swa swihazri. Nambi leswi a wu pfa ka Xikwembu Nkulukumba, xileswo a wu hetisekile, nambi Nawu, kumbe muprista, nambi switlhavelo a swi nga buyisi ku hetiseka ka lava afa va li hansi ka Nawu, swanga hi leswi mupostola lwa huhutiwiki a kombisaka. (Hb 7:11, 19; 10:1) Matsrhan’wini ya ku va huluxa ka xidoho ni lifu, kambe a swi yentxa xidoho xi voneka ha hombe. (Ro 3:20; 7:7-13) Xileswo, malulamiselo lama tlakukiki a ma tizrela ntsena ka leswi Nkulukumba a va yaveliki swone; a Nawu wa ve ‘mudondzrisi’ wa ku hi yisa ku Kriste, wu hi yakela ‘tsrhuti tsena wa matovoko lama taka’. (Ga 3:19-25; Hb 10:1) Kutani, loko Pawulo a vulavula hi ‘leswi faka swi hlula nawu, heswi faka wu ni gome hi nkonta ya nyama’ (Ro 8:3), afa a vulavula hi ku hluleka ka muprista lwenkulu wa nyama wa mu-Yuda (lwa bekiwiki hi Nawu akuva a hetisisa malulamiselo ya ku nyikela switlhavelo ni ku nghena ka mbangu lowa ku Xwenga ni ngati ya xitlhavelo hi Siku dzra ku Kombela ku Dzrivaleliwa), kuva a ‘huluxa hi minkama hinkwayu’ lava afa a va tizrela, swanga hi lana Ba-Heberu 7:11, 18-28 yi tlhamuxelaka ha kone. Switlhavelo leswi muprista Arone a a swi nyikela a swi yentxa vhanu va yamukeleka ka Xikwembu Nkulukumba, kambe a swi nga va yentxi va hetiseka kumbe ku va susa swidoho hi ku helela. Mupostola a hlaya leswaku switlhavelo swa ku dzrivaleliwa a swi hluleka ku ‘hetisisa lava tsrhindzrekelaka’, leswi liki, miyanakany’wini yavu. (Hb 10:1-4; dzringanisa Hb 9:9.) Muprista lwenkulu a nga ta swi kota ku humexa xitizrulo lexi vilelekaka xa ku dzrivaleliwa ka swidoho. Kova ntsena Kriste lwa nga tiyisela ku nyikela mhamba ya xitlhavelo ku swi hetisisa.—Hb 9:14; 10:12-22.
Djulisisa Tindzralama Ta Moya
Sentinela 01/03/1992 p. 31 §§ 4-6
Swivutiso Swa Vadondzri
Pawulo a hlaye leswaku a ku djuleka lifu akuva ku tizra xipfumelelano xa Xikwembu Nkulukumba ni vhanu. Xipfumelelano xa Nawu hi xikombiso xa swone. Moxe afa ali mukongomisi, lwa yentxiki leswaku xipfumelelano xi va kone ka Xikwembu Nkulukumba ni Israyele wa nyama. Moxe a yentxe ntizro wa ku hlawuleka nakone a ve yene lwa a nga kongomisa va-Israyele loko va nghenisiwa ka xipfumelelano lexi. Kutani Moxe a nga ha va a hlayiwe muzrangheli wa xipfumelelano xa Nawu lexi pfaka ka Yehovha. Kambe a swi djula leswaku Moxe a halata ngati yakwe akuva xipfumelelano lexi xa Nawu xi tizra? Im-him. Matsrhan’wini ya leswo, a ku nyikeliwa swihazri ku siva ngati ya Moxe.—Ba-Heberu 9:18-22.
Hi nga kuyini mayelanu ni xipfumelelanu xikazri ka Yehovha ni Israyele wa moya? Yesu Kriste a ve ni xiyavelo xa ku hlawuleka xa kuva Mukongomisi makazri ka Yehovha ni Israyele wa moya. Nambi leswi Yehovha a nga yene muvumbi wa xipfumelelano lexi, a xi zrangeliwa ha Yesu Kriste. Matsrhan’wini ya ku va Mukongomisi, Yesu a ve ni ntizrisano hi ku kongoma ni lava a va hamba xiyenge xa xipfumelelano lexi. (Luka 22:20, 28, 29) Nakone, a li ni wuswikoti bya ku nyikela xitlhavelo lexi a xi vileleka akuva xipfumelelano xi tizra. Xitlavelo lexi a ku nga li xa swihazri, kambe xa mhunu wa ku hetiseka. Kutani Pawulo a a ta vitana Yesu swanga muzrangeli wa xipfumelelano leximpswha. Tsrhaku ‘Kriste a nhinghene . . . tilweni, a ntshima ya dzrone, a ya humelela swoswi mahlweni ka Xikwembu Nkulukumba hi nkonta yezru’, xileswo xipfumelelano xi tizra.—Ba-Heberu 9:12-14, 24.
Loko Pawulo a vulavula ha Moxe na Yesu swanga vazrangeli, a swi hlayi swone leswaku mun’we ku vone vabidzri a vumbe xipfumelelano, kambe swi vumbiwe ha Xikwembu Nkulukumba. Matsrhan’wini ya leswo, vhanu lava bidzri a va patsreka ka kuva vazrangeli va xipfumelelano. Nakone ka xiyenge ha xin’we ku djuleki lifu—dzra xihazri ku pfala dzra Moxe, ni dzra Yesu, lwa nyikeliki ngati yakwe ya lisima ku lava a va patsreka ka xipfumelelano leximpswha.
Perspicaz vol-1 p. 315 § 6
Babatiso
Luka a hlaya leswaku Yesu afa a khongota hi nkama wa babatiso dzrakwe. (Lk 3:21) Mutsrali wa papela dzra ku va-Heberu a hlaye leswaku loko Yesu Kriste a ‘ta la misaveni’ (leswi liki, ku nga li loko a belekiwa ni ku nga swi koti ku dondzra ni ku hlaya mazritu lawa, kambe loko a tinyiketa leswaku a babatisiwa kutani a sungula ntizro wakwe) hi kuya hi Amapsalma 40:6-8 (LXX) a te: ‘A ku zrandzranga xitlhavelo ni mhamba, kambe u ndzri vumbele mizri. . . . Vona, ndzra ta, we Xikwembu Nkulukumba, ku ta yentxa ku zrandzra kwaku (ku tsraliwi a timhaka ta nga abukwini).’ (Hb 10:5-9) Yesu afa a li xipswaliwa xa tiko dzra Yuda, tiko ledzri a dzri ni xipfumelelano na Xikwembu Nkulukumba, xipfumelelano xa Nawu. (Eks 19:5-8; Ga 4:4) Hi xivangelo lexo, Yesu a na kutani a li ka xipfumelelano na Yehovha Xikwembu loko a ya ka Yohani leswaku a mu babatisa. Yesu a a yentxa leswi tlulaka ni leswi nawu a wu swi vilela ku yene. Afa a tinyiketa ku tatana wakwe, Yehovha, akuva a yentxa ‘ku zrandzra’ Kwakwe hi ku nyiketa mizri wakwe lowu ‘lulamiseliwiki’ ku helisa switlhavelo swa swihazri leswi a swi nyikeliwa hi kuya hi nawu. Mupostola Pawulo a li: ‘A ku ‘zrandzreni’ kwakwe koloko, hine ha xwengisiwa hi ku humexiwa kan’we ka mizri ya Yesu Kriste.’ (Hb 10:10) Ku zrandzra ka Tatana, ka Yesu a ku patsra mintizro leyi yelanaka ni Mfumu, nakone Yesu a tinyikele hi ku fanana ka ntizro lowu. (Lk 4:43; 17:20, 21) Yehovha a yamukelile ni ku pfumela ku tinyiketa ka N’wanakwe, hi ku mutota hi moya lowa ku xwenga a ku: ‘Wene u N’wananga lwa a zrandzriwaka, lwe dzri tsrhavisaka hi wene.’—Mr 1:9-11; Lk 3:21-23; Mt 3:13-17.
16-22 KA SETEMBRU
WUKOSI BYI NGA BIBELENI | BA-HEBE-RU 11
“Lisima Dzra Lipfumelo”
Sentinela 10/2016 p. 27 § 6
Kombisa Leswaku U Ni Lipfumelo Ka Swidumbiso Swa Yehovha
A Bibele dzri hlaya leswaku i yini lipfumelo ka Ba-Heberu 11:1. (Dondzra.) Hi ku ya hi ndzrimana leyi, lipfumelo dzri patsra mintxhumu mibidzri leyi mi nga vonikikiki: 1) ‘leswi laviseliwaka’—swi nga ha patsra leswi Xikwembu Nkulukumba a swi dumbisiki ka nkama lowu taka, kambe swi kalaka swi nga se na yentxeka, ku fana ni ku helisiwa ka wubihi ni misava leyimpswha. 2) ‘Xikholwiso xa mintxumu lemi nga voniwikikiki.’ A mhakeni leyi a zritu dzra Xigriki lezri dzrulutiwiki dzriku ‘xitiyiso’ dzri hlaya ‘mintxhumu lemi nga voniwikikiki swanga hi wukone bya Yehovha Xikwembu Nkulukumba, na Yesu Kriste, tintsrumi, ni Mfumu wa le matilweni. (Hb 11:3) Hi swi kombisisa kuyini leswaku dumbu dzrezru dzra hanya ni leswaku ha kholwa ka leswi nga voniwikiki swi nga Bibeleni? Hi mazritu ni swiyentxo swezru—loko hi nga swi kombisi, lipfumelo dzrezru dzra kiyela.
Sentinela 01/11/2013 p. 11 §§ 2-5
‘Muhakeli Wa Lava Mu Djulaka Hakunene’
Ku djuleka yini akuva hi nyonxisa Yehovha? Pawulo a tsrale leswi ‘Handle ka ku pfumela, a swi koteki ku nha mhunu a tsrhaveliwa hi [Xikwembu Nkulukumba].’ Twisisa leswaku Pawulo a nga tsralanga a ku handle ka lipfumelo swa kazrata ku ku nyoxisa Nkulukumba. Kambe a li a swi koteki ku mu nyonxisa. Kambe xa lisima, akuva u nyonxisa Nkulukumba ku djuleka lipfumelo.
I lipfumelo dzra muxaka muni ledzri nyonxisaka Yehovha? Lipfumelo dzrezru ka Xikwembu Nkulukumba dzri patsra mintxhumu mibidzri. Xa ku sungula, hi fanela ku ‘pfumela leswaku a kone’. Wundzruluteli byin’wana byi hlaya leswaku i ku “kholwa leswaku i wa ntshima” ni “leswaku a kone”. Hi nga mu nyonxisisa kuyini Xikwembu Nkulukumba loko hi nga dumbi leswaku a kone? Lipfumelo dzra hakakunene dzri patsra swinyingi, nambi mademona ma kholwa leswaku Yehovha a kone. (Yakob 2:19) Lipfumelo dzrezru ka Xikwembu Nkulukumba dzri fanela ku hi kutxa ku yentxa ni ku hanya hi leswi hi swi dondzraka akuva hi mu nyonxisa.—Yakob 2:20, 26.
Xa wubidzri, hi ‘fanela ku kholwa leswaku’ Xikwembu Nkulukumba i ‘muhakeli’. Mhunu lwa nga ni lipfumelo dzra ntiyiso awa tiyiseka leswaku mizamu leyi a yi yentxaka ku nyonxisa Nkulukumba a hi ya mahala. (1 Ba-le-Korinte 15:58) Loko hi nga mu dumbi Yehovha swi nga kotekisa kuyini ku mu nyonxisa? (Yakob 1:17; 1 Petros 5:7) Mhunu lwa hlayaka leswaku Nkulukumba a nga zron’weki, a nga tlhangeli nakone a nga na lizrezre a nga mu tivi Xikwembu Nkulukumba wa Bibeleni.
Yehovha a ta hakela mani? Pawulo a li ‘lava mu djulaka hi ntshima’. Wundzruluteli byin’wana bya Bibele byi hlaya leswaku zritu dzra Xigriki ledzri ndzruluteliwiki dzri ku ‘lava mu djulaka’ a dzri hlayi ku ‘djuletela’ ku tiva Xikwembu Nkulukumba ntsena kambe, hi fanela ku tikazrata akuva hi mu ‘gandzrela’. Wundzruluteli byin’wana byi tlhamuxela leswaku zritu ledzri dzra Xigriki dzri ntshimisisa mhaka ya ku kazri. Hakunene, Yehovha a hakela lava lipfumelo dzravu dzri va yentxaka va khinyela ku mu gandzrela hi lizrandzru.—Mattheo 22:37.
Sentinela 10/2016 p. 23 §§ 10-11
Vana Ni Lipfumelo Ledzri Tiyiki Dzra Dumbo Ledzri U Nga Na dzrone
Ka Ba-Heberu ndzrima 11, mupostola Pawulo a tlhamuxela mindzringo leyi malandzra manyingi ya Xikwembu Nkulukumba lawa mavito yavu ma kalaka ma nga boxiwanga ma yi tiyiseleliki. Hi xikombiso, mupostola lweyi a boxe vavasati lava a va li ni lipfumelo lava feliwiki hi vanavu va madjaha lava hi ku famba ka nkama va pfuxiwiki. Kutani a tlhele a boxa vambeni lava kalaka ‘va nga zrandzranga ku huluxiwa, akuva va kuma ku huluka loku tlulaka’. (Hb 11:35) Nambi leswi hi nga swi tivikikiki leswaku Pawulo afa a yanakanya hi vamani, van’wana va ku fana na Naboti na Zakariya va biwe hi mazribyi va fa hileswi va yingisetiki ni ku yentxa ku zrandzra ka Xikwembu Nkulukumba. (1Th 21:3, 15; 2Mk 24:20, 21) Daniyeli ni vanghanu vakwe va ve ni mukhandlu wa ku ‘ntsrhuxiwa’ ntsena loko a ve tsrika wudumbeki byavu. Matsrhanwini ya leswo, ku pfumela ka ntamu wa Xikwembu Nkulukumba swi va pfune ku ‘siva milomu ya tindzrawu’ ni ku ‘tima ntamu wa ndzrilo’.—Hb 11:33, 34; Dn 3:16-18, 20, 28; 6:13, 16, 21-23.
Hi nkonta ya Lipfumelo, vaprofeta va ku fana na Mika Na Yeremiya ‘va kume ndzringo hi ku hlekiwa, . . . ni ku pfaleliwa’. Van’wana va ku fana na Eliya, ‘va yingayingi a nhoveni, ni le tinhaveni, ni le timhakweni ni le tiyindlwanine ta le ndzreni ka misava’. Hinkwavu va tiyiselile hi leswi a va li ni ‘xitiyiso xa leswi laviseliwaka’.—Hb 11:1, 36-38; 1Th 18:13; 22:24-27; Yr 20:1, 2; 28:10, 11; 32:2.
Djulisisa Tindzralama Ta Moya
Perspicaz vol-2 p. 109 § 3
Lipfumelo
Swikombiso Swa Khale Swa Lipfumelo. Mun’wana ni mun’wa wa ‘ntlawa lowa ku nhati wa timboni’, lowu Pawulo a wu kombisiki (Hb 12:1) a wu ni xisekelo xa lipfumelo. Hi xikombiso, Abele afa a xi tiva xidumbiso xa Xikwembu Nkulukumba mayelanu ni ‘lixaka’, ledzri a dzri ta pfotlota nhloko ya ‘nyoka’. Kutani afa a lavisela ku hetiseka ka xikhatiso lexi Yehovha a xi nyikiki vapswele vakwe a xizrambeni xa Edeni. He handle ka Edeni, Adamu ni ndangu wakwe a va da swakuda swa nyuku wa mombo wakwe, hikusa misava a mi zrukiwile, xileswo a mi humesa mitwa ni mahlehlwa. Swi nga ha yentxeka Abele afa a xiyisisa ku navela loku Evha afa a li nakone hi nuna wakwe nakone Adamu afa a fuma nsati wakwe. Nakone swi nga ha yentxeka mamana wakwe afa a mu bulela hi swivavu swa ku beleka kwakwe. Kutani, a nyangwa wa ku nghena xizrambeni xa Edeni a wu zrindzriwa hi makerubime ni langavi dzra lipanga loli tingawutelaka hinkwaku. (Gn 3:14-19, 24) Hinkwaswu leswi swa ha tama swi va ‘xikholwiso xa mintxhumu lemi nga voniwikikiki’, lexi a xi tiyisekisa Abele leswaku a ku ta va ni huluku hi kola ka ‘lixaka loli dumbisiwiki’. Hi kola ka lipfumelo, ‘a humexeli Xikwembu Nkulukumba mhamba’, leyi tlulaka ya Kayeni.—Hb 11:1, 4.
Sentinela no 12017 pp. 12-13
“A Tsrhavise Xikwembu Nkulukumba”
Xana Enoki a ‘tekeliwe henhla hi ndlela yini ‘akuva a nga voni ku fa’? Swi nga ha yentxeka leswaku Yehovha a tekele Enoki henhla akuva a nga twi ku vava ka lifu. Kambe Enoki a yamukeli ku ‘tsrhaveliwa hi Xikwembu Nkulukumba’. Hi ndlela yini? Loko a nga si na fa, swi nga yentxeka leswaku Xikwembu Nkulukumba a mu nyike xivono xa misava leyi nga paradeyisi. Loko a kombiwa xivono lexo xa ku nyoxisa, Enoko e fa. Loko mupostola Pawulo a tsrala mayelanu na Enoki kun’we ni vavanuna ni vavasati va ku dumbeka a te: ‘Hinkwavu lavo va file a ku pfumeleni.’ (Ba-Heberu 11:13) Swi nga yentxeka valala vakwe va djule ntsrumbu wakwe, kambe ‘a nga kumiwanga’, kumbexana Yehovha a wu lahlile ku yentxela leswaku va nga wu tizrisi ka wukhongoti bya madzrimi.
23-29 KA SETEMBRU
WUKOSI BYI NGA BIBELENI | BA-HEBERU 12-13
“Ku Tshinyiwa Ha Yehovha I Xikombiso Xa Leswaku Awa Hi Zrandzra”
Sentinela 15/03/2012 p. 29 § 18
U Nga Langusi ‘Ntsrhaku’
Xilayu xa vavisa. Swi nga ku yini loko hi dzringeka ku yanakanya hi xilayu lexi vavisaka lexi hi samiki hi nyiwa xone? Leswo a swi nge hi twisi kuvavisa ntsena, kambe swi nga hi kazrata lakakuva swi hi ‘heta ntamu’. (Hb 12:5) A swi na mhaka leswaku hi xi ‘tekela hansi’ xilayu hi leswi hi nga xi yamukeliki kumbe hi ‘hela ntamu’ hi leswi hi xi yamukeliki kutani hi xi tsrika, a buyelo dzra fana—a hi xi yamukeli xilayu leswaku xi hi pfuna ni ku xwengisa. A hi ku nyonxisa ka swone ku yingela mazritu ya Solomini lama liki: ‘Kokozrela dondzro, u nga yi tsriki, u yi bekisa hikuva i wutomi byaku.’ (Pr 4:13) Ku fana ni mufambisi wa movha lwa yingisaka nawu wa xitaratu, na hine a hi nyingiseni xilayi, hi xi tizrisa kutani hi ya mahlweni.—Pr 4:26, 27; dondzra Ba-Heberu 12:12, 13.
Sentinela 01/07/2012 p. 21 § 3
‘Loko N’wi Khongota, Yani Ku, ‘Tatana’’
Tatana lwa nga ni lizrandzru a laya vanakwe, hikusa a zron’weka hi wumhunu lebyi va taka va nabyone. (Ba-le-Efesa 6:4) Tatana wa ku tasu a nga ha tiyisa voko, kambe a nga va hlundzrukeli vanakwe loko a va lulamisa. Hi ku fanana,Tatana wezru wa le matilweni minkama min’wana a nga vona swi fanelile ku hi laya. Kambe nkama hinkwawu Xikwembu Nkulukumba a hi nyika xilayu hi lizrandzru a nga hi kazrati. Ku fana ni Tatana wakwe, Yesu afa a nga hlundzruki, nambi loko vadondzrisiwa vakwe va nga yangule hi ku kahlula loko a va lulamisa.—Mattheo 20:20-28; Luka 22:24-30.
Sentinela 03/2018 p. 32 § 18
“Yingiseta Ku Tshinyiwa Akuva U Ta Tlhazriha”
Nambi leswi ku tshinyiwa ku vavisaka, kambe ku ni ntxhumu wun’wana lowu vavisaka ku tlulisa—ku nga ntsrhovelo lowu tisiwaka hi ku ku bakanya. (Hb 12:11) Xiya xikombiso xa Kayini ni xa hosi Zedekiya. Loko Kayini a ve ni livengo dzra lunya hi makwavu Abele, Xikwembu Nkulukumba a mu basopisile a ku: ‘U hlundzrukela yini xana? A liso laku li binyela yini xana? Loko fa u yentxa swinene a nha u nga tlakuxiwi xana? Loko u nga yentxi swinene a xihono xi bukwami nyangweni: a ku navela ka xone ku ta va ku wene, kambe wene u ta xi fuma’. (Gn 4:6, 7) Kayini a nga yingisetanga. Hi loko xidoho xi mu hlula. A tikokele khombo na dzri le kule na yene! (Gn 4:11, 12) Ku vavisa ka ku tshinyiwa hi Yehovha a ku nga li ka ntxhumu loko ku dzringanisiwa ni makhombo lawa a tikokeliki wone.
Djulisisa Tindzralama Ta Moya
Sentinela 15/09/2011 pp. 17-18 § 11
Tsrutsruma Hi Ku Tiyisela
Malandzra ya Yehovha lama vumbaka “ntlawa lowa ku nhati wa timboni”, a ma ngo va ntsena vahlaleli lava teliki ku ta hlalela mpalisano wa vatsrutsrumi kumbe xitsrutsrumi xa kukazri va xi vona loko xi pala. A matsrhan’wini ya leswo, a ma nhingenile ka mpalisano na wone. Nakone ma kote ku tsrutsruma ma ko ma heta. Nambi leswi kutani ma fiki, ma nga tekiwa swanga vatsrutsrumi lava nga ni mfambu, lava nga kutxaka vatsrutsrumi lavampshwa ka mpalisano. Yehleketa hi ndlela leyi mutsrutsrumi a ata titwa ha yone loko loko o tiva leswaku van’wana ka vhanu lava mu hlalelaka i vatsrutsrumi lavakulu. Xana a a nga ti tikazrata kuva a tsrutsruma swinene? Timboni leto ta khale ti nga hlaya leswaku ka mpalisano lowo wa ku fanekisela, swa koteka kuva mhunu a hlula. Xileswo, ku yanakanyisisa hi “ntlawa lowa ku nhati wa timboni”, a swi ta pfuna va Heberu va le dzaneni dzra ku sungula leswaku va kuma xixixi ni ku ‘tsrutsruma hi ku tiyisela’ hi laha hi nga ha yentxaka ha kone namunhla.
Sentinela 15/12/1989 p. 22 § 10
Nyikela Switlhavelo Leswi Nyonxisaka Yehovha
Va Heberu a va fanela ku tivonela leswaku va ‘nga kokiwe hi tidondzro ta tinxaka-xaka ni ta vambe’ ta Xiyuda. (Ba-le-Galatia 5:1-6) Ku nga li hi tindondzro leto kambe hi ‘timbilu leti tiyisiwiki hi timpswalu ta Xikwembu Nkulukumba’ leswaku titiya a xihlayelamfuzrini. Van’wana va kanetana mayelanu ni swakuda ni switlhavelo, hikusa Pawulo a hlaye leswaku mbilu a yi nga tiyisiwi hi “milawu hi tlhelo dzra swakuda, leyi nga pfunikiki ntxhumu ka lava yi landzrelelaka”. Mabindzru ya moya lama pfaka hi kola ka ku txhava Xikwembu Nkulukumba ni ku tlhangela tizrulo, ku nga li hi ku zron’weka loku kalaka ku nga fanelanga ka swakuda ni ku tlhangela masiku ya ku kazri. (Ba-le-Roma 14:5-9) Ku tlula Leswo, gandzrelo dzra Kriste dzri yentxe leswaku magandzrelo ya valevhi ma nga ha tizri.—Ba-Heberu 9:9-14; 10:5-10.
30 KA SETEMBRU–6 KA OTUBRU
WUKOSI BYI NGA BIBELENI | YAKOB 1-2
“Leswi Hi Yentxaka Hi Doha Ni Ku Fa”
Despertai no 4 p. 14 §§ 2-4
Ndzringo
Mhunu a dzringiwa hi loko a kokiwa hi ntxhumu, ngopfu-ngopfu wa ku biha. Hi xikombiso, loko u ku wa xava swa kukazri u sungula ku navela ntxhumu wumbeni. Hi loko u teliwa hi miyanakanyu ya leswaku loko ho yiva a wu nga ti kumiwa. Nambitanu, lipfalu dzraku dzri ku gilhi, dzri ku im-him! Kutani u bakanya miyanakanyu leyo u tifambela. Ka xiyimu lexo, ndzringo wu helile nakone u wu hlulile.
LESWI BIBELE DZRI SWI HLAYAKA
Mhunu a nge vi mubihi hi loko a dzringiwa. Bibele dzri hlaya leswaku hinkwezru hi nga ha dzringiwa. (1 Ba-le-Korinte 10:13) Xa lisima hi leswaku xana hi yentxa yini loko hi dzringiwa. Van’wana va txutxela ku navela loku bihiki kutani ntsrhaku va ku yentxa, kambe van’wana va hatla va ku bakanya.
‘Lweyo ni lweyo a ku dzringiwa hi ku navela kwakwe ntsena, hi ku kokiwa ni ku phasiwa.’—Yakob 1:14.
Despertai no 4 p. 14 § 5
Ndzringo
Bibele dzri vulavula hi leswi nga hi yisaka xihoxweni. Yakob 1:15 yi li: ‘Kutani a ku navela [loku bihiki], loko ku teki nyimba, ku beleka xihono.’ Hi mahlayela man’wana, loko hi txutxela ku navela loku bihiki, ku ta tlhasa nkama lowu ku wu hetisisa swi to ko sindzrisa ku fana ni wansati lwa belekaka kumbe a phulukaka n’wana. Nambitanu, swa koteka ku tingawula ku navela loku bihiki. Hi nga swi kota ku hlula ku navela koloko.
Djulisisa Tindzralama Ta Moya
Perspicaz vol-2 p. 726 § 5
Livaningu
Yehovha i ‘Tatana wa swivaningo’. (Yk 1:17) A nga hi nyiki ‘dambu xi va xivaningu ni nhlikanhi, lwe a leletiki hweti ni tinyeleti ku vaninga wusikwini’, (Yr 31:35) kambe i Xihlovo xa ku vaninga hinkwaku ka moya. (2Ko 4:6) Milawu yakwe ni zritu dzrakwe i swivaningo ka lava pfumelelaka ku fambisiwa ha swone. (Ps 43:3; 119:105; Pr 6:23; Eza 51:4) Mupsalma a tsrale leswi: ‘Hi ku vaningiwa hi wene, hi vona livaningo.’ (Ps 36:9; dzringanisa na Ps 27:1; 43:3.) Swanga hi leswi a livaningu dzra dambu dzri tamaka dzri vaninga ku sukela mpundzrwini ‘ku tlhasa a nhlikanhini lowukulu’, swa fana ni ndlela ya valulami, na yone yi vaningeliwa hi wutlhazri bya Yehovha yi ya yi yengeteleka. (Pr 4:18) Akuva hi landzrela leswi Yehovha a swi djulaka hi fanela ku famba ka livaningu dzrakwe. (Eza 2:3-5) Hi tlhelo dzrin’wana, loko mhunu a vona mintxhumu hi ndlela ya ku biha, yelweyo a li munyameni wa moya. Yesu a swi bekise xileswi: ‘Loko tihlo dzraku dzri vabya, a mizri yaku hinkwayu mi ta va munyameni. Loko-ke ku vaninga loku nga kone ndzreni kwaku wu munyama, xana a munyama lowu wu ta va lowa kuyini xana?’—Mt 6:23; dzringanisa na Dt 15:9; 28:54-57; Pr 28:22; 2Pe 2:14.
Perspicaz vol-2 p. 685 § 3
Nawu
‘Nawu Lo Yi Nga Hosi.’ Makazri ka milawu yinyingi yi nga kone vhanwini, ‘nawu lo yi nga hosi’ wu ni lisima dzrikulu swinene nakone hosi yini na yini a yi ta va na wone. (Yk 2:8) A ntwananu wa nawu a wu seketeliwe hi lizrandzru; nakone nawu lowu liki ‘u ta zrandzra wa le kwenu swanga hi loko u tizrandzra’ (nawu lo yi nga hosi) afa a li xileleto xa wubidzri lani ka xone Milawu ni Vaprofeta a va khomelela kone. (Mt 22:37-40) Vakriste a va li hansi ka ntwananu wa nawu, nambitanu va tibeka hansi ka nawu wa Hosi Yehvha ni N’wanakwe, Hosi Yesu Kriste hi ku fambisana ni ntwananu lowumpshwa.