Mintlhamuxelo Ya Xibukwana Xa Wutomi Ni Wutizreli Byezru

7-13 KA OTUBRU

WUKOSI BYI NGA BIBELENI | YAKOB 3-5

“Ku Kombisa Wuthlazri Bya Xikwembu Nkulukumba”

Achegue-se a Jeová pp. 221-222 §§ 9-10

Xana Wa Byi Tizrisa ‘Wutlhazri Lebyi Pfaka Henhla’ A Wuton’wini Byaku?

‘Xa ku sungula mahanyela ya ku basa.’ Ku va lwa basiki swi hlaya ku pfumala bati ku nga li handle ntsena, kambe ni le ndzreni. Bibele ndzri li a wutlhazri byi fambisana ni mbilu, kambe a byi nge nhingeni ka mbilu leyi ntxhimisiwiki hi miyanakanyu, swiyentxo ni minkutxetelo lemi bihiki. (Amaproverbia 2:10; Mattheo 15:19, 20) Nambitanu, loko mbilu yezru yi basile​—leswi liki, swa koteka ka vanhu lava nga hetisekangakiki—​hi ta ‘tsrhindzreka ku leswa ku biha, hi yentxa leswinene’. (Amapsalma 37:27; Amaproverbia 3:7) A swi faneli ku nha ku basa ku li tsrhamela dzra ku sungula ku kombisiwa dzra wutlhazri? Hikusa, loko hi nga basanga mahanyelweni ni le moyeni, hi ta swi kotisa kuyini ku kombisa hi ku helela matsrhamela mambeni ya wutlhazri bya le henhla?

‘Ntsrhaku ku zrula.’ Wutlhazri bya le matilweni byi hi kutxa ku va ni ku zrula, ku nga mhandzru wa moya wa Xikwembu Nkulukumba. (Ba-le-Galatia 5:22) Hi yentxa hinkwaswu akuva hi nga tsremi ‘pindzra dzra ku zrula’ ledzri tlhanganisaka vhanu va Yehovha. (Ba-le-Efesa 4:3) Hi yentxa hinkwaswu akuva hi kondletela ku zrula. Ha yini swi li swa lisima? Bibele dzri li: ‘Zrulani; kutani Xikwembu Nkulukumba wa lizrandzru ni wa ku zrula a ta va nan’wine.’ (2 Ba-le-Korinte 13:11) Loko hi ya mahlweni hi hanya hi ku zrula Xikwembu Nkulukumba wa ku zrula a ta va na hine. Ndlela leyi hi hanyisanaka ha yone ni vamakwezru yi khumba wuxaka byezru na Yehovha. Hi nga swi kombisisa kuyini swa ku hi vhanu va ku zrula? Vona xikombiso.

Achegue-se a Jeová pp. 223-224 § 12

Xana Wa Byi Tizrisa ‘Wutlhazri Lebyi Pfaka Henhla’ A Wuton’wini Byaku?

‘Ku nabyala.’ Xana swi tlhamuxela yini ku nabyala? Hi ku ya hi swidondzri swin’wana, swa nononh’wa ku tlhamuxela zritu dzra ku sungula dzra Xigriki ledzri ndzruluteliwiki dzri va ku ‘nabyala’ ka Yakob 3:17. Vandzruluteli van’wana va tizrisi xiga lexi liki ‘lizrezre’, ‘wunene’ kumbe ku ‘yanakanyelana.’ A ntlhamuxelo wa le hasi wa NM wu hlaya leswaku i ku ‘nabyala’ kumbe ku ‘dzringanisela.’ Xana hi nga swikombisa kuyini swaku ha byi tizrisa a wutlhazri bya le henhla a wuton’wini byezru?

Achegue-se a Jeová pp. 224-225 §§ 14-15

Xana Wa Byi Tizrisa ‘Wutlhazri Lebyi Pfaka Henhla’ A Wuton’wini Byaku?

“Ku yingelana.” A zritu dzra xigriki ledzri ndzruluteliwiki dzri va ‘ku yingelana’ a dzri kumeki ka Matsralwa ya wukriste ya Xigriki. Hi ku ya hi xidondzri xin’wana, zritu ledzri “dzri tizrisiwa ngopfu ku dondzrisa masotxha”. Dzri nyikela miyanakanyu ya ku “kokeka hi ku nabyala” ni ku “titsrongahata”. Lwa fumiwaka hi wutlhazri bya le henhla a tiyimisele ku titsrongahatela leswi Bibele dzri swi hlayaka. A nga tiviwi swanga mhunu lwa hambaka xiboho kutani a yala mavonelo ya van’wana. Ku hambana ni leswo, a lulamele ku ntxintxa loko a kombiwa leswi Bibele dzri swi hlayaka mayelanu ni vonela dzrakwe lezri hoxekiki kumbe ku teka xiboho lexi hoxekiki. Xana u tiviwa swanga mhunu wa muxaka lowo?

‘Byi Tele Lizrezre Ni Mihandzru Leya Hombe’

‘Byi tele lizrezre ni mihandzru leya hombe.’ A lizrezre i xiyenge xa lisima xa wutlhazri bya le henhla, ledzri tlhamuxeliwaka swanga ku ‘tala lizrezre.’ Xiya swa ku dzri hlayiwa kun’we ni ‘lizrezre’ ni ‘mihandzru ya hombe.’ Swa fanela hikusa, ka Bibele, lizrezre dzri kombisa ku zron’weka lokukulu hi vambeni, timpswalu leti humexaka mintizro minyingi leminene. Wundzruluteli byin’wana byi tlhamuxela lizrezre swanga ku ‘khunguvanyeka hi swiyentxo swa ku biha swa munhu ni minzamu ya ku yentxa xantxhumu ha swone.’ Xileswo, a wutlhazri bya le tilweni a byi nononh’wi, a byi tiyentxi ntivi. Ku hambana ni leswo, byi zrulile, bya kufumela, bya twelana. Xana hi nga swi kombisisa kuyini leswaku hi tale lizrezre?

Achegue-se a Jeová pp. 226-227 §§ 18-19

Xana Wa Byi Tizrisa ‘Wutlhazri Lebyi Pfaka Henhla’ A Wuton’wini Byaku?

“A byi na ku hlawula.” Wutlhazri bya Xikwembu Nkulukumba a byi na xihlawu-hlawu kumbe wutiko. Loko hi kongomisiwa hi wutlhazri lebyo, hi ta tikazratela ku susa muxaka wini ni wini wa ku ya hi liso timbilwini tezru. (Yakob 2:9) A hi nga ti kombisa malwandla ka vhanu va kukazri hi leswi va dondzriki ngopfu, va nga ni mali kumbe wutiyanguleli bandleni; nakone a hi nga ti va tekela hansi vangandzreli-kulozri hi leswi va nga xiyin’wini xa le hansi. Loko Yehovha a va komba lizrandzru dzrakwe, na hine hi fanela ku va vona na va faneliwa hi dzrezru.

‘A byi na ku tiyentxisa.’ A zritu dzra xigriki ledzri liki ‘ku tiyentxisa’ dzri nga ha hlaya “mhunu lwa hambaka ntlangu wa ku kazri.” Nkameni wa khale, a vatlangi va ma-Griki ni va-Roma afa va yambala txhumu lowu a wu pfala liso lavu loko va tlanga. Hileswo ke, zrito dzra xigriki ledzri liki ‘ku tiyentxisa’ a dzri tizrisiwa ka mhunu lwa titumbetaka kumbe lwa a nga ni wukanganyisi. Xikombiso lexi xa wutlazri bya Xikwembu Nkulukumba a xi khumbi ntsena ndlela leyi hi hanyisanaka ha yone ni vagandzreli-kulozri, kambe ni ndlela leyi hi titwaka ha yone ha vone.

Djulisisa Tindzralama Ta Moya

Sentinela 15/11/2008 p. 20 § 6

Nkatsrakanyu wa mapapela ya Yakob na Petros

4:5—Hi dzrini tsralwa ledzri Yakob a dzri tsrhahaka lani? Yakob afa a nga tsrhahi tsralwa dzra kukazri. Nambitanu, mazritu lawa lama huhutiwiki ha Xikwembu Nkulukumba kumbexana ma seketeliwe ka dzrungula ledzri tolovelekiki dzra tindzrimana ta ku fana na Genesis 6:5; 8:21; Amaproverbia 21:10; ni Ba-le-Galatia 5:17.

Sentinela 15/11/1997 pp. 20-21 § 8

Lipfumelo Dzri Hi Susumeta Ku Lehisa Mbilu Ni Ku Khongota

A ku hleva mupfumeli-kulozri i xidoho. (Yakob 4:11, 12) Kambe van’wana va sandzra vakriste-kulobye, kumbexana hi leswi va tivonaka va lulamile kumbe hi ku djula ku titlakuxa hi ku tsrongohata van’wana. (Amapsalma 50:20; Amaproverbia 3:29) Zritu dzra xigriki ledzri ndzruluteliwiki dzri va ‘ku sandzra’ dzri hlaya wulala nakone dzri kombisa ku yentxa xihehlo lexi ndzrulutiwiki kumbe madzrimi. Leswo swi yisa ku yavanyiseni ka makwenu hi ndlela ya ku biha. Xana leswo swi fana hi ndlela yini ni ‘ku sandzra nawu wa Xikwembu Nkulukumba ni ku wu yavanyisa’? A vatsrali ni vafarisi afa va ‘beka nawu wa Xikwembu Nkulukumba tlhelweni hi ndlela ya wutlhazri’ kutani va yavanyisa hi kuya hi mimpimiso ya vone vinyi. (Marka 7:1-13) Hi la ku fanaka, loko hi sola makwezru wa kukazri lweyi Yehovha a nga mu solikiki, xana a hi ‘yavanyisi nawu wa Nkulukumba’ kutani hi doha hi ku hlaya leswaku a wu helelanga? Nakone loko hi sola makwezru hi ndlela ya ku biha, hi ta va hi nga hetisisi nawu wa lizrandzru.​—Ba-le-Roma 13:8-10.

14-20 KA OTUBRU

WUKOSI BYI NGA BIBELENI | 1 PETROS 1-2

“Mi Fanela Ku Va Lava Xwengiki”

Sentinela 02/2017 p. 9 § 5

Xitizrulo​—I ‘Nyiko Ya Ku Hetiseka’ Leyi Pfaka Ka Tatana

Hi nga swi kombisisa kuyini leswaku ha dzri zrandzra vito dzra Yehovha? Hi mahanyela yezru. Yehovha a djula leswaku hi xwenga. (Dondzra 1 Petros 1:15, 16.) Leswi hlayaka leswaku hi fanela ku gandzrela Yehovha ntsena ni ku mu yingiseta hi timbilu tezru hinkwatu. Nambi loko hi xanisiwa, hi yentxa hinkwaswu leswaku hi hanya hi minsinya ya milawu yakwe ya ku lulama. Loko hi hanya hi ndlela leyinene, vhanu va ta bekela xihluwa ka vito dzra Yehovha ni ku dzri twalisa. (Mt 5:14-16) Swanga vhanu lava xwengiki, hi kombisa hi mahanyela yezru leswaku milawu ya Yehovha i minene neswaku swihehlo swa sathana i madzrimi. Loko hi phazama, ha ndzruluka hi la ku heleliki nakone hi tsrika ku yentxa mintxumu leyi nga sandzraka Yehovha.​—Ps 79:9.

Continue a Amar a Deus p. 77 § 6

Ndlela Ya Ku Hlawula Swihungatiso Leswinene

Yehovha a li: ‘Xwengani leswi ni xwengiki.’ (1 Petros 1:14-16; 2 Petros 3:11) Yehovha a ta yamukela wugandzreli byezru loko byi xwengile, kumbe byi basile. (Deuteronoma 15:21) Loko hi yentxa mintxhumu leyi Yehovha a yi vengaka, ya ku fana ni mahanyela ya ku biha, wugevenga kumbe ku bulisana ni mademona, wugandzreli byezru a byi ngi ti va lebyi basiki. (Ba-le-Roma 6:12-14; 8:13) Kambe swi nga mu khunguvanyisa Yehovha loko hi hungata hi mintxhumu ya ku fana ni leyi. Leswi swi nga yentxa wugandzreli byezru byi va lebyi nga basangakiki ni lebyi nga yamukelekiki ka Yehovha nakone swi nga hona wuxaka byezru na yene.

Djulisisa Tindzralama Ta Moya

Sentinela 15/11/2008 p. 21 § 9

Nkatsrakanyu Wa Mapapela Ya Yakob Na Petros

1:10-12. Tintsrumi ti navele ku kambisisa ni ku twisisa ntiyiso lowu yentiki wa mintxhumu ya Xikwembu Nkulukumba lowu vaprofeta vakwe va le minkameni ya khale va wu tsraliki mayelanu ni bandla dzra vakriste lava totiwiki. Nambitanu, mintxhumu leyi mi sungule ku twisiseka ntsena loko Yehovha a sungula ku tizrisana ni bandla. (Ef 3:10) Hi fanela ku yetisela xikombiso xa tintsrumi hi tikazratela ku kambisisa mintxhumu ‘lemi yentiki ya Xikwembu Nkulukumba’.​—1Ko 2:10.

Perspicaz vol-3 p. 658 § 4

Mulaviseli

Mulaviseli Lwenkulu. 1 Petros 2:25 swi nga yentxeka a tsrhaha Ezaya 53:6 na ku hlayiwa lava va nga ‘swanga tihamba leta ku lahleka’, nakone Petro a game a ku: ‘Kambe swoswi, n’wi ndzrulukeli ku mubyisi ni mulaviseli wa mahika yenu.’ Leswi swi nga ha kombeteliwa ka Yehovha Xikwembu, hikusa lava Petro afa a hlaya vone a va nga hambukanga ku Kriste Yesu, kambe, ha yene va yisiwe ka Yehovha Xikwembu, lwa nga mubyisi wa vhanu vakwe. (Ps 23:1; 80:1; Yr 23:3; Ezk 34:12) Yehovha hi yene mulaviseli, lwa kambelaka. (Ps 17:3) Ku kambela (Gr., e·pi·sko·peʹ) swi nga ha yelana ni mazritu yakwe ya wuyavanyisi, swanga hi dzaneni dzra ku sungula N.Y., ku fana na Yerusalema, lwa kalaka a nga yanakanyanga nkama wa ku ‘kambeliwa kwakwe [Gr., e·pi·sko·pesʹ].’ (Lk 19:44) Kumbexana a swi ta mu bindzrulela, ku fana ni lava va twalisaka Xikwembu Nkulukumba hi siku ‘dzra ku kambeliwa kwakwe [Gr., e·pi·sko·pesʹ].’​—1Pe 2:12.

21-27 KA OTUBRU

WUKOSI BYI NGA BIBELENI | 1 PETROS 3-5

“A Ku Hela Ka Hinkwaswu Ku Kusuhi”

Sentinela 15/11/2013 p. 3 § 1

“Hitekani A Ku Khongoteni”

Wanuna lwa samiki a tizra niwusiku a li: “Nkama lowu swi kazrataka ngopfu kuva mhunu a tsrhama na a hitekile hi loko byi ya ku xeni.” Vhanu van’wana lava swibohiki ku tsrhama na va hitekile wusiku hinkwabyu va nga pfumelelana na yene. Ni namuhla vakriste va kumana ni xiyimu lexi fanaka hikusa misava ya ku biha ya Sathana yi kusuhi ni ku helisiwa. (Ro 13:12) Hakunene swi nga va ni khombo swinene loko ho khutsriyela hi tlhelo dzra moya swoswi. I swa lisima swinene kuva hi ‘tlhazriha’ hi tlhela hi yingela xitsratsriyo xi nga matsralweni xa kuva hi ‘tikhoma ku khongoteni.’​—1Pe 4:7.

Sentinela 15/04/1999 p. 22 § 3

Ndlela Ya Ku Dzrimuka Ni Ku Hlula Ku Tsrana Kun’wana Ni Ku N’wana Ka Moya

Xa wugamu, tsrhama na wu yanakanya xitsratsriyo xa lizrandzru xa mupostola Petro xi liki: ‘A ku hela ka hinkwaswu ku kusuhi, tlhazrihani ke, n’wi tikhoma ku khongoteni. A ku tlula hinkwaswu zrandzranisani, hikusa a lizrandzru li ta fukumeta wunyingi bya swihono.’ (1 Petros 4:7, 8) Swi nabyale swinene ku pfumelela ku nga hetiseki ka vhanu—ka van’wana ni kwezru—ku nghena timbilwini ni le miyanakanywini yezru kutani ku va swihinga, swikhunguvanyiso. Sathana a ku tiva hahombe ku tsrana ka vhanu. Mayentxela man’wana ya wukanganyisi i ku beka ku yavana kutani a hi hlula ha kone. Hileswo ke, hi fanela ku hatla hi funeketa swidoho swa ku tasu hi ku kombisana lizrandzru ledzrikulu ka mun’wana ni mun’wana kutani hi nga ‘nyiki Diyavulosi nkama.’​—Ba-le-Efesa 4:25-27.

Sentinela 03/2018 pp. 14-15 §§ 2-3

Ku kombisa Malwandla swa Nyoxisa

A mhakeni leyi, Petro a hlaye leswi a swi ta pfuna vamakwavu: ‘N’wiva n’wi yamukelana ku yendzreni kwenu n’wi nga hlunami.’ (1Pe 4:9) A zritu ‘yamukelanani’ hi Xigriki dzri tlhamuxela ku va ni ‘wunene ka vhanu lava u nga va tivikiki.’ Vona leswaku Petro a byele vamakwavu leswaku a va fanela ku yamukelanana ‘mun’wana ni mun’wana’ wavu, lava a na va tivana kumbe ku hanyisana hi khale. Ha yini ku kombisana malwandla a swi va pfuna?

Hikusa a swi ta tlhanganisa vamakwezru. Yanakanya hi leswi. U sami u zrambiwa ku ya kaya ka mhunu? Kutani wa dzrimuka leswi swi nyonxisiki xiswone? Loko u sami u hungata ni van’we a bandleni, xana a va vanga vanghanu vaku ngopfu? A malwandla i ndlela yinene ya ku tivana ni vamakwezru hahombe. Vakriste va nkameni wa Petro a fanela ku tsrhama na va ni wumun’we loko xiyimu xi ya xi bindzra. Leswi hi hanyaka ‘masikwini ya wugamu’, hi fanela ku yentxa hi ku fanana.​—2Tm 3:1.

Djulisisa Tindzralama Ta Moya

Sentinela 15/06/2013 p. 23

Swivutiso Swa Vadondzri

A Bibele dzrili Yesu a ‘dzrungulele mimoya leyi faka mi boyelweni.’ (1Pe 3:19) Xana lewi swi thlamuxela yini?

▪ Hi kuya hi mupostola Petro mimoya leyo hi ‘leyi khale faka mi nga yingisetanga, loko Xikwembu Nkulukumba a ha yimela hi ku leha ka mbilu a masikwini ya Nowa.’ (1Pe 3:20) Swo baa, Petro afa a khanela hi swivubiwa swa moya leswi ti hlawuleliki ku yima na Satana ka wupfukeli byakwe. Yuda afa a khanela hi tintsrumi ‘leti nga bekisangakiki a wuhosi bya tone, kambe ti sukeli kaya dzra tone,’ Xikwembu Nkulukumba ‘ye ku tibekisa munyameni hi timpentxana leti nga helikikiki, ku kota ku tlhasa tsremo dzra siku ledzrikulu’.​—Yuda 6.

Xana swivubiwa swa moya a masikwini ya Nowa swi ve vapfukeli hi ndlela yini? Na Ndambi yi nge si na tlhasa, swivumbiwa leswi swi tintxintxe swi hamba vhanu​—leswi a ku nga li nkongometo wa Xikwembu Nkulukumba ku swone. (Gn 6:2, 4) Matsrhan’wini ya leswo, tintsrumi leti a ti yentxa ntxhumu wa ku biha, ku nga ku nghenela timhaka ta tinkuku ni vavasati. Xikwembu Nkulukumba a nga swi hambelanga leswo swivumbiwa leswi. (Gn 5:2) Tintsrumu leti ta ku biha ti ta helisiwa hi nkama lowu bekiwiki wa Xikwembu Nkulukumba. Swoswi, swanga hi lani Yuda a hlayaka ha kone, ti le ‘munyameni lowukulu’​—hi nga ha ku a bohelweni dzra le moyeni.

Xana hi dzrini lana Yesu a dzrunguleliki ‘mimoya leyi faka mi boyelweni’ nakone hi ndlela yini? Petro a tsrale leswaku swi yetxeke ntsrhaku ka loko Yesu ‘a hanyisiwe moyeni’. (1Pe 3:18, 19) Xiya, leswaku, Petro a li Yesu a ‘dzrungulele’. Akuva Petro a tizrise ‘dzrungulele’ swi komba leswaku swi yentxeke na Petro a nga si na tsrala papela dzrakwe dzra ku sungula. Swi ti komba nakone, leswaku ntsrhakunyana ka ku pfuxiwa kwakwe, Yesu a byele mimoya leyo ya ku biha mayenalu ni xikhatiso lexi a yi ta katisiwa ha xone. Ku dzrungula koloko a ku nga yi nyiki dumbu. A ku li ku dzrungula ka ku yavanyisiwa. (Yohan 1:1, 2) Loko Yesu a kombise lipfumelo a tlhela a dumbeka ku ya tlhasa ku feni kutani a pfuxiwa​—afa a kombisa leswaku Diyavulosi a nge ti mu yentxa ntxhumu—​Yesu afa a ni xisekelo xa ku hlaya ku yavanyiswa koloko.​—Yohan 14:30; 16:8-11.

Nkameni lowu taka, Yesu a ta tsrimba Sathana ni tintsrumi takwe a va txukumeta a xikheleni xa ku yenta. (Luka 8:30, 31; Mpf 20:1-3) Ku ya tlhasela nkameni lowo, tintsrumi leti kalaka ti nga yingisanga ti le munyameni lowukulu wa moya nakone ti ta heliseliwa wugamu.​—Mpf 20:7-10.

Sentinela 15/11/2008 p. 21 § 7

Nkatsrakanyu wa mapapela ya Yakob na Petros

4:6​—I va mani ‘vafi’ lava va ‘dzrunguleliwiki evangeli’? Hi lava a ‘vafile a swidohweni ni le swihon’weni’ swavu, kumbe lava a va file hi moyeni, na va nga si na yingela madzrungula lamanene. (Ef 2:1) Ntsrhaku ka ku kombisa lipfumelo ka madzrungula lamanene, vone va ve lava ‘hanyaka’ hi le moyeni.

28 KA OTUBRU–3 KA NOVHEMBRU

WUKOSI BYI NGA BIBELENI | 2 PETROS 1-3

“Lavisela ku Tlhasa ka Siku dzra Xikwembu Nkulukumba”

Sentinela 15/12/2006 p. 27 § 11

Yehovha A Ta Lulamisela Leswaku ‘Ku Yentxiwa Wululami’

Hi fanela ku xi twisa kuyini xitiyisekiso xa Yesu xa leswaku Yehovha a ta lulamisela leswaku ku yetxiwa wululami ‘hi xihatla’? Zritu dzra Xikwembu Nkulukumba dzri kombisa leswaku ‘nambi leswi Yehovha a hi lehiselaka mbilu’, a ta buyisa wululami hi ku hatlisa loko nkama wu tlhasile. (Luka 18:7, 8; 2 Petros 3:9, 10) Loko ku tlhasi ndhambi a masikwini ya Nowa, vhanu va ku biha va helisiwile hi ku hatlisa. Hi ku fanana, a masikwini ya Loti, loko ndzrilu wu nile hi le matilweni, vhanu va ku biha va helisiwile. Yesu a te: ‘Swi ta yentxisa xiswoswo hi siku ledzri N’wana wa mhunu a taka pfuleteka ha dzrone.’ (Luka 17:27-30) Vhanu va ku biha va ta tlhela va weliwa hi ‘mhangu’. (1 Ba-le-Thesalonika 5:2, 3) Hi nga tiyiseka leswaku Yehovha a nga ti tsrika misava leyi ya Sathana yi tama yi va kone ku tlula nkama lowu a wu bekiki.

Sentinela 15/12/2006 p. 19 § 18

‘A Siku Dzra Yehovha Ledzrikulu Dzri Kusuhi’

A swi hlamalise leswi mupostola Petro a va dzrimuxiki ku tama va ‘lavisela ku tlhasa ka siku dzra Xikwembu Nkulukumba’! Hi nga swi yentxisa kuyini leswo? Hi ku va ‘hi va ni mahanyela ya ku xwenga ni ya wukhongoti.’ (2 Petros 3:11, 12) Loko hi tsrhama na hi khomekile hi mintizro leyo swi ta hi pfuna ku tsrhama na hi yimelile ‘siku dzra Yehovha’. Zritu dzra Xigriki lezri tlhamuxeliwiki dzri va ku ‘lavisela’ dzri hlaya ‘xihatla.’ A hi nge ku kahlulisi ku tlhasa ka siku dzra Yehovha hi ku kongoma. Kambe na ha ha yimele siku ledzro, a khama wu ta khaluta hi ku kahlula loko hi tsrhama na hi komekile a ntizrweni wa Xikwembu Nkulukumba.​—1 Ba-le-Korinte 15:58.

Djulisisa Tindzralama Ta Moya

Sentinela 15/11/2008 p. 22 § 2

Nkatsrakanyu Wa Mapapela Ya Yakob Na Petros

1:19​—I mani ‘nyeleti ya mixo’, yi ta humelela dzrini nakone hi ta swi tivisa kuyini leswaku yi humelelile? ‘Nyeleti ya mixu’ i Yesu Kriste swanga Hosi a Mfun’wini wa Xikwembu Nkulukumba. (Mpf 22:16) Hi 1914, Yesu a tlakuxiwe wuyakwini hinkwabyu swanga Hosi ya wumesiya, a zrezra a kuxa ka siku dzrimpswha. A nkama wa ku ndzrulutiwa wu nyikele ku phatima ka Yesu ni ntamu wa Mfumu wakwe, wu kombisa ku dumbeka ka mazritu ya xiprofeto ya Xikwembu Nkulukumba. Ku yingelisisa hahombe mazritu lawa swi vaningela mbilu yezru, xileswo, hi ta tiva leswaku nyeleti ya wuxa yi tlakuxiwile.

Sentinela 15/11/2008 p. 22 § 3

Nkatsrakanyu Wa Mapapela Ya Yakob Na Petros

2:4​—I yini ‘Tartaro’ nakone hi dzrini lana tintsrumi leta ku doha ti txukumeteliwiki kone? Tartaro i xiyimo lexi fanisiwaka ni bohelo lani ku pfaleliwaka ntsena swivumbiwa swa moya​—ku nga li vhanu. I xiyimu xa munyama wa miyanakanyu mayelanu ni nkongomento lowu hlamalisaka wa Xikwembu Nkulukumba. Lava nga a Tartaro a va na dumbo dzra wumundzruku. Xikwembu Nkulukumba a txukumenteli tintsrumi leta ku biha a Tartaro a masikwini ya Nowa, ti ta va ka xiyimu lexo ku ko ku tlhasa siku ledzri ti taka helisiwa ha dzrone.