KU HANYA SWANGA VAKRISTE

Tinhlengeletanu Letikulu—Mikhandlu Ya Ku Kombisa Lizrandzru

Vamakwezru va matiko ya ku hambanahambana va yimiki xikan’we akuva va susa mufoto ka nhlengeletanu leyikulu ya ya ku hlawuleka.

Ha yini hi kumeka hi xitalu ka tinhlengeletanu letikulu ta swifundzra lembe ni lembe? Ku fana ni va-Israyele va khale, tinhlengeletanu letikulu ta swifundzra ta nan’waka ti hi nyika mukhandlu wa ku gandzrela Yehovha kun’we ni vamakwezru va ntsrandzravahlayi. Hi nyonxa swinene hi swakuda swa moya leswi tiyisanaka leswi hi phameliwaka swone. Hi tlhela hi wu tlangela swinene nkama wa ku hlawuleka, lowu hi wu hetaka ni vanghanu kun’we ni maxaka yezru. Ku tlangela koloko ku hi yentxa hi djula ku va kone ka masiku hinkwawu ya mazrazru ya nhlengeletanu yin’wana ni yin’wana leyikulu ya xifundzra.

Loko hi va ni mikhandlu ya ku hlengeletana kun’we, a hi fanelanga hi yanakanya hi leswi hi nga bindzrulaka swone ntsena, kambe ni ndlela leyi hi nga kombisaka lizrandzru ka vambeni. (Ga 6:10; Hb 10:24, 25) Loko hi pfulela vamakwezru xipfalu kumbe ku beka ntsena mbangu lowu hi wu vilelaka, hi va na hi kombisa leswaku a hi laviseli swezru kambe ni swa van’wana. (Flp 2:3, 4) Tinhlengeletanu Letikulu Ta Swifundzra ti hi nyika mikhandlu ya ku hamba vanghanu vampswha. Hi nkama wa ntlhanganu ni nkama wa ku wisa, hi nga tihambela kungu dzra ku bula ni mhunu lwe hi nga mu tivikiki. (2Ko 6:13) Hi nga ha sungula wunghanu lebyikulu lebyi taka tsrhama hi la ku nga helikiki! Tlhantakubidzri, loko vazrambiwa vezru va vona lizrandzru dzra ntiyiso ledzri hi dzri kombisaka, swi nga va yentxa va navela ku tizrela Yehovha.—Yh 13:35.

HLALELANI VÍDEO LEDZRI LIKI “A LIZRANDZRU A DZRI HELI”! TINHLENGELETANU TA MATIKO HINKWAWU, MI GAMA MI HLAMULA SWIVUTISO LESWI LANDZRELAKA:

Ka nhlengeletanu ya matiko hinkwawu ya 2019, xana vamakwezru va kombise lizrandzru ka lava yendzriki ku ya hlalela nhlengeletanu leyo a matikweni man’wana hi ndlela yini?
Ha yini swi hlamalisa ku vona lizrandzru ni wumun’we lebyi nga kone ka vhanu va Yehovha?
I yini leswi van’we va swizro swa Huvo Leyi Zrangelaka va swi kandzrakanyiki hi lizrandzru ledzri nga kone makazri ka vakriste?
Xana u nga dzri kombisisa kuyini lizrandzru na wene ka tinhlengeletanu letikulu ta swifundzra?

Xana lizrandzru dzri tlhanganise vamakwezru va Alemanha ni Coreia do Sul hi ndlela yini?
Hi fanela ku tiyimisela ku yentxa yini?