Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

3-9 KA MAYU

WUKOSI BYI NGA BIBELENI | ATINHLAYO 27-29

“Yetisela Yehovha Lwa Nga Liki Na Xihlawuhlawu”

Sentinela 15/06/2013 pp. 10-11 § 14

Tlangela Wumhunu Bya Yehovha

Vamakwavu lava va ntlhanu va ye ka Moxe va ya mu vutisa leswi: ʽXana vito dzra tatana dzri ta suseliwa yini ndangwini wakwe, heswi a nga vangakiki na n’wana wa wanuna? Hi nyike pfindla makazri ka vamakwa tatanaʼ. A nga va leswaku Moxe a hlamule, a ku: ʽA nawu wu hlaya swoleswo nakone a ku na lexi ni nga mi pfunaka ha xone?ʼ Im-him. A yise ʽmhaka yavu mahlweni ka Yehovhaʼ. (Tin 27:2-5) Yehovha a hlamulise ku yini? A byele Moxe a ku: ʽA vana va Tselofekhad va hlayelamfuzri; U ta va nyika ku va ni pfindla makazri ka vamakwa tatana wavu, u va yavela pfindla dzra tatana wavu.ʼ A swi helelanga kolano. Yehovha a byele Moxe ku patsra mhaka yoleyo ka nawu a ku: ʽLoko a mhunu a fa, na a nge na n’wana wa xiyisa, n’wi ta yavela n’wanakwe wa n’whanyana pfindla dzrakwe.ʼ (Tin 27:6-8; Yš 17:1-6) Ku sukela a nkameni wolowo ku ya mahlweni vavasati hinkwavu a Israyele lava a va le ka xiyimu lexi fanaka ni xa van’whayana lavaya, a va ta kuma pfindla.

Sentinela 15/06/2013 p. 11 § 15

Tlangela Wumhunu Bya Yehovha

Lexo a ku li xiboho lexi kombisaka lizrandzru ni ku kala xihlawuhlawu! Van’whanyana lavo va ntlhanu a va nge na mhunu lweyi a a ta va pfuna, nakone Yehovha a va khome hi ndlela leyinene ni hi xitxhavu hilani a a va khoma ha kone va-Israyele lavan’wana. (Ps 68:5) Lexi ko va xikombiso xin’we ntsena xa madzrungula manyingi ya le Bibeleni lawa ma kombisaka ntiyiso lowu kutxaka: Yehovha a nga na xihlawuhlawu ka ndlela leyi a ma khomaka ha yone malandzra yake hinkwawu.​—1Sa 16:1-13; Min 10:30-35, 44-48.

Sentinela 15/06/2013 p. 11 § 16

Tlangela Wumhunu Bya Yehovha

Hi nga mu yetiselisa kuyini Yehovha a mhakeni ya ku pfumala xihlawuhlawu? Dzrimuka mintxhumu yibidzri a mhakeni ya ku pfumala xihlawuhlawu. Ntsena loko hi nge na xihlawuhlawu hi kone hi taka kota ku khoma vanhu va mixaka hinkwayu hi ndlela leyinene. I ntiyiso, hinkwezru hi tivona na hi nge na xihlawuhlawu. Kambe, xana a hi ntiyiso leswaku a hi minkama hinkwayu swi nabyalaka ku xiya ndlela leyi hi titwaka ha yone hi van’wana? Kutani hi nga yentxa yini akuva hi tiva leswaku hi ni xihlawuhlawu kumbe im-him? Loko Yesu a djule ku tiva leswi vanhu va swi yanakanyaka mayelanu na yene, a vutise vanghanu vake va ku dumbeka a ku: ʽXana vanhu va li a n’wana wa mhunu hi mani?ʼ (Mt 16:13, 14) Ha yini u nga yetiseli Yesu a mhakeni leyi? U nga vutisa munghanu waku lweyi a taka ku byela ntiyiso wa leswaku u ni xihlawuhlawu kumbe im-him. Loko a ku byela leswaku minkama yin’wana u khoma vanhu va lixaka dzra kukazri hi ndlela leyinene ku tlula va lixaka dzrin’wana, kumbe a ku byela leswaku u zrandzra vanhu lava va nga ni mali kumbe lava va dondzrekiki, u fanela ku yentxa yini? Khongota ka Yehovha, u kombela a ku pfuna ku txintxa ndlela leyi u titwaka ha yone hi van’wana akuva u ta fana ngopfu na yene na swone u nga vi na xihlawuhlawu ka vanhu hinkwavu.​—Mt 7:7; Kl 3:10, 11.

Tindzralama Ta Moya

Perspicaz vol-2 p. 509 § 1

Magandzrelo

Magandzrelo ya swa ku nwa. A magandzrelo ya swa ku nwa a ma talisa ku nyikeliwa kun’we ni magandzrelo laman’wana, ngopfungopfu ntsrhaku ka loko va-Israyele va yaki a tikweni dzra xidumbiso. (Tin 15:2, 5, 8-10) A ku li vhinyu (ʽbyala lebyi popswakaʼ) nakone a dzri txhululiwa a henhla ka alitari. (Tin 28:7, 14; Dzringanisa ni Eks 30:9; Tin 15:10.) Mupostola Pawulo a tsraleli Vakriste va le Filipi a ku: ʽAhina, ni loko ndzri nyiketiwa mhambeni [ya swa ku nwa, NM] ni le ku tizreleni ka ku pfumela kwenu, ndzri tsrhava, im, ndzri tsrhava na n’wine hinkwenu.ʼ Lani a tizrisi mhamba ya swa ku nwa, akuva a kombisa ku tinyiketela kwake ka ku tizrela vakriste kulobye hilani a nga kotaka ha kone. (Flp 2:17) Na a li kusuhi ni ku dlayiwa, Pawulo a tsraleli Timotewu a ku: ʽHikuva mine ndzri ta nyiketiwa [swanga mhamba ya swa ku nwa, NM], swoswi; a nkama wa ku suka kwanga wu tlhasiki kutani.ʼ​—2Tm 4:6.

10-16 KA MAYU

WUKOSI BYI NGA BIBELENI | ATINHLAYO 30-31

“Hetisisa Xihlambanyu Xaku”

Perspicaz vol-2 p. 1215 § 10

Xihlambanyu

U Xi Hamba Hi Ku Swi Zrandzra Kambe Ku Xi Hetisisa Swo Boha. Nambiswilitanu, loko mhunu a hlambanyile a nawu wa Yehovha a wu sindzrisa leswaku a swi hetisisa. Hi ndlela leyo a ku hlayiwa leswaku mhunu lweyi a hlambanyiki a funge hi wutomi byake a kombisa leswaku wutomi byake a ku li xitiyisekiso xa leswaku a ta xi hetisisa. (Tin 30:2; vona ni Ro 1:31, 32.) Leswi mhunu a a funga hi wutomi, swa twala leswi matsralwa ma hlayaka swaku a a fanela ku kambisisa ha hombe leswi patsrekaka na a nga si hlambanya. A nawu a wu ku: ʽLoko u dumbisa xidumbiso hi ku hlambanya ku Yehovha, . . . Xikwembu Nkulukumba waku, a ta wu djulisisa ku wene, kutani u nga kumiwa u li ni nandzru. Loko u nga dumbisi ntxhumu hi ku hlambanya, u nga ka u nga vi na nandzru.ʼ​—Dt 23:21, 22.

Perspicaz vol-2 p. 1215 § 7

Xihlambanyu

Xihlambanyu i ku dumbisa Xikwembu Nkulukumba leswaku u ta yentxa xa kukazri, ku nga ha va ku nyikela xihanano, ku nghenela ntizro wa kukazri, ku va ka xiyimu xa kukazri kumbe ku tsrhika ku yentxa swa kukazri nambi swi nga bihanga. Xihlambanyu a ku li ntxhumu wa ku hlawuleka lowu a wu yentxiwa hi ku tizrandzrela. Leswi a ku li ntxhumu wa ku hlawuleka, xihlambanyu a xi ni lisima ledzri fanaka ni dzra xidumbiso nakone makhambi man’wana zritu ledzri liki xihlambanyu ni ledzri liki xidumbiso ma hlayiwa hi ku landzrelelana a Bibeleni. (Tin 30:2; Mt 5:33, NM) Loko mhunu a hlambanya a kombisa leswi a tiyimiseliki swone, nakasi loko a dumbisa kumbe ku funga a va na a byela lweyi a nga ni wulawuli lebyi tlakukiki akuva mhunu lweyo a nga ni wulawuli a kambisisa mazritu ni leswi patsrekaka a mhakeni leyo. Hi ntolovelo a ku hlambanyiwa akuva ku tiyisekisiwa xipfumelelanu.​—Gn 26:28; 31:44, 53.

Sentinela 01/08/2004 p. 27 § 3

Nkatsrakanyu Wa Buku Dzra Atinhlayo

30:6-8—Xana wanuna lweyi a nga mukriste a nga swi helisa swidumbiso leswi hlambanyiwiki swa nsati wakwe? Mayelanu ni swidumbiso leswi hlambanyiwiki, Yehovha swoswi a beka tihlo ka leswi mugandzreli mun’wana ni mun’wana wake a tiboheliki swone. Hi xikombiso, ku tinyiketela ka Yehovha i xidumbiso lexi hlambanyiwiki xa ximhunu. (Ba-le-Galatiya 6:5) Wanuna a nga na mfanelo ya ku helisa xidumbiso lexi hlambanyiwiki xa nsati wake. Kambe, a wansati a nga fanelanga a hamba xidumbiso lexi hlambanyiwiki lexi lwisanaka ni Zritu dzra Xikwembu Nkulukumba kumbe lexi lwisanaka ni leswi a nga ni mfanelo ya ku swi yentxela nuna wake.

Tindzralama Ta Moya

Perspicaz vol-2 p. 26 § 3

Yefta

A swi koteka ku nyikela vanhu leswaku va ya hambela Yehovha ntizro wa ku hlawuleka lowu fambisanaka ni mbangu wa ku xwenga. Vapswele a va li na yone mfanelo ya ku yentxa leswo. Ana a swi yentxile. Na Samuwele a nga si na pswaliwa, Ana a hambe xidumbiso lexi hlambanyiwiki xa leswaku Samuwele a a ta ya tizrela Yehovha a tabernakeleni. Elkana a pfumelelanile ni xihlambanyu lexo xileswo Ana a helekete Samuwele a tabernakeleni na a ha ku lumuliwa, mfuzri Elkana a fambe na Ana va ya nyikela gandzrelo hi xihazri. (1Sa 1:11, 22-28; 2:11) Mun’wana lweyi a nyikeliwiki akuva a hambela Xikwembu Nkulukumba ntizro wa ku hlawuleka swanga Munaziri ku ve Samisoni.​—Abaṭ 13:2-5, 11-14; dzringanisa leswi ni mfanelo ya tatana ku n’wana wa xisati hi ku ya hi lani swi tsraliwiki hakone ka Tin 30:3-5, 16.

17-23 KA MAYU

WUKOSI BYI NGA BIBELENI | ATINHLAYO 32-33

“Hlongola Vayaki Hinkwavu Lava Yakiki A Tikweni”

Sentinela 01/08/2010 p. 23 § 4

A Wu Swi Tiva?

Xana a ku li yini mimbangu ya ku tlakuka leyi ku vulavuliwaka ha yone ka Matsralwa ya Xiheberu?

Loko va-Israyele va li kusuhi ni ku nghena tikweni dzra xidumbiso, Yehovha a va byele leswaku va helisa mimbangu hinkwayu leyi Vakanana a va gandzrela ka yone. Yehovha a te: ‘N’wi ta . . . pfotlota ni swithombe swavu hinkwaswu, n’wi pfotlota swithombe swavu hinkwaswu swa ku txhululiwa, n’wi mbundzrumuxa ni mimbangu yavu leya ku tlakuka.’ (Atinhlayo 33:52) Mimbangu leyo ya wugandzreli bya madzrimi swi nga yentxeka a ku li miyaku leyi pfulekiki kumbe a hansi ka minsinya. (1 Tihosi 14:23; 2 Tihosi 17:29; Ezekiel 6:3) Swi nga ha yentxeka a yi ni ma-aletari, timhandzri ta ku xwenga, swithombe, mbangu wa ku hisa ka wone mizri ya lisuna ni swin’wana leswi a va swi tizrisa a wugandzrelini byavu.

Sentinela 15/02/2008 p. 27 §§ 5-6

Dondzra Ka Swihoxo Swa Va-Israyele

Namunhla hi kumana ni mindzringo yinyingi ya ku fana ni leyi va-Israyele va kumaniki na yone. Masiku lawa ku ni mintxhumu yinyingi leyi vhanu va yi yentxaka swikwembu swavu. Yi nga ha patsra mali, vhanu lava nga ni ndhuma ka televhizawu, ka mintlangu, ka mintlhanganu ya politika, vazrangeli va wukhongoti nambi swizro swa ndangu. Yin’wana ya mintxhumu leyi hi nga ha yi teka yi li ya lisima swinene a wuton’wini byezru. Ku va ni wunghanu byikulu ni lava nga mu zrandzrikiki Yehovha swi nga ha hona wuxaka byezru na yene.

Va-Israyele vanyingi va wongiwe ni ku phasiwa hi wuwoswani lebyi a byi li kone a wugandzrelini bya Bali. Mintlhamu leyi fanaka ya ha phasa vagandzreli vanyingi va Xikwembu Nkulukumba. Hi xikombiso, mhunu lwa nga liki na wuxiyaxiya a nga ha hlalela pornografiya ka komputadori dzrake kutani swi hona lipfalu dzrake. Swi vavisa ngopfu loko mukriste a phasiwa hi ku hlalela pornografiya ka internet!

Perspicaz vol-1 p. 418 § 3

Vakanana

Yoxuwa ‘a nga tsrhikanga ni ntxhumu ni xin’we lexi Yehovha a nga leleta Moxe’ mayelanu ni ku helisiwa ka Vakanana. (Yš 11:15) Kambe a tiko dzra Israyele a dzri wu landzrelelanga nkongomiso lowo mayelanu ni ku helisa hinkwaswu leswi a swi ta ntxhimisa tiko. Akuva va-Israyele va tama va tsrhama ni Vakanana swi va vangele swikazratu leswikulu swa ku fana ni ku fa ka vhanu vanyingi (hi nga ha hlayi wugevenga, wuwoswani ni ku gandzrela swithombhe), leswi a swi tava swi siveliwili loko va-Israyele a ve landzrela nawu wa ku helisa hi ku helela Vakanana. (Tin 33:55, 56; Abaṭ 2:1-3, 11-23; Ps 106:34-43) Yehovha a a byele va-Israyele leswaku a wululami ni wuyavanyisi Byake a swi na xihlawuhlawu nakone loko va-Israyele vo titlhanganisa ni Vakanana, va tekana navu, va patsrela wukhongoti, ni ku landzrelela swihena swa wukhongoti ni swa mahanyela ya Vakanana, a va ta va na vo tikokela yavanyiso, leswi a swi ta yentxa leswaku va ‘nhlantiwa’ a misaveni kumbe ku tsrhikiwa hi Yehovha.​—Eks 23:32, 33; 34:12-17; Lv 18:26-30; Dt 7:2-5, 25, 26.

Tindzralama Ta Moya

Perspicaz vol-2 p. 1109 § 1

Ndzrilakanu

Ntsrhaku ka loko mpswhampswha yi kombe mbangu lowu lixaka dzra kukazri a dzri ta yaka kone, a ku djuleka swin’wana akuva ku kombisiwa mindzrilakanu: ku kula ka lixaka. ‘U ta yavanyisa tiko hi mpswhampswha hi mindangu yenu, lava taliki n’wi ta va nyika pfindla ledzrikulu, lava nga talangakikiki n’wi ta va nyika pfindla ledzritsrongo; a mun’wana ni mun’wana a ta yamukela leswi a yaveliwiki swone hi mpswhampswha.’ (Tin 33:54) A xiboho lexi a xi tekiwa mayelanu ni tlhelo ledzri lixaka a dzri ta yaka kone a xi nga txintxi, kambe a swa ha koteka ku txintxa mindzrilakanu. Xileswo, loko ku voniwe leswaku a muganga wa Yuda a wu li wukulu ngopfu, a mbangu wake wu pumbiwile, wu nyikiwa lixaka dzra Simiyoni.—Yš 19:9.

24-30 KA MAYU

WUKOSI BYI NGA BIBELENI | ATINHLAYO 34-36

“Tumbela Ka Yehovha”

Sentinela 11/2017 p. 9 § 4

Xana U Tumbela Ka Yehovha?

Xana a ku yentxiwa yini hi mu-Israyele lweyi a dlayiki mhunu mumbeni hi mphazamu? Nambileswi mhunu lweyo a kalaka a nga dlayanga hi vomu, a a ni nandzru wa ku halata ngati leyi nga liki na nandzru. (Gn 9:5) Kambe a a pfumeleliwa leswaku a tsrutsrumela ka dzrin’we dzra 6 wa madoropa ya wutumbelo akuva a ya kombiwa timpswalu. Ka madoropa wolawu a a ta kuma nsizrelelo. Mhunu lweyi a dlayiki mhunu mumbeni hi mphazamu a a fanela ku tsrhama doropeni ledzro dzra wutumbelo ku ko muprista lwenkulu a fa.—Tin 35:15, 28.

Sentinela 11/2017 p. 9 § 6

Xana U Tumbela Ka Yehovha?

Mhunu lweyi a dlayiki mun’wana hi mphazamu, a a fanela ku zranga a b’ika mhaka yake ka vakulu lava a va li nyangweni ya doropa ledzri a tsrutsrumeliki ka dzrone. A a fanela ku yamukeliwa hi malwandla. (Yš 20:4) Ntshaku ka nkamanyana, a va ta mu tlhelisela ka likwavu, akuva vakulu va kambela nandzru wake. (Dondzra Atinhlayo 35:24, 25.) Loko va kuma leswaku a nga na nandzru, a a tlheliseliwa ka doropa dzra wutumbelo.

Sentinela 11/2017 p. 9 § 13

Xana U Tumbela Ka Yehovha?

A mudohi a a sizrelelekile loko a li doropeni dzra wutumbelo. Mayelanu ni madoropa wolawo, Yehovha a te: ‘Byi ta va vutxhavelo byenu.’ (Yš 20:2, 3) Yehovha a a nga swi djuli leswaku mudohi a tlhela a yavanyisiwa hi nandzru wolowo wa wun’we, nambi mudzrihiseli a a nga pfumeleliwi ku landzra mudohi a doropeni dzra wutumbelo. Hi kola ka leswo, mudohi a a nga ta hanya na a txhava. Loko a li doropeni dzroledzro Yehovha a a ta mu sizrelela. A doropa dzra wutumbelo a dzri nga fani ni djele, hikusa a swi ta koteka leswaku mudohi a tizra, a pfuna van’wana ni ku tizrela Yehovha a ku zruleni. Nakunene, a swi ta koteka leswaku mhunu a hanya wutomi lebyi nyonxisaka ni lebyi nga ni nkongometo!

Tindzralama Ta Moya

Sentinela 15/02/1991 p. 13 § 13

Xitizrulu Lexi Dzringanaka Ka Hinkwavu

Adamu na Evha a va nga ti pfuneka ka xituzrulo. Ka Nawu wa Moxe a ku ni leswi: ‘N’wi nga yamukeli xitizrulo xa ku tizrula vutomi bya mudlayi.’ (Atinhlayo 35:31) Adamu a nge kanganyisiwa nakone a nge sindzrisiwa, xileswo xidoho xake xi ve xa maxivomu. (1 Timoteo 2:14) Leswi vatukulu va Adamu va tluleliwiki hi ku kala ku hetiseka kwake, va kume hakelo dzra xidoho ku nga lifu. Ku hlaya ntiyiso, Adamu a a faneliwa hi ku fa, hikusa nambileswi a a hetisekile a hlawule ku tlula nawu wa Xikwembu Nkulukumba hi vomu. Ku va Yehovha a tizrisa xitizrulo ka Adamu a swi ta va swi hambanile ni minsinya ya milawu ya wunene byake. Nambitanu ku hakeliwa ka xidoho xa Adamu, swi hlaya ku susiwa ka tsremo dzra lifu a henhla ka vatukulu va Adamu! (Ba-le-Roma 5:16) Hi ku kongoma, ntamu lowu dlayaka wa xidoho wu susiwi ku sukela a masungulwini ya wone. A mutizruli ‘a yingele ku fa hi nkonta ya hinkwavu’, a byatsrhe a hakelo dzra xidoho xa vana hinkwavu va Adamu.​—Ba-Heberu 2:9; 2 Ba-le-Korinte 5:21; 1 Petros 2:24.

31 KA MAYU–6 KA JUNYU

WUKOSI BYI NGA BIBELENI | DEUTERONOMA 1-2

“Ku Tsrema I Ka Xikwembu Nkulukumba”

Sentinela 15/03/1996 p. 23 § 1

Yehovha A Zrandzra Wunene Ni Wululami

Vakulu lava hlawuliwiki mabandleni, va ni wutiyanguleli bya ku yavanyisa timhaka ta swidoho leswikuku. (1 Ba-le-Korinte 5:12, 13) Loko va li ku yavanyiseni, va dzrimuka leswaku a wululami bya Xikwembu Nkulukumba byi kombisa timpswalu lani swi vilelekaka kone. Loko ku nge na xivangelo xa ku kombisa timpswalu​—ku fana ni ka vadohi lava ga tisolikiki—​a ti fanelanga ti kombisiwa. Kambe a vakulu a va hlongoli mudohi lweyo hi ku djula ku tidzrihisela. Va dumba leswaku a xiboho lexo xa ku mu susa xi ta mu pfuna kuva a buyisela miyanakanyu yake. (Dzringanisa na Ezekiyel 18:23.) A hansi ka wunhloko bya Kriste, a vakulu va tizra na va fambisana ni wululami, leswi patsraka ku va va fana ni ‘xisizrelo loko moya wu hunga.’ (Ezaya 32:1, 2) Xileswo a va fanelanga va va ni xihlawuhlawu, kambe va fanela ku yanakanyela.​—Deuteronoma 1:16, 17.

Sentinela 01/08/2002 pp. 9-10 § 4

Titsrongahate Hi Ku Dumbeka Ka Wulawuli Bya Xikwembu Nkulukumba

Nambitanu, akuva mhunu a va mutsremi wa timhaka, a swi nga yaneli kuva a tiva Nawu ntsena. Leswi a va li vhanu va ku kala ku hetiseka, va vanuna lava, lava kuliki hi ntanga, a va fanela ku lwa ni minsusumeto ya ku biha ya ku fana ni ku ti djulela swavu ni xihlawuhlawu, ku nga mintxhumu leyi a yi ta va yentxa va nga tsremi timhaka hi ndlela ya kone. Moxe a va byeli a ku: ‘N’wi nga ve tsrema hi ku zrandzra ka liso la mhunu; n’wi ta yingela lwentsrongo ku fana ni lwenkulu; n’wi nga txhave liso la mhunu; hikusa ku tsrema i ka Xikwembu Nkulukumba.’ Ina, vatsremi va tiko dzra Israyele a va yimela Xikwembu Nkulukumba loko va tsrema timhaka. Leyi a ku li ndjombo yikulu!​—Deuteronoma 1:16, 17.

Tindzralama Ta Moya

Sentinela 15/09/2013 p. 9 § 9

Swidzrimuxo Swa Yehovha Swa Dumbeka

Loko va-Israyele va sungula liyendzro dzravu ledzri tekiki 40 wa malembe ka ‘hula ledzrikulu dzra ku txhavisa’, a nga va nyikanga wutsrhokotsrhoko hinkwabyu bya ndlela leyi a a ta va kongomisa, a va sizrelela ni ku va hlayisa ha yone. Nambitanu, nkama ni nkama a va kombile leswaku va nga mu dumba va tlhela va dumba ni swileleto swakwe. Loko a tizrisa tlavi ledzrikulu ni nhlikanhi, a wusikwini a tizrisa ndzrilo lowukulu, Yehovha a a dzrimuxa va-Israyele leswaku a a va seketela loko a va kongomisa ka liyendzro dzravu ledzri kazrataka. (Dt 1:19; Eks 40:36-38) A tlhele a yentxa leswaku va kuma hinkwaswu leswi a va swi vilela. ‘Swiyambalu swavu a swi bolanga, ni milenge yavu a mi pfimbanga.’ Hakunene ‘a va pfumalanga ntxhumu’.​—Neh 9:19-21.

7-13 KA JUNYU

WUKOSI BYI NGA BIBELENI | DEUTERONOMA 3-4

“Milawu Ya Yehovha I Ya Wutlhazri Ni Wululami”

Perspicaz vol-1 p. 815 § 5

Ku Twisisa

Ku dondzra ni ku tizrisa leswi hi swi dondzraka kun’we ni ku landzra swileleto swa Xikwembu Nkulukumba swi nga pfuna mhunu kuva a va ni ku twisisa loku ku tlulaka ka lava mu dondzrisaka nambi ka lava kuliki hi ntanga. (Ps 119:99, 100, 130; dzringanisa Lk 2:46, 47.) Nakunene, a wutivi ni ku twisisa swi pfa hi ku landzra swiyimiso ni swiyavanyiso swa Xikwembu Nkulukumba; loko va-Israyele a ve landzrelela swileleto leswi hi ku helela, a matiko ya vavundzramani a ma ta swi vona leswaku a va li ‘tiko ledzri nga ni wutlhazri ni ku yingelisisa’. (Dt 4:5-8; Ps 111:7, 8, 10; dzringanisa 1Th 2:3.) Mhunu lweyi a nga ni ku twisisa awa swi tiva leswaku a Zritu dzra Xikwembu Nkulukumba a dzri fanelanga ku honisiwa. A lwela ku yelanisa ndlela yakwe na dzrone, a tlhela a kombela Xikwembu Nkulukumba kuva a mu pfuna ku yentxa tanu. (Ps 119:169) A pfumelela dzrungula dzra Xikwembu Nkulukumba dzri dzima mitsru (Mt 13:19-23), a dzri tsrala mbilwini yakwe (Pr 3:3-6; 7:1-4), a va a sungula ku venga ‘tindlela hinkwatu ta madzrimi’ (Ps 119:104). N’wana wa Xikwembu Nkulukumba, loko a li la misaveni a kombisi ku twisisa loku fanaka hi ku yala ku tsrutsruma lifu a mhandzrini ya nxanisa hikusa a a djula ku hetisisa wuprofeta bya leswaku a a ta dlayiwa hi ndlela leyo.​—Mt 26:51-54.

Sentinela 01/11/1999 p. 20 §§ 6-7

Loko Ku Ni Moya Wa Ku Hanana

Hi ku hlamalisiwa hi leswi yi swi twiki ni ku swi vona, a hosi ya xisati yi yanguli hi ku titsrongahata yi ku: ‘Ma ni djombo a malandzra yaku, wolawa, lama yimaka hi masiku a mahlweni kwaku, lama yingelaka wutlhazri byaku.’ (1 Tihosi 10:4-8) A yi hlayanga leswaku a malandzra ya Solomoni a ma nyonxile hi leswi a ma ganyile—nambi leswi a ma ganyile hakunene. Matsrhan’wini ya leswo, a malandzra ya Solomoni a ma tovokile hikusa nkama hinkwawu a ma yingela wutlhazri lebyi a nyikiwiki hi Xikwembu Nkulukumba. Mawaku xikombiso lexinene lexi hosi ya xisati ya le Xeba yi xi bekeliki vhanu va Yehovha namunhla, lava tikholisaka hi wutlhazri bya muvumbi wavu ni bya N’wanakwe Yesu Kriste!

Nakone xiya mazritu lawa hosi leya xisati yi ma byeliki hosi Solomoni: ‘A ku khensiwe Yehovha, Xikwembu Nkulukumba waku.’ (1 Tihosi 10:9) Nakunene, yi vone leswaku wutlhazri ni ku humelela ka Solomoni a swi pfa ka Yehovha. Leswi swi fana ni leswi Yehovha a swi dumbisiki Israyele a ku sunguleni. Yene a te ku bekisa milawu yanga ‘hi byo wutlhazri byenu, hi ko ku yingelisisa kwenu a mahlweni ka matiko lama taka yingela swiyimiso leswi hinkwaswu, va ku: Hakunene, a tiko ledzrikulu ledzri, dzri ni wutlhazri ni ku yingelisisa.’​—Deuteronoma 4:5-7.

Sentinela 01/08/2007 p. 29 § 13

Xana U “Xipfundzri A Mahlweni Ka Xikwembu Nkulukumba?”

Loko Yehovha a tovokisa vhanu vakwe, a a va tovokisa hi mintxhumu leyinene ngopfu. (Yakob 1:17) Hi xikombiso, loko Yehovha a nyika va-Israyele tiko ledzri a va ta tsrhama ka dzrone, a va nyike tiko ‘ledzra tsrwamba ni wulombe’. Nambi leswi a ku hlayiwa leswaku a tiko dzra Egipta a dzri li ledzra tsrwamba ni wulombe, ku ni ntxhumu wun’we lowu a wu hambanisa tiko ledzri Yehovha a dzri nyikiki va-Israyele ni tiko dzra Egipta. Moxe a byele va-Israyele a ku: ‘I tiko ledzri Yehovha, Xikwembu Nkulukumba waku, a dzri londzrisaka.’ Hi mazritu mambeni, a mintxhumu a yi ta va fambela ha hombe hikusa a va ta va na va hlayisiwa hi Yehovha. Loko a ve tsrhama na va dumbekile ka Yehovha, a va ta tovokisiwa hi la ku tlulisaka, nakone a va ta tikholisa hi wutomi lebyi a byi nga ti pimanisiwa nikutsrongo ni bya matiko hinkwawu lawa a ma va tsrandzrelile. Hakunene, ‘a makateko ya Yehovha hi wone ma nyikaka mhunu wukosi’.​—Atinhlayo 16:13; Deuteronoma 4:5-8; 11:8-15.

Tindzralama Ta Moya

Sentinela 15/09/2004 p. 25 § 3

Nkatsrakanyu Wa Buku Dzra Deuteronoma

4:15-20, 23, 24​—Xana ku va ku yilisiwa ku vatla swithombe, a swi hlaya leswaku a ku yilisiwa nambi ku vatla swithombe hi nkongometo wa ku xongisa? Nikutsrongo. Ku yilisiwa loku ku vulavuliwaka ha kone la, a ku li ka ku vatla swithombe hi nkongometo wa ku swi gandzrela kumbe ku swi ‘khinsamela ni ku swi tizrela’. A matsralwa a ma yilisi ku vatla kumbe ku dezenyara hi nkongomento wa ku xongisa.​—1 Tihosi 7:18, 25.

14-20 KA JUNYU

WUKOSI BYI NGA BIBELENI | DEUTERONOMA 5-6

“Dondzrisa Vanaku Ku Zrandzra Yehovha”

Sentinela 15/06/2005 p. 20 § 11

Vapswele, Hlayisani Mindangu Yenu

A mhakeni leyi, swi tikomba ku nge na ndzrimana yin’wana a Bibeleni leyi ku vulavuliwaka ngopfu ha yone ku tlula Deuteronoma 6:5-7. Hi kombela u pfula Bibele dzraku kutani u dondzra tindzrimana toleto. Xiya leswaku ku byeliwa vapswele leswaku va zranga va kulisa wumoya byavu, va kulisa ndlela leyi va zrandzraka Yehovha ha yone, va tlhela va nghenisa mazritu yakwe a mbilwini yavu. Ina, u fanela ku va mudondzri lweyi a tiyimiseliki wa Zritu dzra Xikwembu Nkulukumba, u dondzra Bibele nkama ni nkama u tlhela u yanakanyisisa hi leswi u swi dondzriki akuva u kota ku twisisa ha hombe tindlela take, minsinya ya milawu ni milawu yake u tlhela u yi zrandzra. Xileswo mbilu yaku yi ta tala hi mintiyiso leyi nyonxisaka ya le Bibeleni leyi taka ku yentxa u nyonxa, u kombisa xitxhavu ni ku zrandzra Yehovha. Hi ndlela leyo u ta va ni mintxhumu yinyingi leyinene ya ku yi dondzrisa vanaku.​—Luka 6:45.

Sentinela 15/05/2007 p. 15 §§ 15-16

Ni Nga Va Pfunisa Kuyini Vananga Akuva Va Va Ni Wutivi Lebyi Kongomiki?

Leswi u swi hlayaka ni leswi u swi yentxaka swi kombisa matitwela yaku, leswi u swi zrandzraka ni leswi u swi kunguhataka. (Ba-le-Roma 2:21, 22) Ku sukela a wutsrongwanini, a vana va dondzra ngopfu hi ku xiyisisa vapswele vavu. Vana va xiya leswi vapswele vavu va swi tekaka swi li swa lisima, kutani leswi va swi vonaka va nga ha swi teka swi li swa lisima ni kwavu. Loko hakunene u zrandzra Yehovha vanaku va ta swi vona. Hi xikombiso, va ta swi vona leswaku ku dondzra Bibele i swa lisima kwaku. Va ta swi xiya leswaku u zrangisa swivileleko swa Mfumu a wuton’wini byaku. (Matewu 6:33) Loko va kone a mintlhanganwini nkama ni nkama, ni ku hlengemela hi xitalu a ntizrweni wa ku zrezra hi Mfumu va ta swi xiya leswaku ku nyikela ntizro wa ku xwenga ka Yehovha i swa lisima swinene kwaku.​—Matewu 28:19, 20; Ba-Heberu 10:24, 25.

Sentinela 15/06/2005 p. 21 § 14

Vapswele, Hlayisani Mindangu Yenu

Hi lani Deuteronoma 6:7 yi kombisaka ha kone, n’wine vapswele mi ni mikhandlu yinyingi ya ku bula hi mintxhumu ya moya ni vanenu. Ku nga ha va loko mi li ku fambeni, mi li ku hambeni ka mintizro ya le kaya kumbe mi li ku wiseni, mi nga londzrovota mikhandlu leyo akuva mi yanelisa swivileleko swa moya swa vanenu. Ina, a mi fanelanga ku tsrhamela ku zrezrela kumbe ku dondzrisa vanenu mintiyiso ya Bibele nkama ni nkama. Matsrhan’wini ya leswo dzringisani ku yentxa mabulu yenu ya ndangu ma va lama yakaka, mi vulavula hi mintxhumu ya moya. Hi xikombiso, a revhixta dzra Pfukani! dzri ni tinhlokomhaka tinyingi leti vulavulaka hi mintxhumu ya ku hambanahambana. Timhaka ta ku fana ni leto ti nga ha mi pfuna kuva mi bula hi swihazri leswi Yehovha a swi tumbuluxiki, mimbangu ya xonga a misaveni ni mixaka ya ku hambanahambana leyi hlamalisaka ya vhanu kun’we ni ndlela leyi va hanyaka ha yone. Mabulu ya ku fana ni lawa, ma nga susumetela vana kuva va dondzra leswi yengetelekiki ka mabuku lawa ma humexiwaka hi nandzra lwe wa ku dumbeka ni ku tlhazriha.​—Matewu 24:45-47.

Tindzralama Ta Moya

Xihondzro Xa Ku Zrindzra 02/2019 p. 22 § 11

Lizrandzru Ni Ku Lulama A Israyele Wa Khale

Leswi hi swi dondzraka: Yehovha a vona ku tlula ni leswi mhunu a nga xiswone hi le handle. A vona leswi hi nga xiswone hi le ndzreni, a mbilwini yezru. (1Sa 16:7) A ku na mimpimiso, matitwela ni swiyentxo leswi a nga fihleliwaka swone. A djula leswi nga swinene ka hine a tlhela a hi kutxa ku swi yentxa. Kambe a djula leswaku hi vona mimpimiso ya ku biha ni ku yi lawula na yi nga si na hi dohisa.​—2Mk 16:9; Mt 5:27-30.

21-27 KA JUNYU

WUKOSI BYI NGA BIBELENI | DEUTERONOMA 7-8

“U Nga Vi Tekana Navu”

Sentinela 01/07/2012 p. 29 § 2

Ha yini Xikwembu Nkulukumba A Djula Leswaku Vagandzreli Vake Va Tekana Ntsena Hi Xivone?

Yehovha a a swi tiva leswaku Sathana a a djula ku hambukisa vhanu vake hi ku va yentxa va gandzrela swikwembu swa madzrimi. Xileswo, Xikwembu Nkulukumba a dzrimuxe valandzreli vake leswaku vhanu lava nga liki vapfumeli a va ta ‘fulazrelisa vanavu va nga ha ndzri landzri, va ya tizrela swikwembu swin’wana.’ A va lavisane ni ndzringo. Loko tiko dzra Israyele a dzro wela ntlhan’wini wa ku gandzrela swikwembu swa madzrimi, Xikwembu Nkulukumba a a nga ha ta dzri nyonxela nambi ku dzri sizrelela, leswi a swi ta yentxa leswaku valala vavu va va hlasela hi ku nabyala. Kutani, xana tiko ledzri a dzri ta mu humexisa kuyini Mesiya lweyi a dumbisiwiki? Swi le livaleni leswaku Sathana a a ni xivangelo lexi twalaka xa ku wonga va-Israyele leswaku va tekana ni vhanu lava nga liki vapfumeli.

Sentinela 15/03/2015 pp. 30-31 § 5

Ku Tekana ‘Ntsena A Hosini’​—Xana Swa Ha Pfuna?

Nambiswilitanu, a Bibeleni, Yehovha a hi dondzrisa leswaku hi fanela ku tekana ntsena a Hosini. Ha yini? Hikusa awa swi tiva leswi nga swinene kwezru nakone a djula ku hi sizrelela. A nga swi djuli leswaku hi teka swiboho leswi nga liki swinene leswi nga hi vavisaka kumbe leswi nga hi yentxaka hi nga nyonxi. A masikwini ya Nehemiya, Vayuda vanyingi va tekani ni vavasati lava a va nga tizreli Xikwembu Nkulukumba. Xileswo, Nehemiya a vulavule hi xikombiso xa ku biha xa Solomoni. ‘Afa a zrandzriwa hi Xikwembu Nkulukumba wakwe; Xikwembu Nkulukumba afa a mu beki hosi ya Israyele hinkwadzru; nambiswilitanu a vavasati va matiko va mu honisile na yene.’ (Neh 13:23-26) Yehovha awa swi tiva leswaku swidzrimuxo swake swi pfuna hine, xileswo, a dondzrisa vakriste leswaku va tekana ntsena a hosini. (Ps 19:7-10; Eza 48:17, 18) Hi mu tlangela ngopfu Xikwembu Nkulukumba hi leswi a hi nyikaka swilayu swa lizrandzru ni leswi dumbekaka. Loko hi yingiseta Yehovha swanga Mufumi wezru, hi va na hi pfumela leswaku hi yene lweyi a nga ni mfanelo ya ku hi byela leswi hi fanelaka ku swi yentxa.​—Pr 1:5.

Sentinela 15/08/2015 pp. 26-27 § 12

Hlawula Vanghanu Lavanene A Masikwini Lawa Ya Wugamu

Vakriste lava djulaka ku txhata va fanela ku tivonela ngopfu ka vhanu lava va va hlawulaka akuva va va vanghanu vavu. Zritu dzra Xikwembu Nkulukumba dzri hi dzrimuxa leswi: ‘N’wi nga byatsrheni a mpinga mun’we ni lava ku ka va nga pfumeli; hikusa a ku lulama ni ku somboloka swi ni ku tlhangana kwini xana? Nangweso a ku tlhangana ka livaningo ni munyama he kwini?’ (2Ko 6:14) Bibele dzri byela malandzra ya Xikwembu nkulukumba leswaku ma tekana ‘ntsena a Hosini’ leswi liki va tekana ni mhunu lwa tinyiketeliki a tlhela a babatisiwa nakone a hanyaka hi milawu ya Yehovha. (1Ko 7:39) Loko u tekana ni mhunu lwa nga mupfumeli kuloni lwa zrandzraka Yehovha, u ta va ni munghanu lwa taka ku pfuna ku tsrhama na u dumbekile ka Xikwembu Nkulukumba.

Tindzralama Ta Moya

Sentinela 01/02/2004 pp. 13-14 § 4

Yehovha A Yanelisa Swivileleko Swezru Swa Siku Ni Siku

Xikhongoto xezru xa ku kombela swakuda swa siku ni siku, xi fanela ku tlhela xi hi dzrimuxa xivileleko xezru xa swakuda swa moya swa siku ni siku. Nambi leswi Yesu a a twa ndlala ngopfu ntsrhaku ka ku titsrona swakuda ku dzringana nkama wa ku leha, a yalile loko Sathana a mu dzringa leswaku a ndzruluta mazribye ma va mapawu. A te: “Ku tsraliwile: ‘Mhunu a nga fanelanga ku hanya hi pawu ntsena, kambe a fanela ku hanya ni hi zritu dzrin’wana ni dzrin’wana ledzri humaka a non’wini wa Yehovha.’” (Matewu 4:4) Lani Yesu a tsrhahe mazritu ya Moxe lweyi a byeliki Va-israyele a ku: ‘[Yehovha] a ku tsrongahatile, a ku tsrhika na u ni ndlala, a ku disile mana, ledzri faka u nga dzri tivi, na vo vatatana waku va nga dzri tivi; akuva a ku tivisa leswaku a mhunu a nga hanyi ha swakuda ntsena, kambe mhunu a hanya hi hinkwaswu swi humaka non’wini wa Yehovha.’ (Deuteronoma 8:3) Ndlela leyi Yehovha a phameliki va-Israyele mana ha yone, yi yentxe leswaku va kuma swakuda swa nyama va tlhela va dondzra tindondzro ta swa moya. Ndondzro hi leswaku, a va fanela ‘ku hlengeleta leswi yanelaka siku dzrin’wana ni dzrin’wana’. Loko va txhuka va hlengeleta swinyingi ku tlula swa siku, leswi saliki a swi sungula ku nun’wha swi va swi huma swipungwana. (Eksoda 16:4, 20) Kambe leswi a swi nga yentxeki hi siku dzra wu-6 loko va hlengeleta mpimu lowu yandzrisiwiki kabidzri leswaku va swi da hi savata. (Eksoda 16:5, 23, 24) Kutani mana a yi va dondzrisa leswaku a va fanela ku yingiseta ni leswaku wutomi byavu a byi nga ti seketelanga ka swakuda ntsena kambe ‘ka hinkwaswu leswi humaka non’wini wa Yehovha’.

28 KA JUNYU–4 KA JUHLU

WUKOSI BYI NGA BIBELENI | DEUTERONOMA 9-10

“I Yini Leswi Yehovha, Xikwembu Nkulukumba Waku, A Ku Kombelaka Swone?”

Sentinela 01/10/2009 p. 10 §§ 3-4

I Yini Leswi Yehovha A Swi Kombelaka Ku Hine?

I yini lexi nga hi susumetelaka ku yingiseta Xikwembu Nkulukumba hi ku tizrandzrela? Moxe a boxe xivangelo xin’we lexi liki: ‘Txhava Yehovha Xikwembu Nkulukumba waku.’ (Ndzrimana 12) Leswi a swi hlayi ku hlonipha Xikwembu Nkulukumba hi ku txhava ku khatisiwa, kambe swi hlaya ku hlonipha Xikwembu Nkulukumba ni ku hanya hi tindlela take. Loko hi mu txhava swinene Xikwembu Nkulukumba hi ta fulazrela ku yentxa mintxhumu leyi mu hlundzrukisaka.

Kutani ke, hi wini ntxhumu wa ku sungula lowu fanelaka ku hi susumetela ku yingiseta Xikwembu Nkulukumba? Moxe a te: ‘Zrandzra, ni ku tizrela Yehovha, Xikwembu Nkulukumba waku, hi mbilu yaku hinkwayu, ni hi hika dzraku hinkwadzru.’ (Ndzrimana 12) Ku zrandzra Xikwembu Nkulukumba swi patsra mintxhumu yinyingi ku tlula ndlela leyi hi titwaka ha yone. Buku dzrin’wana dzri li: “A mazritu ya Xiheberu lama tlhamuxelaka ndlela leyi hi titwaka ha yone, ma nga ha tlhamuxela leswi hi swi yentxiki hi kola ka ndlela leyi hi titwaka ha yone.” Buku dzrin’wana ledzri fanaka na dzrone dzri hlaya leswaku ku zrandzra Xikwembu Nkulukumba swi hlaya “ku mu yentxela swiyentxo swa lizrandzru”. Hi mazritu man’wana, loko hakunene hi mu zrandzra Xikwembu Nkulukumba, hi ta yentxa mintxhumu hi ndlela leyi taka mu nyonxisa.​—Amaproverbia 27:11.

Sentinela 01/10/2009 p. 10 § 6

I Yini Leswi Yehovha A Swi Kombelaka Ku Hine?

Ku yingiseta hi ku tizrandzrela swi nga hi buyisela matovoko. Moxe a tsrale a ku: ‘bekisa swileleto . . . leswi dzri ku leletaka swone namunhla, akuva swi ta ku xongela.’ (Ndzrimana 13) Milawu hinkwayu ya Yehovha, ku nga hinkwaswu leswi Yehovha a hi kombelaka swone swi ta pfuna hine. I yini lexi xi nga hi tiyisekisaka? Bibele dzrili: ‘Xikwembu Nkulukumba i lizrandzru.’ (1 Yohan 4:8) Tlhantakubidzri, a hi nyike milawu leyi pfunaka hine. (Ezaya 48:17) Loko hi yentxa hinkwaswu leswi Yehovha a hi kombelaka swone, swi ta yentxa leswaku hi nga hlatiyeli ngopfu swoswi swi tlhela swi hi tisela matovoko ya hi la ku nga helikiki a hansi ka Mfumu wake.

Achege-se a Jeová p. 16 § 2

Xana Swa Koteka Hakunene Ku ‘Tsrhindzrekela Ka Xikwembu Nkulukumba’?

Abrahamu a ve mun’wana lweyi a viki ni wunghanu bya ku fana ni lebyi. Yehovha a vulavule hi mulumuzana lweyi swanga ‘nakulozri’. (Ezaya 41:8) Ina, Yehovha a a vona Abrahamu swanga munghanu wake. Abrahamu a ve ni wunghanu byolebyo lebyikulu hikusa ‘a pfumele ku Xikwembu Nkulukumba’. (Yakob 2:23) Ni namunhla, Yehovha a djula mikhandlu ya ku tsrhindzrekela kusuhi ni lava mu tizrelaka na va susumetiwa hi lizrandzru. (Deuteronoma 10:15) A zritu dzrakwe dzra hi kutxa, dzri li: ‘Tsrhindzrekelani ku Xikwembu Nkulukumba; na yene a ta tsrhindzrekela ku n’wine.’ (Yakob 4:8) Ka mazritu lawa hi kuma xizrambu kun’we ni xidumbiso.

Tindzralama Ta Moya

Perspicaz vol-1 p. 127 § 3

Va-Anaki

I muxaka wa vhanu va ku zimuka swinene lava a va tsrhama a tinhaveni ta le Kanana, ku patsra ni le mimbangwini ya le minkingeni ya nambu, ngopfungopfu hi tlhelo dzra nyingitimu. A minkameni yoleyo a ku ni vavanuna vazrazru lava a va dume ngopfu, ku nga Akimani, Xexayi na Atalmayi, lava a va tsrhama a Hebroni. (Tin 13:22) Ku ve lani a tinhloli leta 12 ta Vaheberu ti voniki va-Anaki hi khambi dzra ku sungula, nakone 10 wa tone ti ye nyikela dzrungula ledzri txhavisaka mayelanu ni va-Anaki, va hlaya leswaku vavanuna lava a va li vatukulu va Manefelimi ya nkama wa Nowa ni leswaku loko va ti fananisa na vone, a Vaheberu a va fana ni ‘swidedede’ kumbe mintete. (Tin 13:28-33; Dt 1:28) Hi ku famba na nkama, tsrhamela dzra vavanuna va va-Emini ni va Refayimi dzri fananisiwe ni tsrhamela dzra ku zimuka dzra va-Anaki. Hi kola ka ntamu wavu, swi nga yentxeka ku pswaleke xihlayahlaya lexi liki: ‘Hi mani lweyi a taka tiya a mahlweni ka vana va Anaki?’​—Dt 2:10, 11, 20, 21; 9:1-3.