Mintlhamuxelo Ya Xibukwana Xa Ntlhanganu Wa Wutomi Ni Wutizreli ByezrIu

7-13 KA MARSU

WUKOSI BYI NGA BIBELENI | 1 SAMUEL 12-13

“Ku Tikukumuxa Ku Tisa Tingana”

Sentinela 01/08/2000 p. 13 § 17

Ku Tikukumuxa Swi Tisa Tingana

¹⁷ Hi khambi dzra ku sungula swiyentxo swa Sawulo swi nga ha voneka swi li swinene. Phela, vhanu va Xikwembu Nkulukumba a va li ‘ku kamiweni lokukulu’ ‘a va bindzreliwa’, va zruzrumela hi kola ka xiyimu xavu lexi txhavisaka. (1 Samuel 13:6, 7) Nakunene, a swi bihanga ku yentxa xa kukazri loko swiyimu swi djula leswaku u yentxa tanu. Kambe, dzrimuka leswaku Yehovha awa swi kota ku vona timbilu a tlhela a xiya minkongometo yezru. (1 Samuel 16:7) Xileswo, swi nga yentxeka a vone mintxhumu yin’wana mayelanu na Sawulo leyi kalaka yi nga boxiwanga hi ku kongoma a Bibeleni. Hi xikombiso, swi nga yentxeka Yehovha a vone leswaku ku hela mbilu ka Sawulo a ku vangiwa hi kola ka ku tikukumuxa. Kumbexana Sawulo a a hlundzruliwa swinene hi leswaku yene swanga hosi ya tiko dzra Israyele hinkwadzru, a a fanela ku yimela mun’wana lweyi a a mu teka swanga muprofeta lwa duhwaliki a tlhela a va ni mihoni! Phela, Sawulo a a vona ingiki ku hlwela ka Samuwele a ku mu nyika mfanelo ya ku tiyentxela mintxhumu ha wuswake ni ya ku honisa swileleto leswi kongomeke leswi a nyikiwiki swone. Dzri ve dzrini bindzru? Samuwele a nga zanga a mu kulungela Sawulo hi leswi a swi yentxiki. Ku hambana ni leswo, a mu hlundzrukelile Sawulo, a ku: ‘A mfumu waku wu nga ka wu nga tiyi . . . leswi u nga bekisangakiki leswi Yehovha a ku leletiki swone.’ (1 Samuel 13:13, 14) Ku tikukumuxa ku tisa tingana.

Sentinela 15/06/2007 p. 27 § 8

Yehovha A Nyika Lisima Ku Yingiseta

⁸ Wudzrunguli bya le Bibeleni mayelanu na hosi Sawulo byi khanyisa lisima bya ku yingiseta. Loko Sawulo a sungula ku fuma a a titsrongahata, ‘a tidzringanisa ni lwetsrongo’. Kambe, hi ku famba ka nkama swiboho swake swi sungule ku lawuliwa hi ku tikukumuxa ni miyanakanyu ya madzrimi. (1 Samuel 10:21, 22; 15:17) Siku dzrin’wana Sawulo a a fanela ku ya lwa ni Vafilista. Samuwele a byele hosi leswaku yi mu yimela akuva a ta ya yentxela Yehovha magandzrelo ni ku nyika swileleto leswi yengetelekiki. Kambe, Samuwele a hlwelile, hiloko vhanu va sungula ku hangalaka. Loko Sawulo a vona leswo ‘a humesa timhamba ta ku hisiwa’. Leswo a swi mu nyonxisanga Yehovha. Loko Samuwele a tlhasile, a hosi yi tiyimelelile hi leswi yi kalaka yi nga yingisetanga, yi hlaya leswaku leswi Samuwele a hlweliki, yi sindzriseki ku humexa mhamba ya ku hisiwa akuva yi ta nyonxeliwa ha Yehovha. Ka hosi Sawulo, ku humexa mhamba yoleyo a swi li swa lisima swinene ku tlula ku yingiseta nkongomiso lowu a wu kumiki wa leswaku a yimela Samuwele akuva a ta humexa mhamba yoleyo. Samuwele a mu byele leswi: ‘U yentxile hi wusinge; a wu bekisanga a leleto dzra Yehovha, Xikwembu Nkulukumba waku, ledzri a ku leletiki dzrone.’ Ku kala ku yingiseta Yehovha ku yentxe leswaku Sawulo a luzekeliwa hi wuhosi byake.—1 Samuel 10:8; 13:5-13.

Tindzralama Ta Moya

Sentinela 15/07/2011 pp. 13-14 § 15

Xana U Ta Wu Landzrelela Nkongomiso Wa Yehovha Wa Lizrandzru?

¹⁵ Kumbexana va-Israyele a va yanakanya leswaku va nga dumba hosi leyi nga mhunu ku tlula ndlela leyi va dumbaka Yehovha ha yone. Loko ku li leswaku a va yanakanya hi ndlela leyo, ‘a va landzra mintxhumu leya ku ka ndlela’. Leswi va dumbiki ntxhumu wun’we wa ku ka ndlela, a swi ta nabyala leswaku va dumba mintxhumu yinyingi ya ku ka ndlela leyi humaka ka Sathana. Hi xikombiso, hosi leyi nga mhunu a yi ta va kutxetela ku gandzrela swifaniso. Vhanu lava gandzrelaka swifaniso va yanakanya leswaku va nga dumba swikwembu leswi hambiwiki hi mapulangu kumbe hi mazribye hikusa va kota ku swi vona ni ku swi khumba. A va mu dumbi Yehovha, Xikwembu Nkulukumba lwa Nga vonekiki, lweyi a tumbuluxiki mintxhumu hinkwayu. Kambe mupostola Pawulo a hlaye leswaku swifaniso a ‘hi ntxhumu’. (1Ko 8:4) Swifaniso leswi a swi voni, a swi yingeli, a swi vulavuli nakone a swi koti ku yentxa ntxhumu. Xileswo i wumphunta ku swi gandzrela hi leswi hi kotaka ku swi vona ni ku swi khumba. Swifaniso a swi nge swi koti ku pfuna vhanu, ‘i mintxhumu leya ku ka ndlela’, nakone lava swi dumbaka ‘va fana na swone’.—Ps 115:4-8.

14-20 KA MARSU

WUKOSI BYI NGA BIBELENI | 1 SAMUEL 14-15

“A Ku Yingiseta Ku Tlula Switlhavelo”

Sentinela 15/06/2007 pp. 26-27 § 4

Yehovha A Nyika Lisima Ku Yingiseta Kwaku

⁴ Leswi Yehovha a nga muvumbi, mintxhumu hinkwayu leyi hi nga na yone i yake. Loko swi li tanu, xana ku ni ntxhumu lowu hi nga mu nyikaka? Ina, hi nga mu nyika ntxhumu wa lisima swinene. Hi wini ntxhumu wa kone? Nhlamulo hi nga yi kuma ka xidzrimuxo lexi landzrelaka: ‘N’wananga, tlhazriha, u tsrhavisa mbilu yanga, ndzri ta kuma zritu ku yangula lava ndzri zrukaka.’ (Amaproverbia 27:11) Hi nga nyika Xikwembu Nkulukumba ku yingiseta kwezru. Nambi leswi swiyimu ni ndlela leyi hi kulisiwiki ha yone swi hambaniki, loko hi yingiseta, mun’wana ni mun’wana wezru a nga nyikela nhlamulo ka xihehlo xa ku biha xa Sathana Diyavulosi xa leswaku vhanu a va nge swi koti ku dumbeka ka Xikwembu Nkulukumba loko va kumana ni mindzringo. Leyo i ndjombo yikulu swinene!

Perspicaz vol-2 p. 500 § 2

Ku Yingiseta

A ku na ntxhumu lowu nga sivaka ku yingiseta nakone a swi koteki ku nyonxisa Xikwembu Nkulukumba loko hi nga mu yingiseti. Samuwele a byele hosi Sawulo a ku: ‘Xana Yehovha a tsrhavisiwa hi timhamba leti hisiwaka ni hi xitlhavelo ku fana ni loko dzri yingisetiwa [sha·maʽʹ] zritu dzra Yehovha xana? Lavisa; a kuyingiseta [hi ku kongoma; ku yingela]; A ku zriya ndleve ku tlula a mafuzra ya timhongwa.’ (1Sa 15:22) Ku tsrhika ku yingiseta i ku kanya zritu dzra Yehovha, ku kombisa leswaku mhunu hakunene a nga kholwi, a nga dumbi nakone a nga na lipfumelo ka mazritu wolawo ni lwe a ma hlayiki. Lwa kalaka a nga yingiseti a fana ni mupfhumbi kumbe lwa tizrisaka swithombe. (1Sa 15:23; dzringanisa ni Ro 6:16.) Akuva hi hlaya leswaku ha yingiseta na kasi a hi swi kombisi hi mintizro leswaku ha yingiseta a swi pfuni ntxhumu; ku pfumala ku yingiseta ku kombisa leswaku a hi kholwi nakone hi pfumala xihluwa ka lweyi a hi nyikaka swileleto. (Mt 21:28-32) Lava nyonxaka hi ku yingela leswi zritu dzra Xikwembu Nkulukumba dzri swi hlayaka ntsena, kambe va nga vi va yentxi va zritu, vo tikanganyisa hi mimpimiso ya madzrimi nakone a va nge yamukeli tovoko ni dzrin’we. (Yk 1:22-25) N’wana wa Xikwembu Nkulukumba a swi beki livaleni leswaku nambi lava va yentxaka mintxhumu ya ku djula ku fana ni leyi a yi leletiki, kambe, va swi yentxa hi ndlela leyi hoxekiki kumbe hi nkongometo lowu hoxekiki a va nga ti pfumeleliwa ku ngena mfun’wini, kambe a va ta yaliwa hi ku helela.—Mt 7:15-23.

Tindzralama Ta Moya

Perspicaz vol-1 p. 519 § 8

Ntwelawusiwana

Loko hi kombisa ntwela wusiwana lowu lwisanaka ni ku zrandzra ka Xikwembu Nkulukumba, swi nga tisa mihandzru ya ku biha. Leswi swi tikomba ka leswi swi yentxekeliki hosi Sawulo. A ku tlhasi nkama lowu Xikwembu Nkulukumba a a ta yavanyisa va Amaleki, tiko dzra ku sungula ledzri hlaseliki va-Israyele handle ka nandzru ntsrhaku ka loko va suki a Egipta. Sawulo a leletiwe leswaku a a nga fanelanga ku va twela wusiwana. Hi ku kutxeteliwa hi malandzra yake Sawulo a nga swi hetisisanga hi ku helela swileleto swa Yehovha xileswo Yehovha a mu susele wuhosi. (1Sa 15:2-24) Lwa txutxelaka xihluwa ni ku tlangela wululami bya Yehovha a va a dumbeka hi ku helela ka Yehovha a nga ka a nga luzekeliwe hi wuxaka byake na Yehovha ku fana na Sawulo.

21-27 KA MARSU

WUKOSI BYI NGA BIBELENI | 1 SAMUEL 16-17

“A Ku Lwa I Ka Yehovha”

Sentinela 05/2016 p. 11 §§ 2-3

“A Ku Lwa I Ka Yehovha”

Davida a tiyisekisi Sawulo hi ku mu byela leswi humeleliki nghonyama ni bere. Xana a o ti kukumuxa? Im-him. Davhida a a yi tiva ndlela leyi a swi hluliki ha yone swihazri leswo. A te: ‘Yehovha lweyi a ndzri huluxiki ntan’wini wa ndzrawu ni wa bere, a ta ni huluxa ni ko vokweni dzra Mufilista lweyi.’ Hi wugamu Sawulo a te: ‘Famba; Yehovha a a ve na wene!’—1 Samuel 17:37.

Xana wa swi djula ku va ni lipfumelo dzra ku fana ni dzra Davhida? Xiya leswaku lipfumelo dzra Davhida a ku nga li ntxhumu lowu a o wu yanakanya kumbexana lowu a o wu navela. Lipfumelo ledzri Davhida a a li na dzrone ka xikwembu Nkulukumba a dzri ti seketele ka wutivi ni mfambu lowu a ali na wone. A a swi tiva leswaku Yehovha i musizreleli lweyi a nga ni lizrandzru nakone a hetisisa swidumbiso swake. Loko hi djula ku va ni lipfumelo dzra ku fana ni dzra Davhida, hi fanela ku dondzra hi Xikwembu Nkulukumba wa le Bibeleni. Loko hi hanya hi leswi hi swi dondzraka, mihandzru ya kone yi ta nyonxisa yi tlhela yi tiyisa lipfumelo dzrezru.—Ba-Heberu 11:1.

Sentinela 05/2016 p. 11 §§ 8-9

“A Ku Lwa I Ka Yehovha”

Ndlela leyi Davhida a yanguliki ha yone yi kombisa lipfumelo ledzri tiyiki. Yanakanya hi mupfana na a byela Goliyati a ku: ‘U ta ku mine hi lipanga ni tlhuvana ni tlhazri; mine dzri ta ku wene hi vito dzra Yehovha wa makhandzra, Xikwembu Nkulukumba wa tiyimpi ta Israyele, leti u ti yeyisiki.’ Davhida a a swi tiva leswaku ntamu wa mhunu ni ni tlhazri a swi nga li swa lisima. Yehovha Xikwembu Nkulukumba a a ta suvisa Goliyati hi leswi a kalaka a nga mu hloniphanga, lakakuva Davhida a hlaya leswaku ‘a ku lwa i ka Yehovha’. —1 Samuel 17:45-47.

Davhida a a swi vona leswaku Goliyati a a li xihotlovila ni leswaku a a hlomile. Kambe Davhida a nga swi pfumelelanga leswo ku va swi mu txhavisa. A nga yentxanga xihoxo lexi Sawulo ni khandzra dzrake va xi yentxiki. Davhida a nga ti dzringanisanga na Goliyati. Kambe a a vona Goliyati hi ndlela leyi Yehovha a a mu vona ha yone. Nambi leswi a a lehi kolomu ka 2.9 wa mametru a tlhela a tlula vavanuna lavan’wana hinkwavu hi ku leha, kambe a a gama kwini loko a pimanisiwa ni muvumbi wa misava hinkwayu? Handle ka ku ganaganeka a a dzringana ni nsokoti, nakone Yehovha a a tiyimiseli ku mu helisa.

Sentinela 05/2016 p. 12 § 4

“A Ku Lwa I Ka Yehovha”

Namunhla malandzra ya Xikwembu Nkulukumba a ma ha patsreki ka tiyimpi. (Matewu 26:52) Kambe hi fanela ku yetisela lipfumelo ledzri Davhida a a li na dzrone. Ku fana na Davhida, hi fanela ku teka Yehovha a li xivizri kwezru lweyi ku nga yene ntsena a faneliwaka hi ku gandzreliwa hi tlhela hi mu bekela xihluwa. Hi nga ha titwa na hi taleliwe hi swi kazratu a wuton’wini, kambe Yehovha a a nga hi pfuna ku hlula. Loko ho vona Yehovha swanga Xikwembu Nkulukumba wezru nakone hi va ni lipfumelo kwake ku fana na Davhida, a ku na swikazratu leswi nga hi txhavisaka a xi kone lexi nga hlulaka ntamu wa Yehovha.

Tindzralama Ta Moya

Perspicaz vol-2 p. 974 § 5

Sawulo

Ku ve ntsrhaku ka leswo ni ntsrhaku ka ku loko Davhida a totiwe swanga hosi leyi a yi ta fuma a Israyele lani moya wa Yehovha wu humiki ka Sawulo. Ku sukela ka kolanu ‘a moya lowumfani lowu zrumiwiki hi Yehovha wu mu pfuxela lipfalu’. Akuva Yehovha a suse moya wake ku Sawulo, a pfumelele leswaku moya wa ku biha wu mu nghenela, a sivela Sawulo leswaku a nga vi na mu zrula ka miyanakanyu a tlhela a mu pfuxela matitwela, miyanakanyu ni mivono leya u biha. Ku hluleka ka Sawulo, ka ku yingiseta Yehovha a ku kombisa lomu mbilu yake ni miyanakanyu yake a swi byekamele kone, lani moya wa Xikwembu Nkulukumba a wu nga mu sizreleli nambi ku mu tiyisa. Nambitanu, leswi Yehovha a a pfumeleli leswaku moya wa ku biha wu siva moya wake wu tlhela wu xanisa Sawulo, hi kola ka leswo a wu vitaniwa ‘moya lowumfani lowu zrumiwiki hi Yehovha’, leswi yentxiki malandzra ya Sawulo ma wu vitana ‘moya lowumfani wa ka Xikwembu Nkulukumba’. Mun’we wa malandzra ya Sawulo, a kutxe Sawulo leswaku a vitana Davhida akuva a va mutxhayi wake lweyi a a ta mu zrulisa loko ‘moya lowumfani’ wu mu xanisa.—1Sa 16:14-23; 17:15.

28 KA MARSU–3 KA ABRILI

WUKOSI BYI NGA BIBELENI | 1 SAMUEL 18-19

“Tama U Titsrongahata Loko Swi Ku Fambela Ha Hombe”

Sentinela 01/04/2004 p. 15 § 4

Dumba Moya Wa Xikwembu Nkulukumba Loko U Langutana Ni Ku Ntxintxa Ka Swiyimu Swa Wutomi

⁴ Ntsrhakunyana, mupfana lweyo, lweyi a nga mubyisi a a ta va ni ndhuma a tikweni hinkwadzru. A vitaniwile leswaku a a ya tizrela hosi ni ku ya yi txhayela wunanga. A dlaye nhenha leyi vitaniwaka Goliyati, leyi a yi li xihotlovila lexi a xi ni mahlundzru lamakulu lakakuva nambi masotxha ya va-Israyele lawa a ma ni wuswikoti a ma txhava ku lwisana na xone. Swanga muzrangeli wa masotxha, Davhida a lwe ni Vafilista a va hlula. A vhanu a va mu zrandzra, va khande tinsimu ta ku mu dzrumisa. A ku sunguleni, mudzrimuxi wa hosi Sawulo a byele hosi leswaku Davhida lweyi a ha liki mumpswha a a li ‘lwe a tivaka ku txhaya swinene’ a arpa nakone a a li ‘nhenha ya ntamu a ku lweni lweyi a nga n’anga ya ku yimba kumbe ku txhaya arpa’ nakone a a li ‘nhenha leya ntamu, a mhunu wa fumu, lwa tlhazrihiki a ku kaneleni, lwe wa ku xonga’.—1 Samuel 16:18; 17:23, 24, 45-51; 18:5-7.

Sentinela 01/2018 pp. 28-29 §§ 6-7

Vana Ni Wuxiyaxiya Loko U Tizrisana Ni Vhanu Va Ku Hambanahambana

⁶ Vhanu vanyingi va ngheneliwa hi moya wa ku tikukumuxa hi leswi va nga xonga, va nga ni ndhuma, va nga ni wuswikoti ni wulawuli. Davhida a a li na swone hinkwaswu leswi kambe a titsrongahatile wutomi byake hinkwabyu. Ntsrhaku ka loko Davhida a dlaye Goliyati, hosi Sawulo a mu nyike n’wanake akuva a a va nsati wa Davhida, kambe Davhida a te: ‘Mine ndzri mani xana? I yini ku a hanya kwanga, ni yindlu ya tatana a Israyeleni, lakakuva ndzri va mukon’wana wa hosi?’ (1Sa 18:18) I yini lexi pfuniki Davhida kuva a tama a titsrongahata minkama hinkwayu? Wumhunu, wuswikoti, ni wutiyanguleli lebyi Davhida a a li na byone a swi kume hi kola ka leswi Xikwembu Nkulukumba a ‘kazramike’ kumbe a titsrongahatiki akuva a kota ku tizrisana na yene. (Ps 113:5-8) Davhida a a swi tiva leswaku mintxhumu hinkwayu leyinene a a li na yone yi huma ka Yehovha.—Dzringanisa 1 Ba-le-Korinte 4:7.

⁷ Ku fana na Davhida, vhanu va Yehovha namunhla va tikazratela ku titsrongahata. Hi tala hi ku hlamala hi ku tiva leswaku nambi n’winyi wa wuyaku hinkwabyu awa titsrongahata. (Ps 18:35) Hi yingiseta xilayu lexi liki: ‘Yambalani lilondzro la wumbilu, a wunene, a ku titsrongahata, a ku nabyala, a ku tiyisela.’ (Kl. 3:12) Nakone ha swi tiva leswaku a lizrandzru ‘a li na ku tikulisa, a li tikukumuxi’. (1Ko 13:4) Loko hi titsrongahata, vhanu va nga ha nyonxela ku dondzra ha Yehovha. Swanga hi leswi vavanuna va nga ha vaka vagandzreli va Yehovha hi ku vona leswaku vasati vavu va tikhoma hi ndlela leyinene, ni van’wana va nga ha djula ku dondzra ha Yehovha loko va vona ku titsrongahata loku vhanu vake va ku kombisaka.—1Pe 3:1.

Tindzralama Ta Moya

Perspicaz vol-2 p. 727 § 2

Muprofeta

Nambi leswi a va bekiwa kuva vaprofeta na va hlawuliwa hi moya wa Yehovha, a hi minkama hinkwayu a va vulavula leswi pfaka ka Yehovha. Minkama yimbeni a moya wa Xikwembu Nkulukumba ‘a wu va henhla kwavu’ wu va byela madzrungula lawa a va fanela ku ma hlaya. (Ezk 11:4, 5; Mk 3:8) Leswo a swi va hisa hi le ndzreni lakakuva swi va susumetela ku vulavula. (1Sa 10:10; Yr 20:9; Am 3:8) a va nga yentxi mintxhumu leyi kalaka yi nga tolovelekanga ntsena, kambe ndlela leyi a va swi yentxa ha yone a yi kombisa leswaku hakunene a ku li mintxhumu leyi kalaka yi nga tolovelekanga ni matitwela lama hlamalisaka. Leswo swi nga ha yentxeka swi tlhamuxela leswaku a va djula ku hlaya yini loko va ku vhanu van’wana ‘va ve swanga vaprofeta’. (1Sa 10:6-11; 19:20-24; Yr 29:24-32; dzringanisa Min 2:4, 12-17; 6:15; 7:55.) Ndlela leyi a va xi hetisisa ni ku xi hisekela ha yone xiyavelo xavu a swi ta yentxa leswaku vhanu vambeni va yanakanya leswaku leswi va swi yentxaka a swi tolovelekanga nakone a va swi pimisanga, hi lani vazrangeli va masotxha va pimisiki ha kone loko mun’we wa vaprofeta a tota Yehu. Kambe loko va twisise leswaku wanuna lwiyani a a li muprofeta, va yamukele dzrungula ledzro hi ku nyonxa. (2Th 9:1-13; dzringanisa Min 26:24, 25.) Loko Sawulo a li ku hlongoliseni ka Davhida, a sindzriseki ‘ku tiyentxa swanga muprofeta’, a susa mpahla a yetlela hansi ‘na a nga yambalanga ntxhumu a siku dzroledzro hinkwadzru ni wusiku byolebyo hinkwabyu’, swi tikomba ku ve mukhandlu wa ku va Davhida a tsrutsruma. (1Sa 19:18–20:1) Leswi a swi hlayi swone leswaku vaprofeta a va talisa ku tsrhama na va nga yambalanga, hikusa wudzrunguli bya Bibele byi hlaya leswi hambaniki. Ka wudzrunguli byibidzri lebyi tsraliwiki, muprofeta a tsrhame na a nga yambalanga hi nkongometo wa ku kazri, akuva a kombisa xiyenge xa ntlhamuxelo wa wuprofeta byake. (Eza 20:2-4; Mik 1:8-11) A xivangelo xa ku va Sawulo a tsrhame na a nga yambalanga, kumbe a hlivile mpahla yake ya wuhosi, a swi djula ku hlaya leswaku a a li mhunu lwe a tolovelekiki lwa kalaka a nga li na ntamu ka wulawuli ni wuhosi bya Yehovha, nambi ka nkongometo wumbeni, a swi boxiwanga.

4-10 KA ABRILI

WUKOSI BYI NGA BIBELENI | 1 SAMUEL 20-22

“Ndlela Ya Ku Va Munghanu Lwenene”

Xihondzro Xa Ku Zrindzra 11/2019 p. 7 § 18

Yaka Wunghanu Lebyi Tiyiki Na Wugamu Byi Nga Si Tlhasa

¹⁸ Namunhla, vamakwezru va kumana ni swihinga swa ku siyana-siyana. Hi xikombiso, vanyingi va weliwa hi timhangu ta ntumbuluku ni ta ku vangiwa hi mhunu. Loko ku yentxeka leswo, van’we kwezru hi nga ha kota ku zruzrela vanghanu lava a makaya kwezru. Van’wana va nga ha pfunisa hi mali. Kambe hinkwezru hi nga kombela Yehovha leswaku a pfuna vamakwezru lavo. Loko hi tiva leswaku makwezru wa kukazri a le gomeni, swi nga yentxeka hi nga swi tivi swa ku swi hlaya kumbe swa ku swi yentxa. Kambe hinkwezru hi na swinyingi swa ku pfuna ha swone. Hi xikombiso, hi nga tinyika nkama wa ku tsrhama ni munghanu wezru. Hi nga mu pfulela ndleve ni mbilu hi mu yingiseta loko a khanela. Nakone hi nga dondzra naye ndzrimana ya kukazri leyi hi yi zrandzraka. (Eza 50:4) Xa lisima ngopfu-ngopfu i ku kumeka kusuhi ni vanghanu vezru loko va hi vilela.​—Dondzra Amaproverbia 17:17.   

Sentinela 15/02/2008 p. 8 § 7

Famba Tindleleni Ta Yehovha

⁷ Xikwembu Nkulukumba a djula leswaku hi va vanghanu lavanene. (Pr 17:17) Yonatani n’wana hosi Sawulo a ve munghanu wa Davhida. Loko Yonatani a twa leswaku Davhida a dlaye Goliyati, ‘a hika dzra Yonatani dzra ku namazrela hika dzra Davhida, Yonatani a mu zrandzra swanga hi hika dzrake’. (1Sa 18:1, 3) Yonatani a hlevele Davhida ka leswaku Sawulo a a djula ku mu dlaya. Ntsrhaku ka loko Davhida a tsrutsrumile, Yonatani a tlhele a kumana na Davhida va hamba xipfumelelanu. A ku sale kutsrongo kuva Sawulo a dlaya Yonatani hi kola ka leswi a byeliki Davhida hi ta kungu dzrake dzra ku djula ku mu dlaya, kambe vanghanu lavabidzri va tlhele va tlhangana va tiyisa wunghanu byavu. (1Sa 20:24-41) Loko va tlhanganile ka wugamu, Yonatani a tiyise Davhida a mu byela leswaku a namazrela ‘ka Xikwembu Nkulukumba’.—1Sa 23:16-18.

Sentinela 15/10/2009 pp. 19-20 § 11

Ku Tama U Va Ni Vanghanu Lavanene A Misaveni Leyi Nga Liki Na Lizrandzru

¹¹ Dumbeka. Salomoni a tsrale leswi: ‘A nakulobye wa mhunu awa mu zrandzra hi masiku; i makwavu a makhombyeni.’ (Pr 17:17) Loko Salomoni a tsrala mazritu lawa, swi nga yentxeka a a yanakanya hi wunghanu lebyi papayi wake, Davhida, a a li na byone na Yonatani. (1Sa 18:1) Hosi Sawulo a a djula leswaku n’wanake Yonatani a va yene a mu sivaka, a va hosi ya Israyele. Kambe Yonatani a pfumelile leswaku Yehovha a hlawule Davhida akuva a va hosi. Ku hambana na Sawulo, Yonatani a nga mu kweletanga Davhida. A nga khunguvanyekanga loko Davhida a dzrumisiwa nakone a nga yimanga naswu swihehlo leswi Sawulo a swi hangalasiki mayelanu na Davhida. (1Sa 20:24-34) Xana hi fana na Yonatani? Loko vanghanu vezru va kuma swiyavelo swa kukazri, xana hi nyonxa na vone? Loko va weliwa hi makhombo ke, xana ha va txhavelela hi tlhela hi va seketela? Loko hi twa na ku hleviwa munghanu wezru, xana hi kahlula hi kholwa ka mhaka yoleyo? Kumbexana hi ta sizrelela munghanu wezru hi ku dumbeka, ku fana na Yonatani?

Tindzralama Ta Moya

Sentinela 15/03/2005 p. 24 § 4

Nkatsrakanyu Wa Buku Dzra Samuel Wa Ku Sungula

21:12, 13. Yehovha a yimela leswaku hi tizrisa wuswikoti byezru bya ku yanakanya akuva hi kota ku langutana ni swiyimu swa ku kazrata a wuton’wini. A hi nyiki zritu dzrake ledzri huhutiwiki, ledzri nyikanaka wutlhazri, wutivi ni wuswikoti bya ku yanakanya. (Amaproverbia 1:4) Nakone hi ni pfunu wa vakulu lava bekiwiki lava nga vakriste.

18-24 KA ABRILI

WUKOSI BYI NGA BIBELENI | 1 SAMUEL 23-24

“Lehisa Mbilu U Yimela Yehovha”

Sentinela 01/04/2004 p. 16 § 8

Tiseketeli Hi Moya Wa Xikwembu Nkulukumba Loko U Langutana Ni Ku Ntxintxa Ka Swiyimu A Wuton’wini

⁸ Davhida a yalile ku tidzrihisela ka Sawulo. Swanga hi leswi a a li ni lipfumelo ni ku leha mbilu, Davhida a vone swi yampswa ku dumba Yehovha ni ku mu tsrhikela timhaka hinkwatu. Loko hosi yi humile a mhakweni, Davhida a yi lengete a ku: ‘Yehovha a a tsreme makazri kwezru, wene na mine, Yehovha a a ndzri dzrihiseli ku wene; kambe a voko dzranga dzri nga vi hehla kwaku.’ (1 Samuel 24:12) Nambi leswi Davhida a a swi tiva leswaku leswi Sawulo a a swi yentxa a a nga fanela ku swi yentxa a nga tidzrihiselanga, nakone a nga mu hlamulanga hi ndlela ya ku biha Sawulo kumbe ku vulavula ku biha ha yene. Ka makhambi ya ku hlayanyana, Davhida a tikawukile a yala ku tidzrihisela. A matsrhan’wini ya leswo, a a dumba leswaku hi Yehovha lwa taka lulamisa timhaka hinkwatu.—1 Samuel 25:32-34; 26:10, 11.

Sentinela 01/06/2004 p. 22 §§ 5-6

Xana Wutomi Byaku Byi Lawuliwa Hi Swiyimu Leswi U Kumanaka Na Swone?

Dondzro ya wuzrazru hi leswaku, matsrhan’wini ya ku tizrisa tindlela leti nga liki ta matsralwa akuva hi tlhantlha swi kazratu swezru, hi fanela ku yimela Yehovha. Mudondzrisiwa Yakobe a tsrale a ku: ‘Kambe a ku tiyisela a ku ve ni ntizro wa ku hetiseka, akuva n’wi hetiseka, n’wi va swiheli; n’wi nga pfumali mhakeni ni yin’we.’ (Yakob 1:4) Hi fanela ku pfumelela ‘a ku tiyisela ku va ni ntizro wa ku hetiseka’ hi kuva hi tiyiselela mindzringo ku ya tlhasa wugamu, hi nga kahluli ku kuma ndlela ya ku huma ka wone leyi nga liki ya matsralwa. Lipfumelo dzrezru dzri ta dzringiwa dzri tlhela dzri kanetiwa, kutani ntamu wa dzrone wu ta voneka. Yosefa na Davhida va ve ni tsrhamela ledzri dzra ku tiyisela. A va dzringetanga ku tlhantlha swikazratu swavu hi ndlela leyi a yi ta khunguvanyisa Yehovha. Matsrhan’wini ya leswo, va lwe hi nkhinkhi akuva va hlula ka swiyimu leswi a va kumana na swone. Va yimele Yehovha, nakone va kume matovoko lamakulu hi ku yentxa tanu! Yehovha a tizrise vavanuna lava akuva huluxa ni ku zrangela vhanu vake.—Genesis 41:39-41; 45:5; 2 Samuel 5:4, 5.

Na hine hi nga ha kumana ni swiyimu leswi nga hi yentxaka hi djuletela tindlela ta ku huma ka swone leti lwisanaka ni matsralwa. Hi xikombiso, xana u hela ntamu hi leswi u kalaka u nga si na kuma mhunu lwa fanelekaka wa ku txhata na yene? Loko swi li tanu, tingawula mindzringo leyi nga ha ku yentxaka u tlula nawu wa Yehovha wa ku ‘tekana ntsena a Hosini’. (1 Ba-le-Korinte 7:39) Xana mi kumana ni swi kazratu a wukatini byenu? Matsrhan’wini ya ku yan’wa moya wa misava lowu kutxaka ku tsrhika kumbe ku dlaya wukati, dzringisani ku tlhantlha swikazratu swenu hi ku va ni ntizrisanu. (Malaki 2:16; Ba-le-Efesa 5:21-33) Xana u kumana ni swikazratu swa ku hlayisa ndangu waku hi kola ka wusiwana? Ku yimela Yehovha swi patsra ku tingawula tindlela ta ku kuma mali hi ku nabyala leti nga liki nawini. (Amapsalma 37:25; Ba-Heberu 13:18) Hinkwezru hi fanela ku yentxa leswi nga ntan’wini wezru ka xiyimu xin’wana ni xin’wana lexi hi nga ha vaka hi li ka xone, kutani hi yentxa minzamu hinkwayu leyi taka yentxa leswaku Yehovha a hi tovokisa. Loko hi li ku yentxeni ka leswo, hi fanela ku tiyimisela hi yimela Yehovha akuva a tlhantlha swikazratu swezru hi ku hetiseka.—Mika 7:7.

Tindzralama Ta Moya

Sentinela 11/2017 p. 27 § 11

U Nga Pfumeleli Ntxhumu Wu Ku Sivela Ku Kuma Hakelo

¹¹ Loko hi tikazratela ku txutxela lizrandzru ni wunene a hi nga ti va na byone wukwele. Bibele dzri li: ‘A lizrandzru li lehi; mbilu li ni wumbilu; a lizrandzru a li na xikwele.’ (1Ko 13:4) Hi fanela ku tikazratela ku vona mintxhumu hi ndlela leyi Yehovha a yi vonaka ha yone, hi tlhela hi vona vamakwezru swanga swizro swa mizri wun’we ku nga bandla, leswo swi ta hi pfuna ku nga vi na xikwele. Leswo swi ta hi yentxa hi nyonxa ni vamakwezru hi lani Bibele dzri hlayaka ha kone loko dzri ku: ‘Loko xizro xin’wana xi twalisiwa, a swizro hinkwaswu swi tsrhava kun’we naxu.’ (1Ko 12:16-18, 26) Xileswo a matsrhan’wini ya ku va ni xikwele, hi ta nyonxa loko vamakwezru swi va fambela ha hombe. Xiya xikombiso xa n’wana hosi Sawulo, Yonatani. A nga vanga ni wukwele loko a twa leswaku Davhida hi yene lwe a taka va hosi a matsrhan’wini yake. A matsrhan’wini ya leswo a mu kutxile. (1Sa 23:16-18) Na hine a hi veneni ni lizrandzru ni wunene ku fana na Yonatani.

25 KA ABRILI–1 KA MAYU

WUKOSI BYI NGA BIBELENI | 1 SAMUEL 25-26

“Xana U Yentxa Mintxhumu Hi Magugu?”

Imite pp. 78-79 §§ 10-12

A Yentxe Mintxhumu Hi Wutlhazri

¹⁰ Xana malandzra ya Davhida lama gingiritekaka ma va khomisi kuyini malandzra ya Nabali? Leswi a va li khandzra dzra ntamu, a swi ta va nabyalela kuva va titekela tinyipfu va da, kambe a va swi yentxanga leswo. Matsrhan’wini ya leswo va pfune vabyisi va Nabali ku sizrelela tinyipfu. (Dondzra 1 Samuel 25:15, 16.) A tinyipfu ni vabyisi a va kumana ni makhombo manyingi. Hi nkama wolowo swihazri swa nhova leswi daka nyama a swi li swinyingi, nakone a ndzrelikana wa israyele lowu a wu li n’walungu a wu li kusuhi lakakuva a swi ta nabyala leswaku vayivi va matiko lawa a va vundzramane na wone va buya va ta yiva.

¹¹ A swi nga mu nabyaleli Davhida ku kumela malandzra yake swakuda leswi yaneliki siku ni siku loko va li mananga. Siku dzrin’wana Davhida a zrumele 10 wa vavanuna kuva va ya kombela mpfunu ka Nabali. Davhida a ye kombela mpfunu hi nkama lowunene hikusa a ku li nkama wa leswaku tinyipfu ti tsremetiwa voya nakone hi nkama lowo vhanu a va kombisa malwandla. Davhida a tlhele a vulavula hi ndlela ya ku titsrongahata mahlweni ka Nabali. Leswi Nabali a a li nkulu kwake, a mu kombise xitxhavu, a ku hi mine ‘n’wanaku Davhida’. Xana Nabali a yentxe yini?—1Sa 25:5-8.

¹² A matsrhan’wini ya ku mu pfuna a hlundzrukile. A yanguli malandzra ya Davhida na a hlundzrukile hi lani nandzra lwe ku vulavuliwiki ha yene a ku sunguleni ka nhlokomhaka leyi a tlhamuxeliki Abigayili ha kone. Nabali a a nga djuli ku twa ntxhumu e pawu dzrake, mati, kumbe ku dlaya swin’we swa swifuyu swake. A a vona Davhida swanga lwa kalaka a nga pfuni ntxhumu, a a mu vitana xikazrawa lexi tsrhamelaka ku tsrutsruma. Ndlela leyi Nabali a khomiki Davhida ha yone a yi fana ni ndlela leyi Sawulo a mu khomiki ha yone Davhida swanga hi leswi a a mu nyenya. Hi wubidzri byavu a va nga byi tizrisi wutlhazri lebyi humaka ka Yehovha. Xikwembu Nkulukumba a a mu zrandzra Davhida nakone a a nga mu voni swanga nandzra lwa xandzrukiki, kambe a a mu vona swanga lwa taka va hosi ya israyele a nkameni lowu taka.—1Sa 25:10, 11, 14.

Imite p. 80 § 18

A Yentxe Mintxhumu Hi Wutlhazri

¹⁸ Loko a ye ka Davhida a tlhase a kombela lidzrivalelo ingiki hi yene lwa dohiki. A pfumelile leswaku nuna wake a a yentxa mintxhumu hi ku pfumelelana ni ntlhamuxelo wa vito dzrake, nakone swi nga ha yentxeka leswaku a tlhele a byela Davhida leswaku a swi nga ti pfuna ntxhumu kuva a a khatisa mhunu wa ku tanu. Leswi a a swi tiva leswaku Davhida i muzrumiwa wa Yehovha na kone ‘a lwa mafumu kumbe tiyimpi ta Yehovha’ a mu kombise xitxhavu. Mazritu yake lama landzrelaka a ma kombisa leswaku a a xi tiva xidumbiso xa Yehovha mayelanu ni mhaka ya leswaku Davhida a a tava hosi, hikusa a te: ‘Yehovha . . . a ta va a ku bekile hosi ya Israyele.’ Kutani a mu kombele leswaku a nga yentxi ntxhumu lowu taka mu siya na a ni nandzru wa ngati kumbe xivangelo xa ku va ‘a vaviseka’, ku nga ku biwa hi lipfalu. (Dondzra 1 Samuel 25:24-31.) Hakunene mazritu yake ma khumba mbilu!

Tindzralama Ta Moya

Imite p. 80 § 16

A Yentxe Mintxhumu Hi Wutlhazri

¹⁶ Xana leswi swi hlaya leswaku Abigayili a a nga byi hloniphi wunhloko bya nuna wake? A swi tanu. Nabali a nga byi kombisanga wunene ka nandzra wa Yehovha lwa totiwiki, nakone a ke sala kutsrongo akuva swiyentxo swake swa wuphunta swi peta wutomi bya vhanu vanyingi a khombyeni. Loko Abigayili a a nga yentxanga ntxhumu xana a swi ta hlaya leswaku a hlangamelile ka xidoho xa nuna? Phela ka hinkwaswu leswi a a swi yentxa a a fanela ku hlonipha Xikwembu Nkulukumba ku tlula nuna wake.