Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

5-11 KA SETEMBRU

WUKOSI BYI NGA BIBELENI | 1 TIHOSI 9-10

“Nyika Lisima Wutlhazri Bya Yehovha”

Sentinela 01/07/1999 p. 30 § 6

Liyendzro Ledzri Viki Ni Mabindzru Lamakulu

A hosi ya xisati ya le Xeba loko yi kumane na Solomoni yi sungule ku mu dzringa hi ku mu hamba ‘swivutiso swa ku kazrata’. (1 Tihosi 10:1) Zritu dzra Xiheberu ledzri ndzruluteliwiki lani dzri nga ha ndzruluteliwa dzri va ‘switekatekisana’. Kambe leswi a swi djuli ku hlaya swone leswaku a hosi leyi ya xisati yi sungule ku tha switekatekisana na hosi Solomoni. Lexi nyonxisaka, ka Amapsalma 49:4, zritu ledzri fanaka dzra Xiheberu dzri tizriseliwe ku tlhamuxela swivutiso swa lisima mayelanu ni xidoho, lifu ni xitizrulo. Kutani swi tikomba na hosi ya xisati ya le Xeba a yi vulavula hi timhaka ta lisima na Solomoni leti dzringiki wuyenti bya wutlhazri byake. Bibele dzri hlaya leswaku hosi ya xisati yi sungule ku ‘mu byela hinkwaswu leswi faka yi naswu mbilwini ya yone’. Solomoni na yene ‘a yi tlhamuxela swivutiso swa yone hinkwaswu; a ka vanga na ntxhumu lowu nga hlula hosi akuva yi tlhamuxela swone’.—1 Tihosi 10:2b, 3.

Sentinela 01/11/1999 p. 20 § 6

Loko Ku Li Ni Moya Wa Ku Hanana

Hi ku hlamalisiwa hi leswi yi swi twiki ni ku swi vona, a hosi leyi ya xisati hi ku titsrongahata yi hlamalile yi ku: ‘Ma ni ndjombo malandzra yaku, wolawa, lama yimaka hi masiku mahlweni kwaku, lama yingelaka wutlhazri byaku.’ (1 Tihosi 10:4-8) A hosi leyi ya xisati, a yi hlayanga leswaku malandzra ya Solomoni a ma nyonxa hi kola ka leswi a ma ni lifuwu dzrinyingi nambi leswi a dzri li dzrinyingi. Matsrhan’wini ya leswo, malandzra ya Solomoni a ma tovokile hikuva nkama hinkwawu a ma yingiseta wutlhazri lebyi Solomoni a nyikiwiki byone ha Yehovha Xikwembu Nkulukumba. Xongani ka xikombiso lexi lexinene lexi hosi ya xisati ya le Xeba yi xi bekelaka vhanu va Yehovha namunhla, lava tikholisaka hi wutlhazri bya mutumbuluxi hi ku kongoma ni bya N’wanake Yesu Kriste!

Sentinela 01/07/1999 p. 30 § 7

Liyendzro Ledzri Viki Ni Mabindzru Lamakulu

A hosi ya xisati ya le Xeba yi nyonxisiwe swinene hi wutlhazri bya Solomoni ni ku humelela ka mfumu wake lakakuva ‘yi hela moya’. (1 Tihosi 10:4, 5) Van’wana va ndzrulutela mazritu lawa va hlaya leswaku a sale na a nga ha ‘hefemuli’. Xidondzri xin’wana xi ve xi dzringanyeta leswaku a titivalile! Ku nge na mhaka leswaku ku yentxeki yini, a hosi ya xisati yi hlamalisiwe hi leswi yi swi voniki ni leswi yi swi twiki. Hosi leyi ya xisati yi hlaye leswaku malandzra ya Solomoni ma nyonxile hi nkonta ya ku twa wutlhazri bya hosi nakone yi dzrumise Yehovha hikuva a beke Solomoni a xiluvelweni xa wuhosi. Kutani yi nyike hosi swihanano swa ku dula, lani loko ku hlayiwa ntsrengo wa woru, hi ku ya hi xidzringanyeto xa namunhla, a wu li kolomu ka ku tlula 1 biliyawu wa mameticali. Solomoni na yene a humexe swihanano swake, a nyika hosi leyi ya xisati ‘hinkwaswu leswi yi swi zrandzraka ni leswi yi swi navelaka’.—1 Tihosi 10:6-13.

Tindzralama Ta Moya

Sentinela 01/11/2008 p. 22 §§ 4-6

Xana A Wu Swi Tiva?

Xana Hosi Solomoni A A Ni Woru Dzrinyingi Ku Ya Tlhasa Kwini?

A matsralwa ma hlaya leswaku Hiramu hosi ya Tiri a zrumele mune wa matonelada ya woru ka hosi Solomoni, a hosi ya xisati ya le Xeba na yone yi mu nyike ntsrengo lowu fanaka, nakone switimela swa mati swa hosi Solomoni swi buyise kolomu ka ku tlula 15 wa matonelada ya woru na swi ta hi Ofiri. Ndzrimana yin’wana yi hlaya leswaku ‘a ku bindzra ka gole (woru) ledzri faka dzri buya ka Solomoni hi lembe dzrin’wana ni dzrin’wana, afa ku buya ntlhanu wa madzana na dzana dzrin’we na ntlhanu wa makume na kume dzrin’we, na ntlhanu wa matalenta na talenta dzrin’we (666)’, kumbe kolomu ka ku tlula 25 wa matonelada. (1 Tihosi 9:14, 28; 10:10, 14) Xana mhaka leyi i ntiyiso? Xana tihosi a minkameni yoleyo a ti ni woru dzrinyingi ku ya tlhasela kwini?

Tsralwa dzrin’wana dzra khale ledzri vakambisisi va kombetelaka leswaku mhaka leyi nga ka dzrone i ntiyiso, dzri hlaya leswaku Faru Thutmosi wa wuzrazru wa le Egipta (2000 M.N.Y.) a nyikele kolomu ka 13 wa matonelada ni hamfu ya woru a tempeleni dzra Amun-Ra ledzri nga Karnaki. Hi lembe dzra wu 8 M.N.Y. a hosi ya Asiriya Tiglath-pileser wa wuzrazru a kume ku tlula mune wa matonelada ya woru ka tinemba leti humaka Tiri nakone Sargon wa wubidzri a nyikele hi ntsrengo lowu fanaka wa woru swanga swihanano ka swikwembu swa Vababilona. Ku hlayiwa leswaku hosi Philip wa wubidzri wa le Makedoniya (359-336 M.N.Y.) a a kela ku tlula 28 wa matonelada ya woru lembe ni lembe a migodini ya Pangaeum a Thrace.

Loko Alexandre Lwenkulu (336-323 M.N.Y.) n’wana wa Philip, a hlula Susa, ntsindzra wa mfumu wa Persiya, ku hlayiwa leswaku a teke kolomu ka 1180 wa matonelada ya woru kolanu nakone ku hlayiwa leswaku a teke kolomu ka 7.000 wa matonelada a mfun’wini wa Persiya. Kutani mhaka leyi nga Bibeleni leyi vulavulaka hi woru ledzri hosi Solomoni a a li na dzrone yi fananisiwa ni swib’iko leswi, mhaka yoleyo a yi hundzreleti.

12-18 KA SETEMBRU

WUKOSI BYI NGA BIBELENI | 1 TIHOSI 11-12

“Hlawula Hi Wutlhazri Lweyi U Taka Tekana Na Yene”

Sentinela 07/2018 p. 18 § 7

I Vamani Lava Yimaka Na Yehovha?

⁷ Hi nga dondzra swinyingi ka xikombiso xa hosi Solomoni. Na a ha li mumpswha, Solomoni a a talisa ku djula nkongomiso wa Yehovha. Xikwembu Nkulukumba a mu nyike wutlhazri lebyi hlamalisaka nakone a mu nyike ntizro wa ku yaka tempele ledzrikulu a Yerusalema. Kambe Solomoni a lahlekeliwe hi wuxaka byake na Yehovha. (1Th 3:12; 11:1, 2) A Nawu wa Xikwembu Nkulukumba a wu nga pfumeli leswaku a hosi ya Muheberu yi va ni ‘vasati lava ku tala, suka mbilu ya yone yi hambuka’. (Dt 17:17) Solomoni a nga wu yingisetanga nawu lowo hikusa a titekele 700 wa vavasati. A tlhela a yengesela hi ku titekela 300 wa vavasati lavatsrongo. (1Th 11:3) Wunyingi bya vasati vake a va nga li va-Israyele nakone a va gandzrela swikwembu swa madzrimi. Hi ku yentxa leswo, Solomoni a tlhele a tlula nawu wa Xikwembu Nkulukumba lowu a wu yilisa ku teka vavasati va matiko.—Dt 7:3, 4.

Xihondzro Xa Ku Zrindzra 01/2019 p. 15 § 6

U Nga Yi Sizrelelisa Kuyini Mbilu Yaku?

⁶ Sathana a djula leswaku hi fana na yene, a nga mupfukeli lwa bakanyaka milawu ya Yehovha nakone a susumetiwaka hi moya wa ku tidjulela swake. Sathana a nge hi sindzrisi ku pimisa ni ku yentxa mintxhumu ku fana naye. Xileswo, a dzringisa ku tlhasela makungu yake hi tindlela timbeni. Hi xikombiso, a hi beka makazri ka vhanu lava ku nga khale na a va honile. (1Yh 5:19) A lavisela leswaku hi ta hlawula ku heta nkama navu, nambi leswi hi swi tivaka leswaku vanghanu lava ku biha va “hona” kumbe va “bolisa” mimpimiso ni swiyentxo swezru. (1Ko 15:33.) Zrengu ledzro dzri tizrile ka Hosi Salomoni. A txhate ni vavasati vanyingi va vahedeni, lava hi wugamu va kotiki ku mu kutxetela swinene va va ‘va hambukisa mbilu yakwe’ ka Yehovha.​—1Th 11:3.

Sentinela 07/2018 p. 19 § 9

“I Mani Lweyi A Yimaka Na Yehovha?”

⁹ Kambe Yehovha a nga txhuki a swi ba hi makatla swidoho. A Bibele dzri li: ‘Yehovha a hlundzrukela Solomoni, hi leswi a mbilu yake yi tsrhikiki Yehovha . . . lweyi a faka a tivonekisile ku yene kubidzri, a mu lelete a mhakeni leyo leswaku a nga landzri swikwembu swimbeni; kambe a nga bekisanga ku leleta ka Yehovha.’ Xileswo Xikwembu Nkulukumba a tsrhike ku mu pfuna. Mfumu wa Israyele wu sungule ku yavana nakone vamadapfindla vake va kumane ni swi kazratu leswi tekiki malembe manyingi.—1Th 11:9-13.

Tindzralama Ta Moya

Sentinela 06/2018 p. 14 §§ 1-4

A Lahlekeliwe Hi Wuxaka Byake Na Xikwembu Nkulukumba

Loko Robowamu a vone leswaku vhanu va xandzrukile, a hlengelete khandzra dzrake dzra yimpi. Kambe hi ku tizrisa muprofeta Xemaya Yehovha a mu byele leswi: ‘Mi nga tlhantukeni, mi ya lwa ni vamakwenu, a vana va Israyele. Tlhelani, a mun’wana ni mun’wana a ndlwini yake hikusa mhaka leyi yi huma ku mine.’—1Th 12:21-24.

Xana a va nga fanelanga ku lwa na vone? Leswo swi tikomba na swi kazrate Robowamu. Xana vhanu a va ta ku i hosi ya matsrhamela muni leyi dumbisaka ku khatisa vhanu ‘hi mibalana’ kambe hi ku kahlula yi tsrhika vhanu va xandzruka? (Dzringanisa 2 Makronika 13:7.) Nambitasu, a hosi ni makhandzra ya yone ‘va yingisete zritu dzra Yehovha, va tlhela va muka swanga hi leswi Yehovha a hlayisiki xiswone’.

Hi dondzra yini ka mhaka leyi? I wutlhazri ku yingiseta Xikwembu Nkulukumba nambi loko ku yentxa leswo swi vanga xihlekiso a vhanwini. Ku yingiseta Xikwembu Nkulukumba swi hi yentxa hi va ni wuxaka lebyinene na yene nakone a hi tovokisa.—Dt 28:2.

I yini leswi Robowamu a swi yentxiki? Leswi a titsrongahatiki hi ku tsrhika kungu dzra ku lwa ni tiko ledzrimpshwa, a sungule ku yaka mimiti a mimbangwini ya Yuda na Benjamini ku nga tinxaka leti a ti fumiwa ha yene. A tiyise mimiti yinyingi ‘a yi tiyisa swinene’. (2Mk 11:5-12) Xa lisima swinene, ku dzringana nkama wa kukazri a a yingiseta milawu ya Yehovha. Nakone vhanu vanyingi va tinxaka ta 10 ta Israyele, lava a va zrangeliwa ha Yerobuwamu a va gandzrela ngopfu swifaniso, van’wana va tame va ‘nyika ntamu Robowamu’ hi ku famba mpfhuka wa ku leha va ya Yerusalema va ya seketela wugandzreli bya ntiyiso. (2Mk 11:16, 17) Xileswo, ku yingiseta ka Robowamu ku yentxe leswaku a wuhosi byake byi tiya.

19-25 KA SETEMBRU

WUKOSI BYI NGA BIBELENI | 1 Tihosi 13-14

“Ha Yini Swi Li Swa Lisima Ku Yaneliseka Ni Ku Dzringanisela?”

Sentinela 15/08/2008 p. 8 § 4

Tama U Dumbeka Hi Mbilu Hinkwayu

⁴ Ntsrhaku ka leswo, Yerobuwamu a byele muprofeta wa Xikwembu Nkulukumba wa ntiyiso a ku: ‘A hi fambe kun’we a kaya u ya wisa ndzri ta ku hanana swihanano.’ (1Th 13:7) I yini leswi muprofeta a a fanela ku swi yentxa? Xana a a fanela ku ya ndlwini ka hosi leyi ntsrhaku ka loko a yi byele dzrungula dzra wuyavanyisi? (Ps 119:113) Kumbexana a a fanela ku yala xizrambu xa hosi nambi leswi a yi tikomba ingiki ya tisola? Yerobuwamu a a ganyile nakone a a ta swi kota ku nyika vanghanu vake swihanano swa lisima. Loko a li leswaku a muprofeta wa Xikwembu Nkulukumba a a li ni moya wa ku navela mintxhumu leyi vonekaka a xihanano xa hosi a xi ta va ndzringo lowukulu ku yene, nambitasu Yehovha a byele muprofeta lweyi a ku: ‘U nga de, u nga nwe, u nga tlheli u buya hi ndlela leyi u fambiki ha yone.’ Kutani muprofeta a hlamula na a nga na ku ganaganeka a ku: ‘Nambi u nga ndzri nyika wukazri (kumbe hamfu) bya yindlu yaku, ndzri nga ka ndzri nga nhingeni na wene, ndzri nga ka ndzri nga di, ndzri nga ka ndzri nga nwi a mbangwini lowu.’ Kutani muprofeta a suka a Betele a famba hi ndlela yin’wana. (1Th 13:8-10) Xiboho xa muprofeta lweyi, xi hi dondzrisa yini mayelanu ni ku dumbeka hi mbilu hinkwayu?—Ro 15:4.

Sentinela 15/08/2008 p. 11 § 15

Tama U Dumbeka Hi Mbilu Hinkwayu

¹⁵ He swini swin’wana leswi hi nga swi dondzra ka xihoxo lexi yentxiwiki hi muprofeta wa le Yuda? Amaproverbia 3:5 yi li: ‘Dumba Yehovha hi mbilu yaku hinkwayu, u nga dumbi ku yingelisisa kwaku.’ A matsrhan’wini ya ku tama a dumba Yehovha hi lani a yentxiki ha kone a ku sunguleni, ka xiyentxakalo lexi muprofeta wa le Yuda a titekele xiboho. Xihoxo xake xi yentxe leswaku a lahlekeliwa hi wutomi byake ni ku tlhela a tihonela vito mahlweni ka Xikwembu Nkulukumba. Leswi mu humeleliki swi kandzrakanya lisima dzra ku titsrongahata ni ku tizrela Yehovha hi ku dumbeka.

Sentinela 15/08/2008 p. 9 § 10

Tama U Dumbeka Hi Mbilu Hinkwayu

¹⁰ Muprofeta lweyi wa le Yuda a a fanele a byi vonile wukanganyisi bya muprofeta lwiyani lweyi a a duhwalile. A a fanela ku tivutisa leswaku, ‘ha yini Yehovha a zrumele ntsrumi ka mhunu mumbeni akuva a tisa swileleto leswimpswha mayelanu na mine? Muprofeta lweyi a a fanela ku kombela Yehovha leswaku a mu tlhamuxela mayelanu ni swileleto leswimpswha leswi a swi yamukeliki, kambe matsralwa ma kombisa leswaku a nga swi yentxanga leswo. A matsrhan’wini ya leswo, ‘a buye ni muprofeta lweyi lweyi a duhwaliki a da a nwa’. Leswo a swi mu nyonxisanga Yehovha. Loko muprofeta lweyi a kanganyisiwiki a tlhelela Yuda, a dlayiwe hi nghonyama. Vona ku vavisa ka ndlela leyi ntizro wake wa wuprofeta wu gamiki ha yone!—1Th 13:19-25.

Tindzralama Ta Moya

Sentinela 01/07/2010 p. 29 § 5

A Langusa Leswinene

Xa lisima swinene, mazritu lama nga 1 Tihosi 14:13, ma hi dondzrisa mhaka ya lisima swinene ha Yehovha ni leswi a swi lavisaka ku hine. Dzrimuka leswaku “ku kumiwile” leswinene ka Abiya. Swi tikomba na Yehovha a kambele mbilu ya Abiya ku ko a kuma ntxhumu wa kukazri lowunene. Loko Abiya a dzringanisiwa ni swizro swa ndangu wake, a a fana ni perola ledzri nga ‘a nhulini leyikulu ya mazribye’, hi lani xidondzri xin’wana xi hlayiki ha kone. Yehovha a mu tovokisile Abiya hi kola ka wunene lebyi a byi kombisiki nambi leswi a a huma a ndangwini wa vhanu lava ku somboloka.

26 KA SETEMBRU–2 KA OTUBRU

WUKOSI BYI NGA BIBELENI | 1 TIHOSI 15-16

“Yetisela Xikombiso Xa Xixixi Xa Asa”

Sentinela 15/08/2012 p. 8 § 4

“Ku Ni Hakelo Ka Swiyentxo Swenu”

Ka 20 wa malembe lama landzreliki ntsrhaku ka loko tiko dzra Israyele dzri yavanile dzri va ni mimfumu mibidzri, a Yuda a ku tale ngopfu hi wugandzreli bya madzrimi. Loko Asa a va hosi hi 977 M.N.Y., nambi tindzruna a mfun’wini a ti gandzrela swikwembu swa ku beleka swa Vakanana. Kambe Bibele dzri hlaya leswaku Asa a ‘yentxe leswinene ni leswi lulamiki mahlweni ka Yehovha, Xikwembu Nkulukumba wakwe’. Asa ‘a suse ma-aletari ya vamatiko, ni mimbangu leyi tlakukiki, a pfotlota makolona, a mbundzrumuxa ma-axera’. (2Mk 14:2, 3) Nakone Asa a ‘suse vavanuna lava tinyiketiki a wuwoswi’ a tikweni dzra Yuda lava a va hamba wusinge swanga xiyenge xa wugandzreli byavu bya madzrimi. Asa a nga yentxanga leswo ntsena, a tlhele a kutxa vhanu akuva ‘va djula Yehovha Xikwembu Nkulukumba wa vatatana wavu’ ni ku bekisa ‘nawu ni xileleto’ swa Xikwembu Nkulukumba.—1Th 15:12, 13; 2Mk 14:4.

Sentinela 03/2017 pp. 19-20 § 7

Tizrela Yehovha Hi Mbilu Hinkwayu!

⁷ Hinkwezru hi nga kambisisa timbilu tezru hi vona loko hakunene hi tinyiketele ka Xikwembu Nkulukumba hi ku helela. Tivutise, ‘xana ni tiyimiseli ku nyonxisa Yehovha, ku lwela wugandzreli bya ntiyiso ni ku lwela vhanu vake ka mintxhumu ya ku biha?’ Yanakanya hi xixixi lexi Asa a xi kombisiki hi ku susa Mahaka, lweyi a a hloniphiwa tikweni hikuva a li mamana wa hosi! Minkama yimbeni swi nga ha djula kuva u va ni xixixi ku fana na Asa. Hi xikombiso, hi li yini loko xizro xa ndangu kumbe munghanu waku lwenkulu a hambe xidoho a va a yala ku ntxintxa a va a susiwa bandleni, xana u ta tekela ku tsrema ku titlhanganisa na yene? Xana mbilu yaku yi ta ku susumetela ku yentxa yini?

Perspicaz vol-1 p. 225 § 1

Asa

Nambi leswi minkama yimbeni a a pfa a kombisa ku pfumala wutlhazri ni wutivi bya moya, matsrhamela lamanene ya Asa, ni ku fambela kule ni wugandzreli bya madzrimi, swi nga yentxeka a swi mu kazrata ngopfu ku tlula swihono swake, nakone a a voniwa swanga hosi leyi dumbekiki ka lixaka dzra Yuda. (2Mk 15:17) A mfumu wa hosi Asa lowu tekiki kolomu ka 41 wa malembe, wu kotlane ni mfumu wa tin’we ta tihosi kumbe hinkwatu ta 8 ta Israyele: Yerobuwamu, Nadabi, Bahaxa, Ela, Zimri, Omri, Tibni (lava fumiki tlhelo dzrin’we dzra Israyele na va yavana na Omri), na Akabe. (1Th 15:9, 25, 33; 16:8, 15, 16, 21, 23, 29) Loko Asa a fa, n’wanake Yehoxafati a sale a va hosi.—1Th 15:24.

Tindzralama Ta Moya

Sentinela 15/09/1998 p. 21 § 8

Xana U Vona Xikwembu Nkulukumba Swanga Mhunu Wa Ntshima?

Hi xikombiso, dondzra wuprofeta mayelanu ni xikhatiso xa ku pfuxetiwa ka muti wa Yeriko u va u kambisisa ku hetiseka ka byone. Yehošua 6:26 yi li: ‘A nkameni wolowo Yehošua a hlambanyela, a ku: a a zruketeliwe mahlweni ka Yehovha lwa taka pfuka a va a yaka muti lowu nga Yeriko; a ta wu sungulela hi ku fa ka n’wanakwe wa mativula, a tiyisa timhazrana ta wone hi ku fa ka nsivazrumbu yake.’ Byi hetiseki ntsrhaku ka kolomu ka 500 wa malembe, hikuva hi dondzra leswi ka 1 Tihosi 16:34: ‘A nkameni wa [Hosi Akabe] Khiyele wa le bethel, a yaka Yeriko; a yaka masungulo ya wone hi ku fa ka Abiramu, a mativula yakwe, a beka xipfalu xa wone hi u fa ka n’wanake wa xisivazrumbu, Segubi, swanga hi zritu dzra Yehovha ledzri a nga dzri hlaya ha Yehošua n’wana Nuni.’ Ko va Xikwembu Nkulukumba wa ntshima ntsena lweyi a nga huhuteleka wuprofeta bya ku fana ni lebyi a tlhela a tiyiseka hi ku hetiseka ka byone.

3-9 KA OTUBRU

WUKOSI BYI NGA BIBELENI | 1 TIHOSI 17-18

“U Ta Tsrhama Na U Ni Ku Ganaganeka Ku Ya Tlhasela Dzrini?”

Sentinela 03/2017 p. 14 § 6

Vana Ni Lipfumelo U Va U Teka Swiboho Hi Wutlhazri

⁶ Loko va li ka tiko dzra xidumbiso, va-Israyele a va fanela ku teka xiboho xa lisima, xa ku gandzrela Yehovha kumbe swikwembu swa madzrimi. (Dondzra Yehošua 24:15.) A swi tikomba ingiki a swi nabyalile ku teka xiboho lexo. Kambe xiboho xavu, a xi ta hlaya wutomi kumbe lifu. Hi ku phindaphinda, va-Israyele va teke swiboho swa wuphunta nambi loko Yehovha a va bekeli vayavanyisi. Va tsrhike ku gandzrela Yehovha kutani va gandzrela swikwembu swa madzrimi. (Abaṭ 2:3, 11-23) Nakone, yanakanya hi leswi va-Israyele a va fanela ku swi yentxa ntsrhakunyana ka loko va sindzriseki ku teka xiboho. Muprofeta Eliya a va byele leswi a va fanela ku swi hlawula: Ka ku tizrela Yehovha kumbe xikwembu xa madzrimi Bali. (1Th 18:21) Eliya a kawuke va-Israyele hi leswi a va ni ku ganaganeka. U nga ha yanakanya leswaku a swi nabyala ku teka xiboho lexi hikusa minkama hinkwayu ku tizrela Yehovha swa pfuna. Nakunene a swi nga ti twala ku djula ku tizrela Bali xikwembu lexi nga pfuniki ntxhumu. Nambitanu, va-Israyele volavo a va ‘khuta hi milenge mibidzri’. Hi wutlhazri Eliya a va kutxe kuva va hlawula wugandzreli bya ntiyiso ku nga ku tizrela Yehovha.

Imite p. 88 § 15

A Lwele Wugandzreli Lebyi Xwengiki

¹⁵ Hi kola ka leswo, vaprista va Bali va sungule ku kala va nga lawuleki, ‘va bandlukana hi zritu ledzrikulu, va tixeka hi timpanga ni matlhazri swanga hi xihena xavu, a ngati yi kota yi dzradzrama ku vone.’ Kambe hinkwaswu leswo a swi pfunanga ntxhumu! ‘A ku vanga na zritu, ni yangulo, ni ku yingeliwa.’ (1Th 18:28, 29) Nakunene xikwembu lexi va liki i Bali a xi nga hanyi. A ko va ntxhumu lowu hambiwiki hi Sathana akuva a hambukisa vhanu ka Yehovha. Ntiyiso hi lowu, ku hlawula xikwembu xin’wana ni xin’wana a matsrhan’wini ya Yehovha swi ni mabindzru lama hetanaka ntamu ni lama khomisaka tingana.—Dondzra Amapsalma 25:3; 115:4-8.

Imite p. 90 § 18

A Lwele Wugandzreli Lebyi Xwengiki

¹⁸ Loko Eliya a nga si na khongota, swi nga yentxeka na xitsrhungu xi tivutisile leswaku xana hakunene Yehovha a ta hlamula xikhongoto xa Eliya, xana a nga ta mu khomisa tingana hi lani Bali a yentxiki ha kone ka vaprofeta vake? Kambe ntsrhaku ka xikhongoto, xivutiso xavu kutani a xi hlamuliwile. A xib’iko xi li: ‘Kolanu a ndzrilo wa Yehovha wu xika, wu hisa mhamba leya ku hisiwa, ni tihunyi, ni mazribye, ni ntsrhuzri, wu pswhisa ni mati lawa afaka me kheleni.’ (1Th 18:38) A nhlamulo ya kone yi hlamalise ngopfu swinene! Kutani vhanu va hlamulise kuyini?

Tindzralama Ta Moya

Sentinela 01/04/2008 bokisi p. 19

A Lavisile A Tlhela A Zrindzra

Xana Dandzra Dzra Minkameni Ya Eliya Dzri Hete Nkama Wa Ku Dzringana Kwini?

Muprofeta wa Yehovha Eliya a byele hosi Akabe leswaku a dandzra ledzri tekiki nkama wa ku leha a dzri ta hela ku nga li khale. Leswo swi humelele hi ‘lembe dzra wuzrazru’, swi le livaleni leswaku a ku nkontiwa ku sukela loko Eliya a tivise hi khambi dzra ku sungula hi ta dandzra dzroledzro. (1 Tihosi 18:1) Yehovha a nise mpfula ntsrhakunyana ka loko Eliya a hlaye leswaku a a ta yentxa tanu. Kutani vhanu van’wana va nga hetelela hi ku hlaya leswaku dandzra dzroledzro dzri hele hi lembe dzra wuzrazru, xileswo a dzri hetanga malembe mazrazru. Nambitanu, Yesu na Yakobe va hi byela leswaku a dandzra dzri hete ‘malembe mazrazru na ntlhanu wa tihweti na hweti yin’we’. (Luka 4:25; Yakob 5:17) Xana loko Bibele dzri vulavula hi mhaka leyi dzra tikaneta?

Nikutsrongo. A Israyele wa khale a wuxika a byi teka nkama wa ku leha, a dzri heta kolomu ka 6 wa tihweti. A swi ganaganekisi leswaku a nkama lowu Eliya a yiki ha wone kaya ka Akabe a ya a ya mu tivisa hi ta dandzra, a wuxika bya kone a byi teki nkama wa ku leha ku tlula lowu tolovelekiki nakone xiyimu kutani a xi bindzra ngopfu. Nakone dandzra ledzro a dzri ni kolomu ka 6 wa tihweti na dzri sungulile. Xileswo loko Eliya a tivise hi khambi dzra ku sungula hi ta ku hela ka dandzra ‘hi lembe dzra wuzrazru’, dandzra dzroledzro kutani a dzri heti malembe mazrazru ni hamfu, ‘malembe mazrazru na ntlhanu wa tihweti na hweti yin’we’ ma hele hi nkama lowu vhanu hinkwavu a va hlengeletanile a nhaveni ya Karmeli, akuva va ta vona xiyentxakalo lexi a xi ta kombisa leswaku hi mani Xikwembu xa Ntiyiso makazri ka Yehovha na Bali.

Kutani xiya ndlela leyi Akabe a khumbekiki ha yone loko Eliya a mu yendzrele khambi dzra ku sungula ku ya mu tivisa hi dandzra ledzri a dzri sungulile. Vhanu a va pfumela leswaku Bali a a li ‘mukhandzriyi wa matlavi’, xikwembu lexi a xi ta nisa pfula akuva xi helisa dandzra. Loko wuxika byi hela hi ndlela leyi a yi nga tolovelekanga swi nga ha yentxeka leswaku a va tivutisa va ku: ‘A kwini Bali? A ta hi nisela dzri siku pfula?’ Mazritu ya Eliya ya leswaku a ku nga ti va ni pfula kumbe mbezre ku ko a leleta leswaku yi na, ma fanele ma va kazrate ngopfu vagandzreli va Bali.—1 Tihosi 17:1.

10-16 KA OTUBRU

WUKOSI BYI NGA BIBELENI | 1 TIHOSI 19-20

“Djula Ntxhavelelo Ka Yehovha”

Xihondzro Xa Ku Zrindzra 06/2019 pp. 15-16 § 5

Dumba Yehovha Loko U Li Ku Hlatiyeleni

⁵ Dondzra 1 Tihosi 19:1-4. Eliya a tale hi ku txhava loko nkosikazi Jezabele a hlaye leswaku a djula ku mu dlaya, nakone a tsrutsrumele ka muganga lowu vitaniwaka Berxeba. Eliya a a hele ntamu lakakuva a ‘tikombeleli ku fa’. Ha yini a titwe hi ndlela leyo? Hikusa a a li mhunu wa ku kala ku hetiseka, lweyi a a ‘tiyingela swanga ha hine.’ (Yk 5:17) Kumbexana a hluliwe hi ku hlatiyela ni ku kazrala nyameni. Swi tikomba ingiki a a pimisa leswaku a minzamu leyi a yi yentxiki ya ku seketela wugandzreli bya ntiyiso a yi ndzruluke nyuku wa mbyana, mintxhumu a Israyele a yi nga txintxanga ni leswaku ka vagandzreli va Yehovha a ke sala yene ntsena. (1Th 18:3, 4, 13; 19:10, 14) Hi nga ha hlamalisiwa hi leswi muprofeta lweyo wa ku dumbeka a titwisiki xiswone. Kambe Yehovha a a swi twisisa leswi Eliya a a titwisa xiswone.

Imite p. 103 § 13

Xikwembu Nkulukumba Wake A Mu Txhavelelile

¹³ Xana u yanakanya leswaku Yehovha a titwise kuyini loko a langusa lani misaveni na a li matilweni kutani a vona muprofeta wake lwa zrandzrekaka na a yetlele hansi ka nsinya a mananga, kutani a kombela ku fa? Nhlamulo ya kone yi le livaleni. Ntsrhaku ka loko Eliya a biwe hi xizrongwana, Yehovha a zrumela ntsrumi ku yene. Ntsrumi yi mu pfuxile yi ku: ‘pfuka u da’. Eliya a pfukile, hikusa a ntsrumi a yi mu lulamisele a pawu dzra ku kufumela ni mati. Ku nga va leswaku Eliya a yi tlangelile a ntsrumi yoleyo? Dzrungula dzri hlaya leswaku muprofeta a dile ni ku nwa a tlhela a yetlela. Xana Eliya a a ni gome ledzrikulu lakakuva a hluleka ni ku vulavula? A ntsrumi yi tlhele yi mu pfuxa hi khambi dzra wubidzri, kumbexana ni mixo. Yi tlheli yi mu pfuxa yi ku: ‘Pfuka u da, hikuva a mfambu waku wu lehe ngopfu ku tlula ntamu waku.’—1Th 19:5-7.

Imite p. 106 § 21

Xikwembu Nkulukumba Wake A Mu Txhavelelile

²¹ Dzrungula hinkwadzru ledzri nga hala henhla dzri swi beka livaleni leswaku Yehovha a a nge ti kumeka ka mintxhumu ya kukazri ya ntumbuluku. Eliya a a swi tiva leswaku Yehovha a a nga li Xikwembu Nkulukumba wa madzrimi wa ku fana na Bali, lweyi a a gandzreliwa hi vagandzreli lava hambukisiwiki lava a va mu teka swanga ‘mukhandzriyi wa matlavi’ kumbe munisi wa timpfula. Yehovha i Xihlovo xa ntamu hinkwawu lowu hlamalisaka lowu kumekaka ka ntumbuluku nakone a tlakukile swinene ka ntxhumu wun’wana ni wun’wana lowu a wu tumbuluxiki. Nambi matilo a ma mu yaneli. (1Th 8:27) Xana mintxhumu leyi hinkwayu yi mu pfunise kuyini Eliya? Dzrimuka ku txhava kwake. Leswi Yehovha Xikwembu Nkulukumba a a mu seketela hi ntamu wake hinkwawu wa ku hlamalisa, Eliya a a nge na xivangelo xa ku txhava Akani na Jezabele!—Dondzra Amapsalma 118:6.

Imite pp. 106-107 § 22

Xikwembu Nkulukumba Wake A Mu Txhavelelile

²² Ntsrhaku ka loko ndzrilo wu timekile, a mpfumawulo wu helile, Eliya a twe ‘xizritwana xa ku nabyala’. A mazritu ya kone a ma zramba Eliya akuva a tlhela a tiphofula nakone a yentxe swoleswo, a phofule ndlela leyi a a titwa hi yone hi khambi dzra wubidzri. Kumbexana leswo swi mu yentxi a titwa na a ntsrhunxekile. Kambe swi le livaleni leswaku Eliya a txhaveleleki ngopfu swinene hi leswi ‘xizritwana xa ku nabyala’ xi mu byeliki swone. Yehovha a tiyisekise Eliya leswaku i wa lisima. Hi ndlela muni? Xikwembu Nkulukumba a paluxe nkongometo wake wa ku lwa na Bali a Israyele. Swi le livaleni leswaku ntizro wa Eliya a wu nga li nyuku wa mbyana hikusa nkongometo wa Xikwembu Nkulukumba a wa ha ya mahlweni. A a ha li xiyenge xa nkongometo wolowo hikusa Xikwembu Nkulukumba a mu nyike swileleto swa kukazri swa leswaku a tlhelela ntizrweni wake.—1Th 19:12-17.

Tindzralama Ta Moya

Sentinela 01/11/1997 p. 31 § 1

Xikombiso Xa Ku Tinyiketela Ni Ku Dumbeka

Malandzra manyingi ya Xikwembu Nkulukumba namunhla ma kombisa moya lowu fanaka wa ku tinyiketela. Van’wana va siye ‘masimu’ yavu, mintizro yavu ya ku tihanyisa akuva va zrezra madzrungula lamanene mimbangwini ya le kule kumbe kuva va tizra swanga swizro swa ndangu wa Betele. Van’wana va ye tizrela matikweni mambeni akuva va pfunisa ku miyaku ya nhlengeletanu. Van’wana va yamukeli leswi a va nga swi yimelanga, swa ku fana ni mintizro leyi languteliwaka hansi. Kambe a nga kone lweyi a tizrelaka Yehovha lwa kalaka a nga yentxi ntizro wa lisima. Yehovha a tlangela hinkwavu lava mu tizrelaka hi ku swi zrandzra, nakone a ta tovokisa moya wolowo wa ku tinyiketela.—Marka 10:29, 30.

17-23 KA OTUBRU

WUKOSI BYI NGA BIBELENI | 1 TIHOSI 21-22

“Yetisela Ndlela Leyi Yehovha A Byi Tizrisaka Ha Yone Wulawuli Byake”

Perspicaz vol-2 p. 53 § 5

Yehovha Wa Makhandzra

Loko Yoxuwa a vone ntsrumi kusuhi ni Yeriko a yi vutisile leswaku a yi yima ni va-Israyele kumbe ni valala, yone yi hlamule yi ku: ‘Im-him, ndzre ku ta ndzri nga ndzruna ya yimpi ya Yehovha.’ (Yš 5:13-15) Muprofeta Mika a byele hosi Akabe na Yehoxafati a ku ‘ndzri voni Yehovha a tsrhamisiki xiluvelweni xake, ni butsrhu hinkwadzru dzra le tilweni dzri yime kusuhi naye, a xineneni ni le ximatsrini’ na a kombetela ka vana va Yehovha va moya hi ku kongoma. (1Th 22:19-21) Swa fanela ku tizrisiwa zritu ‘Yehovha wa makhandzra’ swanga hi leswi a ntamu wa tintsrumi wu kalaka wu nga kombisiwi na wu yavanile ka makerubimi, maserafime ni tintsrumi (Eza 6:2, 3; Gn 3:24; Mpf 5:11) kambe swanga mintlawa leyi hlelekiki, lakakuva Yesu Kriste a vulavule hi ku va ni “makhandzra ya tintsrumi ya ku tlula 12 wa wone”. (Mt 26:53) Ka swikombelo swake leswi a swi kongomisiki ka Yehovha, Ezekiyele a mu vitane swanga ‘Yehovha wa makhandzra Xikwembu Nkulukumba wa Israyele, lwa tsrhamiki le ku makerubimi’. A swi tikomba na a kombetela ka areka dzra xipfumelelanu ni ka swifaniso swa makerubimi leswi a swi li henhla ka tampa, leswi a swi fanekisela xiluvelo xa le matilweni xa Yehovha. (Eza 37:16; dzringanisa ni 1Sa 4:4; 2Sa 6:2.) Nandzra wa Elixa lweyi a a ni ku txhava a tiyisiwe hi xivoniso xa ku hlamalisa, lani a voniki tinhava a matlhelweni ya madoropa, lani Eliya a a tsrhama kone na ti tale hi makalitxhi ya yimpi ni ndzrilo swanga xiyenge xa tintsrumi ta Yehovha.—2Th 6:15-17.

Xihondzro Xa Ku Zrindzra 02/2021 p. 4 § 9

‘A Nhloko Ya Wanuna Mun’wana Ni Mun’wana I Kriste’

⁹ Ku titsrongahata. Yehovha a ni wutlhazri ku tlula vhanu hinkwavu; nambitanu a yingela mavonela ya malandzra yake. (Gn 18:23, 24, 32) Awa swi pfumelela kuva vhanu lava nga hansi ka wulawuli byake va nyikela mavonela yavu. (1Th 22:19-22) Yehovha a hetisekile, kambe a nga yimelanga leswaku hi va lava hetisekiki. A matsrhan’wini ya leswo, a pfuna vatizreli vake lava nga hetisekangakiki leswaku va humelela. (Ps 113:6, 7) Ku hlaya ntiyiso, Bibele dzri li Yehovha i “mupfuni”. (Ps 27:9; Hb 13:6) Hosi Davhida a hlaye leswaku e kota ku hamba ntizro lowukulu ntsena hi ku titsrongahata ni mpfuno wa Yehovha.​—2Sa 22:36.

Perspicaz vol-2 p. 354 § 6

Madzrimi

Yehovha a pfumelela xidoho akuva lava va hlawulaka ku hanya hi xone ‘va pfumela madzrimi’ a matsrhan’wini ya madzrungula lamanene mayelanu na Yesu. (2Te 2:9-12) Mhaka leyi yi kombisa leswi humeleliki malembe ntsrhaku na Akabe a fuma Israyele. Vaprofeta va madzrimi va tiyisekise Akabe leswaku a a ta hlula Ramote-Giliyadi a yimpini, nakasi muprofeta wa Yehovha Mikaya a hlaye leswaku a a nge ti hlula. Hi lani Mikaya a vonisiwiki ha kone, Yehovha a pfumeleli xivumbiwa xa moya leswaku xi va ‘moya wa madzrimi’ a milon’wini ya vaprofeta va Akabe. Leswi liki, xivumbiwa lexi xi tizrise ntamu wa xone akuva va nga vulavuli ntiyiso kambe leswi a va djula ku swi hlaya ni leswi hosi Akabe a a djula ku swi twa kwavu. Nambi leswi a dzrimuxiwiki, Akabe a hlawule ku kanganyisiwa hi madzrimi wolawo, nakone leswo swi koxe wutomi byake.—1Th 22:34-38.

Tindzralama Ta Moya

Xihondzro Xa Ku Zrindzra 10/2021 p. 3 §§ 4-6

I Yini Ku Tisola Ka Ntiyiso?

⁴ Hi wugamu ku tlhase nkama wa kuva Yehovha a teka xiboho. A zrume Eliya akuva a byela Akabe na Jezabele leswaku a va ta khatisiwa. A ndangu wavu hinkwawu a wu ta helisiwa. Mazritu ya Eliya ma yentxe Akabe a tisola. Lexi hlamalisaka hi leswaku wanuna lwiyani a titsrongahatile.—1Th 21:19-29.

⁵ Hi nkama luwani Akabe a titsrongahatile, kambe ndlela leyi Akabe a a hanya ha yone ntsrhaku ka leswo yi kombise leswaku a a nga tisoli hakakunene. A nga zanga a helisa wugandzreli bya Bali a mfun’wini wake. Nakone a nga pfuxetanga wugandzreli bya Yehovha. Nakone ku ni swimbeni leswi a swi kombisa leswaku Akabe a a nga tisoli.

⁶ Ntsrhaku ka nkamanyana, Akabe a lwisane ni va-Asiriya. A vitane hosi Yehoxafati wa le Yuda akuva a tipatsra na yene. Swanga hi leswi Yehoxafati a a li hosi leyinene, a byele Akabe leswaku a va fanela va sungula hi ku khanela ni muprofeta wa Yehovha. A ku sunguleni vonela ledzro a dzri mu nyonxisanga Akabe, kutani a hlaye leswi: ‘Ka ha sali mhunu mun’we, lweyi hi nga vutisaka ku Yehovha ha yene; kambe ndzra mu hambula hikuva a nga ndzri pfhumbeli leswinene, mine, kambe hi leswa ku biha.’ Nambi tasu va fambe va ya bulisana na muprofeta Mikaya. Kambe hi lani a va swi yimele ha kone, dzrungula dzra muprofeta a dzri nga li dzrinene ka Akabe! Akabe a a ta va a tisolile a va a kombela ku dzrivaleliwa ha Yehovha. A matsrhan’wini ya leswo, Akabe a zrumele masotxha akuva ma pfalela muprofeta Mikaya a djele. (1Th 22:7-9, 23, 27) I ntiyiso leswaku Akabe a swi kotile ku pfalela muprofeta wa Yehovha, kambe a nga byi sivelanga wuprofeta akuva byi hetiseka. Ka yimpi leyi viki kone Akabe a dlayiwile.—1Th 22:34-38.

24-30 KA OTUBRU

WUKOSI BYI NGA BIBELENI | 2 TIHOSI 1-2

“Xikombiso Lexinene Xa Ku Dondzrisa”

Sentinela 15/04/2015 p. 13 § 15

Ndlela Leyi Vakulu Va Dondzrisaka Vamakwezru Ha Yone Leswaku Va Va Ni Wutiyanguleli A Bandleni

¹⁵ Mhaka ya Elixa yi tlhela yi kombisa leswaku i swa lisima leswaku vamakwezru va xinuna namunhla va hlonipha vakulu lava nga ni mfambu. Ntsrhaku ka loko Eliya na Elixa va yendzrele ntlawa wa vaprofeta a Yeriko, vavanuna volavo vabidzri va tlhase a nambyeni wa Yordani. Hiloko ‘Eliya a teka djansi dzrake, a dzri hindzra, a ba mati ha dzrone, ma yavana hi le makazri.’ Vavanuna volavo va tsremakanye Yordani a misaveni leyi womiki nakone a va famba ‘na va khanela’. Elixa a yingelisise hinkwaswu leswi mudondzrisi wake a mu byeliki swone a tlhela a ya mahlweni a dondzra kwake. Elixa a a nga tivoni ingiki kutani a tiva hinkwaswu. Ntsrhaku ka leswo Eliya a tekiwe hi xidzedze kutani Elixa a tlheleli a nambyeni wa Yordani, Loko a tlhase kolanu, a be mati hi djansi dzra ximfumu dzra Eliya kutani a ku: ‘A kwini Yehovha, Xikwembu Nkulukumba wa Eliya?’ Mati ya nambu wolowo ma tlheli ma yavana.—2Th 2:8-14.

Sentinela 15/04/2015 p. 13 § 16

Ndlela Leyi Vakulu Va Dondzrisaka Vamakwezru Ha Yone Leswaku Va Va Ni Wutiyanguleli A Bandleni

¹⁶ Xana u swi xiyile leswaku hlolana dzra ku sungula dzra Elixa a dzri fana ni dzra wugamu dzra Eliya? Leswi swi hi dondzrisa yini? Elixa a nga tibyelanga leswaku leswi kutani a nga muprofeta, a a fanela ku yentxa mintxhumu hi ndlela leyi hambaniki ni ndlela leyi Eliya a a Yentxa mintxhumu ha yone. Matsrhan’wini ya leswo, Elixa a yentxe mintxhumu hi lani Eliya a yentxiki ha kone ku kombisa leswaku a a mu hlonipha, leswi swi pfune kuva vaprofeta van’wana va mu dumba Elixa. (2Th 2:15) Elixa a tizre swanga muprofeta ku dzringana 60 wa malembe, nakone Yehovha a mu nyike ntamu wa ku hamba mahlolana ya ku tala ya ku tlula lawa ma yentxiwiki hi Eliya. Vadondzri xana va nga dondzra yini namunhla a mhakeni leyi?

Tindzralama Ta Moya

Sentinela 01/08/2005 p. 9 § 1

Nkatsrakanyu Wa Buku Dzra Tihosi Ta Wubidzri

2:11—He wani matilo lawa Eliya a tlhantukeliki ka wone hi ‘xitungutwanaʼ? I yini ‘matilo’ lawa Eliya ‘a tlhantukeliki ka wone hi xitungutwana’? A hi mbangu wa le kule lowu nga le wuyakwini nakone a hi mbangu wa moya lowu ku tsrhamaka Xikwembu Nkulukumba ni vana vake va moya. (Deuteronoma 4:19; Amapsalma 11:4; Matewu 6:9; 18:10) ‘Matilo’ lawa Eliya a tlhantukeliki ka wone a ku li matilo ya kola matlavini. (Amapsalma 78:26; Matewu 6:26) Kalitxhi dzra ndzrilo ledzri a dzri tsrutsruma ka matilo lawa hi ma vonaka dzri yise Eliya ka mbangu wun’wana wa kola misaveni, lani a tamiki a hanya swa nkamanyana. Ku hlaya ntiyiso, Eliya a tsralele hosi Yehorama, hosi ya le Yuda, a papela.—2 Makronika 21:1, 12-15.

31 KA OTUBRU–6 KA NOVHEMBRU

WUKOSI BYI NGA BIBELENI | 2 TIHOSI 3-4

“Teka N’wanaku”

Sentinela 12/2017 pp. 4-5 § 7

Na Swi Tiva Leswaku A Ta Pfuka

⁷ Ku pfuxiwa ka wubidzri loku kumekaka a matsralweni hi loku yentxiwiki hi muprofeta lweyi a landzreliki muprofeta Eliya, ku nga Elixa. Wansati mun’wana wa mu-Israyele wa le Xunemi a kombe Elixa malwandla lamakulu. Hi kola ka leswo, Xikwembu Nkulukumba a tovokise wansati lweyo, lweyi a a nge na vana hi ku mu nyika n’wana wa djaha. Ntsrhaku ka malembe n’wana yelweyo a file. Yanakanya ndlela leyi mamana wake a titwiki ha yone. A kombele mpfumelelo ka nuna wake, kutani a famba 30 wa makilometru a landzra Elixa a nhaveni ya Karmeli. Muprofeta Elixa a a zrumeli mupfunisi wake Geyazi a Xunemi leswaku a ya txhavelela, kambe Geyazi a nga swi kotanga ku pfuxa n’wana lweyo. Kutani mamana wa n’wana yelweyo a landzre Elixa.—2Th 4:8-31.

Sentinela 12/2017 p. 5 § 8

Na Swi Tiva Swaku A Ta Pfuka

⁸ Elixa a tlhase ndlwini lomu a ntsrumbu wa n’wana lweyo a wu bekiwe kone. Hi hlolana n’wana lweyi a a file a pfuxiwile kutani a yisiwa ka mamana wake lweyi a a nga ha tikoti hi ku nyonxa! (Dondzra 2 Tihosi 4:32-37.) Kumbexana u dzrimuki leswi Ana a swi hlayiki a xikhongotweni xake loko a yisa Samuwele a tabernakeleni leswaku a ya tizrela Yehovha, a te: ‘Yehovha . . . a hanyisa; a fulameta vhanu a Sheol a va tlhantukisa.’ (1Sa 2:6) Swi le livaleni leswaku Yehovha hi yene a pfuxiki djaha ledzriyani dzra le Xunemi, nakone a kombise leswaku a ni ntamu wa ku pfuxa lava fiki.

Tindzralama Ta Moya

Perspicaz vol-2 p. 728 § 4

Muprofeta

“Vana va vaprofeta.” Hi lani Gramática Hebraica de Gesenius, Oxford, 1952, p. 418, dzri hlayaka ha kone xiga xa xiheberu ben (n’wana wa) kumbe benehʹ (vana va), leswi swi nga ha hlaya kuva “xizro xa nhlengeletanu kumbe ntlawa (ku nga va wa lixaka dzra kukazri, kumbe xikhundla xa kukazri)”. (dzringanisa Neh 3:8, lani ‘xizro xa mufuli wa gole’, hi ku kongoma i ‘n’wana wa mufuli wa gole.’) Xileswo, xiga lexi liki ‘vana va vaprofeta’ swi nga yentxeka xi hlaya xikole xa ku dondzrisa lava hlawuliwiki ka ntizro wolowo, kumbe ntlawa lowu tizrisanaka wa vaprofeta. Ku hlayiwa leswaku a ku ni mintlawa ya ku tanu ya vaprofeta a Betele, Yeriko ni Gilgal. (2Th 2:3, 5; 4:38; dzringanisa ni 1Sa 10:5, 10.) Samuwele a a zrangela ntlawa wa le Rama (1Sa 19:19, 20), nakone swi tikomba na Eliya a a hamba ntizro lowu fanaka a masikwini yake. (2Th 4:38; 6:1-3; dzringanisa ni 1Th 18:13.) Wudzrunguli byi hlaya ka leswaku a va tiyakela mimbangu leyi a va tsrhama ka yone nakone va tizrise switizro leswi va volekiki, leswi liki a va hanya hi mintxhumu yitsrongo. Nambi leswi a swi nga tolovelekanga kuva va tsrhama mbangu mun’we kumbe ku pambulelana swakuda, swi nga yentxeka a va yamukela swiyavelo swa ku suka akuva va ya hamba mintizro ya wuprofeta a mimbangwini yin’wana.—1Th 20:35-42; 2Th 4:1, 2, 39; 6:1-7; 9:1, 2.