Yimela Wugamu Bya Xiyimu Lexi Xa Misava Hi Lipfumelo

Ku nga li khale, ku lehisa mbilu ka Yehovha hi misava leyi ku ta hela. Wukhongoti bya madzrimi byi ta helisiwa, a tlhanganu wa matiko wu ta hlasela vhanu va Xikwembu Nkulukumba nakone Yehovha a ta helisa vhanu hinkwavu lava yentxaka leswa ku biha ka yimpi ya Armagedoni. A vakriste va wu lavisele hi malanfani nkama lowu ku taka hetiseka swiyentxakalu leswi.

I ntiyiso ka leswaku, a hi na wutsrhokotsrhoko hinkwabyu mayelanu ni leswi swi taka yentxeka hi nkama wa nhlomulo lowukulu. Hi xikombiso, a hi dzri tivi siku ledzri wu taka sungula ha dzrone hi ku kongoma. A hi xi tivi xivangelo lexi taka yentxa vazrangeli va politika va hlasela wukhongoti. A hi swi tivi leswaku swi ta teka nkama muni na matiko ma ha hlasela vhanu va Xikwembu Nkulukumba kumbe ku ta yentxeka yini. Nakone a hi swi tivi leswaku Yehovha a ta tizrisa yini akuva a helisa vhanu lava yentxaka swa ku biha ka yimpi ya Armagedoni.

Nambitanu, a matsralwa ma hi nyika wudzrunguli lebyi hi byi vilelaka akuva hi tiyiselela swiyimu leswi swa ha taka hi xixixi. Xikombiso, ha swi tiva leswaku hi hanya a wugan’wini bya ‘masiku ya wugamu’. (2Tm 3:1) Ha swi tiva ka leswaku a ku hlaseliwa ka wukhongoti ku “ta pumbiwa” akuva wukhongoti bya ntiyiso byi nga helisiwi. (Mt 24:22) Ha swi tiva leswaku Yehovha a ta huluxa vhanu vake. (2Pe 2:9) Nakone ha swi tiva leswaku lweyi Yehovha a mu hlawuliki akuva a helisa vhanu lava yentxaka leswa ku biha ni ku huluxa xitsrhungu lexikulu ka yimpi ya Armagedoni a lulamile nakone a ni ntamu lowukulu.—Mpf 19:11, 15, 16.

Leswi taka yentxeka nkameni lowu taka swi ta yentxa leswaku vhanu va ‘tsremeka minhlana hi ku txhava’. Kambe a swi tanu hi hine. Ha swi tiva leswi Yehovha a swi yentxiki akuva a huluxa vhanu vake a nkameni lowu khalutiki. Ku dondzra ni ku yanakanyisisa hi leswi, swi hi yentxa hi ‘tlakuxa tinhloko [tezru]’, na hi ni ku tiyiseka ka leswaku ku huluxiwa kwezru ku kusuhi.—Lk 21:26, 28.