Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru
© 2023 Watch Tower Bible and Tract Society of Pennsylvania
1-7 KA MAYU
WUKOSI BYI NGA BIBELENI
“Vona Van’wana Hi Ndlela Leyi Yehovha A Va Vonaka Ha Yone”
Sentinela 03/2017 p. 24 § 7
Xana Wa Swi Hlayisa Mbilwini Yaku Hinkwaswu Leswi Tsraliwiki?
7 Xana hi nga hlaya yini hi Yehoxafati n’wana Asa? Yene a a ni wumhunu lebyinene. Leswi a a zrandzra Xikwembu Nkulukumba, a a tikazratela ku yentxa mintxhumu yinyingi leyinene. Nambitanu a teke swiboho swa wuphunta. Hi xikombiso, a pfumeleli leswaku a n’wanake wa djaha a tekana ni n’wana wa hosi Akabu, lweyi wa ku biha. Nakone Yehoxafati a thlele a pfuna Akabu loko a ya lwa ni Vasiriya, nambileswi Mikaya a a mu dzrimuxile hi khombo ledzri a dzri ta humelela. Ka yimpi yoleyo, Yehoxafati a phose kutsrongo akuva a dlayiwa. Ntsrhaku, a thlelele Yerusalema. ( 2Mk 18: 1-32) Hi kola ka leswo, muprofeta Yehu a mu vutise aku: ‘Xana swi ku faneli ku pfuna lwe wa ku biha, ni ku zrandzra lava vengaka Yehovha xana?’—Dondzra 2 Makronika 19: 1-3.
Sentinela 15/08/2015 p. 3 §§ 8-9
Yanakanyisisa Hi lizrandzru ledzri tiyiki dzra Yehovha
8 Yehovha a djula hi swi tiva leswaku a hi zrandzra ngopfu nileswaku a nga lavisisi swihoxo swezru, kambe a beka tihlu ka mintxhumu ya yinene leyi hi yi yentxaka. (2Mk 17:3-10) A hi kambisiseni ndlela leyi ha yone Yehovha a lavisiseke leswinene ka Hosi Yehoxafati wa le yuda. Yehoxafati a teke xiboho xa wuphukuphuku hikuva a pfumele ku famba kun’we na Hosi Akabu va ya lwa ni Vasiriya a Rhamoti-Giliyad. Nambileswi 400 wa vaprofeta va madzrimi va byeliki Akabu, lwe wa ku somboloka, leswaku a a ta hlula yimpini, Mikaya, muprofeta wa ntiyiso wa Yehovha a byele Yehoxafati na Akabu leswaku a va ta hluliwa loko va ya yimpini. Nakunene va hluliwile hi lani Mikaya a hlayiki ha kone. Akabu a dlayiwile a yimpini kasi Yehoxafati phose kutsrongo akuva a dlayiwa. Ntsrhaku ka yimpi yoleyo, Yehovha a Zrumele Yehu akuva a ya kawuka Yehoxafati hi kola ka xihoxo xake. Kambe Yehu a tlhele aku: ‘U kumiwe na u ni leswinene.’—2Mk 18:4, 5, 18-22, 33, 34; 19:1-3.
9 Malembe ntsrhanku Yehoxafati a lelete Tihosana, Valevhi ni Vaprista akuva va famba mimitini hinkwayu ya Yuda va dondzrisa vhanu nawu wa Yehovha. Leswo swi tise mabindzru manyingi lakakuva nambi vhanu lava a va nge vayuda va kote ku tiva Yehovha. (2Mk 17:3-10) Nambileswi Yehoxafati hi ku famba nkama a gamiki a teka xiboho lexi nga liki xinene, Yehovha a nga yi dzrivalanga mintxhumu hinkwayu ya yinene leyi a tsrhamiki a yi yentxa. Mhaka leyi ya hi txhavelela hikusa minkama yin’wana hi pfa hi yentxa swihoxo. Nambitanu loko hi yentxa hinkwaswu leswi hi nga swi kotaka akuva hi tizrela Yehovha a ta ya mahlweni a hi zrandzra nakone a nge txhuki a yi dzrivala mintxhumu hinkwayu leyinene leyi hi mu yentxeliki yone.
Tindzralama Ta Moya
Sentinela 03/2017 p. 20 §§ 10-11
Tizrela Yehovha Hi Mbilu Leyi Heleliki
10 Yehoxafati, n’wana Asa a tame ‘a famba ndleleni ya Asa Tatana wakwe’. (2Mk 20:31, 32) Hi ndlela yini? Ku fana ni Papayi wake, Yehoxafati a pfune vhanu akuva va djulisisa Yehovha. A hlele tsima dzra ku dondzrisa vhanu a ‘buku dzra Nawu wa Yehovha’. (2Mk 17:7-10) A tlhele a yendzra a mfun’wini wa n’walungu wa Israyele ku ya tlhasa a tinhaveni a Efrayimi, akuva ‘a tlhelisa vhanu ku Yehovha’ (2Mk 19:4). Yehoxafati a ve hosi leyi ‘djuliki Yehovha hi mbilu hinkwayu’.—2Mk 22:9.
11 Hinkwezru hi nga pfunisa a ntizrweni wa ku zrezra lowu kongomisiwaka hi Yehovha. Xana u tibekele kungu dzra ku dondzrisa Zritu dzra Xikwembu Nkulukumba nkama ni nkama ni ku khumba timbilu tavu akuva va tizrela Yehovha? Hi ku pfuniwa hi Yehovha ni ku tikazrata kwaku u nga swi kota ku sungula xidondzro xa Bibele. Khongota akuva u kuma xidodzro xa Bibele. Xana u tiyimiselile kuva u kuma xidondzro xa Bibele nambiloko swi ta sindzrisa ku tizrisa nkama waku wa ku wisa? Swanga hi leswi Yehoxafati a yiki a Efrayimi ku ya pfuna vhanu leswaku va tlhelela ka wugandzreli bya ntiyiso, na hine hi nga pfuna vhanu lava holiki akuva va tlhela va va ni wuxaka lebyi tiyiki na Yehovha. Ntlhantakubidzri, vakulu va yendzrela lava susiwiki lava swi nga ha yentxekaka va txintxile, akuva va ya va pfuna.
8-14 KA MAYU
WUKOSI BYI NGA BIBELENI | 2 MAKRONIKA 20-21
‘Dumba Yehovha Xikwembu Nkulukumba Waku’
Sentinela 15/12/2014 p. 23 § 8
Ku Lavisana Ni Wugamu Bya Misava Leyi Ya Ku Biha Hi Wumun’we
8 A nkameni wa Hosi Yehoxafati, ‘vunyingi lebyikulu’ bya vhanu lava tsrhamaka kusuhi a va djula ku hlasela vhanu va Xikwembu Nkulukumba. (2Mk 20:1, 2) Lexi nyonxisaka hi leswaku malandzra ya Xikwembu Nkulukumba a ma dumbanga ntamu wa wone akuva ma hlula valala. A matsrhan’wini ya leswo, ma djule mpfunu wa Yehovha. (Dondzra 2 Makronika 20:3, 4.) Nakone mun’wana ni mun’wana wavu a nga yentxanga mintxhumu hi ku ya hi mayanakanyela yake. A Bibele dzri li: ‘A vayuda afa va yimile a mahlweni ka Yehovha, kun’we ni swivananyana swavu, ni vasati vavu, ni vana vavu.’ (2Mk 20:13) Swi nge na mhaka leswaku a va li vampshwa kumbe vhanu lava kuluki hi ntanga, hinkwavu va landzre nkongomiso wa Yehovha, nakone Yehovha a va sizrelelile ka valala vavu. (2Mk 20:20-27) Nakunene lexi i xikombiso lexinene xa ndlela leyi vhanu va Xikwembu Nkulukumba va langusanaka ni nhlanselo ha yone.
Xihondzro Xa Ku Zrindzra 11/2021 p. 16 § 7
N’wine Vatekani Ma Ha Ka Ku Txhata —Tiyisani Wuxaka Byenu Na Yehovha
7 Yehovha a khaneli na Yehoxafati hi ku tizrisa Mulevhi lweyi a vitaniwaka Yakhaziel. Yehovha a te: ‘Tlhevisani n’wi yima, n’wi ta vona ku huluka loku Yehovha a taka n’wi yentxela kone.’ (2Mk 20:13-17) Leyo a a nga li ndlela leyi tolovelekiki ya ku lwa yimpi! Minkongomiso leyo a yi nga buyi hi ka mhunu; a yi buya hi ka Yehovha. Leswi a a mu dumba Xikwembu Nkulukumba hi ku helela, Yehoxafati a yentxe leswi a byeliwiki swone. Loko yene kun’we ni tiko va sukile va ya kumana ni valala, a matsrhan’wini ya ku beka masotxha mahlweni, a beke vayimbeleli lava a va nga na matlhazri. Yehovha a hetisise leswi a a swi dumbise Yehoxafati. A helise khandzra dzra valala vake.—2Mk 20:18-23.
Tindzralama Ta Moya
Perspicaz vol-1 p. 1271 §§ 1-2
Yehoramu
Hi kola ka nkutxetelo wa ku biha wa nkatake, Ataliya, Yehoramu a nga landzrelelisanga he kusuhi tindlela ta Papayi wake Yehoxafati. (2Th 8:18) Yehoramu a nge dlaya 6 wa vamakwavu ni man’we ya malandzra ya Vayuda ntsena, kambe a tlhele a hambukisa vhanu a ndleleni ya Yehovha akuva va gandzrela Swikwembu swa madzrimi. (2Mk 21:1-6, 11-14) A ku fuma kwake hinkwaku a ku tsrandzreliwe hi swikazratu swa ku fana ni tiyimpi. Xa ku sungula, a pfukeliwe hi Edomu; ntsrhaku Libna na yene a pfukele Yuda. (2Th 8:20-22) Ka papela ledzri a dzri zrumeleliki Yehoramu, muprofeta Eliya a tsrale leswi: ‘Yehovha Xikwembu Nkulukumba wa Davhida Tatana waku, a hlayisa xiswoswo: Leswi u nga fambangakiki a tindleleni ta Yehoxafati, Tatana waku, ni le tindleleni ta Asa, a hosi ya Yuda, kambe u fambi tindleleni ta tihosi ta Israyele, u hlohlotele a Vayuda ni vayaki va Yerusalema a wumbuyeni swanga hi yindlu ya Akabe, u dlaye ni vamakwenu va yindlu ya Tatana waku, lava ku tluliki hi wunene, lavisa Yehovha a ta buyisa ntungu lowukulu a tikweni dzraku, a ta ba vana vaku ni vasati vaku ni hinkwaswu leswi nga swaku; loko e wene u ta vabya ngopfu hi vuvabyi bya le ndzreni, lebyi taka yengesela mazrumbu yaku ma ku ma huma hi ntamu wa vuvabyi.’—2Mk 21:12-15.
Hinkwaswu swi yentxeke hi lani Yehovha a hlayiki ha kone. Yehovha a pfumelele leswaku va-Arabe ni vafilista va hlasela tiko ni ku tlhela va teka vasati ni vana va Yehoramu akuva va ya va swikazrawa. Xikwembu Nkulukumba e pfumelela ntsena leswaku ku huluka n’wana wa xigumandzreni wa Yehoramu ku nga Akaziya, hi kola ka xipfumelelanu lexi a xi yentxiki na Davhida. ‘A ntsrhaku ka leswo hinkwaswu, Yehovha a mu ba [Yehoramu] hi wuvabyi bya mazrumbu lebyi hlulaka vadahi.’ Ntshaku ka malembe mabidzri ‘a mazrumbu yake ma huma’ kutani hakatsrongokatsrongo a fa. Lebyi ku ve wughamu bya wanuna lweyi wa ku biha, lakakuva ‘a tiko dzrake a dzri mu hambelanga ndzrilo lo wanga hi wa vatatana vakwe’ A lahliwe mutini wa Davhida, ‘kambe ku nge masizreni ya tihosi’. Kutani Akaziya, n’wanake a ndzruluka hosi, matsrhan’wini yake.—2Mk 21:7, 16-20; 22:1; 1Mk 3:10, 11.
15-21 KA MAYU
WUKOSI BYI NGA BIBELENI | 2 MAKRONIKA 22-24
“Yehovha A Hakela Lava Tizraka Hi Xixixi”
Sentinela 01/04/2009 p. 24 §§ 1-2
Ku Titlhanganisa Ni Vanghanu Va Ku Biha Swi Yentxe Yehowaxi A Fulazrela Yehovha
A KU li nguva ya ku kazrata a Yerusalema, ku nga muti lowu a tempele dzra Xikwembu Nkulukumba a dzri li ku wone. A ka ha ku dlayiwa Hosi Ahaziya. Swi kazrata ni ku swi tlhamuxela leswi Ataliya, mamana wa Ahaziya a swi yentxiki ntsrhaku ka loko a dlaye hosi Ahaziya. A dlaye vatukulu vake, ku nga vana va Ahaziya! Xana wa swi tiva leswaku ha yini yentxe leswo? Hikusa a a djula ku va hosi matsrhan’wini yavu.
Nambitanu, Yehowaxi, mun’we wa vatukulu va Ataliya, lweyi a a li xibebetana, a huluxiwile nakone vhovho wake a nga yi tivanga mhaka leyi. Xana wa swi nyonxela ku tiva leswaku swi yentxekise kuyini akuva a huluxiwa? Yehowaxi a tumbetiwe a tempeleni hi zrazrana wake lweyi a vito dzrake a nga Yehoyexeba. A kote ku yentxa leswo hikusa a nuna wake Yehoyada a a li muprista lwenkuluku. Kutani ha wubidzri byavu va pfumelelanile akuva va huluxa Yehowaxi.
Sentinela 01/04/2009 p. 24 §§ 3-5
Ku Titlhanganisa Ni Vanghanu Va Ku Biha Swi Yentxe Yehowaxi A Fulazrela Yehovha
Yehowaxi a tumbetiwe a tempeleni ku dzringana 6 wa malembe. Ku dzringana nkama lowo hinkwawu a dondzrisiwe hinkwaswu mayelanu na Yehovha Xikwembu Nkulukumba ni hi milawu yake. Ntsrhaku ka loko Yehowaxi a tlhanganise 7 wa malembe, Yehoyada a mu beke ku va hosi. Xana wa swi nyonxela ku tiva leswaku a swi yentxise kuyini leswo ni leswaku ku yentxeke yini hi vhovho wa Yehowaxi, hosi ya xisati Ataliya lweyi a a ni mintizro ya ku biha.—
Hi xihundla, Yehoyada a hlengelete vazrindzri va ku hlawuleka lava tihosi ta le Yerusalema a ti li na vone a Yerusalema. A va tlhamuxele ndlela leyi yene kun’we ni nkatake va mu huluxiki ha yone n’wana lweyi wa Hosi Akaziya. Hiloko Yehoyada a teka Yehowaxi a mu yisa ka vazrindzri volavo, lava va swi xiyiki leswaku a a ni mfanelo ya ku va hosi.
Yehoyada a humese Yehowaxi a handle kutani a mu beka ku va hosi. Hi loko vhanu va sungula ku ‘womba mavoko va ku: a ku hanyi Hosi’. A vazrindzri va tsrandzrela Yehowaxi akuva va mu sizrelela kutani loko Ataliya a vona leswaku a ku biwa nkulungwana, a huma kutani a huwelela a hlaya leswaku a ku li xihoxo ku va Yehowaxi a bekiwa swanga Hosi. Kutani Yehoyada a nyike vazrindzri mpfumelelo wa ku dlaya Ataliya.—2Th 11:1-16.
Perspicaz vol-1 p. 818 § 19
Xilahlu, Mbangu Wa Masizra
Muprista lwenkulu Yehoyada, lweyi a a lulamile, a nyikiwe tovoko dzra kuva a lahliwa ‘a mutini wa Davhida kun’we ni tihosi’. Ko va yene ntsena lweyi a a nga li wa le wuhosini kambe a lahliwiki mbangwini wa tihosi.
Tindzralama Ta Moya
Perspicaz vol-2 p. 1221-1222 § 12
Zakariya
12. N’wana wa muprista lwenkulu Yehoyada. Ntsrhaku ka lifu dzra Yehoyada, hosi Yehohaxi a tsrhike wugandzreli bya ntiyiso, a sungula ku landzra swilayu swa ku biha a matsrhan’wini ya ku yingiseta vaprofeta va Yehovha. Zakariya, primu wa Yehowaxi (2Ch 22:11), a basopise xitsrhungu mayelanu ni mhaka leyi, kambe a matsrhan’wini ya ku va va tisola, va mu khandle hi mazribye a q’ekeni dzra tempele. Hi lawa mazritu lawa Zakariya a ma hlayiki loko a fa: ‘Yehovha a a swi voni, a a swi dzrihiseli!’ Xikombelo lexo xa wuprofeta xi yingeliwile, hikusa a ke hohlotiwa tiko dzra Yuda ntsena hi Vaasiriya kambe na yene Yehowaxi a dlayiwile hi malandzra yake mabidzri, ‘hi nkonta ya ngati ya vana va Yehoyada, a muprista’. A mabuku ya Septuaginta Grega ni Vulgata Latina ma hlaya leswaku Yehowaxi a dlayiwe akuva ku dzrihisiwa ngati ya n’wana wa Yehoyada. Kasi a matsralwa ya va masoretico ni ya va Peshitta Siaríaco, wone ma tizrisa mazritu “vana”. Swi nga yentxeka va tizrise zrito ledzri akuva va kombisa lisima ni ku yisa lidzrumu ka n’wana wa Yehoyada, Zacariya, lweyi a a li muprofeta, tlhelo muprista.—2Mk 24:17-22, 25.
22-28 KA MAYU
WUKOSI BYI NGA BIBELENI | 2 MAKRONIKA 25-27
“Yehovha A Ni Wuswikoti Bya Ku Ku Nyika Swa Ku Tlula Leswi U Nga Na Swone”
Perispicaz vol-2 p. 1266 § 6
Yehowaxi
Yehowaxi a thlele a lugarisa 100.000 wa masotxha yake ka hosi ya Yuda akuva va ya lwa ni Vaedomu. Kambe hi ku landzra xilayu xa ‘Mhunu wa Xikwembu Nkulukumba’ Masotxha wolawo ma ntsrhunxiwe kuva ma muka nambileswi a ma pfi ma hakeliwa 100 wa matalenta ya prata lawa ma nga dzringanaka (660.600 wa madolar) Masotxha lawo ma hlundzruke ngopfu hikuva ma mukisiwe kaya, swi nga yentxeka ma kwatisiwe hi leswi a ma nga ta va ni xiyavelo ka leswi a swi ta tekeliwa valala. Xileswo ntsrhaku ka loko va tlhelele n’walungu, va ye hlasela swidoropana ku sukela a Samariya kuya thlasa Bete-Heron vava va phanga mintxhumu.—2Mk 25:6-10, 13.
Xihondzro Xa Ku Zrindzra 08/2021 p. 30 § 16
‘Nampswa, U Vona’ Leswaku Yehovha I Munene
16 Titsrone swa kukazri. A swi vileli kuva hi tsrhika hinkwaswu leswi hi nga na swone akuva hi nyonxisa Yehovha. (Ekl 5: 19, 20) Kambe loko hi txhava ku titsrona swa kukazri akuva hi yengesela ntizro wezru ka Yehovha, hi nga ha wela ndzringweni wa ku fana ni lowu weliki wanuna wa xifananiso xa Yesu. Wanuna lwiyani a a swi djula swinene ku va ni wutomi bya ku yampswa lakakuva a tsrhike ntizro wa Xikwembu Nkulukumba. (Dondzra Luka 12: 16-21.) Christian, makwezru wa kukazri lwa tsrhamaka França, a li: “A ni nga tizrisi nkama kumbe ntamu wanga akuva ni tizrela Yehovha kumbe akuva ni va ni ndangu wanga.” Yene ni nsati wake va teke xiboho xa ku tizra swanga maphayona. Kambe akuva va kota ku yentxa leswo, a va fanela ku tsrhika mintizro yavu. Akuva va kota ku tiwundla va sungule ku tizra ka ku basisa nakone va dondzre ku hanya hi switsrongo. Xana ku tikazrata koloko ku pfunile? Christian a li: “Swoswi hi swi zrandzra swinene ku zrezra, nakone hi nyonxa ngopfu loko hi vona swidondzro ni timpinda tezru na ti dondzra ha Yehovha.”
Tindzralama Ta Moya
Sentinela 15/12/2007 p. 10 §§ 1-2
Xana U Ni Mukutxi Lweyi A Ku Pfunaka Ku Tama U Tizrela Xikwembu Nkulukumba?
Uziya a ve hosi ya mfumu wa nyingitimu a Yuda na a ni 16 wa malembe. Uziya a fume ku dzringana 50 wa malembe, ku sukela a ku heleni ka sekulu 9 kuya ku sunguleni ka sekulu 8 M.N.Y. Uziya ‘a tame a yentxa leswi lulamiki mahlweni ka Yehovha ku sukela na e he ntsrongo.’ I yini lexi mu pfuniki ku tama a famba ndleleni ya ku lulama? Wudzrunguli byili: ‘A khinyela ku djula Yehovha a ku hanyeni ka Zekariya, lwe faka a yingelisisa swivoniso swa Xikwembu Nkulukumba; a masikwini hinkwawu lawa a djuliki Yehovha ha wone, Xikwembu Nkulukumba a mu Katekisa.’—2Mk 26:1, 4, 5.
A ku tiviwi swinyingi mayelanu na Zakariya mudzrimuxi wa Hosi handle ka wudzrunguli lebyi kumekaka bibeleni. Kambe leswi Zakariya a a li ‘lwe faka a yingelisisa swivoniso swa Xikwembu nkulukumba’ a ve ni nkutxeytelo lowunene ka Hosi leyi leyi a ya ha li mumpshwa akuva yi kota ku yentxa leswi nga swinene. A buku dzrin’wana dzri hlaya leswaku Zakariya a a li ‘wanuna lweyi a a ma tiva ha hombe ,matsralwa, lweyi a a ni mfambu wukulu ka timhaka ta wukhongoti nakone a a vulavula hi wutivi byake.’ (The Expositor’s Bible) Mun’we wa vakambisisi va bibele a hetelele hi ku hlaya leswi mayelanu na zakariya: “A a ti tiva ha hombe timhaka ta wuprofeta nakone . . . a a thlazrihile, a a tinyiketelile, a a li wanuna wa ku lulama nakone swi tikomba a ve ni nkutxetelo lowunene ka Uziya.’
29 KA MAYU–4 KA JUNYU
WUKOSI BYI NGA BIBELENI | 2 MAKRONIKA 28-29
‘U Nga Tizrela Yehovha Nambi Loko Vapswali Vaku Va Nga Li Xikombiso Lexinene’
Sentinela 02/2016 p. 14 §§ 8
Yetisela Vanghanu Lavakulu Va Yehovha
8 Ndlela leyi Ezekiya a kulisiwiki ha yone yi hambanile ni ndlela leyi Rute a kulsiwiki ha yone. Yene a pswaliwe ka tiko ledzri a dzri tinyiketele ka Xikwembu Nkulukumba. Kambe a hi Vaisrayele hinkwavu lava a va dumbekile. Papayi wa Ezekiya, ku nga hosi Akazi a a bihe ngopfu, a nga kombisanga xitxhavu ka tempele dzra Xikwembu Nkulukumba nakone a kutxetele vhanu akuva va gadzrela Swikwembu swa madzrimi. Akazi a tlhele a hisa vana vake, ku nga vamakwavu va Ezekiya swanga magandzrelo, a va nyikela ka swikwembu swa madzrimi!—2Th 16:2-4, 10-17; 2Mk 28:1-3.
Sentinela 02/2016 p. 14 §§ 9-11
Yetisela Vanghanu Lavakulu Va Yehovha
9 Xikombiso xa ku biha xa hosi Akazi n’waninkama a xi ta yentxa leswaku Ezekiya a hlundzrukela Yehovha. Namunhla wa siku vhanu van’wana lava kumanaka ni swikazratu a wuton’wini byavu, leswi swi kalaka swi nga gami mbangu loko swi pimanisiwa ni swa Ezekiya, va vona ingiki va ni xivangelo lexi twalaka xa kuva va ‘hlunamela Yehovha’ kumbe ku hlundzrukela nhlengeletanu yake. (Pr 19:3) Van’wana va vona ingiki xikombiso xa ku biha lexi va bekeliwiki xone hi mindangu yavu loko ve he vatsrongo, xi ta yentxa leswaku swi nga va fambeli ha hombe a wuton’wini kumbe kuva na vone va yentxa swihoxo swa ku fana ni leswi yentxiwiki hi vapswali vavu. (Ezk 18:2, 3) Xana lowo i ntiyiso?
10 Ndlela leyi Ezekiya a hanyiki ha yone yi kombisa leswaku a swi hi ndlela leyo! A ku na xivangelo lexi twalaka xa ku hlundzrukela Yehovha. Phela a hi yene a hi vangelaka swikazratu. (Yb 34:10) I ntiyiso leswaku vapswali va nga ha dondzrisa vanavu mintxhumu leyi nga liki yinene kumbe ya ku biha. (Pr 22:6; Kl 3:21) Kambe leswo a swi hlayi swone leswaku ndlela leyi hi kulisiwiki ha yone yi kombisa leswaku hi ta va vhanu va matsrhamela muni. Hi mhaka muni? Hikusa Yehovha a hi nyike ntxhumu wa ku hlawuleka, ku nga nyiko ya ku tihlawulela, leswi liki hi nga hlawula ku yentxa leswinene kumbe swa ku biha. (Deut. 30:19) Xana Ezekiya a yi tizrise hi ndlela yini nyiko leyi ya lisima?
11 Nambi leswi papayi wake a a li mun’we wa tihosi ta ku biha ta le Yuda, Ezekiya a ve mhunu wa munene ngopfu. (Dondzra 2 Tihosi 18:5, 6.) A nga landzranga xikombiso xa papayi wake, a matsrhan’wini ya leswo, a hlawule ku yingiset vaprofeta va Yehovha va ku fana na Ezaya, Mika na Hoxeya. A yingisete swileleto swavu hi wuzron’wana. Leswo swi mu kutxe kuva a lulamisa swikazratu leswi swi vangiwiki hi papayi wake. A basise tempele, a kombe Xikwembu Nkulukumba leswaku a dzrivalela vhanu, ni ku helisa swikwembu swa madzrimi a tikweni hinkwadzru. (2Mk 29:1-11, 18-24; 31:1) Hi ku famba ka nkama, loko hosi ya Asiriya, Senakeribe, a djule ku hlasela Yerusalema, Ezekiya a kombise xixixi lexikulu ni lipfumelo. A dumbe mpfunu wa Yehovha ni ku tlhela a tiyisa vhanu vake. (2Mk 32:7, 8) Ku ve ni nkama lowu Ezekiya a nga sungula ku tibyela, kambe loko Yehovha a mu lulekile, a titsrongahatile. (2Mk 32:24-26) Swi le livaleni leswaku Ezekiya i xikombiso lexinene lexi hi nga xi yetiselaka. A nga pfumelelanga leswaku ndlela leyi a kulisiwiki ha yone yi honetela lipfumelo dzrake. A matsrhan’wini ya leswo, a kombise leswaku a a ni wunghanu bya le kusuhi na Yehovha ni leswaku a a mu zrandzra.
Tindzralama Ta Moya
Setinela 15/02/2012 pp. 24-25
Nathani—Museketeli Wa ku dumbeka wa wugandzreli bya ku xwenga
Swa nga mugandzreli wa ku dumbeka wa Yehovha, Nathani a a tiyimisele ku seketela makungu ya Davhida ya ku yaka tempele dzra ku sungula dzra wugandzreli bya ntiyiso. Kambe ka xiyentxakalu lexi, a matsrhan’wini ya ku zranga hi ku vutisa Yehovha, a hlaye mavonela yake. Ka wusiku byolebyo, Xikwembu Nkulukumba a zrume Nathani akuva a ya byela Davhida leswaku a hi yene lweyi a a ta mu yakela tempele. Kambe a dzri ta yakiwa hi mun’we wa vanake. Nambi tanu Nathani a byele Davhia leswaku Xikwembu Nkulukumba a yentxa xipfumelelanu na yene xa leswaku a xitsrhamu xake xa wuhosi xi ta ‘tiya hi laha ku nga helikiki.’—2Sa 7:4-16.
Vonela dzra Nathani mayelanu ni mhunu lweyi a a ta yaka tempele a dzri nga fambisani ni ku zrandzra ka Xikwembu Nkulukumba. Nambitanu, muprofeta lweyi a nga zanga a ngurangura kambe a yingiseti xileleto xa Yehovha a tlhela a fambisana na xone. Ingiki hinkwezru hi nga tikazratela ku yetisela xikombiso xa Nathani loko hi ndlela ya kukazri Yehovha a lulamisa mavonela yezru. Ku va Nathani a tame a tizra swanga muprofeta swi kombisa leswaku Yehovha a tame a mu yamukela. Ku hlaya ntiyiso, swi tikomba ingiki Yehovha a hlawule Nathani na Gade, lweyi wa muvoni wa swivoniso, akuva va kongomisa Davhida ku hlela 400 wa vayimbeleli ka ntizro wa tempele.—1Mk 23:1-5; 2Mk 29:25
5-11 KA JUNYU
WUKOSI BYI NGA BIBELENI | 2 MAKRONIKA 30-31
“Ku Hlengeletana Kun’we Swa hi Pfuna”
Perspicaz Vol-1 p. 920 § 5
Ezekiya
A a Hisekela Wugandzreli Bya Ntiyiso. Ku sukela loko a bekiwe a xitsrhan’wini xa wuhosi na a ni 25 wa malembe, Ezekiya a kombise ku hisekela a wugandzrili bya Yehovha. Ntxhumu wa ku sungula lowu a wu yentxiki kuve ku pfuxeta tempele. A tlhanganise Vaprista ni va Levhi, kutani a va byela leswi: ‘Swoswi ndzri zrandzra ku hamba xipfumelelanu na Yehovha Xikwembu Nkulukumba wa Israyele.’ Nkongometo akuli ku yentxa ntwananu wa ku dumbeka, swanga ntwananu wa nawu, nambileswi a wa ha tizra kambe a va nga wu teki wu li wa lisima, xileswo a va djula ku tlhela va wu khangulisa xinyuwana a Yuda. Hi ku hiseka, a hlele valevhi mintizrweni yavu, a tlheli a pfuxeta lulamiselo dzra wuyimbeleli akuva ku Yimbeleliwa swidzrumiso. Siku dzra ku tlangela paskwa akuli hweti ya Nisan, A tempele, Vaprista kun’we ni valevhi, a va nga basanga. Ku ta tlhasela ka siku dzra 16 ka Nisan, tempele kun’we ni swibya swa dzrone a swi pfuxetiwile ni ku basisiwa. Swi sindzrise kuva tiko hinkwadzro dzra Israyele dzri basisiwa hi ndlela ya ku hlawuleka. Ku sungula, Tihosana tinyikele magandzrelo, ni timhamba akuva ku dzrivaleliwa Mfumu, mbangu wa ku xwenga ni xitsrhungu. Ku landzrela timhamba ta tinyingi ta ku hisiwa leti nyikeliwiki hi xitsrhungu.—2Mk 29:1-36.
Perspicaz vol-1 p. 920 § 6
Ezekiya
Leswi tiko a dzri nga basanga, a swi kotekanga ku tlangela paxkwa hi nkama wa kone, xileswo Ezekiya a tizrise lulamiselo dzra nawu ledzri a dzri pfumelela leswaku vhanu lava kalaka va nga basanga va tlangela paxkwa ntsrhaku ka hweti. A zrambe tiko dzra Yuda kun’we ni tiko dzra Israyele hi ku tizrisa mapapela lawa a ma zrumeliki ka tiko hinkwadzru ku sukela a Berseba ku ya tlhasa a Dan. Lava a va fambisa mapapela va kumane ni ku kanetiwa. Kambe van’wana va ku fana na Axer, Manassi na Zebulon, va titsrongahatile va va va famba, kun’we ni van’wana va ka Efrayimi ni va ka Issakar. Handle ka leswo, a ku ni vagandzreli vanyingi va Yehovha lava a va nga li Vaisrayele. Swi nga yentxeka van’we ka lava a va yima ni wugandzreli bya ntiyiso, lava a va kumeka a mfun’wini wa le n’walungu, a swi ta va kazratela ku kumeka ka xiyentxakalo lexi. Ku fana ni vavanuna lava a va heleketa mapapela, swi nga yentxeka a va ta lavisana ni ku kanetiwa kun’we ni swipoyilo, swanga hi leswi a mfumu wa tinxaka ta 10 a wu le ka xiyimu xa ku kazrata, a wu nghene hi nhloko ka wugandzreli bya madzrimi hi hala tlhelo a wu le kusuhi ni ku hlaseliwa hi Vaasiriya. — 2Mk 30:1-20; Tin 9:10-13.
Perspicaz Vol-1 p. 920 §§ 7-8
Ezekiya
Ntsrhaku ka paxkwa, va hambe Festa dzra Mapawu ya ku kala handzrelo ku dzringana 7 wa masiku. A nkhuvu a wu nyonxisa ngopfu lakakuva va yengetela 7 wa masiku akuva va tama va kulungela, nambi ka minkama ya ku kazrata. Hikusa kusukela a masikwini ya Solomoni va tame va kuma tovoko dzra Yehovha lakakuva ‘kuva ku tsrhava lokukulo a Yerusalema, Hikusa kusukela a masikwini ya Solomoni n’wana wa Davida Hosi ya israyeli, a Ka vanga na leswaku nhato a Yerusalem.’—2Mk 30:21-27.
Leswaku a a li xiyentxakalo xa lisima xa ku pfuxetiwa ka wugandzreli bya ntiyiso ku nge tlhanganu wa ku tinyonxisa swa nkamanyana, swi tikomba ka leswi landzreliki. Na va nga si tlhela makaya kwavu, Vaisrayele va hohlote makolona, va tsremelela maaxera ni mimbangu ya ku tlakuka ya Yuda ni ya Bejamim ku ya tlhasa ni le Efrayimi na Manase. (2Mk 31:1) Ezekiya a beke xikombiso lexinene hikuva a pfotlose nyoka ya kobre leyi a yi yentxiwe hi Moxe, hikusa xitsrhungu a xi sungula ku yi khinsamela xiyi yentxa Xinkwembu Nulukumba va tlhela va yi hisela magandzelo. (2Th 18:4) Ntsrhaku ka nkhuvu lowukulu Ezekiya a tame a khomelela ka wugandzreli bya ntiyiso hikuva a hlela Vaprista ni ku yentxa lulamiselo dzra ku nyika swakuda hinkwavu lava a va tizra tempeleni. A va kutxe ku yingisa nawu mayelanu ni ku humesa swa wukhume ni mihandzru ya ku sungula akuva va nyika Valevhi ni Vaprista. Xitsrhungu xi dzri seketele hi mbilu hinkwayu lulamiselo ledzro—2Mk 31:2-12.
Tindzralama ta Moya
Sentinela 09/2018 p. 6 §§ 14-15
“Loko mi tiva leswo, ma nyonxa loko mi swi yentxa”
14 Hi nga kombisa leswaku ha titsrongahata hi kuva hi tiyimisela ku yingiseta van’wana. Yakob 1:19 dzri li mhunu a a “hangweyese ku yingela.” Yehovha a hi bekele xikombiso lexinene a mhakeni leyi. (Gn 18:32; Yš 10:14) Vona leswi hi nga swi dondzraka ka mabulo lawa ma kumekaka Eksoda 32:11-14. (Dondzra.) Nambileswi a swinga sindzrisi kuva Yehovha a yingiseta mavonela ya Moxe, kambe a mu nyiki nkama wa ku hlaya ndlela leyi a a titwa ha yone. Xana unga yingiseta xidzringanyeto xa mhunu lweyi a yentxiki xihoxo? Nambitasu, Yehovha a yingiseta swikhongoto swa hinkwavu lava nga ni lipfumelo kwake.
15 Mun’wana ni mun’wana wezru a fanela ku tivutisa leswi: ‘Loko Yehovha a titsrongahatile a yingiseta Abrahamu, Abraham, Rahele, Moxe, Joxuwa, Manowa, Eliya na Ezekiya, xana a ni fanelanga ni tikazratela ku hlonipha vamakwezru, ni va yingiseta ni tlhela ni tizrisa swidzringanyeto swavu? Xana ku ni mhunu wa kukazri lweyi ni nga mu pfunaka a bandleni kumbe a ndangwini? Ni nga mu pfunisa kuyini?’—Gn 30:6; Yd 13:9; 1Th 17:22; 2Mk 30:20.
12-18 KA JUNYU
WUKOSI BYI NGA BIBELENI | 2 MAKRONIKA 32-33
‘Txhavelela Vamakwezru Hi Nkama Wa Mahlomulo’
Prespicaz Vol-1 p. 241 § 21
Asiriya
Senakeribi. Senakeribi, n’wana wa Sargao wa wubidzi (II), a hlaseli Yuda ka lembe dzra wu 14 na ku fuma Ezekiya (732 M.N.Y.). (2Th 18:13; Eza 36:1) Ezekiya a pfukele mpinga wa va Asiriya lowu tiku a dzri wu zrwalile hi mhaka papayi wake Akazi. (2Th 18:7) Senakeribi a pfukele Yuda, a va a hlula 46 wa ma doropa (vona Eza 36:1, 2), Senakeribi a sindzrisi leswaku Ezekiya a hakela nandzru wa ku dzringana 30 wa ma talenta ya woru (11.560.000 wa ma dolar) ni 300 wa ma talenta ya prata (1.982.000 wa ma dolar). (2Th 18:14-16; 2Mk 32:1; dzringanisa Eza 8:5-8.) Nambileswi kutani a va hakelile nandzru wavu, Senakeribi hi ku tizrisa muyimeli wake a sindzrise leswaku va ti nyikela. (2Th 18:17–19:34; 2Mk 32:2-20) Senakeribi a sindzriseki ku tlhelela Ninivha ntsrhaku ka loko Yehovha a dlaye 185.000 wa va Asiriya. (2Th 19:35, 36) Ntsrhaku a dlayiwile hi vanake vabidzri, a va a siviwa a xitsrhan’wini xa wuhosi hi n’wanake Azar-Adon. (2Th 19:37; 2Mk 32:21, 22; Eza 37:36-38) A swiyentxakalo leswi, handle ka lexi xa ku helisiwa ka masotxha ya va Asiriya, swi tsraliwile ka Buku dzra matimu ya Senakeribi ni ka Buku dzra matimu ya Hazer-Adon.—MUFOTO, Vol. 1, p. 957.
Sentinela 15/12/2013 p. 19 § 12
Namunhla, I Va Mani Vabyisi Va 7 Ni Tihosana Ta 8?
12 Minkama hinkwayu Yehovha a ti yimisele ku hi pfuna hi leswi hi hlulekaka ku swi yentxa, kambe a yimela leswaku na hine hi yentxa leswi hi nga swi kotaka. Ezekiya a djule mpfunu ka “Tihosana takwe, ni tinhenha takwe,” kutani va kunguhata ku “Siva tinhlovo ta mati, leti faka ti handle ka muti . . . [Ezekiya] a tiyisa mbilu, a pfuxa lihlampfu hinkwalu loli mbundzrumuxiwiki, a lehisa swihondzro, kutani a yaka lihlampfu lin’wana handle, . . . a hamba mathlazri ni swithlangu swa ku tala.” (2Mk 32:3-5) Yehovha a tizrise vavanuna va nga li vangaki lava a va ni xixixi, ku nga— Ezekiya, tihosana take ni vaprofeta van’wana va ku dumbeka akuva a sizrelela ni ku byisa vhanu vake hi nkama wolowo.
Sentinela 15/11/2013 p. 19 § 13
Namunhla, I Va Mani Vabyisi Va 7 Ni Tihosana Ta 8?
13 A Ntsrhaku ka leswo Ezekiya a yentxe ntxhumu wun’wana wa lisima swinene ku tlula ku siva swihlovo ni ku pfuxeta lihlampfu. Leswi a a li mubyisi lwe munene, Ezekiya a hlengelete vhanu kutani a sungula ku va kutxa hi mazritu a ku: ‘N’wi nga helisiwi timbilu hi hosi ya Axur . . . , hikusa lava nga na hine va tlula lava nga na yone. Voko dzra nyama dzri na yene, kambe Yehovha Xikwembu Nkulukumba wezru a na hine ku hi pfuna ni ku hi lwela.’ Nakunene mazritu lawa a ma tiyisa lipfumelo, ku tiva leswaku— Yehovha a a ta va lwela vhanu vake! Loko Vayuda va twa mazritu lawa va sungula ku ‘Tiyisiwa hi mazritu ya Ezekiya a hosi ya Yuda.’ Xiya leswaku kuve ‘mazritu ya Ezekiya’ lawa ma yentxiki leswaku vhanu va va ni xixixi. Ezekiya, tihosana take ni vavanuna va ntamu kun’we na muprofeta Mikeya na muprofeta Esaya, va ve vabyisi lavanene hi lani Yehovha a swi profetiki hakone.—2Mk 32:7, 8; dondzra Mika 5:5, 6.
Tindzralama Ta Moya
Xihondzro Xa Ku Zrindzra 04/10/2021 p. 4 §§ 11-12
Xana I Yini Ku Tisola Ka Ntiyiso?
11 Hi ku famba ka nkama, Yehovha a hlamule swikhongoto swa Manasi. Loko Yehovha a yingele swikhongoto swa Manasi, a vone leswaku a mbilu yake a yi txintxile. Leswi Manasi a a khongota hi ku hiseka, Yehovha a tlhele a mu pfumelela ku va hosi. Nakone Manasi a londzrovote mukhandlu lowo akuva a kombisa leswaku a a tisolile hakakunene. A yentxe leswi Akabe a kalaka a nga swi yentxanga. A txintxe matsrhamela yake. A hohlote wukhongoti bya madzrimi nakone a pfuxete wugandzreli bya ntiyiso. (Dondzra 2 Makronika 33:15, 16.) Leswo swi djuli leswaku Manasi a va ni xixixi ni lipfumelo. Phela ku dzringana malembe manyingi a a li xikombiso xa ku biha ka ndangu wake, ka vhanu lava a va tsrhama a ndlwini ya wuhosi ni ka tiko hinkwadzru. Kambe ka malembe ya wugamu ya wutomi byake, Manasi a dzringise ku helisa wubihi hinkwabyu lebyi a a byi yentxile, nakone swi nga yentxeka a ve ni nkutxetelo lowunene ka ntukulu wake Yosiya lweyi malembe ntsrhaku a viki hosi leyinene.—2Th 22:1, 2.
12 Xana hi nga dondzra yini ka Manasi? A titsrongahatile mahlweni ka Xikwembu Nkulukumba nakone a yentxe leswi yengetelekiki. A khongotile nakone a kombele leswaku Yehovha a mu komba timpswalu. Manasi a txintxile. A tikazratile akuva a helisa wubihi hinkwabyu lebyi a a byi vangile, a yentxe hinkwaswu a nga swi kotaka akuva a gandzrela Yehovha ni ku pfuna van’wana akuva va yentxa hi ndlela leyi fanaka. Xikombiso xa Manasi xi pfuna nambi lava va yentxiki swidoho leswikulu akuva va va ni dumbo ni wumboni lebyi tiyiki bya leswaku Xikwembu Nkulukumba i ‘munene nakone hi lwa dzrivalelaka’. (Ps 86:5) Lava va tisolaka hakakunene va nga dzrivaleliwa.
19-25 KA JUNYU
WUKOSI BYI NGA BIBELENI | 2 MAKRONIKA 34-36
“Xana U Pfuneka Hi Ku Helela Loko U Dondzra Zrito Dzra Xikwembu Nkulukumba?”
Perspicaz vol-1 p. 1179 § 3
Hulda
Loko Yosiya a twe ku dondzriwa ka “buku dzra nawu” ledzri kumiwiki ha Hilkiya Muprista lwenkulu, loko va li kazri va pfuxeta tempele, yene a zrumele ntlawa wa kukazri akuva wu ya kambisisa mhaka leyo ka Yehovha . Ntlawa lowo wu kongome ka Hulda, lweyi a va tlhamuxeliki zrito dzra Yehovha, ledzri a dzri kombisa leswaku a makhombo lawa a ma ta humelela hikola ka ku kala ku yingiseta kwavu lawa ma tsraliwiki a “bukwini” a ma ta wela tiku ledzri hikola ka leswi va xandzrukiki. Hulda a yengesele hi ku hlaya leswaku, hikola ka leswi a titsrogahatiki ka Yehovha , Yosiya a a nge ti mavona makhombo wolawo kambe a a ta fa a va a lahliwa hi ku zrula.—2Th 22:8-20; 2Mk 34:14-28.
Sentinela 15/06/2009 p. 10 § 20
Vana Ni Nkhinkhi Hi Kola Ya Yindlu Ya Yehovha!
20 Loko va le ka ntizro wa ku pfuxeta tempele lowu hleliwiki ha Hosi Yosiya, a Muprista lwenkulo Hilkiya “a kuma buku dzra nawu wa Yehovha lowu nyikeliwiki ha Moxe.” A dzri teke a dzri nyika matsralana, Xefana, lweyi a dzri tekiki a ya dzri dondzrela Yosiya leswi tsraliwiki. (Dondzra 2 Makronika 34:14-18.) I yini leswi humeleliki? Kolanu a Hosi yi handzrule timpahla ta yone ku kombisa leswaku ya tisola nakone yi zrumi vavanuna va yone kuva va ya vutisa ka Yehovha. Hi ku tizrisa Muprofeta wa xisati Hulda, Xikwembu Nkulukumba a nyikele vuyavanyisi lebyi a byi khumba swihena swa wukhongoti bya Xiyuda. Ku hiseka ka Yosiya ka ku helisa wukhongoti bya madzrimi, ku xiyekile lakakuva a kume timpswalu ka Yehovha nambileswi a a ta tisa makhombo lawa a ma hlayiki a makazri ka tiko. (2Mk 34: 19-28) Xana hi nga dondzra yini? Nakunene hi ni kunavela loku fanaka ni loku Yosiya a a li nakone, hi djula ku kahlula hi yi yamukela minkongomiso leyi Yehovha a hi nyikaka yone. Hi djula ku xi tekela nhlokweni xikombiso xa ku tivonela ka leswi nga ha humelelaka loko hi pfumelela wudukwa ni ku kala ku dumbeka swi ntxhimisa wugandzreli byezru. Nakone hi nga tiyiseka leswaku ku fana na Yosiya, Yehovha a ta xiya ni ku yamukela ndlela leyi hi byi hisekelaka ha yone wugandzreli bya ntiyiso.
Tindzralama ta Moya
Sentinela 03/2017 p. 27 §§ 15-17
Xana u Ta Tizrisa Leswi Tsraliwiki hi Mbilu Yaku Hinkwayo?
15 Hi wugamu, hi dondzra yini ka leswi humeleliki Hosi Yosiya? Yanakanya hi leswi yentxiki leswaku a hluliwa ni ku tlhela a dlayiwa. (Dondzra 2 Makronika 35: 20-22.) Yosiya “a huma kuya tlhangaveta” hosi Neko wa le Egipta, nambileswi hosi yoleyo yi hlayiki leswaku a yi nga djuli ku lwa na yene. Bibele dzri hlaya leswaku mazrito ya Neko a ma huma a “non’wini wa Xikwembu Nkulukumba.” Kutani ha yini Yosiya a humile a ya lwa na Neko? Bibele a dzri hlayi xivangelo xakone.
16 Xana Yosiya a ta swi tivisa kuyini leswaku a mazrito ya Neko ma huma ka Yehovha? Kumbexana a a ta vutisa Yeremiya, kumbe Muprofeta mun’wana wa ku dumbeka. (2Mk 35: 23, 25) Kambe a nga yentxanga tanu, Neko a a nga djuli ku ya lwa ni muti wa Yerusalema kambe a a ya lwa ni muti wu’wana wa Karimexi. Handle ka leswo, vito dzra Xikwembu Nkulukumba a dzi nga khumbeki ka mhaka leyi hikusa Neko a nga zanga a pfukele Yehovha kumbe vhanu vake. Xileswo a ku va nga wutlhazri kuva Yosiya a ya lwa na Neko. Xana hi dondzra yini ka mhaka leyi? Loko hi langutana ni swikazrato, hi ta va hi yentxa ha hombe loko hi yanakanya hi leswi Yehovha a djulaka hi swi yentxa ka mhaka yoleyo.
17 Loko hi kumana ni swikazrato swa kukazri a wuton’wini, hi fanela ku yanakanyisisa hi minsinya ya milawu ya Bibele. Hi va hi yi tizrisa hi ndlela leyi fanelekaka, ka swiyimo swin’wana hi nga ha bula ni vakulu. Vone va nga hi byela leswi hi fanelaka ku swi tiva hi mhaka yoleyo kumbe ku hamba wusetxhi ka mabuku yezru. Kambe va nga ha bula na hine hi minsinya yin’wana ya Bibele leyi hi fanelaka ku yanakanyisisa ha yone. Hi xikombiso, a hi nge makwezru wa xisati a djula ku ya nsin’wi hi siku dzra kukazri. (Min 4:20) Kambe a nuna wake a hi mboni a djula kuva va heta siku hinkwadzro na vali xikan’we. A hlaya leswaku i khale na va nga heti nkama xikan’we nakone a djula leswaku va yentxa xa kukazri xikan’we. Makwezru lweyi wa xisati a nga ha yanakanya hi tsralwa dzra ku kazri a Bibeleni, dzra ku fana ni lezri liki yingiseta Xikwembu Nkulukumba, kumbe ledzri liki hi fanela ku yentxa vadondzrisiwa. (Mt 28: 19, 20; Min 5:29) Kambe a fanela ku tlhela a yanakanyisisa hi leswaku Bibele dzri li u fanela ku titsrongahata ka nuna waku ni ku va lweyi a yanakanyelanaka. (Ef 5: 22-24; Flp 4: 5) Xana a nuna wake a mu tsrimbisa kuva aya nin’wini minkama hinkwayo, kumbe o djula kuva va yentxa txhumu wa kukazri ntsena siku dzroledzro? Hi fanela kuva lava dzringaniselaka nkama lowu hi tikazratelaka kuva vanghanu va Xikwembu Nkulukumba ni ku va ni lipfalo ledzri basiki.
26 KA JUNYU-2 KA JULHU
WUKOSI BYI NGA BIBELENI EZRA 1-3
‘Pfumelela Yehovha A Ku Tizrisa’
Xihondzro Xa Ku Zrindzra 03/2022 p. 2 § 1
VHANU a va nyonxe swinene. Yehovha Xikwembu Nkulukumba a ‘pfuxe mbilu ya Korexi, a hosi ya Pérsia’, akuva a ntsrhunxa va-Israyele lava a va li wukazraweni a Babilona. A hosi yi tivise leswaku Vayuda va nga tlhelela a kaya kwavu akuva va ya ‘yaka yindlu ya Yehovha, Xikwembu Nkulukumba wa Israyele’. (Ezr 1:1, 3) Lowo kuve nkama wa ku nyonxisa ngopfu swinene hikusa a Vayuda a va ta pfuxeta wugandzreli lebyi xwengiki bya Xikwembu Nkulukumba a tikweni dzravu!
Sentinela 10/2017/ p. 26 § 2
Vagadi Va Mahantxi Ni Hazri Ya Wuhosi
2 Zakariya a a swi tiva ha hombe leswaku a va Yuda lava tlheleliki a Yerusalema akuli vavanuna ni vavasati lava zrandzraka Yehovha. Hi lava a moya wa Xikwembu nkulukumba u va susumeteliki ku siya tiyindlu tavu ni mabindzru yavu vava va tlhelela a Yerusalema. (Ezr 1: 2, 3, 5) Vayuda lava va suke ka tiku ledzri a va dzri tolovelile kutani va zruzrela mbangwini lowu vanyingi vavu ava nga wutolovelanga, phela loko ku pfuxetiwa ka tempele dzra Yehovha a ku nga li ka lisima kwavu a va tava va nga pfumelanga ku fambanga mpfhuka wa kolomo ka (1.600 km) a mbangwini lowu nga ni khombo.
Tindzralama ta Moya
Sentinela 15/01/2006 p. 19 § 1
Zrito dzra Yehovha dzra hanya tinhlankulo dzra Buku dzra Ezra
1:3-6. Ku fana ni Vaisrayele van’wana lava saliki a Babilona, Timboni ta Yehovha tinyingi a ti swi koti ku nghenela a ntizru wa nkama hinkwawu kumbe kuya tizra lomu ku nga ni xivileleko lexikulu. Kambe, tiseketela ni ku tlhela ti kutxa lava ngeneliki ntizru wolowo, nakone ti nyikela swihananu swa ku tizrandzrela akuva ntizro wa ku zrezra madzrungula lamanene ya Mfumu ni wa ku yentxa vadondzrisiwa wu tama wu kula wu ya mahlweni.