BIBLIYOTEKA Dzra Watchtower Ka Internet
Dzra Watchtower Ka Internet
BIBLIYOTEKA
Xironga
  • BIBELE
  • SWIPALUXIWA
  • MINTLHANGANU
  • mwbr23 Julhu matl. 1-12
  • Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

A ku na video ka leswi u swi hlawuliki

Dzrivalelo, ku ni leswi hoxekiki akuva video dzri txhaya.

  • Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru
  • Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru—2023
  • Swinhlokwanamhaka
  • 3-9 KA JULHU
  • 10-16 KA JULHU
  • 17-23 KA JULHU
  • 24-30 KA JULHU
  • 31 KA JULHU–6 KA AGOXTO
  • 7-13 KA AGOXTO
  • 14-20 KA AGOXTO
  • 21-27 KA AGOXTO
  • 28 KA AGOXTO–3 KA SETEMBRU
Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru—2023
mwbr23 Julhu matl. 1-12

Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

3-9 KA JULHU

WUKOSI BYI NGA BIBELENI | EZRA 4-6

“U Nga Kavanyeti Ntizro”

Xihondzro Xa Ku Zrindzra 03/2022 p. 18 § 13

Xana Wa Swi Vona Leswi Zekariya A Swi Voniki?

13 A ntizro wa ku yaka tempele a wa ha yilisiwa. Nambi swi li tanu muprista lwenkulu Yexuwa na muzrangeli Zerubabele, ‘va tlhele va yaka yindlu ya Xikwembu Nkulukumba’. (Ezr 5:1, 2) Swi nga yentxeka Vayuda van’wana a va yanakanya leswaku a xiboho lexo a xi nga li xinene. A va ta tumbelisa ku yini ka valala vavu na va li ku yakeni ka tempele? A valala vavu a va ta va vangela swikazratu swinyingi. Xileswo, vavanuna lava a va zrangela, ku nga Zerubabele na Yexuwa, a va fanela ku tiyisekisa Vayuda leswaku Yehovha a a li kusuhi na vone nakone va xi yamukelile xitiyisekiso lexo. Hi ndlela Yini?

Sentinela 01/02/1986 p. 29, bokisi §§ 2-3

A Tihlo Dzra Yehovha ‘Dzri Lavisa Vakulu’

Ntsrhaku ka loko Vayuda lava a va sale Babilona va tlhelele Yerusalema, ku sunguliwe ntizro lowukulu lowu tekiki 16 wa malembe. Muprofeta Hagai na Zakariya va pfune Vayuda ku hlula ku txhava, kutani va ya mahlweni ni ku yaka tempele dzra Yehovha. Kambe swi nga yanga kwini tihosi ta Persiya ti sungule ku va vangela swikazratu. A valala va te: ‘N’wi pfumeleliwe hi mani ku yaka yindlu leyi?’—Ezr 5:1-3.

Nhlamulo ya xivutiso lexo a yi li ya lisima swinene, hikusa loko vakulu a vo khomiwa hi ku txhava a va ta yima ku pfuxeta tempele. Loko vakulu lavo a vo lwisana ni wuhosi a ntizro wavu a wu ta yimisiwa. Xileswo, a vakulu (handle ka ku ganaganeka a va zrangeliwa hi Zerubabele na muprista lwenkulu Yehoxuwa) va nyikele nhlamulo ya wutlhazri ni leyi pfunaka. Va dzrimuxe wuhosi mayelanu ni nawu lowu humexiwiki ha Korexe lowu a wu nyika Vayuda mpfumelelo wa ku pfuxeta a tempele. Hi ku dzrimuka leswaku a ku na mhunu ni mun’we lweyi a a fanela ku lwisana ni nawu lowu humexiwiki hi Vapersiya, tihosi toleto ti va tsrhike va ya mahlweni ni ku yaka hikuva a ti nga djuli ku lwisana ni nawu lowo. Kutani va tame va djuletela swivangelo swa ku va tsrhikisa ku yaka. Nambitasu, Vayuda a va tsrhikanga ku yaka ku tlhasela loko Hosi Dariyosi a nyikele mpfumelelo wa leswaku a va fanela ku tama va yaka!—Ezr 5:11-17; 6:6-12.

Xihondzro Xa Ku Zrindzra 03/2022 p. 15 § 7

Xana Wa Swi Vona Leswi Zekariya A Swi Voniki?

7 Kambe ku ve ni ku txintxa loku nyonxisiki Vayuda. Hi kwini ku txintxa koloko? Hi 520 M.N.Y., Hosi leyimpshwa, Dariyosi wa ku sungula, yi sungule ku fuma Persiya. Hi lembe dzra wubidzri dzra ku fuma kwake, a gungule leswaku a milawu leyi a yi tsrimbisa ku yaka a yi nga seketeliwanga mbangu. Xileswo, a pfumelele ku va ntizro wu ya mahlweni. (Ezr 6:1-3) Xiboho lexo xi hlamalise vhanu vanyingi kambe a ka ha ni swimbeni. A hosi yi tivise leswaku vayakelani va yima ku hingeleta a ntizro wa ku yaka. Handle ka leswo, a va fanela ku humexa mali ni mintxhumu leyi a yi vileleka akuva a ntizro wu ya mahlweni. (Ezr 6:7-12) Xileswo, Vayuda va hete ku yaka tempele hi 515 M.N.Y., hi mune wa malembe ntsena.—Ezr 6:15.

Xihondzro Xa Ku Zrindzra 03/2022 p. 19 § 16

Xana Wa Swi Vona Leswi Zekariya A Swi Voniki?

16 Yehovha a tlhela a hi kongomisa hi ku tizrisa “nandzra wa ku dumbeka ni ku tlhazriha”. (Mt 24:45) Swi nga yentxeka minkama yimbeni nandzra wa ku dumbeka a hi nyika minkongomiso leyi swi nga ha hi kazratelaka ku yi twisisa. Hi xikombiso, va nga ha ku nyika nkongomiso lowu kongomiki akuva u tilulamisela mhangu ya ntumbuluku leyi u yanakanyaka leswaku swi nga ha kazrata kuva yi yentxeka lomu u tsrhamaka kone. Kumbe hi nga ha yanakanya leswaku swa kazrata ku landzra swileleto leswi hi swi kumaka mayelana ni ku tivhikela ka ntungu. Hi nga yentxa yini loko hi vona ingiki swa kazrata ku landzra nkongomiso lowu hi wu yamukeliki? Hi nga yanakanyisisa hi ndlela leyi Vayuda va pfunekiki ha yone hi ku yamukela nkongomiso wa Yexuwa na Zerubabele. Hi nga tlhela hi yanakanyisisa hi madzrungula mambeni ya le Bibeleni. Minkama yimbeni vhanu va Xikwembu Nkulukumba va yamukele minkongomiso leyi a yi tikomba yi nga li yinene kambe yi huluxiki wutomi byavu.—Abaṭ 7:7; 8:10.

Tindzralama Ta Moya

Sentinela 15/06/1993 p. 32 §§ 3-5

Xana U Nga Dzri Dumba Bibele?

Mali leyo yi hambiwe a Tarso, a nyingitimu wa lomu swoswi ku tiviwaka swanga Túrquia. Mali leyo yi hambiwe a ku fumeni ka va Pérsia, a ku fumeni ka Mazayewu hi lembe dzra wu 4 M.N.Y. A tiviwa swanga mufumi wa ‘ha lahaya ka nambu’ kumbe ‘wa tlhelo ledzrin’wana dzra nambu wa Efrata.

Kambe ha yini xiga lexi xi li xa lisima? I xa lisima hikusa xiga lexi xa kumeka ni ka Bibele. A buku dzra Ezra 5:6–6:13 dzri kombisa ku bulisana loku viki kone a makazri ka Hosi Dariyosi wa mu Pérsia ni mufumi lweyi a vitaniwaka Tatenayi. Mhaka ya kone a yi khumba ntizro wa ku pfuxeta tempele lowu a wu yentxiwa hi Vayuda. Ezra a a li mukopiyari wa Zritu dzra Xikwembu Nkulukumba nakone leswi a swi tsraliki i ntiyiso. U ta xiya leswaku ka Ezra 5:6 na 6:13 a vitane Tatinayi swanga ‘hosana wa tiko dzra tlhelo dzra ha lahaya ka nambu’.

Mali leyi yi hambiwe kolomu ka 100 wa malembe na Ezra a tsrale mazritu lawo, hikusa Ezra a tsrale mazritu lawo hi 460 M.N.Y. na mali leyi yi nga si yentxiwa. Van’wana va nga ha yanakanya leswaku wutsrhokotsrhoko mayelanu ni nandzra wa kukazri wa khale a hi bya lisima ngopfu. Xana loko hi dumba vatsrali va Bibele ka timhaka letitsrongo va ti tsraliki hi wutsrhokotsrhoko, a hi fanelanga hi va dumba ni ka timhaka letikulu va ti tsraliki?

10-16 KA JULHU

WUKOSI BYI NGA BIBELENI

“Ndlela Leyi Ezra A Tikhomiki Ha Yone Yi Yise Lidzrumu Ka Yehovha”

Sentinela 01/10/2000 p. 14 § 8

Txutxela ku zrandzra Zritu dzra Xikwembu Nkulukumba

8 Kutani lizrandzru hi Zritu dzra Xikwembu Nkulukumba dzri fanela ku sukela a mbilwini na dzri susumetiwa hi ku navela lokunene. Hi fanela ku tinyika nkama wa ku yanakanyisisa hi tindzrima leti ha ha ka ku ti dondzra. Hi fanela ku kelisisa hi mintxhumu ya moya ni ku tlhela hi yanakanyisisa ha yone. Leswo swi djula hi yanakanyisa hi ndlela ya ku zrula ni ku tlhela hi khongota. Ku fana na Ezra, ku sungula hi fanela ku lulamisela mbilu yezru akuva hi kota ku dondzra ni ku yanakanyisisa hi Zritu dzra Xikwembu Nkulukumba. Ku tsraliwe leswi mayelanu na Ezra: ‘Hikuva Ezra afa a tiyise mbilu yakwe ku djula nawu wa Yehovha, ni ku wu yentxa, ni ku dondzrisa swiyimiso ni swiyavukanyiso a Israyeleni.’ (Ezr 7:10) Xiya swivangelu swizrazru leswi yentxeiki Ezra a lulamisela mbilu yake: Akuva a dondzra, akuva a tizrisa leswi a swi dondzriki ni kuva a dondzrisa van’wana. Hi fanela ku yetisela xikombiso lexi xa Ezra.

Toda a Escritura p. 75 § 5

Buku dzra Bibele dzra Atinhlayo 13—1 Makronika

5 A ku na mhunu mumbeni lweyi a a ta tsrala dzrungula ledzri hi ndlela leyi nga yone ku fana na Ezra. ‘Hikuva Ezra afa a tiyise mbilu yakwe ku djula nawu wa Yehovha, ni ku wu yentxa, ni ku dondzrisa swiyimiso ni swiyavukanyiso a Israyeleni.’ (Ezr 7:​10) Yehovha a mu pfunile hi ku tizrisa moya wa ku xwenga. A mufumi wa misava hinkwayu wa mu Pérsia, hosi Artarxexes, a byi xiyile wutlhazri bya Xikwembu Nkulukumba ka Ezra, lakakuva a mu nyika wutiyanguleli byinyingi a mfun’wini wa Yuda. (Ezr 7:​12-​26) Leswi a a zrwexiwe wutiyanguleli lebyi pfaka ka Xikwembu Nkulukumba kun’we ne mfun’wini wa Pérsia, Ezra swi mu nabyalelile ku tsrala dzrungula dzrake hi ku tizrisa mabuku ya lisima lawa a ma kumeka hi nkama wolowo.

Perspicaz vol-1 p. 1179 § 6

Ku Titsrongahata

Ku hi nyika minkongomiso leyinene. Lweyi a titsrongahataka a nga yimela ku yamukela nkongomiso wa Xikwembu Nkulukumba. Ezra a a ni wutiyanguleli byikulu bya ku kongomisa 1.500 wa vavanuna ku suka a Babilona va ya a Yerusalema, ku nga hlayiwi vaprista, Vanethinim kun’we ni vana. Handle ka leswo, a va teke mpimu wunyingi wa woru ni prata akuva va swi tizrisela ku xongisa tempele Yerusalema. Loko va li kazri va yendzra a va ta vilela nsizrelelo kambe Ezra a a nga djuli leswaku hosi ya mu Pérsia yi va nyika masotxha akuva yi va sizrelela. Hikuva a a nga djuli leswaku vhanu va yanakanya leswaku va tiseketele ka voko dzra nyama akuva va sizreleleka. Handle ka leswo, a a byele hosi a ku: ‘A voko dzra Xikwembu Nkulukumba wezru dzri pfuna hinkwavu va mu djulaka.’ Hi ndlela leyo a va fanela ku titsrona swakuda, va titsrongahata ka Yehovha. Va hambe xikombelo ka Xikwembu Nkulukumba a va yingela a tlhela a va sizrelela ka makhombo lawa a va ta kumana na wone a ndleleni lakakuva va tlhase na va sizrelelekile. (Ezr 8:1-14, 21-32) Na a li Babilona, muprofeta Daniel a tlakuliwile hi Xikwembu Nkulukumba hi ku va a mu zrumele ntsrumi ka xivono swanga hi leswi Daniyele a titsrongahatiki ka Xikwembu Nkulukumba hi ku djula ku kongomisiwa ni ku twisisa.—Dn 10:12.

Tindzralama Ta Moya

Sentinela 15/01/2006 p. 19 § 10

Nkatsrakanyu Wa Buku Dzra Ezra

7:28–8:20—Ha yini Vayuda vanyingi a Babilona va yale ku tlhelela a Yerusalema na Ezra? Nambi leswi a ku hele 60 wa malembe na ntlawa wa ku sungula wa Vayuda wu tlhelele tikweni dzravu, a Yerusalema a ku ni vhanu vatsrongo. Ku tlhelela a Yerusalema a swi tlhamuxela kuva va sungula wutomi lebyimpshwa ni ku lavisana ni swiyimu leswi txhavisaka. A nkameni lowuyani a tiko dzra Yerusalema a dzri nge na ntxhumu lowu a wu ta yentxa leswaku Vayuda lava a va ni mali a Babilona va djula ku tlhelela a Yerusalema. Mfuzri a liyendzro dzra ku suka Babilona u ya a Yerusalema a dzri ni khombo. Lava tlheliki a va fanela ku va ni lipfumelo ledzri tiyiki ka Yehovha, va hisekela wugandzreli bya ntiyiso va tlhela va va ni xixixi akuva va yentxa ku txintxa. Nambi Ezra a kume ntamu hi leswi voko dzra Yehovha a dzri li henhla kwake. Hi ku pfuniwa ha Yehovha, 1.500 wa mindangu, kolomu ka 6.000 wa vhanu, va pfumelile ku famba naye. Ntsrhaku ka loko Ezra a teke swiboho swin’wana, 38 wa Valevhi ni 220 wa Vanethinim na vone va mu seketelile.

17-23 KA JULHU

WUKOSI BYI NGA BIBELENI | EZRA 9-10

“Mabindzru Lama Tisiwaka Hi Ku Kala Ku Yingiseta”

Sentinela 15/01/2006 p. 20 § 1

Nkatsrakanyu Wa Buku Dzra Ezra

9:1, 2—Ha yini ku txhata ni vhanu va matiko a swi ta vanga khombo? Tiko ledzri pfuxetiwiki a dzri fanela ku pfuxeta wugandzreli bya ntiyiso ku ko Mesiya a tlhasa. Ku txhata ni vamatiko a swi ta vanga khombo ledzrikulu ka wugandzreli bya ntiyiso swanga hi leswi van’we a va txhate ni vhanu lava gandzrelaka swifaniso, hi ku famba ka nkama tiko hinkwadzru a dzri ta tipatsra ni vhanu lava gandzrelaka swikwembu swa madzrimi. Wugandzreli bya ku xwenga hi ku famba ka nkama a byi ta nyamalala a misaveni. Kutani xana Mesiya a a ta buyela mani? A swi hlamalisi leswi Ezra a hlamaliki hi ku vona leswi yentxekiki!

Sentinela 01/10/2009 p. 10 § 6

Xana Yehovha A Hi Kombela Yini?

Ku yingiseta na swi sukela a mbilwini swi ta hi tisela matovoko. Moxe a tsrale leswi: ‘Bekisa swileleto swa Yehovha . . . leswi ndzri ku leletaka swone namunhla, akuva swi ta ku xongela.’ (Ndzrimana 13) Ina, hinkwaswu swileleto swa Yehovha, hinkwaswu a hi kombelaka swone swi pfuna hine. Leswi a swi hi hlamalise hikusa Bibele dzri li ‘Xikwembu Nkulukumba i lizrandzru’. (1Yh 4:8) Hi ndlela leyo, a hi nyika milawu leyi taka hi pfuna hi lani ku nga helikiki. (Eza 48:17) Ku yentxa hinkwaswu leswi Yehovha a hi kombelaka swi ta hi pfuna ku fambela kule ni swikazratu swoswi ni kuva hi kuma matovoko lama nga helikiki a hansi ka mfumu wake.

Tindzralama Ta Moya

Sentinela 15/01/2006 p. 20 § 2

Nkatsrakanyu Wa Buku Dzra Ezra

10:3, 44—Ha yini vavasati kun’we ni vana va hlongoliwile? Loko vana a ve sala a swi ta nabyala kuva vavasati lava hlongoliwiki va tlhela hi mhaka ya vanavu. Handle ka leswo, hi ntolovelo va vilela ku hlayisiwa hi mamana wavu.

24-30 KA JULHU

WUKOSI BYI NGA BIBELENI | NEHEMIYA 1-2

“Ni Tekele Ku Khongota”

Sentinela 15/02/2008 p. 3 § 5

Beka Yehovha Mahlweni Kwaku Minkama Hinkwayu

5 Minkama yimbeni swi nga ha djula leswaku hi khongota ka Xikwembu Nkulukumba swa kola ni kola na hi kombela mpfunu. Khambi dzrimbeni, hosi ya mu Persiya, Artaxerxe a xiye leswaku a mutxheli wake wa vhinyu, Nehemiya, a a nga nyonxanga. Kutani hosi yi mu vutise yi ku: ‘U kombela yini xana?’ Hi ku kahlula, Nehemiya a khongote ka Xikwembu Nkulukumba wa matilo. A a fanela ku hamba xikhongoto xa ku kahlula he mbilwini. Kambe Xikwembu Nkulukumba a xi hlamulile xikhongoto xa Nehemiya hikusa hosi yi mu seketelile akuva a pfuxeta lihlampfu dzra Yerusalema. (Dondzra Nehemiya 2:1-8.) Nakunene nambi xikhongoto xa ku goma xa le mbilwini xi nga pfuna swinene.

be 177 p. 4

Ku Beka Wukaneli Hi Ndlela Ya Ntumbuluku

I yini leswi nga ku pfunaka kuva u hlamula hi ndlela leyinene loko vo txhuka va ku kombela akuva u tlhamuxela leswi u swi kholwaka swa kola ni kola? Yetisela xikombiso xa Nehemiya, lweyi a khongotiki he mbilwini na a nga si hlamula xivutiso xa hosi Artaxerxe. (Neh 2:4) Ntsrhaku, yanakanyisisa hi mazritu lawa u taka ma hlaya. Tinhla leyi landzrelaka ti nga ku pfuna: 1) Hlawula yinhla yin’we kumbe tibidzri leti u taka ti tlhamuxela (u nga tizrisa tinhla leti nga ka buku ledzri liki Ku Hlamulana Hi Matsalwa). 2) Hlawula tindzrimana leti u taka ti tizrisa akuva u seketela tinhla leto. 3) Yanakanya hi ndlela leyi u taka sungula ha yone mabulu akuva muyingiseti a tama a djula ku ku twa. Ntsrhaku ka leswo, sungula ku vulavula.

Tindzralama Ta Moya

Sentinela 15/02/1986 p. 25

Ku Tlakuxiwa Ka Wugandzreli Bya Ntiyiso

Ni kutsrongo, hikusa Nehemiya a a buya na khongota hi khale hi xiyimu xa ku hohlotiwa ka Yerusalema ‘a hlikanhi ni wusiku’. (1:4, 6) Loko Nehemiya a pfulekeliwe hi mukhandlu wa ku hlaya ku navela kwake ka ku pfuxeta lihlampfu dzra Yerusalema a mahlweni ka hosi Artaxerxe, a tlhele a khongota a phindha leswi a a li kazri a buya na a swi hlaya ka swikhongoto swake hi masiku. Nehemiya a a ni xihena xa ku khongota nkama ni nkama mayelanu ni xiyimu xa Yerusalema. Xileswo, loko a pfulekiliwe hi mukhandlu wa ku vulavula na hosi Artaxerxe mayelanu ni mavonela yake ya ku pfuxeta lihlampfu dzra Yerusalema, a khongotile. Yehovha a yingisete xikhongoto lexi hi ku yentxa leswaku a lihlampfu dzra doropa dzri tlhela dzri pfuxetiwa.

Leswi hi swi dondzraka: Nehemiya a djule nkongomiso wa Yehovha. Kutani na hine loko hi djula ku teka swiboho leswikulu hi fanela ku va lava ‘phikelelaka a ku khongoteni’. Ni ku tlhela hi fambisana ni nkongomiso wa Yehovha.—Ro 12:12.

31 KA JULHU–6 KA AGOXTO

WUKOSI BYI NGA BIBELENI | NEHEMIYA 3-4

Xana U Ti Vona Na U Li Wa Lisima Lakakuva A U Nge Yi Yentxi Mintizro Leyi Laviseliwaka Hansi?”

Sentinela 01/02/2006 p. 10 § 1

Nkatsrakanyu wa Buku dzra Nehemiya

3:5, 27. A hi fanelanga hi titwa na hi xixiwa loko hi yetxa mintizro ya mavoko, leyi yentxiwaka a ndzreni ka wugandzreli bya ntiyiso Hi lani “vakulu” va Tekowa a va tivona ha kone. Kambe hi fanela ku yetisela xikombiso xa Vatekowa lava tolovelekiki lava tizriki hi ku swi zrandzra.

Xihondzro Xa Ku Zrindzra 10/2019 p. 23 § 11

Xana Yehovha A Ta Ku Yentxa U Va Yini?

11 Ntsrhaku ka loko ku khalute madzana ya malembe, vana va xisati va Xalum va ve van’we va lava Yehovha a nga va tizrisa leswaku va pfunisa ku pfuxeta lihlampfu dzra Yerusalema. (Neh 2:20; 3:12) Nambi leswi tatana wavu a a li hosana, vana va Xalum a va tibekisele ku yentxa ntizro lowo wa ku bindzra swinene. (Neh 4:15-18) A va hambane ngopfu ni vakulu va le Tekowa, lava va yaliki ku pfunisa a ntizrweni lowo. (Neh 3:⁠5) Vona ku nyonxa loku vana va xisati va Xalum va viki na kone loko ntizro wu hetiwile hi 52 wa masiku ntsena! (Neh 6:​15) Namunhla, vamakwezru va xisati lava nga ni mbilu ya ku swi zrandzra va nyonxa hi ku yentxa muxaka wa ntizro wa ku hlawuleka wa wutizreli bya ku xwenga—ku nga ku yakiwa ni ku lunghisiwa ka miyaku leyi nyikeliwiki ka Yehovha. Nkhinkhi yavu, wuswikoti ni wudumbeki byavu i swa lisima leswaku ntizro lowu wu yentxiwa ha hombe.

Sentinela 01/08/2004 p. 18 § 16

Ndlela Ya Ku Txutxela Langusela Ledzri Kriste A A Li Na Dzrone Mayelanu Ni Ku Va Lwenkulu

16 Vakriste hinkwavu, lavakulu ni lavatsrongo, va fanela ku txutxela langusela ledzri Kriste a a li na dzrone mayelanu ni ku va lwenkulu. A bandleni ku ni mintizro ya ku siyanasiyana leyi yentxiwaka. Xileswo, u nga txhuki u titwa na wu dzreliwile loko u txhuka u kombeliwa ku yentxa mintizro leyi voniwaka na yi li ya le hansi. (1Sa 25:41; 2Th 3:11) Vapswali, xana ma va kutxa vanenu lava ha liki vatsrongo ni lavampshwa akuva va yamukela xiyavelo xin’wana ni xin’wana lexi va nga ha nyikiwaka xone a bandleni, a mbangwini wa tinhlengeletanu kumbe a mbangwini wa makongreso? Xana va ku vona na wu yentxa mintizro leyi voniwaka na yi li ya xiyimu xa le hansi? Makwezru mun’wana lweyi swoswi a tizrelaka ntsindzra wa misava hinkwayu wa Timboni ya Yehovha, loko a dzrimuka xikombiso lexinene lexi vapswele vake va yu bekeliki xone a li: “Ndlela leyi a va yi vona ha yone mintizro ya ku basisa a yindlu ya wugandzreli ni mbangu wa tinhlengeletanu yi ni yentxe ni twisisa leswaku i swa lisima ku yentxa mintizro leyo. Minkama hinkwayu a va tinyikela akuva va yentxa mintizro leyi a yi ta pfuna bandla kumbe vamakwezru hinkwavu swi nge na mhaka ndlela leyi mintizro leyo a yi voniwa ha yone. Leswo swi ni pfuna ku yamukela xiyavelo xin’wana ni xin’wana lexi ni nyikiwaka xone lani Betele.”

Tindzralama Ta Moya

Sentinela 01/02/2006 p. 9 § 1

Nkatsrakanyu Wa Buku Dzra Nehemiya

4:17, 18—Xana mhunu a nga wu yentxisa kuyini ntizro wa ku yaka hi voko dzrin’we? Ka lava zrwalaka mintsrhwalu lexo a ku nge xikazratu. Hikusa loko va zrwale ntsrhalu kumbe va yentxe hi ku pakatsra a va ta kota ku wu khoma hi voko dzrin’wana kutani ‘hi dzrin’wana va tamela matlhazri’. ‘Mun’wana ni mun’wana wa vayaki afa a tsrimbe lipanga lakwe a nyongeni, a yaka swoswo.’ A va lulamile leswaku loko va txhuka va hlaseliwa va tilwela.

7-13 KA AGOXTO

WUKOSI BYI NGA BIBELENI | NEHEMIYA 5-7

“Nehemiya A A Djula Ku Tizrela Van’wana, Ku Nga Li Ku Tizreliwa”

Sentinela 01/11/2002 p. 27 § 3

Vaseketeli Va Wugandzreli Bya Ntiyiso Va Le Minkameni Leyi Khalutiki Ni Va Le Masikwini Yezru

Nehemiya a nga nyikelanga hi nkama ni wuswikoti byake ntsena, kambe a tlhele a tizrisa mintxhumu leyi a a li na yone akuva a seketela wugandzreli bya ntiyiso. A tizrise mali yake akuva a huluxa vamakwavu, ku nga vayuda kuloni a wukazraweni. Loko a volekisa mali a a nga yimeli kuva va tlhelisa na yi pswalanile. A nga zanga a ‘bindzrisela’ Vayuda hi ku djula leswaku va mu hakela hi kola ka leswi a a li muzrangeli. Nambi leswi a a ni mfanelo ya ku yentxa leswo. A matsrhan’wini ya leswo, a pfule swipfalu swa kaya kwake akuva a phamela ‘vavanuna va dzana na ntlhanu wa makume a hlenhla ka lava tiki ku hine va huma ku vamatiko lava hi tsrandzreliki makazri.’ ‘Leswi faka swi bekisiwa siku dzrin’wana ni dzrin’wana i hamba yin’we ni tihomu ta ntlhanu na yin’we leti hlawuliwiki ni tihuku.’ Hinkwaswu leswi a a swi yentxela vayeni vake. Handle ka leswo, a a va nyika ‘ni vuvhinya lebya ku tala bya tinxakaxaka’. Leswi hinkwaswu a a swi yentxa hi 10 ni 10 wa masiku nakone hi yene a a xava hinkwaswu.—Neh 5:8, 10, 14-18.

Sentinela 09/2016 p. 6 § 16

“A Mavoko Yaku Ma Nga Kazrali”

16 Hi ku pfuniwa ha Yehovha, a mavoko ya Nehemiya kun’we ni ya lava a a tizra na vone ma tiyisiwile akuva va yentxa ntizro wa ku pfuxeta lihlampfu dzra Yerusalema. Kutani va kote ku heta ntizro lowo hi 52 wa masiku ntsena! (Neh 2:18; 6:15, 16) Nehemiya a a ngo va mulanguseli wa ntizro ntsena, kambe na yene a tizre hi nkhinkhi a ku pfuxeteni. (Neh 5:16) Hi ndlela leyi fanaka, vakulu vanyingi namunhla va yetisela xikombiso xa Nehemiya hi ku pfunisa a ku basiseni ka yindlu ya wugandzreli. Loko vakulu va tizra ni vazrezri a nsin’wini ni ku yentxa a mayendzro ya wubyisi va va na va nyika ntamu a mavoko lama kazraliki ni ku tiyisa lava txhukisiwiki.—Dondzra Ezaya 35:3, 4.

Sentinela 01/02/2000 p. 32

Xana Yehovha A Ta Ku Dzrimuka Ha Yini?

Makhambi manyingi loko Bibele dzri hlaya leswaku Xikwembu Nkulukumba a ‘yanakanya’ dzri hlaya leswaku a yentxe xa kukazri. Hi xikombiso, ntsrhaku ka ndhambhi leyi tekiki 150 wa masiku ‘kutani Xikwembu Nkulukumba a ku dzrimuka Nowa . . . Xikwembu Nkulukumba a ku hungisa mheho misaveni, a mati ma tlhela.’ (Gn 8:1) Ntsrhaku ka malembe loko Samsoni a dlayiwe matihlo ni ku tsrimbiwa hi Vafilista a khongote a ku: ‘Hosi [Yehovha] ni dzrimuke na ku khongota, ni hanani ntamu swoswi, kan’we ntsem.’ Yehovha a dzrimuke Samsoni hi ku mu nyika ntamu lowu tlulaka lowu tolovelekiki akuva a tidzrihisela ka valala va Xikwembu Nkulukumba. (Abaṭ 16:28-30) Ka xiyimu xa Nehemiya, Yehovha a tovokise ku tikazrata kwake, xileswo a wugandzreli bya ntiyiso byi tlhele byi pfuxetiwa a Yerusalema.

Tindzralama Ta Moya

Sentinela 01/07/2007 p. 30 § 15

“Tama U Hlula Swa Ku Biha Hi Leswinene”

15 Xa wuzrazru, a valala va tizrise muwongi ku nga Muisrayele lweyi a vitaniwaka Xemaya akuva va yentxa Nehemiya a tlula Nawu wa Xikwembu Nkulukumba. Xemaya a byele Nehemiya a ku: ‘A hi hlengeletaneni a ndlwini ya Xikwembu Nkulukumba, a ndzreni ka tempele, hi pfala swipfalu swa tempele, hikusa va ta ta ku ku dlaya.’ Xemaya a byele Nehemiya leswaku va kusuhi ni ku mu dlaya, xileswo akuva a huluka a a fanela ku ya tempeleni. Kambe Nehemiya a a nga li muprista, xileswo loko a a yo tumbela ndzreni ka tempele dzra Xilkwembu Nkulukumba a a ta va a yentxa xidoho. Xana a a ta tlula nawu wa Xikwembu Nkulukumba akuva a huluxa wutomi byake? Nehemiya a te: ‘Xana mhunu lweyi wa nga ha mine a nga tsrutsruma xana? A kwini mhunu lweyi a fanaka na mine lweyi a nga nhingenaka a tempeleni a hanya? A ndzri na ku nhingena kone.’ I yini lexi pfuniki Nehemiya akuva a nga weli ka ntlhamu lowu? Hikusa a swi tiva leswaku nambi leswi Xemaya a a li Muisrayele a a nga ‘zrumanga ha Xikwembu Nkulukumba’. Hikusa a muprofeta wa ntiyiso a a nga ti mu kutxa ku tlula nawu wa Xikwembu Nkulukumba. Ni ka xiyimu lexi, Nehemiya a nga zanga a pfumela ku hluliwa hi valala. Ntsrhakunyana ka leswo a hlaye leswi: ‘A lihlampfu loni li hela hi siku dzra masiku mabidzri na ntlhanu dzra hweti ya Elul na dzri tizriwe hi siku dzra ntlhanu wa makume na masiku mabidzri.’—Neh 6:10-15; Tin 1:51; 18:7.7

14-20 KA AGOXTO

WUKOSI BYI NGA BIBELENI | NEHEMIYA 8-9

‘Ku Titsrhavela Ka Yehovha [I] Ntamu Wenu’

Sentinela 15/10/2013 p. 21 § 2

“Leswi Hi Nga Swi Dondzraka Ka Xikhongoto Lexi Lulamiseliwiki Ha Hombe”

2 Na ka ha sale hweti akuva ku yentxeka ntlhanganu lowu kutani hi vulavuliki ha wone, a Vayuda a va hetili ku pfuxeta lihlampfu dzra Yerusalema. (Neh. 6:​15) Ntizro lowo wu teke 52 wa masiku ntsena. Ntsrhaku ka leswo, a swi ta koteka leswaku vhanu va Xikwembu Nkulukumba va hisekela swivileleko swavu swa moya. Kutani hi siku dzra ku sungula dzra hweti leyi landzreliki, Tishri, va tlhanganile a mbangwini lowu pfulekiki akuva va yingiseta Ezra kun’we ni Valevhi van’wana loko va dondzra ni ku tlhamuxela Zritu dzra Xikwembu Nkulukumba. (Xifaniso 1) Mindangu hinkwayu, ku patsra ni ‘lava nga ni ku yingelisisa’ a va yime va yingiseta ‘ku sukela mixweni ku ko ku tlhasa nhlikhanhini’. Handle ka ku ganaganeka, lexi i xikombiso lexinene xa ku xi yetisela ka hinkwavu lava va tlhanganaka a tindlwini ta wugandzreli leti tsrhamisekiki. Ka swiyimu leswi, xana hi pfumelela leswaku miyanakanyu yezru yi yingayinga yi va hi sungula ku yanakanya mintxhumu leyi kalaka yi nga li ya lisima ngopfu? Loko swi li hi ndlela leyo yanakanya hi xikombiso xa vaisrayele. Vone a ve yingiseta ntsena kambe va tlhele va khumbeka hi leswi swi hlayiwiki ka ntlhanganu wolowo lakakuva va sungula ku dzrila hi kola ka leswi va kalaka va nga wu yingisetanga nawu wa Xikwembu Nkulukumba swanga tiko dzrake.—Neh 8:1-9.

Sentinela 15/07/2007 p. 22 §§ 9-10

Xana U Ta ‘Tama U Kongomisiwa Hi Moya’?

9 Ku nyonxa i matitwela ya le ndzreni lama ku yentxaka u titwa ha hombe. Yehovha i “Xikwembu Nkulukumba lwa nyonxiki”.(1Tm 1:11, TNM; Ps 104:31) A n’wana awa nyonxa hi ku yentxa ku zrandzra ka papayi wake. (Ps 40:8; Hb 10:7-9) Nakone ‘ku titsrhavela ka Yehovha i ntamu [wezru]’.—Neh 8:10.

10 Nambi loko hi li ka swikazratu leswikulu kumbe hi xanisiwa ku nyonxa loku pfaka ku Xikwembu Nkulukumba ku hi yentxa hi tsrhama na hi yanelisekile nkama lowu hi yentxaka ku zrandzra kwake. A wutivi bya ‘Xikwembu Nkulukumba’ byi hi tisela ku nyonxa ka ntiyiso! (Pr 2:1-5) Wuxaka lebyi nyonxisaka lebyi hi nga na byone na Xikwembu Nkulukumba byi tiseketele ka wutivi lebyi kongomiki ni ka ku ko­mbisa lipfumelo kwake ni ka xitizrulo xa Yesu. (1Yh 2:1, 2) Ntxhumu wun’wana lowu wu hi yentxaka hi nyonxa i ku hamba xiyenge xa nhlengeletanu ya vamakwezru lava kumekaka a misaveni hinkwayu. (Tsf 3:9; Hg 2:7) Dumbo dzrezru mayelanu ni mfumu ni ndjombo leyikulu leyi hi nga na yone ya ku zrezra madzrungula lamanene, swi hi yentxa hi va ni ku nyonxa. (Mt 6:9, 10; 24:14) Ku yentxeka leswi fanaka hi dumbo dzra ku hanya hi lani ku nga helikiki. (Yh 17:3) Leswi dumbo dzrezru dzri nga dzrikulu, hi fanela ku va lava nyonxiki.—Dt 16:15.

Tindzralama Ta Moya

Perspicaz vol-1 p. 145 § 2

Xiaramayika

Ntsrhaku ka malembe na Vayuda va tlhelelile hi wukazraweni a Babilona, Ezra lweyi a a li muprista a dondzrele Vayuda lava a va hlengeletani a Yerusalema a buku dzra Nawu, kutani a Valevhi va dzri tlhamuxela. Nehemiya 8:8 yi li: ‘Afa va dondzra swinene a bukwini, a nawini wa Xikwembu Nkulukumba, va dzri tlhamuxela lakakuva tiko dzri yingelisisa leswi hlayiwaka.’ Swi nga yentxeka mintlhamuxelo leyi a yi patsra kuva ku ndzruluteliwa Xiheberu xi ya ka Xiaramayika swanga hi leswi Vaheberu a va vulavula Xiaramayika nkama na va li Babilona. Handle ka ku ganaganeka, ka ntlhanganu lowu a ku nyikeliwa ni mintlhamuxelo leyi yentiki akuva nambi Vayuda lava a va vulavula Xiheberu va kota ku wu twisisa hi ndlela leyi yentiki mongo wa leswi a swi dondzriwa.

21-27 KA AGOXTO

WUKOSI BYI NGA BIBELENI | NEHEMIYA 10-​11

“Va Tikazratele Ku Nyonxisa Yehovha”

Sentinela 15/10/1998 p. 22 § 13

Yerusalema—Ntiyiso Lowu Fambisanaka Ni Vito Dzrake

13 ’Xipfumelelanu’ lexi yentxiwiki a nkameni wa Nehemiya xi yentxe leswaku vhanu va Xikwembu Nkulukumba va tilulamisela siku dzra ku khanguliwa ka lihlampfu dzra Yerusalema. Kambe a ka ha ni xivileleko xikulu lexi a xi djula ku lulamisiwa hi xihatla. Swanga hi leswi a muti wa Yerusalema a wu zrendzreliwe hi lihlampfu ledzrikulu ledzri a dzri ni 12 wa tinyangwa a ku vileleka vayaki lava yengetelekiki. Nambi leswi Vaisrayele van’wana a va sungule ku tsrhama ‘a muti afa wu yanamile, na wu kulile, kambe vhanu va wone afa va nga talanga’. (Neh 7:4) Leswaku ku lulamisiwa xikazratu lexi, Vaisrayele va hlahluve hi mpswampswa akuva, ‘makazri ka lava khume, mun’we a ta tisiwa a yaka Yerusalema, a mutini lowa ku xwenga’. Kutani hi kuva ku seketeliwe a lulamiselo ledzro ‘a tiko dzri khense vhanu lava tinyiketiki hi ku swi zrandzra a ku yaka Yerusalema’. (Neh 11:1, 2) Lexi i xikombiso lexinene ka vagandzreli va ntiyiso namunhla lava swiyimu swavu swi va pfumelelaka ku zruzrela a mimbangwini lomu ku nga ni xivileleko lexikulu na va swi yentxa hi ku pfuniwa hi vakriste lava wupfiki!

Sentinela 15/02/1986 p. 26

A swi nga ta va nabyalela akuva va siya mintxhumu yavu va zruzrela a Yerusalema. Nakone swi nga yentxeka lava a va tsrhama ka doropa ledzriyani a swi ta nabyala kuva va hlaseliwa hi makhombo ya kukazri. Kutani hi kola ka swiyimu leswo hinkwaswu, van’wana va vone swi yampswa kuva va kulungela lava va tinyikeliki, ni ku tlhela va khongota ka Yehovha va kombela leswaku a va tovokisa.

Sentinela 04/2016 p. 8 § 15

Ku Dumbeka Ku Yentxa Leswaku Hi Yamukeleka Ka Xikwembu Nkulukumba

15 Loko hi tinyiketele ka Yehovha hi mu dumbise leswaku hi ta yentxa ku zrandzra kwake nambi ku ngo yentxeka yini na yini. A hi swi tiva leswaku minkama yin’wana a swi nga ta hi nabyalela ku hetisisa xidumbiso lexi hi xi yentxiki. Kambe hi yentxa yini loko hi kombeliwa ku yentxa ntxhumu wa kukazri lowu hi kalaka hi nga wu nyonxeli? Loko hi hlula ku txhava kwezru hi ku va hi yingiseta Xikwembu Nkulukumba wezru hi ku swi zrandzra, hi va na hi kombisa leswaku ha xi hetisisa xidumbiso xezru. Swi nga ha kazrata ku titsrona swa kukazri, kambe minkama hinkwayu, Yehovha awa hi tovokisa hi ndlela leyikulu ku tlula ku tikazrata loku hi ku yentxiki. (Mlk 3:10) Kambe ku nga hlayiwa yini hi n’wana wa Yefta? I yini leswi a swi yentxiki ntsrhaku ka loko papayi wake a mu byele hi xidumbiso lexi a xi yentxiki?

Tindzralama Ta Moya

Sentinela 01/02/2006 p. 11 § 1

Nkatsrakanyu Wa Buku Dzra Nehemiya

10:34—Ha yini vhanu a va fanela ku buyisa tihunyi? Nawu wa Moxe a wu nga leletanga hi ta ku buyisiwa ka tihunyi. Lulamiselo ledzri dzre bekiwa hi kola ka xivileleko lexi a xi li kone. A ku djuleka tihunyi tinyingi leswaku ti tizriseliwa ka ku hisa magandzrelo a altarini. Swi tikomba ingiki nhlayu ya Vanethinim lava a va nge Vaisrayele, lava a va tizra swanga swikazrawa a tempeleni, a yi li yitsrongo. Xileswo, ku hambiwe mpshwampshwa akuva tihunyi ti kota ku buyisiwa nkama ni nkama.

28 KA AGOXTO–3 KA SETEMBRU

WUKOSI BYI NGA BIBELENI | NEHEMIYA 12-13

“Dumbeka Ka Yehovha Loko U Hlawula Vanghanu”

Perspicaz vol-1 p. 114 § 2

Vaamoni

Ntsrhaku ka loko Tobiya a hlongoliwile a tempeleni, a nawu wa Xikwembu Nkulukumba lowu kumekaka ka Deuteronoma 23:3-6 lowu tsrimbisaka kuva Vaamoni ni Vamoambu va nghena a nhlengeletanwini ya yindlu ya Israyele, wu dondzriwile ni ku tlhela u landzriwa. (Neh 13:1-3) Nawu lowo wa ku tsrimbisa Vaamoni ni Vamoambu lowu bekiwiki 1.000 wa malembe ntsrhaku hi kola ka leswi va yaliki ku pfuna Vaisrayele loko va li kusuhi ni ku nghena ka tiko dzra xidumbiso, hakanyingi a nawu lowu wu twisisiwa na wu tlhamuxela leswaku a vhanu lava a va nga na mfanelo ya kuva va hamba xiyenge xa tiko dzra Israyele kumbe ndjombo ya ku hamba xin’wana ni xin’wana. Kambe a nawu lowu a wu hlayi swone swaku Vaamoni ni Vamoambu a va nga fanelanga ku tithlanganisa ni Vaisrayele, kumbe va tsrhama kun’we, hi ndlela leyo va kuma matovoko lama taka hi ka Xikwembu Nkulukumba. Nakone leswo swi voneka ha hombe ka xikombiso xa Zeleki lweyi a a li yin’we ya tinhenha ta Davhida, ni ka wudzrunguli bya Ruti lweyi wa Mumoambu.—Rt 1:4, 16-18.

Sentinela 15/08/2013 p. 4 §§ 5-6

Mi Xwengisiwile

5 Dondzra Nehemiya 13:4-9. Hi hanya a makazri ka vhanu lava nga ni nkutxetelo wa ku biha. Xileswo a swi nabyali ku tsrhama na hi xwengile. Yanakanya hi xikombiso xa Eliyaxibi na Tobiya. Eliyaxibe a a li muprista lwenkulu kasi Tobiya a a li Muamoni lweyi swi nga yentxekaka a a tizrela hosi ya le Pérsia na a li Yudeya. Tobiya kun’we ni vanghanu vake va dzringise ku tsrhikise Nehemiya ku pfuxeta lihlampfu dzra Yerusalema. (Neh 2:10) Vaamoni a va nga pfumeleliwi ku nghena a tempeleni. (Dt 23:3) Kutani ha yini a muprista lwenkulu a pfumelile ku nyika mhunu wa ku fana na Tobiya a mbangu lomu a ku diwa ka woni a tempeleni?

6 Tobiya a a li munghanu lwenkulu wa Eliyaxibi. Tobiya ni n’wanake Yehokanani a va teke vavasati lava nga Vayuda nakone Vayuda vanyingi a va vulavula ha hombe ha Tobiya. (Neh 6:17-19) Mun’we wa vatukulu va Eliyaxibe a a teke n’wana wa Senibalati, hosana ya le Samariya lweyi a a li mun’we wa vanghanu lavakulu va Tobiya. (Neh 13:28) Wuxaka lebyi byi swi kombisa ha hombe leswaku hi mhaka mhunu muprista lwenkulu Eliyaxibi a pfumelele ku kutxeteliwa hi mhunu lweyi a a li mukaneti wa ntizro lowu a wu yentxiwa hi vhanu va Xikwembu Nkulukumba. Kambe Nehemiya a kombise leswaku awa dumbeka ka Yehovha hi ku txukumetela handle mintxhumu hinkwayu leyi Tobiya a a yi petelile a mbangwini wa ku dela ka wone a tempeleni.

Sentinela 15/03/1996 p. 16 § 6

Kombisa Ku Dumbeka Loku Heleliki Loko U Lavisana Ni Mindzringo

6 Loko hi dumbeka ka Xikwembu Nkulukumba hi ta tingawula ku hamba xinghanu ni vhanu lava nga valala vake. Hi leswi yentxiki mudondzrisiwa Yakobe a tsrala leswi: “N’wine vavasati va vumbuye, a n’wi swi tivi xana leswaku a vunakulobye bya misava i vulala ku Xikwembu Nkulumba xana?” (Yk 4:4, TNM) Hi djula ku va ni ku dumbeka ka ku fana ni loku Davhida a ku kombisiki lakakuva a ku: ‘Yehovha, a ndzri va hambuli a vahambuli vaku xana? A ndzri va hlundzrukeli lava ku pfukelaka xana? Ndzri va hambula hi hambulu ledzra ku hetiseka; i valala ku mine.’ (Ps 139:21, 22) A hi swi djuli ku titlhanganisa ni vhanu lava dohaka hi maxivomu hikusa a hi na matsrhamela lama fanaka ni yavu. Xana a ku dumbeka kwezru ka Xikwembu Nkulukumba a ku fanelanga ku hi yentxa hi fambela kule ni vhanu lava nga valala va Xikwembu Nkulukumba ku nga ha va hi ku kongoma kumbe hi ku tizrisa matelevhizawu?

Tindzralama Ta Moya

Perspicaz vol-2 p. 452 § 9

Wuyimbeleli

A wuyimbeleli a byi li bya lisima a tempeleni. Leswo swi voneka ha hombe ka mareferensiya ya Bibele lama vulavulaka hi vayimbeleli. Vone a va ‘nge na tizro wun’wana’ akuva va kota ku tinyiketela hi ku helela ka ntizro wa wuyimbeleli. (1Mk 9:33) Leswaku i ntlawa wa Valevhi lowu hlawulekiki swi voneka hi leswi va tsraliwiki hi tlhelo ka lava tlheleliki a Babilona. (Ezr 2:​40, 41) Hi ku pfuniwa hi wuhosi bya hosi ya Mupérsia Artaxerxe, ntlawa lowu kun’we ni mintlawa yin’wana ya ku hlawuleka a yi nga ‘humexi nhlengo, kumbe mali ya lifanti, kumbe ya ku wela’. (Ezr 7:24) Ntsrhaku, a hosi yi hambe lulamiselo dzra leswaku ‘a hakelo ledzri hlayiwiki dzri nyikiwa vayimbeleli a siku dzrin’wana ni dzrin’wana’. Nambi leswi ku hlayiwaka leswaku Nawu lowu wu humexiwi hi Artaxerxe, swi nga yentxeka ku ve Ezra lweyi a kombeliki ka hosi Artaxerxe swanga hi leswi a a ni mpfumelelo wa ku yentxa leswo. (Neh 11:​23; Ezr 7:18-26) Lakakuva swa twisiseka hiku sa nambi leswi a vayimbeleli hinkwavu a va li Valevhi, a Bibele dzri va tlhamuxela swanga ntlawa wa ku hlawuleka hikusa dzri li ‘vayimbeleli’, ni ‘Valevhi’.—Neh 7:1; 13:10.

    Mabuku Ya Xizronga - (2003-2025)
    Huma
    Nghena
    • Xironga
    • Zrumela
    • Tihlawulele
    • Copyright © 2025 Watch Tower Bible and Tract Society of Pennsylvania
    • Milawu Ya Matizrisela
    • Nawu Wa Xihundla
    • Seta Swa Xihundla
    • JW.ORG
    • Nghena
    Zrumela