DONDZRO 15

Ku Vulavula Hi Ku Dumba

1 Thes. 1:5

NKATSRAKANYU: Kombisa leswaku wa kholwa hi ku helela leswaku leswi u swi hlayaka i ntiyiso nakone i swa lisima.

Lulamisela ha hombe. Dondzra mhaka ya kone u za u twisisa ndlela leyi ha yone mintlhamuxelo ya Matsralwa yi yentxaka swi twisiseka leswaku leswi hlayiwaka i ntiyiso. Dzringisa ku hlaya tinhla ta lisima ta wukaneli byaku hi mazritu matsrongo ni ya ku nabyala. Ngopfu-ngopfu kombisa leswaku mhaka yi va pfunisa kuyini vayingiseti. Kombela moya wa ku xwenga.

Titolovete wukaneli byaku hi zritu dzra ku tlakuka akuva u tolovelana swinene ni mhaka leyi u khanelaka ha yone ni ku yampswisa mabekela ya kone.
Tizrisa mazritu lama kombisaka ku dumba. A matsrhan’wini ya ku phindhetela mazritu wolawa ma nga ka mabuku kumbe ka xibosu, tizrisa mazritu ya ka kwaku. Hlawula mavulavulela lama kombisaka leswaku wa swi dumba leswi u swi hlayaka.
Khanela na swi pfela mbilwini. Khanela hi zritu ledzri twalaka. Lomu swi kalaka swi nga soliwi, khanela ni vayingiseti na mi langutana hi matihlo.

Kambe dzrimuka leswaku ku kombisa ku dumba a swi hlayi swone leswaku u khanela hi futa, kumbe u yentxa hi ku leleta kumbe ku gema. Nambi loko u khanela na swi pfela mbilwini, tsratsriya vayingiseti hi ndlela ya lizrandzru.