Xihondzro Xa Babele

Loko ku khalute Ndhambhi, a vana va Nowa va ve ni vana va vanyingi. Hi ku famba ka malembe, a mindangu yavu yi ya yi kula yi va sungula ku hangalaka a misaveni hi lani Yehovha a hlayiki ha kone.

Kambe a mindangu yimbeni a yi swi djulanga ku yingiseta leswi Yehovha a swi hlayiki, yi va yi ku: ‘A hi tsrhameni hinkwezru ka mbangu wun’we, hi ta tiyakela doropa ni xihondzro xa xikulu (predu dzra ku leha) lexi taka tlhasa matilweni. Hi ta va ni ndhuma ngopfu swinene!’

Nambitanu, Yehovha a a nga nyonxi hi leswi a swi yentxeka, kutani a va tsrhikisa ku yaka xihondzro xolexo. Wa swi tiva leswaku a swi yentxise kuyini? A yentxe leswaku va sungula ku khanela tindzrimi ta ku hambanahambana, kutani leswi a va nga ha twanani ha hombe loko va vulavula, va tsrhike ku yaka. Yanakanya mpfilumpfilu ya kone! Hi leswi yentxiki kuva doropa ledzriyani dzri tiviwa swanga Babele, leswi tlhamuxelaka leswaku “mpfilumpfilu”. Ntsrhaku ka leswo, vhanu va ye tsrhama ka mimbangu ya ku siyanasiyana, nambitanu va tame va yentxa mintxhumu ya ku biha. Xana a ka ha ni mhunu lweyi a a zrandzra Yehovha? Hi ta swi gungula ka dondzro leyi landzrelaka.