A ku ni doropa ledzri a dzri vitaniwa Ur, ledzri a dzri li kusuhi ni doropa dzra Babele. A vhanu va kone a va nga gandzreli Yehovha, a va gandzrela swikwembu swa madzrimi. Nambitanu a ku ni wanuna lweyi a a hambanile ni vhanu va le Ur, a vito dzrake a a li Abrahamu. Wanuna lweyi a o gandzrela Yehovha ntsena.

Yehovha a mu byela a ku: ‘Suka kaya kwaku, u tsrhika maxaka yaku u ya mbangwini lowu ni taka ku komba wone.’ Hi ku landzrela, Xikwembu Nkulukumba a dumbisa Abrahamu a ku: ‘A ndangu waku wu ta kula ngopfu swinene nakone hi mhaka yaku ni ta komba wunene vhanu va misava hinkwayu.’

Abrahamu a a nga ku tivi lomu Yehovha a a djula leswaku a ya kone, kambe leswi a a dumba Yehovha, yene ni nkatake Sara va longele mintxhumu yavu va va va sungula liyendzro dzravu dzra ku leha. Hiloko Abrahamu a yendzra ni papayi wake, Tera kun’we na Loti, n’wana wa makwavu.

Loko Abrahamu a ni 75 wa malembe, yene ni ndangu wake va tlhase a tikweni dzra Kanana, ku nga mbangu lowu Yehovha a a djula leswaku va ya ka wone. Kutani loko va tlhasile, Yehovha a mu dumbisa swin’wana a ku: ‘A mbangu hinkwawu lowu u wu vonaka ni ta nyika vanaku ni vatukulu vaku.’ Kambe Abrahamu na Sara a va duhwalile nakone a va nga na n’wana ni mun’we. Kutani a swi ta kotekisa kuyini kuva Yehovha a hetisisa xidumbiso xake?

Abrahamu na Sara kutani a va ni malembe manyingi na va txhatile. Va tsrhike muti wavu wa ku xonga, va va va ya hanya ka matende. Sara a a nga tikhalakhali hikusa a a dumba Yehovha.

Sara a a swi djula ngopfu ku va ni n’wana. Hiloko a byela Abrahamu a ku: ‘Loko mutizri wanga Agari o pswala n’wana na wene, n’wana lweyo a ta va n’wananga.’ Hi ku famba ka nkama Agari a pswale n’wana na Abrahamu. A vito dzrake a a li Iximayele.

Ntsrhaku ka malembe manyingi na kutani Abrahamu a ni 99 wa malembe kasi Sara a ni 89, va yendzreliwe hi vavanuna vazrazru. Abrahamu a va zrambe leswaku va tsrhamisa hansi ka nsinya va va va da xikan’we. Wa swi tiva leswaku a va li vamani vavanuna volavo? A va li tintsrumi! Hiloko yin’we ya tintsrumi toleto yi byela Abrahamu yi ku: ‘Ndzreni ka lembe wene ni nkataku mi ta va ni n’wana.’ Sara a a ma yingela mabulu yavu na a li ndzreni ka tende kutani a sungula ku hleka a tlhela a yanakanya leswi: ‘Mine ni duhalile, swi nga kotekisa kuyini kuva ni va ni n’wana?’

Ntsrhaku ka lembe hi lani ntsrumi ya Yehovha yi hlayiki ha kone, Sara a ve ni n’wana. Abrahamu a mu txhula vito dzra ku i Izaki, ledzri tlhamuxelaka leswaku “Ku hleka”.

Nkama lowu Izaki a a ni 5 wa malembe, Sara a vone Iximayele na a xanisa Izaki. Leswi Sara a a djula ku sizrelela n’wanake a kombele Abrahamu kuva a hlongola Agari na Iximayele. A ku sunguleni, Abrahamu a a nga swi djuli leswo, kambe Yehovha a mu byela a ku: ‘Yentxa leswi Sara a ku byeliki swone, ni ta mu hlayisa Iximayele. Kambe a swidumbiso leswi ni ku byeliki swone swi ta hetiseka hi ku tizrisa Izaki.’