Ka doropa dzra le Uzi a ku hanya wanuna lweyi a a gandzrela Yehovha, a vito dzrake a a li Yobe. Wanuna lweyi a a ganye ngopfu nakone a a ni ndangu wa wukulu. Yobe a a li mhunu wa munene nakone a a pfuna vhanu lava a va li swisiwana, vavasati lava a va feliwe hi vanuna ni vana lava a va feliwe hi vapswele. Xana ku va Yobe a yentxa leswinene a swi hlaya leswaku a nge ti txhuka a kumana ni swikazratu?

Sathana Diyavulosi a a swi vona hinkwaswu leswi Yobe a a swi yentxa, nambileswi Yobe a a nga swi tivi. Kambe Yehovha a a swi tiva leswaku Sathana a vonisisa Yobe, hiloko a byela Sathana a ku: ‘Ha yini u vonisisa nandzra wanga Yobe? Phela a ku na mhunu wa ku fana na yene lani misaveni. Yene awa ni yingiseta nakone hinkwaswu leswi a swi yentxaka swi lulamile.’ Sathana a hlamula Yehovha a ku: ‘Swi le livaleni leswaku Yobe awa ku yingiseta hikusa wa mu sizrelela u tlhela u mu tovokisa. Phela u mu nyika masimu ni swifuyu. Dzringisa ku susa hinkwaswu leswi a nga na swone hi ta swi vona leswaku a ha ta tama a va munghanu waku kumbe a ta ku tsrhika.’ Yehovha a mu hlamula a ku: ‘Hi swone, a le mavokweni yaku, mu yentxi leswi u swi vonaka kambe u nga mu dlayi.’ Ha yini Yehovha a pfumelele Sathana a dzringa Yobe? A mu pfumelele hikusa a a mu dumba ngopfu Yobe nakone a a swi tiva leswaku a a ta tama a va munghanu wake nambiloko a li ka swiyimu swa ku kazrata.

Hiloko Sathana a sungula ku hlasela Yobe hi mintungu ya ku siyanasiyana. A zrange hi ku zrumela vhanu akuva va ya yiva tihomu ni timbongolo take. Ntsrhaku ka leswo, a zrumela ndzrilo akuva wu hisa tihamba hinkwatu. Sathana a tlhela a yentxa leswaku ntlawa wun’wana wa vhanu wu ya yiva makamela ya Yobe nakone a vatizri va Yobe lava a va hlayisa swifuyu leswiyani va dlayiwa. Hi ku landzrela, ku yentxeke ntxhumu wa ku vavisa ngopfu swinene. Sathana a dlaye vana va Yobe hi ku yentxa leswaku a yindlu leyi a va li ndzreni ka yone nkama lowu a va hamba fexta yi va wela. Hinkwaswu leswi swi mu hete ntamu Yobe, kambe a nga tsrhikanga ku va munghanu wa Yehovha.

A swi gamelanga lanu, Sathana a a djula leswaku Yobe a ya a xaniseka, xileswo a yentxe leswaku Yobe a humeliwa hi mazrumba ya ku vavisa ngopfu swinene a mizrini wake hinkwawu. Yobe a a nga swi tivi leswaku ha yini a humeleliwa hi mintxhumu hinkwayu leyo, nambitanu a tame a va munghanu wa Yehovha. Loko Yehovha a vona hinkwaswu leswi Yobe a tiyimiseliki ku swi yentxa, a nyonxa ngopfu swinene!

Kutani Sathana a zrumela vanghanu vazrazru va Yobe akuva va mu dzringa. Va tlhase va ku: ‘U dohile u va u dzringisa ku swi fihla, hi leswi yentxaka Xikwembu Nkulukumba a ku khatisa.’ Hiloko Yobe a ku: ‘A ni yentxanga ntxhumu wa ku biha.’ Hi ndlela leyo Yobe a sungula ku yanakanya leswaku a a li Yehovha lweyi a a mu tisela swikazratu hinkwaswu leswi a a kumana na swone, a va a hlaya leswaku Yehovha a a nga ha mu khomi hi ndlela ya wululami.

Kutani djaha dzra kukazri ledzri a dzri vitaniwa Elihu dzri yingele mabulu ya Yobe ni vanghanu vake vazrazru, kutani dzri ku: ‘Hinkwaswu leswi hinkwenu mi swi hlayiki i madzrimi. Minkama yimbeni swi nga yentxeka hi nga swi twisisi leswaku ha yini Yehovha a pfumelela mintxhumu ya ku fana ni leyi yi hi yentxekela, kambe hi nga tiyiseka leswaku Yehovha a nge ti txhuka a hi yentxela mintxhumu ya ku biha. Yehovha a vona hinkwaswu leswi humelelaka malandzra yake nakone awa ma pfuna nambiloko ma le ka swiyimu swa ku kazrata.’

Kutani Yehovha a vulavula na Yobe, a mu vutisa leswi: ‘A u li kwini nkama ni nga hamba matilo ni misava? Ha yini u hlaya leswaku a ni lulamanga? Phela a u swi twisisi leswaku hi kola ka yini mintxhumu hinkwayu leyi yi ku yentxekela.’ Xileswo Yobe a pfumela leswaku a phazamile, a ku: ‘Yehovha ni phazamile. Ni sama ni swi twa na ku vulavuliwa ha wene, kambe ku hlaya ntiyiso, swoswi hi kone ni ku tivaka. A xi kone ni xin’we lexi kalaka xi nga koteki kwaku. Ni dzrivaleli Yehovha hi kola ka leswi ni nga swi hlaya.’

Ntsrhaku ka leswo, Yehovha a hanyisa Yobe ka mavabyi yake a tlhela a mu nyika mintxhumu yinyingi ku tlula leyi a a li na yone na a nge si na dzringiwa hi Sathana. Yobe a hanye malembe manyingi nakone a a nyonxe ngopfu swinene. Yehovha a tovokise Yobe hikusa a mu yingisetile nambiloko a li ka swiyimu swa ku kazrata. Wene ke? U ta fana na Yobe hi ku va u tama u gandzrela Yehovha nambiloko u kumana ni swikazratu?

Wa ha dzrimuka leswaku a ndangu wa Yakobe wu suke Kanana wu ya tsrhama a Egipta? Hi swone, loko ndangu wa Yakobe wu tlhase Egipta wu sungule ku kula ngopfu wu va wu tiviwa swanga Vayisrayele. Ntsrhaku ka loko Yakobe na Yosefa va file, a Egipta ku ve ni hosi leyimpshwa leyi na yone a yi vitaniwa Faro. Faro a sungule ku txhava loko a vona leswaku a Vaisrayele a va li vanyingi ngopfu ku tlula Vaegipta. Xileswo a va sindzrisa ku tizra swanga swikazrawa ka ntizro wa ku hamba matijolu ni ka ntizro wa ku dzrima. O va ku, nkama lowu Vaegipta a va ya va xanisa Vaisrayele, a nhlayu ya Vaisrayele a yi ya yi yengeseleka. Xileswo Faro a nga swi zrandzranga, hi mhaka leyo a lelete leswaku ku dlayeteliwa swibebetana hinkwaswu swa madjaha leswi a swi ta pswaliwa hi Vaisrayele. Nakunene Vaisrayele va txhave ngopfu!

A nkameni lowo a ku ni wansati wa kukazri wa Muisrayele lweyi a a vitaniwa Yokebede, lweyi a a ni xibebetana xa ku xonga. Akuva Faro a nga xi dlayi xibebetana lexo, Yokebede a xi pete ka ntsrhava a va a teka ntsrhava lowo a wu beka ka swihuvana leswi a swi li ka nambu wa Nilo. Miriyamu, makwavu wa xibebetana lexo, a ye yima hi kusuhi akuva a vona leswi a swi ta humelela.

Ku yentxeke leswaku a n’wana wa Faro a ya hlamba ka nambu wa Nilo kutani a vona xibebetana na xi dzrila na xi li ndzreni ka ntsrhava, a va a xi twela wusiwana. Hiloko Miriyamu a tsrhindzrekelela n’wana wa Faro a mu vutisa leswi: ‘Wa swi djula kuva ni ku djulela wansati wa kukazri akuva a ku hlayisela xibebetana lexi?’ A n’wana wa Faro a pfumela, kutani Miriyamu a ya vitana mamana wake Yokebede, lweyi a a li mamana wa xibebetana lexo. Xileswo, a n’wana wa Faro a byela Yokebede a ku: ‘Teka xibebetana lexi u ni hlayisela xone, ni ta ku hakela hi kola ka leswo.’

Loko n’wana lweyo a kulile, Yokebede a mu yise ka n’wana wa Faro. A n’wana wa Faro a mu hlayise swanga n’wanake a tlhela a mu txhula vito dzra ku Moxe. Moxe a kulisiwe swanga hiloko a li n’wana wa hosi nakone a a ni mfanelo ya ku kuma xin’wana ni xin’wana lexi a a xi djula. Kambe Moxe a nga mu dzrivalanga Yehovha. A a swi tiva ha hombe leswaku yene a a li Muisrayele, a a nga li Muegipta, xileswo a hlawule ku tizrela Yehovha.

Nkama lowu Moxe a a ni 40 wa malembe, a teke xiboho xa ku pfuna vamakwavu, ku nga Vaisrayele. Hiloko siku dzrin’wana Moxe a vona Muegipta wa kukazri na a ba Muisrayele kutani Moxe a ba Muegipta a za a fa, a gama a mu kelela. Nkama lowu Faro a nga swi tsrumbula a dzringise ku dlaya Moxe, kambe Moxe a tsrutsruma a ya tumbela ka tiko dzra Vamidiyani, nakone Yehovha a mu sizrelelile.