Loko Faro a tiva leswaku Vaisrayele va hume a tikweni dzra le Egipta, a huwelela hi zritu dzra le henhla ka masotxha yake a ku: ‘Lulamiselani tin’qolo ta yimpi hi landzra Vaisrayele, a hi nga fanelanga hi va tsrhika va famba.’ Kutani Faro ni masotxha yake va sungula ku landzra Vaisrayele.

Hi nkama lowo, Yehovha a a komba Vaisrayele ndlela leyi a va fanela ku famba ha yone. Wa swi tiva leswaku a a swi yentxisa kuyini? A nhlikanhini a a va kongomisa hi ku tizrisa tlavi kasi a wusikwini a a va kongomisa hi ku tizrisa ndzrilo.

Ntsrhaku ka nkamanyana, Vaisrayele va tlhasa a Lwandle dzra ku Pshwuka, a va Yehovha a va byela leswaku va yimanyana. Nkama na va ha yimile, va vona Faro ni masotxha yake na va va hlongolisa. A va nga na ka ku tsrutsrumela kone. A mahlweni kwavu a ku ni Lwandle dzra ku Pshwuka kasi hi hala ntsrhaku a Vaegipta a va va tela. A Vaisrayele va txhava ngopfu swinene lakakuva va hlaya leswaku swa yampswa kuva va tlhelela a Egipta. Kambe Moxe a a mu dumba swinene Yehovha. Xileswo, a va byela leswi: ‘Mi nga txhavi, a hi yimeni akuva hi vona ndlela leyi Yehovha a taka hi huluxa ha yone.’

Kutani Yehovha a byela Vaisrayele leswaku va tilulamisela akuva va ya mahlweni ni liyendzro. Ntsrhaku ka leswo, Yehovha a yentxa leswaku a tlavi ledzri a dzri li mahlweni ka Vaisrayele dzri ya ntsrhaku kwavu, dzri va dzri ya yima a mahlweni ka Vaegipta. Xileswo, a tlhelo ledzri Vaisrayele a va yime ka dzrone a ku ni livaningu, kambe lani Vaegipta a va li kone a ku mphume ngopfu swinene.

Hiloko Yehovha a byela Moxe akuva a tlakuxa voko dzrake a henhla ka Lwandle dzra ku Pshwuka. Kutani Yehovha a yentxa leswaku ku ba moya lowukulu a lwandle ku dzringana wusiku hinkwabyu, xileswo a lwandle dzri tsravukanisiwa hi le makazri lakakuva ku pfuleka ndlela. A Vaisrayele hinkwavu va nghena hi ndlela leyo va famba hi ka misava leyi womiki va za va ya tlhasa ka tlhelo ledzrin’wana dzra Lwandle.

Faro ni masotxha yake va landzra Vaisrayele hi ndlela leyi Yehovha a a yi pfulile a makazri ka Lwandle, kambe Yehovha a pfilunganya masotxha ya Faro a gama a tlhantlha maroda ya tin’qolo tavu ta yimpi. Hiloko masotxha ma sungula ku huwelela ma ku: ‘A hi tlheleni hikusa Yehovha a lwela Vaisrayele.’

Kutani Yehovha a zruma Moxe kuva a tlhela a tlakuxa voko dzrake a henhla ka Lwandle dzra ku Pshwuka. Loko Moxe a yentxa leswo a makhumbi lawayani mabidzri ya mati ma funeketa Vaegipta. Faro ni masotxha yake hinkwawu va fa va ku jii! A nga kone ni mun’we lwa hulukiki.

Na va yime ka tlhelo ledzrin’wana dzra Lwandle, a Vaisrayele va hlalela leswi Yehovha a swi yentxiki. Kutani akuva va tlangela Yehovha, a vavasati va sungula ku kina. Xileswo hinkwavu va yimbelela va ku: ‘Yimbelelelani Yehovha, hikusa namunhla hinkwavu va swi tiva leswaku a ni ntamu! A dlaye masotxha ni makavhalu yavu a Lwandle.’ A vhanu hinkwavu va nyonxa ngopfu swinene hikusa a Vaisrayele va kume ntsrhunxeko wa hakakunene!

Kolomu ka tihweti tibidzri ntsrhaku ka loko Vaisrayele va hume a Egipta, va tlhasa kusuhi ni Nhava ya Sinayi, va va va tsrhama kone swa nkamanyana. Hiloko Yehovha a byela Moxe leswaku a ya nhaveni. Loko a tlhasa, Yehovha a mu byela leswi: ‘Ni huluxe Vaisrayele. Loko va yentxa hinkwaswu leswi ni va byelaka swone, va ta va vhanu vanga va ku hlawuleka.’ Moxe a xika hi le nhaveni a va a byela Vaisrayele hinkwaswu leswi Yehovha a mu byeliki swone. Va yangulise kuyini? Va te: ‘Hi ta yentxa hinkwaswu leswi Yehovha a hi byelaka swone.’

Moxe a tlhela a ya nhaveni. Loko a tlhasa, Yehovha a mu byela leswi: ‘Ni ta vulavula ni Vaisrayele ntsrhaku ka masiku mazrazru. Va byeli leswaku va nga dzringisi ku tlhantukela Nhaveni ya Sinayi.’ Kutani Moxe a xika nhaveni a va a byela Vaisrayele leswaku va tilulamisela hikusa Yehovha a a ni ntxhumu wa lisima akuva a va byela.

Ntsrhaku ka masiku mazrazru, a Vaisrayele va vona lihati ni tlavi dzra ntima na dzri funekete nhava, va tlhela va twa tilo na dzri dzruma ngopfu swinene va gama va twa a mpfumawulu wa ku txhayiwa ka xipalapala. Hiloko Yehovha a xika na a li ndzrilweni, kutani Vaisrayele va txhava ngopfu swinene. A nhava yi tala hi musi yi tlhela yi tsrekatsreka ngopfu swinene nakone a mpfumawulu wa ku txhayiwa ka xipalapala wu ya wu yengeseleka. Kutani Xikwembu Nkulukumba a ku: ‘Hi mine Yehovha. A mi fanelanga mi gandzrela xikwembu ximbeni.’

Moxe a tlhela a tlhantuka a Nhaveni ya Sinayi, kutani Yehovha a mu nyika milawu leyi Vaisrayele a va fanela ku yi landzra mayelanu ni ndlela leyi a va fanela ku mu gandzrela ha yone, a tlhela a mu byela ndlela leyi a va fanela ku hanya ha yone. Xileswo, Moxe a tsrala milawu leyo a tlhela a yi dondzrela Vaisrayele. Hiloko Vaisrayele va dumbisa Yehovha va ku: ‘Yehovha, hi ta yentxa hinkwaswu leswi u hi byelaka swone.’ Xana a Vaisrayele va xi hetisisile xidumbiso xavu?