Yehovha a byela Moxe akuva a tlhantukela a Nhaveni ya Sinayi. Moxe a tsrhame kohala ku dzringana 40 wa masiku. Na Moxe a ha li nhaveni, Yehovha a tsrala 10 wa milawu ya lisima swinene ka mazribye mabidzri ya ku phaphateka, a gama a nyiketa Moxe. A milawu leyo yi tiviwa swanga 10 wa milawu.

Ntsrhaku ka nkamanyana, a Vaisrayele va sungula ku yanakanya leswaku Moxe a a nga ha ti tlhela. Kutani va byela Aroni va ku: ‘Moxe a nyamalalile. Hi djula mhunu lweyi a taka hi susa lani. Hi hambeli xikwembu!’ Xileswo Aroni a kombela leswaku Vaisrayele va mu buyisela woru. Aroni a teka woru a dzri nq’ivilikisa a va a hamba zrole. Loko zrole dzri helile, a Vaisrayele va sungula ku dzri gandzrela va va va dzri hambela fexta. Vone a va ku: ‘A zrole ledzri i xikwembu xezru! Hi dzrone dzri hi humesiki a tikweni dzra Egipta.’ Xana a swi fanela kuva Vaisrayele va yentxa leswo? Im-him! Vone a va dumbise leswaku i Yehovha ntsena lweyi a va ta mu gandzrela, kambe leswi va nga swi yentxa a swi hambanile ni leswi va nga swi dumbisa.

Loko Yehovha a vona leswo, a byela Moxe a ku: ‘Swa yampswa u fulamela u ya vona Vaisrayele. A va ni yingisetanga, va hambe xikwembu xa madzrimi leswaku va xi gandzrela.’ Xileswo Moxe a fulamela na a khome mazribye mabidzri lawa a nyiketiwiki hi Yehovha.

Loko Moxe a ya a tsrhindzrekela lani Vaisrayele a va li kone, a va yingela na va yimbelela. Loko kutani a li kusuhi, a vona Vaisrayele na va kina va tlhela va gandzrela zrole dzra woru. Leswo swi mu hlundzrukise ngopfu swinene Moxe. Hiloko a teka mazribye lawa a a ma khomile a ma txukumetela hansi ma tekela ku khemekela. Ntsrhaku ka leswo, Moxe a gilhita zrole, ku nga xitatwa xa xihon’wana. A gama a vutisa Aroni a ku: ‘Aroni, ha yini u tsrhike vhanu va ku hlohlotela ku yentxa ntxhumu wa ku nyenyentsa wa nge hi lowu? U phazame ngopfu swinene’. Aroni a ku: ‘Moxe, na ku kombela u nga kwati. U va tiva ha hombe vhanu lava. Vone a va djula xikwembu, xileswo va ni buyisele woru kutani ni dzri txhela ndzrilweni ni va ni hamba zrole ledzri.’ Hiloko Moxe a tlhela a tlhantuka Nhaveni ya Sinayi a ya kombela Yehovha ku va a dzrivalela Vaisrayele.

Yehovha a dzrivalele Vaisrayele lava a va tiyimisele ku mu yingiseta. Hi dondzra yini? Ka Yehovha a ku yingiseta hi swone swi nga swa lisima swinene.

Nkama lowu Moxe a a li Nhaveni ya Sinayi, Yehovha a mu zrume leswaku a hamba tabernakela, ku nga mbangu wa ku hlawuleka lowu a Vaisrayele a va ta mu gandzrela ka wone. Moxe a a fanela ku hamba tabernakela hi ndlela ya ku va swi nabyala ku dzri yaka, ku dzri hahlula ni ku dzri zrwala.

Yehovha a kombele Vaisrayele leswaku va nyikela leswi va nga na swone akuva va pfunisa a ku yakeni ka tabernakela. Hiloko Vaisrayele va nyikela hi woru, prata, kobri, mazribye ya lisima, majoya, mavoya ya tihamba, tipanu, swikhumba swa swihazri ni mintxhumu yin’wana. A Vaisrayele va nyikele mintxhumu ya yinyingi lakakuva Moxe a za a ku: ‘Swi dzringanile! Mi nga ha buyisi ntxhumu.’

Vavanuna ni vavasati va vanyingi lava a va tiva mintizro ya ku siyanasiyana, va pfunisile a ku yakeni ka tabernakela. Nkama lowu van’we va tizraka hi tipanu, van’wana a va tizra hi mazribye ya lisima, woru kumbe hi mapulangu.

Yehovha a pfune Vaisrayele leswaku va dondzra mintizro leyi a yi vileleka leswaku va yaka tabernakela. Vone va yake tabernakela hi ndlela leyi Yehovha a a yi djula. Ka tlhelo dzra le handle dzra tabernakela a ku ni kintari. Ka kintari lowo a ku ni basiya dzra kobri ni altari dzra dzrikulu. Hi le ndzreni a ku ni kortina dzra ku xonga ledzri a dzri hambanisa mbangu wa ku Xwenga ni mbangu wa ku Xwengisisa. Ka mbangu wa ku Xwenga a ku ni motsre wa woru, menza ni altari, kasi ka mbangu wa ku Xwengisisa a ku ni areka dzra xipfumelelanu. Wa swi tiva leswaku i yini xipfumelelanu? I xidumbiso xa lisima. Xileswo a areka dzra xipfumelelanu a dzri tizra swanga xidzrimuxo ka Vaisrayele, xa leswaku a va dumbise Yehovha leswaku a va ta gandzrela yene ntsena.

Yehovha a lange vana va Aroni leswaku va va vaprista. Vone a va fanela ku hlayisa tabernakela ni swihanano leswi vhanu a va swi tisela Yehovha. Yehovha a hlawule Aroni leswaku a va muprista lwenkulu. A ko va Aroni ntsena lweyi a a fanela ku nghena Mbangwini wa ku Xwengisisa kan’we hi lembe. Wa swi tiva leswaku a a nghena a yentxa yini? A a nghena akuva a kombela Yehovha leswaku a mu dzrivalela swidoho swake, a dzrivalela swidoho swa vanake ni swa Vaisrayele.

A tabernakela dzri hetiwe ku yakiwa ntsrhaku ka loko ku khalute lembe na Vaisrayele va hume Egipta. Swoswi kutani a va ni mbangu lowu a va ta gandzrela Yehovha ka wone.

Yehovha a yentxa leswaku ku humelela tlavi a henhla ka tabernakela. A dzri va kongomisa lani a va fanela ku ya kone. Loko dzri tlhasa ka mbangu wa kukazri dzri yima, a Vaisrayele a va fanela ku yima kolanu. Kambe loko dzri tlhantuka a va swi tiva leswaku a ku li nkama wa ku ya mahlweni ni liyendzro. Xileswo a va hahlula tabernakela va dzri zrwala va va va landzra tlavi.