A Vaisrayele va suke Nhaveni ya Sinayi, va yendzra hi le mananga na va sukela Parani va ya ka mbangu lowu vitaniwaka Kadexi. Loko va tlhasa, Yehovha a byela Moxe a ku: ‘Hlawula 12 wa vavanuna, u teka mun’we ka lixaka ha dzrin’we dzra Vaisrayele, leswaku va ya kambela tiko dzra Kanana.’ Kutani Moxe a hlawula 12 wa vavanuna a tlhela a va byela leswi: ‘Yanani Kanana, mi ya vona leswaku a tiko dzri nonile kumbe im-him. Mi tlhela mi vona leswaku a madoropa ma tiyile kumbe im-him. Mi ta gama mi kambela ni vhanu va kone mi vona leswaku va tsrhama ka matende kumbe ka madoropa.’ Hiloko a 12 wa vakambeli va tiko va ya Kanana.

Ntsrhaku ka loko ku khalute 40 wa masiku, a vakambeli va tiko va tlhela na va ni makuwa, maromam ni mawuvha. Kutani va sungula ku dzrungulela Vaisrayele leswi va swi voniki, va ku: ‘A mbangu wone wu nonile, kambe a vhanu lava tsrhamaka ka wone i vavanuna va ntamu. Futsrhi a madoropa ya kone ma ni mimuru ya ku leha ngopfu swinene.’ Kutani Kalebe lweyi a a li mun’we wa vakambeli va tiko, a ku: ‘Nambitanu, hi nga swi kota ku va hlula, a hi fambeni swoswi!’ Ha yini Kalebe a hlaye mazritu lawo? Kalebe a hlaye leswo hikusa yene na Yoxuwa a va dumba Yehovha. Kambe a vakambeli lavan’wana va 10, va ku: ‘A swi nge koteki, phela a Vakanana va lehi ngopfu, va fana ni swihotlovila! Leswi hi nga gomisa xiswone, loko hi yime kusuhi na vone ingiki ho va tinsokoti!’

Loko Vaisrayele va yingela leswo, va txhava Vakanana. Va sungula ku ngurangura va byelanana va ku: ‘A hi hlawuleni mhunu mumbeni akuva a hi zrangela, hi va hi tlhelela a Egipta. Ha yini hi fanela ku ya ka mbangu lowu hi taka ya fa?’ Kutani Yoxuwa na Kalebe va dzringisa ku zrulisa Vaisrayele va ku: ‘Mi nga va txhavi, Yehovha a ta hi sizrelela, lexi djulekaka i ku ya mahlweni hi mu yingiseta ntsena.’ Kambe a Vaisrayele a va nga djuli ku twa ntxhumu; va djule nambi ku dlaya Yoxuwa na Kalebe!

Yehovha a yentxe yini? A byele Moxe a ku: ‘Ni yentxele Vaisrayele mintxhumu ya yinyingi, nambitanu a va swi djuli ku ni yingiseta. Xileswo va ta tsrhama mananga ku dzringana 40 wa malembe nakone va ta fela kone. Ku to sala ntsena Kalebe na Yoxuwa kun’we ni vana va Vaisrayele.’

Ntsrhaku ka nkamanyana na Vaisrayele va ha li mananga, vavanuna va kukazri va ndzruluke vapfukeli; a va nga ha swi djuli ku yingiseta Moxe. A mavito yavu a ku li Kora, Datani na Abiramu, ku patsra ni 250 wa vavanuna van’wana. Hiloko va byela Moxe va ku: ‘Hi kazralile ha n’wine! Kasi ha yini u tiyentxa muzrangeli wezru? Nakone ha yini a li Aroni ntsena lweyi a nga vaka muprista lwenkulu? Yehovha a nga na n’wine ntsena, a tlhela a va na hine.’ Leswo a swi mu nyonxisanga Yehovha nikutsrongo! Kwake a swi fana ni loko vavanuna lavayani va pfukela yene hi ku kongoma!

Moxe a byela Kora ni vavanuna lavan’wana a ku: ‘A mundzruku buyani a tabernakeleni nakone tekani muzri wa ku nun’hwela akuva mi ta wu hisa. Yehovha a ta kombisa leswaku a hlawula mani akuva a va muprista.’

Hi siku ledzri landzreliki, Kora ni vavanuna lavan’wana va 250 va ya kumana na Moxe a tabernakeleni kutani va sungula ku hisa muzri wa ku nun’hwela. Kambe a ntizro lowo wa ku hisa muzri wa ku nun’hwela a wo fanela ku yentxiwa hi vaprista ntsena. Kutani Yehovha a byela Moxe na Aroni a ku: ‘Sukani kusuhi na Kora ni vanghanu vake.’

Hi nkama lowo, Datani na Abiramu a va li a matendeni yavu; a va mu yingisetanga Moxe nakone a va yanga a tabernakeleni. Xileswo, Yehovha a leleta leswaku Vaisrayele hinkwavu va suka kusuhi ni matende ya Kora, Datani na Abiramu. A Vaisrayele va xi yingisetile xileleto xa Yehovha, kambe Datani, Abiramu ni mindangu yavu a va xi yingisetanga. Swa kola ni kola Yehovha a pfula xikhele xa xikulu ngopfu swinene kutani ku pela vapfukeli lavayani! Ntsrhaku ka leswo, Yehovha a xixa ndzrilo hi le tilweni wu hisa Kora ni vavanuna lavan’wana va 250 lava a va li tabernakeleni.

Hi ku landzrela, Yehovha a byela Moxe a ku: ‘Teka nhonga ya muzrangeli mun’wana ni mun’wana wa lixaka ha dzrin’we dzra Israyele, kutani u tsrala vito dzrake ka yone. Kambe ka nhonga ya lixaka dzra Levhi tsrala vito dzra Aroni u va u teka tinhonga hinkwatu u ti beka a tabernakeleni. Ni ta milisa swiluva ka nhonga ya wanuna lweyi ni mu hlawuliki kuva muprista lwenkulu.’

Hi mundzruku ka kone, Moxe a ya a tabernakeleni akuva a ya teka tinhonga. Wa swi tiva leswaku ku humelele yini? A ka nhonga ya Aroni a ku mile swiluva. Moxe a kombisa tinhonga leto ka vavanuna lava a va li vazrangeli va lixaka dzrin’wana ni dzrin’wana. Xileswo Vaisrayele hinkwavu va tiyisekile leswaku Yehovha a a hlawule Aroni akuva a va muprista lwenkulu.