Na Vaisrayele va ha li ku yendzreni a mananga ku dzringana 40 wa malembe, va hlule madoropa manyingi ya ntamu. Kutani swoswi, a va li kusuhi ni doropa ledzri vitaniwaka Mowabu, lani a hosi leyi a yi fuma a ku li Balaki nakone a yi txhava ku lwa ni Vaisrayele hikusa a yi swi vona leswaku yi ta hluliwa. Xileswo, Balaki a kombele wanuna wa kukazri lweyi a vitaniwaka Balama akuva a ya Mowabu a ya hlaya leswaku a ku ta humelela mintxhumu ya ku biha hi Vaisrayele.

Kambe Yehovha a byela Balama a ku: ‘U nga vulavuli mintxhumu ya ku biha hi Vaisrayele.’ Kutani Balama a nga pfumelanga ku ya a Mowabu. Ntsrhaku ka leswo, hosi Balaki a tlhela a zrumela zritu ka Balama a ku: ‘Loko u buya halenu Mowabu ni ta ku nyika hinkwaswu leswi u swi djulaka.’ Nambitanu Balama a nga pfumelanga ku ya a Mowabu. Kambe Yehovha a byela Balama a ku: ‘Yana Mowabu, kambe loko u tlhasa hlaya ntsena leswi ni taka ku byela swone.’

Hiloko Balama a khwela mbongolweni yake a ya Mowabu. Kambe a a kunguhate ku ya vulavula ku biha hi Vaisrayele nambileswi Yehovha a a mu byele leswaku a a nga fanelanga a yentxa leswo. Xileswo nkama lowu a a yendzra, ku humelela ntsrumi ya Yehovha a xitaratwini. Balama a a nga yi voni kambe a yo voniwa ntsena hi mbongolo yake. Akuva mbongolo yi dedekela ntsrumi, yi hume xitaratwini kutani Balama a yi ba. Balama a tama a famba kutani a ntsrumi yi tlhela yi humelela. Loko mbongolo yi zama ku dedekela ntsrumi, yi kongoma ka khumbi dzra kukazri yi va yi manya nenge wa Balama ni khumbi dzroledzro, kutani Balama a tlhela a yi ba. Hiloko ntsrumi yi humelela hi khambi dzrin’wana dzra wuzrazru, kambe ka khambi ledzri a mbongolo a yi swi kotanga ku dedekela ntsrumi, xileswo yi tsrhame xitaratwini. Ni ka khambi ledzri Balama a ba mbongolo.

Hi nkama wolowo, Yehovha a yentxa leswaku a mbongolo yi vulavula, yi va yi vutisa Balama yi ku: ‘Kasi u ni bela yini?’ Balama a hlamula a ku: ‘Wo ni danisa! Loko a no va ni xipada lani, a ni ta ku dlaya.’ A mbongolo yi tlhela yi vutisa yi ku: ‘U khwele henhla kwanga malembe manyingi, xana ni sama ni ku yentxa leswi?’

Ntsrhaku ka leswo, Yehovha a yentxa leswaku Balama a kota ku vona ntsrumi. Kutani a ntsrumi yi mu byela yi ku: ‘Xana Yehovha a nga ku byelanga leswaku a u fanelanga u vulavula ntxhumu wa ku biha hi Vaisrayele?’ Balama a hlamula a ku: ‘Ni hoxile, na ha tlhelela kaya.’ A ntsrumi yi mu hlamula yi ku: ‘Yana Mowabu, kambe vulavula ntsena leswi Yehovha a taka ku byela swone.’

Xana Balama a dondzre xa kukazri? Im-him, a nga dondzranga. Loko a tlhase Mowabu a zame ku hlaya leswaku a ku ta humelela swa ku biha hi Vaisrayele. Swi hambi makhambi mazrazru na a zama ku yentxa leswo, kambe Yehovha a yentxe leswaku Balama a hlaya mintxhumu ya yinene leyi a yi ta humelela Vaisrayele. Ntsrhaku ka leswo, a Vaisrayele va hlasele tiko dzra Mowabu nakone Balama a dlayiwile. A swi ta va swi nga yampswanga loko Balama a e yingiseta Yehovha ku sukela ku sunguleni?

Ntsrhaku ka kuva a kongomise Vaisrayele ku dzringana malembe manyingi, Moxe kutani a kusuhi ni ku fa. Yehovha a mu byela leswi: ‘Ku nge ti va wene u taka nghenisa Vaisrayele a tikweni ledzri ni va dumbisiki dzrone. Kambe ni ta ku pfumelela u dzri vona hi le kule.’ Kutani Moxe a kombela Yehovha leswaku a hlawula wanuna mumbeni akuva a kongomisa Vaisrayele. Hiloko Yehovha a byela Moxe a ku: ‘Famba u ya vulavula na Yoxuwa, u mu byela leswaku ku hlawuliwe yene.’

Kutani Moxe a byela Vaisrayele leswaku a ta fa ni leswaku Yehovha a hlawule Yoxuwa akuva a nghena navu ka tiko dzra le Kanana. Kolanu Moxe a byela Yoxuwa a ku: ‘U nga txhavi, Yehovha a ta ku pfuna.’ Ntsrhaku ka leswo, Moxe a khwela ka Nhava ya Nebo, loko a tlhasa wugan’wini bya nhava, Yehovha a mu pfumelela ku vona tiko ledzri a dumbisiki Abrahamu, Izaki na Yakobe. Moxe a fe na a ni 120 wa malembe.

Yehovha a byela Yoxuwa a ku: ‘Tsremakanya nambu wa Yordani u nghena a Kanana. Tiyiseka leswaku ni ta ku pfuna ku fana ni leswi ni mu pfunisiki xiswone Moxe. Masiku hinkwawu dondzra nawu lowu ni wu nyikiki Vaisrayele. Vana ni xixixi, u nga txhavi. Famba u ya yentxa hinkwaswu leswi ni ku byeliki swone.’

Xileswo, Yoxuwa a zruma vhanu vabidzri akuva va ya kambela a tiko dzra Yeriko. Ka ndzrima leyi landzrelaka hi ta tiva leswi yengetelekiki mayelanu ni leswi yentxekiki kohala. Loko vakambeli lava va buyile, va hlaye leswaku a ku li nkama lowunene wa kuva va nghena a Kanana. Hi siku ledzri landzreliki, Yoxuwa a byela Vaisrayele kuva va tilulamisela, hikusa ku nga li khale a va ta tsremakanya nambu wa Yordani, a tlhela a byela vaprista lava a va tlakula a areka dzra xipfumelelanu leswaku va zrangela. Loko Vaisrayele va tlhasa ka nambu wa Yordani va vone leswaku a mati a ma li manyingi ni leswaku a swi ta va ni khombo ku tsremakanya ka wone. Kambe loko vaprista va pete milenge ka nambu, a mati ma pshwa hi ku kahlula, nakone va tame va yima a nambyeni ku ya tlhasa loko Vaisrayele hinkwavu va tsremakanyile. Ku hlaya ntiyiso, swi nga yentxeka Vaisrayele va dzrimuke leswi Yehovha a swi yentxiki a Lwandle dzra ku Pshwuka.

Hi wugamu, ntsrhaku ka malembe manyingi, a Vaisrayele va tlhase ka Tiko dzra Xidumbiso. A va ta tiyakela miti, madoropa nakone a va ta tibyalela hinkwaswu leswi va swi djulaka. A ku li tiko dzra ku xonga swinene ledzri taliki hi leiti ni wulombe.