Loko vakambeli va tiko va tlhasa a Yeriko, va ye tsrhama kaya ka wansati wa kukazri lweyi a vitaniwaka Rahabi. Kambe loko a hosi ya le Yeriko yi swi tiva, yi zruma masotxha leswaku ma ya kaya ka Rahabi akuva ma ya khoma vakambeli va tiko. Loko a masotxha ma tlhasa, Rahabi a byele a vakambeli va tiko akuva va tumbela. Ntsrhaku ka leswo, a ye khanela ni masotxha a ku: ‘A vakambeli va tiko a va li kola kambe va fambile, loko mo va hlongolisa mi nga va kuma.’ Ntsrhaku ka loko a masotxha ma fambile, Rahabi a byela vakambeli va tiko a ku: ‘Na swi tiva leswaku Yehovha a djula ku mi nyika a tiko dzra Yeriko. Xileswo ni ta mi pfuna, kambe na mi kombela, ni tiyisekisani leswaku mi ta huluxa ndangu wanga.’

A vakambeli va tiko va byela Rahabi va ku: ‘Ha ku dumbisa leswaku hinkwavu lava va taka va lani ndlwini kwaku va ta huluxiwa, kambe swi djula u tsrimba a pindzra dzra ku pshwuka ka janela dzra yindlu yaku.’

Kutani Rahabi a xixa vakambeli va tiko hi pindzra ka janela dzrake, va va va tsrutsruma va ya tumbela a tinhaveni ku dzringana masiku mazrazru. Loko masiku lawo ma khalutile, va ye kumana na Yoxuwa. Ntsrhaku ka leswo, Vaisrayele va tsremakanye nambu wa Yordani. A doropa dzra Yeriko a ve dzrone dzra ku sungula ledzri a Vaisrayele va dzri hlaseliki. Yehovha a byele Vaisrayele akuva va zrendzrelekela handle ka doropa hinkwadzru dzra Yeriko, nakone a va fanela ku zrendzrelekela 6 wa masiku, kambe va yentxa leswo kan’we hi siku. Kutani hi siku dzra wu 7, a va fanela ku zrendzrelekela doropa ku dzringana 7 wa makhambi. A vaprista va txhaye timhondzro kutani a Vaisrayele va huwelele hi zritu dzra le henhla. Hiloko a mimuru hinkwayu ya Yeriko yi tekela ku gilhika. Kambe nambileswi khumbi dzrin’we dzra yindlu ya Rahabi a dzri hamba xiyenge xa muru a yi gilhikanga. Rahabi a dumbe Yehovha a va a yentxa leswi vakambeli va tiko va mu byeliki swone, hi kola ka leswo yene ni ndangu wake va hulukile.

A tiko hinkwadzru dzra Kanana dzri tiva leswi swi nga yentxeka a Yeriko, xileswo a tihosi ta le Kanana ti teka xiboho xa ku ya lwa ni Vaisrayele. Kambe Vagibiyoni lava na vone a va tsrhama Kanana va vona swi yampswa ku tifihla leswaku i Vakanana. Xileswo, va zrumela vavanuna va kukazri akuva va yambala mpahla ya ku handzrukela, va va va ya khanela na Yoxuwa va ku: ‘Hi pfa hi ka tiko dzra le kule swinene. Hi swi tivile leswi Yehovha a nga mi yentxela swone a Egipta ni le Mowabu. Loko mi hi dumbisa leswaku a mi nge ti hlasela doropa dzrezru hi ta mi tizrela hi tlhela hi va swikazrawa swenu.’

Hiloko Yoxuwa a swi kholwa leswi vavanuna lavayani va swi hlayiki, a va a va dumbisa leswaku a a nge ti va hlasela. Ntsrhaku ka masiku mazrazru, Yoxuwa a gungula leswaku vavanuna lavayani a va nga ti hi ka tiko dzra le kule kambe a va ta hi le Kanana. Yoxuwa a vutisa Vagibiyoni a ku: ‘Ha yini mi hi hembelile?’ Kutani va mu hlamula va ku: ‘A ho txhava, ha swi tiva leswaku Yehovha awa mi pfuna, xileswo ha kombela, mi nga hlaseli tiko dzrezru.’ Kutani Yoxuwa a hetisisa xidumbiso xake a va a va tsrhika va hanya.

Ntsrhaku ka nkamanyana, ntlhanu wa tihosi ta Vakanana ti ya lwa ni Vagibiyoni, kambe Yoxuwa ni masotxha yake va ya pfuna Vagibiyoni. Va sungula ku lwa hi mixo wa siku ledzri landzreliki. Kutani Vakanana va sungula ku tsrutsruma hi matlhelo hinkwawu, kolanu Yehovha a yentxa leswaku ku na mazralana ya makulu, ma va wela. Hiloko Yoxuwa a kombela Yehovha leswaku a yimisa dambu. Kambe Yoxuwa a a ngi ngi sama a vona dambu na dzri yimile. Kutani i yini xi mu yentxiki a hamba xikombelo xa ku fana ni lexo? A kombele leswo hikusa a a dumba Yehovha hi ku helela. A dambu dzri tame dzri yima nhlikanhi hinkwawu, phela a dambu dzre pela ntsena ntsrhaku ka loko Vaisrayele va hlule tihosi hinkwatu ta le Kanana kun’we ni masotxha ya tone.