Tindlela Ta Ku Yandzrisa Wutizreli Byaku

LOKO ku tlhase nkama wa kuva Yesu a zruma vadondzrisiwa vakwe swanga vazrezri va Mfumu, a va byele leswi: ‘A ku tsrhovela i kukulu, kambe vatizri a hi vangani.’ A ku ni ntizro wukulu lowu a wu djula ku yentxiwa, xileswo a yengesele a ku: ‘Kombelani ke a N’winyi wa ku tsrhovela, akuva a ta zruma vatizri a ku tsrhoveleni kwakwe.’ (Mt 9:37, 38) Yesu a byele vadondzrisiwa vakwe ndlela ya ku hetisisa wutizreli byavu. A vulavule hi ndlela leyi kombisaka xihatla swinene: ‘N’wi ngaka n’wi nga heti miti ya Israyele, N’wana wa mhunu a nga sanga na ta.’​—Mt 10:23.

² Namunhla nakone, ku ni swa ku tala leswi djulaka ku yentxiwa a ntizrweni wa ku zrezra. Madzrungula lawa lamanene ya Mfumu ma fanela ku zrezriwa na wugamu byi nge si na tlhasa, nakone a nkama wa hela! (Mr 13:10) Leswi nsimu ya kone ku nga misava, hi langusana ni xiyimu xa ku fana ni xa Yesu ni vadondzrisiwa vakwe, kambe hi ndlela leyikulu swinene. Nhlayu yezru i yitsrongo loko yi dzringanisiwa ni mawakawaka ya vhanu lava nga misaveni, kambe hi nga dumba leswaku Yehovha a ta hi pfuna. Madzrungula lamanene ya Mfumu ma ta zrezriwa a misaveni hinkwayu nakone a wugamu byi ta tlhasa hi nkama lowu Yehovha a wu bekiki. Xana hi ta zrangisa Mfumu wa Xikwembu Nkulukumba a wuton’wini byezru akuva hi hetisisa hi ku helela a wutizreli byezru? He wani makungu ya moya lawa hi nga tibekelaka akuva hi kota ku yentxa leswo?

³ Loko Yesu a hlaya leswi Yehovha a swi laviselaka ka malandzra Yakwe lama tinyiketeliki, a te: ‘Kutani u ta zrandzra Hosi [Yehovha, NM] Xikwembu Nkulukumba waku, hi mbilu yaku hinkwayu, ni hi moya waku hinkwawu, ni hi ku yanakanya kwaku hinkwaku, ni hi ntamu waku hinkwawu.’ (Mr 12:30) Hi fanela ku tinyiketa hi mbilu hinkwayu loko hi tizrela Xikwembu Nkulukumba. Leswi swi hlaya leswaku hi fanela ku kombisa ku tinyiketela loku yentiki ni ka xihlayelamfuzri, hi ku yentxa leswi hi nga swi kotaka a ntizrweni wa Yehovha. (2Tm 2:15) Ku ni mikhandlu leyi yi hi pfulekeliki hi ku ya hi swiyimu ni makotela ya mun’wana ni mun’wana wezru. Vona yin’wana ya mikhandlu yoleyo kutani u teka xiboho xa leswaku he wani makungu ya moya lawa u taka lwela ku ma tlhaselela leswaku u hetisisa wutizreli byaku.

KU TIZRA SWANGA MUZREZRI WA BANDLA

⁴ Hinkwavu lava va pfumelaka xihlayelamfuzri va ni tovoko dzra ku zrezra madzrungula lamanene. Lowu i ntizro wa ku sungula lowu Yesu a nyikiki vadondzrisiwa vakwe. (Mt 24:14; 28:19, 20) Mudondzrisiwa wa Yesu Kriste hi ntolovelo a tekela ku sungula ku byela vambeni hi madzrungula lamanene lawa a ma twaka. Hi leswi Andreya, Filipi, Korneliyo ni vambeni va swi yentxiki. (Yh 1:40, 41, 43-45; Min 10:1, 2, 24; 16:14, 15, 25-34) Xana leswi swi djula ku hlaya leswaku a mhunu a nga byela vambeni madzrungula lamanene nambi loko a nge si na babatisiwa? Ina! Loko mhunu a za a faneleka ku va muzrezri lweyi a nga siki na batisiwa a bandleni, a pfulekeliwa hi mukhandlu wa ku nyikela wumboni hi muti ni muti. Handle ka leswo, hi ku ya hi wuswikoti ni swiyimu swakwe, a nga hlengemela hi tindlela timbeni a wutizrelini bya nsimu.

⁵ Handle ka ku ganaganeka, a ntsrhaku ka loko muzrezri a babatisiwile a zron’wekela ku yentxa hinkwaswu leswi a nga swi kotaka akuva a pfuna vambeni ku tiva madzrungula lamanene. Hi ku fanana, vavanuna ni vavasati va ni tovoko dzra ku hlengemela a ntizrweni wa ku zrezra. Ha tovokisiwa nambi loko hi hetisisa xiyenge lexitsrongo xa ku yisa a mahlweni a swivileleko swa Mfumu wa Xikwembu Nkulukumba. Mun’wana ni mun’wana lweyi a nga kotaka ku kulisa wutizreli byakwe hi tindlela timbeni ta ntizro a ta nyonxa hakunene.

KU TIZRELA LOMU KU NGA NI XIVILELEKO XIKULU

⁶ Swi nga ha yentxeka a nsimu ya bandla dzraku yi tizriwa nkama ni nkama ku tlhela ku nyikeliwa wumboni hi lani swi djulekaka ha kone. Loko swi li tanu, u nga ha vona swi yapswa ku yengesela wutizreli byaku hi ku zruzrela lomu nsimu yi nga ni xivileleko xikulu. (Min 16:9) Loko swoswi u li nkulu kumbe nandzra wa wutizreli, ku nga ha va ni bandla dzrimbeni ledzri nga ha tlangelaka mpfuno waku. A mulaviseli waku wa muganga a nga ha ku byela leswi u nga swi yentxaka leswaku u pfunisa a bandleni dzrimbeni ledzri nga ndzreni ka muganga. Loko u navela ku tizrela a tikweni dzrimbeni, a hofisi dzra zrwavi dzri nga ku nyika dzrungula dzra lisima.

⁷ Xana u navela ku tizrela a tikweni dzrimbeni? Loko swi li tanu, u fanela ku kambisisa mazruzrela yaku hi wukheta. Ha yini u nga buli ni vakulu va bandla dzraku hi mhaka leyo? Ku zruzra ka ku tanu nakunene ku ta khumba wene ni lweyi u taka zruzra na yene. (Lk 14:28) Nambitanu, loko u nge na kungu dzra ku ya hlwela swi nga yapswa ku yanakanyisisa hi ku tizrela a mugangeni lowu nga tikweni dzraku.

⁸ A mimbangwini yimbeni, vamakwezru lava tizraka swanga valaviseli va ha li vampshwa a ntiyisweni. Vamakwezru lava titsrongahataka, va mabandla lawo, va nyonxela ku tsrhika vakulu lava wupfiki lava zruzrelaka a mabandleni yavu leswaku va zrangela. Loko u li nkulu lweyi a yanakanyaka hi ku zruzrela a tikweni dzra ku tanu, dzrimuka leswaku a nkongometo waku a hi ku siva vamakwezru lavo. A matsrhan’wini ya leswo, tizra navu. Va kutxe ku lwela ku tlhaselela leswi yengeselekiki ni ku yamukela wutiyanguleli a bandleni. (1Tm 3:1) Lehisa mbilu loko mintxhumu yimbeni yi nga yentxiwi hi ndlela leyi a yi ta yentxiwa ha yone a tikweni dzraku. Tizrisa leswi u swi tivaka swanga nkulu leswaku u va pfuna swinene vamakwezru. Xileswo, loko ku tlhasa nkama wa kuva u zruzra u tlhelela tikweni dzraku, vamakwezru va ta sala na va yi tiva ku yapswa ndlela ya ku hlayisa bandla.

⁹ Na hofisi dzra zrwavi dzri nge si na ku nyika mavito ya mabandla lawa u nga ma pfunaka, a Xihubyana xa Ntizro xa Bandla dzraku xi ta zranga hi ku zrumela papela ledzri khanelaka hi xiyimu xaku a zrwavini. Papela ledzri dzra vileleka nambi loko u tizra swanga nkulu, nandzra wa wutizreli, phayona kumbe muzrezri. A xihubyana xa ntizro xi ta patsra papela ledzri khanelaka hi xiyimu xaku kun’we ni papela dzra xikombelo xaku, xi swi zrumela a hofisini dzra zrwavi dzra tiko ledzri u navelaka ku ya tizrela ka dzrone.

KU ZREZRA HI LIDZRIMI DZRIMBENI

¹⁰ Akuva u yengesela ntizro waku, u nga ha yanakanya hi ku dondzra lidzrimi dzrimbeni, ku patsra ni lidzrimi dzra mavoko. Loko u ni kungu dzra ku dondzra ku zrezra hi lidzrimi dzrimbeni, ha yini u nga byeli vakulu ni mulaviseli wa muganga? Va nga ku byela leswi djulekaka va tlhela va ku nyika ntamu lowu u wu djulaka. A hansi ka nkongomiso wa hofisi dzra zrwavi, miganga yimbeni yi hlela mintlawa ya vazrezri lava nga ni wuswikoti kun’we ni maphayona leswaku va dondzrisiwa lidzrimi dzrimbeni akuva va zrezra ha dzrone.

NTIZRO WA WUPHAYONA

¹¹ Vazrezri hinkwavu va fanela ku tiva leswi djulekaka akuva va teka ntizro wa wuphayona bya ku pfunisa, bya nkama hinkwawu, ni bya ku hlawuleka, ku patsra ni mintizro yin’wana ya nkama hinkwawu. Phayona dzri fanela ku va mukriste lwa babatisiwiki a tlhela a va xikombiso xinene nakone swiyimu swakwe swi mu pfumelela ku heta nhlayu leyi djulekaka ya mawora a ku zrezreni ka madzrungula lamanene ya mfumu. A Xihubyana xa Ntizro xa Bandla hi xone xi pfumelelaka swikombelo swa ntizro wa wuphayona bya ku pfunisa ni bya nkama hinkwawu, kasi a maphayona ya ku hlawuleka ma bekiwa hi hofisi dzra zrwavi.

¹² Maphayona ya ku pfunisa ma nga ha pfumeleliwa ku tizra xipimu xa hweti yin’we, tihweti ta ku landzrelelana leti ma ti navelaka kumbe nkama lowu nga pimiwangakiki, hi ku ya hi swiyimu swa wone. Vazrezri vanyingi va Mfumu va swi zrandzra ku tizra swanga maphayona ya ku pfunisa loko ku ni swiyentxakalu swa ku hlawuleka, swa ku fana ni hi nkama wa Xidzrimuxo kumbe hi nkama wa liyendzro dzra mulaviseli wa muganga. Vambeni va hlawula tihweti ta maferiya. Vazrezri lava babatisiwiki lava ha yaka xikole va nga ha nyonxela ku tizra swanga maphayona ya ku pfunisa loko xikole xi pfaliwile. Vazrezri va nga hlawula ku va maphayona ya ku pfunisa na va nyikela mawora lama pumbiwiki hi tihweti ta Marsu na Abrili ni hi hweti ya liyendzro dzra mulaviseli wa muganga. Nambi u li ka xiyimu muni, loko u ni mahanyela ni mikhuva leyinene, u kota ku tlhaselela mawora lama djulekaka nakone u tiyiseka leswaku u nga swi kota ku heta hweti kumbe ku tlula swanga phayona dzra ku pfunisa, vakulu va nga nyonxela ku vona xikombelo xaku xa ku yentxa ntizro lowu wa ku hlawuleka.

¹³ Akuva u faneleka ku tizra swanga phayona dzra nkama hinkwawu, xiyimu xaku swoswi xi fanela ku ku pfumelela ku tlhaselela mawora lama djulekaka hi lembe. Swanga phayona dzra nkama hinkwawu, swi nga va swinene ku tizrisana ha hombe ni bandla dzraku. Maphayona lama hisekaka i tovoko a bandleni. Ma yentxa ntizro wa nsimu wu nyonxisa ma tlhela ma kutxa vambeni ku teka ntizro wa wuphayona. Nambitanu, na u nge si na hamba xikombelo xa ntizro wa wuphayona bya nkama hinkwawu, u fanela ku va muzrezri lweyi a nga xikombiso lexinene, lweyi a nga ni 6 wa tihweti na a babatisiwile.

¹⁴ Maphayona ya ku hlawuleka hi ntolovelo ma hlawuliwa a xikazri ka maphayona ya nkama hinkwawu lawa ma hisekaka a nsin’wini. Ma fanela ku kota ku ya tizra kun’wana ni kun’wana lomu a hofisi dzra zrwavi dzri taka ma zrumela kone. Minkama ya ku tala ma zrumeliwa ka mimbangu ya le kule, lomu ma nga kumaka lava nyonxelaka ni ku vumba mabandla mampshwa. Minkama yimbeni, maphayona ya ku hlawuleka ma zrumeliwa ka mabandla lawa ma vilelaka mpfuno akuva ma pfala nsimu ya wone. Maphayona man’wana ya ku hlawuleka lawa ma nga vakulu va bandla ma yaveliwa ku ya pfuna mabandla la nga matsrongo, nambi loko ku nge na xivileleko xa vatizri a nsin’wini. Maphayona ya ku hlawuleka ma nyikiwa swimalana leswi va tipfunaka ha swone ka swivileleko swavu. Maphayona mambeni ya ku hlawuleka ma hlawuliwa ku tizra swa nkamanyana.

VAZRUMIWA

¹⁵ Xihubyana xa Ntizro xa Huvo Leyi Zrangelaka xi hlawula vazrumiwa, lava gamaka va yaveliwa hi Xihubyana xa Zrwavi dzra lomu va tsrhamaka kone, akuva va ya tizrela ka mbangu lowu nga ni vhanu vanyingi. Va hetisisa swinyingi hi ku tiyisa ni ku yisa mahlweni ntizro wa ku zrezra ni mintizro ya bandla. Hakanyingi vazrumiwa va wupfisiwa ka Xikole xa Vazrezri va Mfumu. Va nyikiwa mbangu wa ku tsrhama ni swimalana akuva va tihanyisa ha swone.

KU TIZRA SWANGA MULAVISELI WA MUGANGA

¹⁶ Lava hlawuliwaka hi Huvo Leyi Zrangelaka leswaku va tizra swanga valaviseli va miganga, va sungula hi ku wupfisiwa ni ku kuma wuswikoti hi ku tizra swanga vapfaleti va valaviseli va miganga. Vavanuna lava va zrandzra nsimu ni vamakwavu. I maphayona lama hisekaka, vadondzri va Bibele lava hisekaka ni swikaneli tlhelo vadondzrisi vanene. Swi voneka ka hinkwavu leswaku va kombisa mihandzru ya moya nakone va dzringanisela, va yanakanyela va tlhela va twisisa. Loko makwezru a txhatile, nsati wakwe lweyi a nga phayona i xikombiso lexinene a mahanyeleni yakwe ni ndlela leyi a tizrisanaka ha yone ni vambeni. I muzrezri lwa hisekaka. A tlhela a tiva xiyimu xakwe swanga wansati lwa tekiwiki, lwa titsrongahataka. A nga zrangeleli, a vulavula timhaka leti lumbaka nuna kumbe ku lwela ku hlula mabulu. Valaviseli va miganga ni vasati vavu va tsrhama na va tale hi ntizro, xileswo lava va lwelaka ku yentxa ntizro lowu va fanela ku va ni lihanyu dzrinene. A maphayona a ma titsralisi ha wuswawone leswaku ma va valaviseli va miganga. A matsrhan’wini ya leswo, ma byela mulaviseli wa wone wa muganga mayelanu ni ku navela koloko, kutani a ma byela leswi djulekaka.

SWIKOLE LESWI ZRANGELIWAKA HA XIKWEMBU NKULUKUMBA

¹⁷ Xikole xa Vazrezri va Mfumu: Ku vileleka vazrezri vanyingi va Mfumu leswaku va tizra nsimu leyi swi kalaka ku tizrela ka yone ni kuva va nyikela mpfuno hi tlhelo dzra moya a mabandleni. Hi ndlela leyo, vamakwezru va xisati ni va xinuna lava va nga txhatangakiki ni lava txhatiki va nga titsralisa leswaku va wupfisiwa a Xikole xa Vazrezri va Mfumu. A ntsrhaku ka ku heta xikole lexo, swidondzri swi zrumeliwa ku ya tizra swanga maphayona ya nkama hinkwawu lomu ku nga ni swivileleko leswikulu a tikweni dzra swone. Nambitanu, lava va nga kotaka ku tinyiketa va nga nyikiwa swiyavelo swimbeni a tikweni dzravu kumbe dzrin’wana. Van’wana va nga ha zrumeliwa ku tizrela handle ku dzringana nkamanyana kumbe wutomi hinkwabyu swanga maphayona ya ku hlawuleka. Maphayona lawa ma navelaka ku nhingenela xikole lexo ma nga tiva leswi djulekaka ka ntlhanganu lowu vulavulaka hi xikole lexo a nhlengeletanwini leyikulu ya xifundzra.

¹⁸ Xikole xa Bibele xa Watchtower xa Giliyadi: Vamakwezru va xinuna ni va xisati lava nga siki na txhata ni lava txhatiki lava hlawuliwaka leswaku va ya ka xikole lexi va fanela ku kota ku vulavula Xinghiza nakone va hamba ntizro wa ku hlawuleka wa nkama hinkwawu. Va nga pfuna swinene a nsin’wini ni le zrwavini. Va swi kombisile leswaku va zrandzra ku tizrela vamakwavu nakone va nga pfuna vambeni hi ndlela ya lizrandzru ku dondzra ni ku khomelela nkongomiso wa Matsralwa. A xihubyana xa Zrwavi dzra kolanu xi zramba swidondzri leswi hisekaka leswaku swi hamba swikombelo. A vathwasi va xikole lexo va zrumeliwa a nsin’wini kumbe a hofisini dzra zrwavi dzra le tikweni dzravu kumbe dzrin’wana.

NTIZRO WA BETELE

¹⁹ Ku tizrela a Betele i tovoko dzra ku hlawuleka. Vito ledzri liki Betele dzri hlaya leswaku “Yindlu ya Xikwembu Nkulukumba”, nakone vito ledzro dzra faneleka hikusa a mimbangwini leyi ku yentxiwa ntizro wa Xikwembu Nkulukumba. Vamakwezru va xinuna ni va xisati lava tizrelaka Betele va yentxa ntizro wa lisima lowu fambisanaka ni ku hamba, ku ndzrulutela, ni ku nyikela mabuku lama seketeliwiki Bibeleni. Ntizro wavu i wa lisima ka Huvu leyi Zrangelaka, leyi laviselaka ni ku nyikela nkongomiso a mabandleni a misaveni hinkwayu. Vatizri vanyingi va le Betele lava va nga vandzruluteli va tsrhama va tlhela va tizra a ndzreni ka muganga wa zrwavi lomu ku khaneliwaka lidzrimi ledzri ndzruluteliwaka. Leswi swi va pfumelela ku yingela lidzrimi ledzri khaneliwaka siku ni siku. Va nga tlhela va tivonela hi yavu kumbexana vhanu va dzri twisisa lidzrimi ledzri ndzruluteliwaka a mabukwini.

²⁰ Ntizro wunyingi wu yentxiwaka a Betele wu djula ntamu. Xileswo, lava ngopfu-ngopfu va zrambiwaka ku tizrela a Betele i vamakwezru lava nga vampshwa, lava tinyiketeliki, va tiyiki a mizrini va tlhela va va ni lihanyu dzrinene. Loko ku ni xivileleko a zrwavini ledzri laviselaka tiko dzraku, na u navela ku tizrela a Betele, u nga vutisa vakulu va bandla dzraku mayelanu ni leswi djulekaka.

NTIZRO WA KU YAKA

²¹ Ku yaka tiyindlu ta ku yentxa mintizro ya Xikwembu Nkulukumba i ntizro wa ku xwenga, ku fana ni ntizro wa ku yaka tempele ya Salomoni. (1Th 8:13-18) Vamakwezru vanyingi va xinuna ni va xisati va kombisa ku hiseka loku hlamalisaka hi ku nyikela hi nkama ni mintxhumu yavu leswaku va seketela ntizro lowu.

²² Xana u nga pfunisa? Loko u li muzrezri lweyi a babatisiwiki lweyi a navelaka ku hlengemela a ntizrweni wa ku tanu, vamakwezru lava laviselaka ntizro wa ku yaka a mugangeni waku va nga nyonxela mpfuno waku, nakone va tiyimisele ku ku dondzrisa nambi loko u nga tivi swinyingi. Ha yini u nga byeli vakulu va bandla dzraku leswaku u navela ku pfunisa? Vazrezri vambeni lava babatisiwiki, lava fanelekaka, va kumeke ka swiyimu leswi va pfumelelaka nambi ku yaka tiyindlu ta tinhlengeletanu a matikweni mambeni.

²³ Ku ni mikhandlu yinyingi ya ku pfunisa ka ntizro wa ku yaka. Vazrezri lava va ga swikombiso leswinene lava va wu tivakanyana ntizro wa ku yaka nakone swiyimu swi va pfumelelaka ku pfuneta ku yaka kusuhi ni lomu va tsrhamaka kone va nga ha tizra swanga vatizri va ku tizrandzrela va ku dezenyara ni ku yaka a tikweni. Vambeni va swi kota ku seketela hi nkama wutsrongo mintizro leyi yentxeliwaka kule, nakone va hlawuliwa hi hofisi dzra zrwavi leswaku va tizra swanga vatizri va ku tizrandzrela va ku yaka ku dzringana mavhiki mabidzri ku ya ka tihweti tizrazru. Lava va bekiwiki ku tizra ku dzringana nkama wa ku leha va vitaniwa malandzra ya ku yaka. Nandzra wa ku yaka lweyi a kumaka xiyavelo xa ku ya tizrela a handle ka tiko a vitaniwa nandzra wa ku yaka a handle ka tiko. A Ntlawa wa ku Yaka wu vumbiwa hi vatizri va ku yaka va ku tizrandzrela ni vatizreli va ku yaka lava zrangelaka tsima dzra ku yaka na va seketeliwa hi vatizri va ku tizrandzrela va ku dezenyara ni ku yaka lava lumbaka mabandla lama patsrekaka ka tsima ledzro. Mintlawa ya ku yaka yi tlulela yi ya ka tsima ledzri landzrelaka a ndzreni ka nsimu ya zrwavi dzra yone.

HE WANI MAKUNGU YAKU YA MOYA?

²⁴ Loko u nyiketele wutomi byaku ka Yehovha, ku navela kwaku i kuva u mu tizrela nkama hinkwawu. Kambe he wani makungu yaku swoswi? Ku va ni makungu ya moya swi ta ku pfuna ku tizrisa ntamu waku ni wukosi byaku hi wutlhazri. (1Ko 9:26) Loko u tibekela makungu lawo swi ta ku pfuna ku kula hi tlhelo dzra moya, nakone loko u ya u tikazratela ku tlhaselela makungu ya moya lama yengeselekiki swi ta ku pfuna ku beka miyanakanyu yaku ka mintxhumu ya lisima dzrikulu.​—Flp 1:10; 1Tm 4:15, 16.

²⁵ Mupostola Pawulo a hi bekele xikombiso lexinene xa ku xi landzrela a ntizrweni wa Xikwembu Nkulukumba. (1Ko 11:1) Pawulo a tinyiketele hi lani ku heleliki a ntizrweni wa Yehovha. A a swi vona leswaku Yehovha a mu nyike mikhandlu yinyingi. Pawulo a tsralele vamakwavu va le Korinte, a ku: ‘Ndzri pfuleliwe a nyangwa leyikulu leyi nga ni ntizro.’ Xana a hi ntiyiso leswaku na hine hi pfuleliwile? Ina, ku ni mikhandlu yinyingi ya kuva hi tizrela Yehovha hi wumun’we ni bandla, ngopfu-ngopfu a ku zrezreni ka madzrungula lamanene ya Mfumu. Kambe ku fana na Pawulo, ku famba hi ‘nyangwa leyikulu’ swi patsra ku lwisana ni ‘vakaneti lavanyingi.’ (1Ko 16:9) Pawulo a a tiyimisele ku tiluleka. Vona leswi a swi hlayiki: ‘Ndzri khata mizri wanga, ndzri wu yentxa mundjema kumbe xikazrawa.’ (1Ko 9:24-27) xana hi tibekisele ku yentxa leswi fanaka?

²⁶ Mun’wana ni mun’wana a kutxiwa ku tibekela makungu ya moya hi ku ya hi swiyimu swa wutomi byakwe. Vanyingi namunhla va le ka ntizro wa kukazri wa nkama hinkwawu hikusa va tibekele makungu ya moya na va ha li vatsrongo. Nambi loko va ha li vatsrongo, vapswele vavu ni vambeni va va kutxe ku yentxa leswo. Hi ndlela leyo, va tikholisa hi ku tizrela Yehovha handle ka ku tisola. (Pr 10:22) Makungu mambeni ya lisima ma patsra ku kumeka a ntizrweni wa ku zrezra vhiki ni vhiki, ku sungula ni ku fambisa swidondzro swa Bibele swa le kaya, kumbe ku tinyika nkama wa ku lulamisela mintlhanganu. Xa lisima i kuva hi tama hi tiyile ni ku hetisisa hi ku helela wutizreli byezru. Loko hi yentxa leswo hi ta dzrumisa Yehovha nakone hi ta tlhaselela kungu dzrezru ledzrikulu dzra ku mu tizrela nkama hinkwawu.​—Lk 13:24; 1Tm 4:7b, 8.