“A Na Ha Swi Djuli Ku Txintxa Misava”

KHALE WANGA:

Ku sukela a wutsrongwanini a ni wu zrandzra ntumbuluku. Ndangu wanga a wu swi zrandzra ku pfuxela tinhova ni mativa ya ku xonga lawa a ma tsrandzrele doropa dzrezru dzra Jyväskylä a Filândia xikazri. Nakone a ni swi zrandzra ngopfu swihazri. Na ne he ntsrongo loko ni vona swipixi, timbyana a swo ni nyika ku swi tlakula ni tlanga na swone. Loko ni ya ni kula a ni kwata ngopfu loko ni vona vhanu va xanisa swihazri. Hi ku famba ka nkama ni hambe xiyenge xa hlengeletanu leyi a yi lwela timfanelo ta swihazri. Lani ni tiviki vhanu lava a va ni mapimisela ya ku fana ni yanga.

A hi lwela timfanelo ta swihazri hi nkhinkhi. A hi phakela swipapelana nakone a hi hamba switereka swa ku lwisana ni switolo swa ku xavisa mpahla ya ku hambiwa hi swikhumba ni malaboratoriyu ya ku kambeta mizri hi swihazri. Hi tlheli hi vumba hlengeletanu yimpswha ya ku sizrelela swihazri. A hi nga na mhaka ni mhunu. A hi lwela swezru, xileswo minkama yinyingi a hi holovisana ni wuhosi. Hi minkama ya ku tala, ni khomiwile ni tlhela ni yisiwa ku thethisiweni.

Handle ka ku lwela swihazri a ni zron’weka hi timhaka timbeni ta misava. Hi ku famba nkama ni hambe xiyenge xa tinhlengeletanu ta ku siyanasiyana ta ku fana na Anistia Internacional na Greenpeace. Ku seketela mintizro leyi a ku li ntxhumu wa ku sungula a wuton’wini byanga. A ni lwela swisiwana, lava sokolaka hi ndlala ni lava dzreliwaka.

Hi ku famba ka nkama ni ye ni vona leswaku a ni nge swi koti ku txintxa misava. Nambileswi tinhlengeletanu letiyani a ti swi kota ku lulamisa mintxhumu leyitsrongo, timhaka letikulu a to ya ti kula, a swo fana ni kuva mintamu ya wubihi yi khome misava, nakone a ku nge na mhunu lweyi nga ni mhaka na swone. A ni swi vona leswaku ni hlulekile.

NDLELA LEYI BIBELE DZRI TXINTXIKI WUTOMI BYANGA HA YONE:

Leswi a ni xukuvalile, a ni tivona ni hlulekile. Ni sungule ku pimisa hi Xikwembu ni Bibele. Ni same ni dondzra Bibele ni Timboni ta Yehovha. Nambileswi a ni vona wunene byavu ni ku zron’weka kwavu ha mine, a ni nge si na lulamela ku txintxa wutomi byanga. Kambe swoswi mintxhumu a yi txintxile.

Ni khome Bibele dzranga ni va ni sungula ku dzri dondzra. Leswo swi ni pepisile. Ni kume mimbangu yinyingi leyi khanelaka hi ku khoma swihazri hi ndlela leyinene. Hi xikombiso, ka Amaproverbia12:10 ku hlayiwa leswi: ‘Mhunu wa ku lulama a lavelela wutomi bya swifuyu swake.’ (BIBELE DRA KUXWENGA). Ni twisise leswaku Xikwembu Nkulukumba a hi yene lweyi a vangaka swikazratu leswi vhanu va kumanaka na swone. A matsrhan’wini ya leswo, swi tisa hi leswi vhanu va kalaka va nga djuli ku landzra nkongomiso wake. Ni hlamale ngopfu loko ni dondzre hi lizrandzru ni ku lehisa mbilu ka Yehovha​—Amapsalma103:8-14.

Hi nkama wolowo ni kombele ku zrumeleliwa buku ledzri liki: I Yini Leswi Bibele Yi Swi Dyondzisaka Hakunene? A swi hlwelanga, vatekani vabidzri va Timboni ta Yehovha va ni pfuxelile va va va sungula ku ni fambisela xidondzro xa Bibele. Nakone ni sungule ku ya mintlhanganwini ya wukriste a Ndlwini ya Wugandzreli. Swanga mihandzru, ntiyiso wa Bibele wu sungule ku dzima timitsru a mbilwini yanga.

Hi kola ka Bibele ni sungule ku yentxa ku txintxa kunyingi. Ni yime ku dzraha ni ku nwa ku tlula mpimu. Mahanyela yanga, ndlela leyi a ni vulavula ha yone ni ndlela leyi a ni byi vona ha yone wuhosi swi txintxe hi ndlela leyinene. (Ba-le Roma 13:1) Nakone ni tsrhike manhayela yanga ya khale lawa a ma ntxhime hi ntamu swinene.

Lexi xi nga ni bindzrela ngopfu a ve ku va ni vonela ledzrinene hi ti hlengeletanu ta ku lwela timfanelo ta vhanu ni swihazri. Ku txintxa loku a ku vanga ka kola ni kola. A ku sunguleni ni vone ingiki ni ta va no kanganyisa tinhlengeletanu leti loko ni huma ka tone. Kambe ni gameli ku swi twisisa leswaku Mfumu wa Xikwembu Nkulukumba hi wone wu nga tlhantlhaka swizralanganya swa misava leyi hakunene. Ni vone swi yampswa ku tizrisa ntamu wanga hinkwawu kuva ni seketela Mfumu wolowo ni ku pfuna vambeni ku dondzra xa kukazri ha wone.​—Matewu 6:33.

MATOVOKO LAWA NI MA KUMIKI:

Na na ha lwela ku txintxa misava a vhanu a ni hamba ni va vona swanga lavanene ni lava bihiki, nakone a ni hantla ni lwa ni lava a ni va vona leswaku va bihile. Kambe hi mhaka ya Bibele a na ha va vengi vhanu van’wana. Matsrhan’wini ya leswo ni lwela ku komba hinkwavu lizrandzru dzra wukriste. (Matewu 5:44) Yin’we ya tindlela ya ku kombisa lizrandzru ledzro i ku byela vhanu madzrungula lamanene ya Mfumu wa Xikwembu Nkulukumba. Na nyonxa hi ku va ka ntizro lowunene lowu kondletelaka ku zrula ni ku nyonxa, wu tlhela wu nyika vhanu dumbo dzra ntiyiso.

Leswi ni tsrhikeliki Yehovha ku va a tlhantlha swikazratu swa vhanu, ni ve ni ku zrula ka miyanakanyu. Na kholwiseka leswaku yene swanga mutumbuluxi a nge ti pfumelela leswaku swihazri ni vhanu va xanisiwa hi lani ku nga helikiki. Nakone a nge ti pfumelela ku va misava yezru leyi ya ku xonga yi helisiwa. Hi ku tizrisa Mfumu wake, ku nga li khale a ta lulamisa hinkwaswu leswi honeteliwiki. (Ezaya11:1-9) Ku tiva timhaka leti ni ku pfuna van’wana kuva va kholwa ka tone, swi ni nyika ku nyonxa lokukulu. Swoswi a na ha swi djuli ku txintxa misava.