XIDONDZRO 32

Mfumu Wa Xikwembu Nkulukumba Wa Fuma Swoswi!

Buku Ledzri Gandlisiwiki

A Mfumu wa Xikwembu Nkulukumba wu sungule ku fuma a tilweni hi 1914. Hi nkama wolowo ku sungule masiku ya wugamu ya mimfumu ya vhanu. Hi swi tivisa kuyini leswo? A hi voneni leswi Bibele dzri swi hlayiki mayelana ni mhaka leyi, ni leswaku hi xini xiyimu xa misava ku sukela hi 1914.

1. I yini leswi Bibele dzri swi hlayiki?

A buku dzra Daniyele dzri hi pfuna ku twisisa leswaku Mfumu wa Xikwembu Nkulukumba a wu ta sungula ku fuma ku heleni ka nkama lowu hlayiwaka ‘minkama ya 7’. (Daniel 4:16, 17) A ntsrhaku ka 100 wa malembe, Yesu a vitane minkama leyi leswaku i ‘minkama ya vamatiko’. Yesu a dondzrisi leswaku minkama leyo a yi nga si na hela. (Luka 21:24) Minkama ya 7 a yi ta hela hi 1914.

2. I yini leswi yentxekaka misaveni ku sukela hi 1914?

A vadondzrisiwa va Yesu va mu vutise leswi: “Xana mintxhumu leyi yi ta yentxeka siku muni, nakone xi ta va xini xikombiso xa ku ta kwaku ni xa ku hela ka xiyimu lexi xa misava?” (Matewu 24:3) Ka nhlamulo yake, Yesu a vulavule hi mintxhumu yinyingi leyi a yi ta yentxeka loko a sungula a ku fuma a matilweni swanga Hosi. Swin’wana ka swone a ku ta va tiyimpi, ku pfumaleka ka swakuda ni ku tsrekatsreka ka misava. (Dondzra Matewu 24:7.) Bibele na dzrone, dzri hlaye leswi vhanu a va ta va xiswone ‘a masikwini ya wugamu’ nakone hi kola ka xivangelo, lexo a wutomi a byi ta ‘nonon’hwa’. (2 Timoteo 3:1-5) Ku sukela hi 1914 mintxhumu yoleyo yo tama yi yengeteleka.

3. Ku sukela loko Mfumu wa Xikwembu Nkulukumba wu sungule ku fuma, ha yini mintxhumu yi ya yi biha ku tlulisa?

Ntsrhakunyana ka loko Yesu a sungule a ku fuma swanga Hosi ya Mfumu wa Xikwembu Nkulukumba, a lwe yimpi na Sathana ni mademona yake a tilweni. Sathana a hluliwile ka yimpi yoleyo. A Bibele dzri li: ‘Dzra ku txukumeteliwa misaveni, ni tintsrumi ta dzrone ti txukumetiwa kun’we na dzrone.’ (Apfuletelo 12:9, 10, 12) Sathana a hlundzruke ngopfu swinene hi ku tiva leswaku a ta helisiwa. Hi xivangelo lexo, a vanga ku vaviseka ni ku xaniseka a misaveni hinkwayu. A swi hlamalisi loko misava yi bihi hi ndlela leyi! Kambe Mfumu wa Xikwembu Nkulukumba wu ta helisa swikazratu hinkwaswu leswo.

KELISISA

Vona ndlela leyi hi swi tivaka ha yone leswaku a Mfumu wa Xikwembu Nkulukumba wu sungule ku fuma hi 1914. Tlhela u vona leswi hi kutxiwaka ku swi yentxa.

4. A wuprofeta bya Bibele byi kombetela ka lembe dzra 1914

Vonani VHIDIYU

VHIDIYU: Mfumu Wa Xikwembu Nkulukumba Wu Sungule Ku Fuma Hi 1914 (5:02)

Xikwembu Nkulukumba a yentxe leswaku hosi Nebukadnetsari, hosi ya Babilona wa khale, a lozra lozro. Ka lozro ledzro Yehovha a mu kombe leswi a swi ta yentxeka ka nkama lowu taka. Daniyele a tlhamuxele leswi lozro a dzri hlaya swone nakone a dzri yimela a mfumu wa Nebukadnetsari ni Wa Xikwembu Nkulukumba.—Dondzrani Daniel 4:17.a

Dondzrani Daniel 4:20-26, mi gama mi tizrisa bokisi ledzri kumekaka ka tluka 133 akuva u hlamula swivutiso leswi landzrelaka:

A) I yini leswi Nebukadnetsari a swi voniki ka lozro?—Vona tindzrimana 20 ni 21.
B) A ku ta yentxeka yini hi nsinya?—Vona ndzrimana 23.
C) I yini leswi a swi ta yentxeka ntsrhaku ka ‘minkama ya 7’?—Vona ndzrimama 26.

Hi kwini ku yelana loku nga kone a makazri ka nsinya wa lozro ni Mfumu wa Xikwembu Nkulukumba?

WUPROFETA (Daniel 4:20-36)

Mfumu

A) Nsinya lowu tlakukiki

A wu ta yima ku fuma

B) ‘Xakatsrani muzri’ ku kondzra ku hundzra a ‘minkama ya 7’

Xikundzru xa nsinya lexi nga ni bandhi dzra kobri ni nsimbi.

A wu ta tlhela wu fuma

C) “A mfumu waku wu ta tlheliseliwa ku wene”

Ku hetiseka ka ku sungula ka wuprofeta lebyi . . .

D) Xana nsinya a wu yimela mani?—Vona ndzrimana 22.
E) Wu yime dzrini ku fuma?—Dondzrani Daniel 4:29-33.
F) Xana ku yentxeke yini ha Nebukadnetsari loko ku hele ‘minkama ya 7’?—Dondzrani Daniel 4:34-36.

KU HETISEKA KA KU SUNGULA

Mfumu

D) Nebukadnetsari, hosi ya Babilona

Hosi Nebukadnetsari lweyi a yimiki a tikulisaka swinene.

A wu ta yima ku fuma

E) Ntsrhaku ka 606 Mahlweni ka Nguva Yezru, Nebukadnetsari a sungula ku hlanya kutani a nga swi koti ku fuma ku dzringana 7 wa minkama

Hosi Nebukadnetsari a tsrhamiki, a daka byanyi swanga xihazri.

A wu ta tlhela wu fuma

F) Nebukadnetsari a tlhela a tiva a va a sungula ku fuma

Hosi Nebukadnetsari a langusaka tilweni na a tlakuxe mavoko.

Ku hetiseka ka wubidzri ka wuprofeta lebyi . . .

G) Xana a nsinya wu yimela mani?—Dondzrani 1 Makronika 29:23.
H) Xana va yime dzrini ku fuma? Hi swi tivisa ku yini leswaku a va nga fumi loko Yesu a li lani misaveni?—Dondzrani Luka 21:24.
I) Xana Mfumu lowu wu sungule ku fuma nkama muni nakone kwini?

KU HETISEKA KA WUBIDZRI

Mfumu

G) Tihosi ta Israyele leti yimelaka Mfumu wa Xikwembu Nkulukumba

Longoloko dzra tihosi ta Israyele ti nga ka switsrhamu swa wuhosi. Ku phatima ku vaninga a henhla kwavu.

A wu ta yima ku fuma

H) Yerusalema a helisiwa nakone tihosi ta Israyele ti yima ku fuma ku dzringana 2.520 wa malembe

Ndzrilo lowu helisaka Yerusalema hi 607 M.N.Y. ntsrhaku ka 2.520 wa malembe.

A wu ta tlhela wu fuma

I) Yesu a sungula ku fuma a tilweni swanga Hosi ya Mfumu wa Xikwembu Nkulukumba

Yesu a fuma misava na a li ka xitsrhamu xa wuhosi a tilweni ku sukela hi 1914 N.Y. Livaningu ledzri vaningaka mahlweni kwake.

Xana minkama ya 7 i malembe mangani?

Swiyenge swimbeni swa Bibele swi hi pfuna ku twisisa swiyenge swin’wanyana swa dzrone. Hi xikombiso, a buku dzra Apfuletelo dzri hlaya leswaku minkama yizrazru ni hamfu yi fana ni 1.260 wa masiku. (Apfuletelo 12:6, 14) Leswi hlayaka leswaku minkama ya 7 i nhlayu yoleyo leyi phindiwiki kabidzri, kumbexana i 2.520 wa masiku. Minkama yimbeni a Bibele dzri tizrisa a siku akuva dzri yimela a lembe. (Ezekiel 4:6) Ka buku dzra Daniel ku hlayiwa leswo mayelana ni 7 wa minkama, ku nga 2.520 wa malembe.

5. Misava yi txintxe ngopfu ku sukela hi 1914

Vonani VHIDIYU

VHIDIYU: Misava Yi Txintxile Ku Sukela Hi 1914 (1:10)

Yesu a hlaye leswi misava a yi ta va xiswone loko a yene a va Hosi. Dondzrani Luka 21:9-11, mi gama mi bulisana hi xivutiso lexi:

Ka mintxhumu leyi, i yini leswi u swi vonaka namunhla?

Mupostola Pawulo a vulavule hi leswi vhanu a va ta va xiswone a masikwini ya wugamu ya tihosi ta vhanu. Dondzrani 2 Timoteo 3:1-5, mi gama mi bula hi xivutiso lexi:

Xana u vona leswaku vhanu va masiku lawa va tikhoma hi ndlela leyi?

Mifoto: Foto ledzri kombisaka a tsrhamela ni xiyimu xa misava a masikwini ya wugamu. 1. Muzrangeli wa masotxha lweyi a nga palku a huwelelaka na a tlakuxa mavoko . 2. Mapredu lama hohlokaka ntsrhaku ka ku tsrekatsreka ka misava. 3. Mavhiyawu ya masotxha. 4. Xitsrhungu xa vhanu lava yambaliki mimaxkara na va li kazri va famba xitaratwini. 5. Mapredu mabidzri lawa pfuzraka a Nova Iorque ntsrhaku ka ku hlaseliwa hi va terorixta. 6. Wanuna lweyi a tizrisaka timbangi. 7. Wanuna lweyi tlakuxaka voko na a khondla xibakela, a holovisa nsati. 8. Timbangi ni mabyala manyingi. 9. Vavasati vabidzri lava yambaliki mpahla yi nga ka moda ni minkazrazra na va li kazri va susa mifoto. 10. Mukongomisi wa ntlangu lweyi a kongomisaka vhanu ka xipetakulu. 11. Muhlohloteli wa xitereka a txukumetela bomba dzra xigadzrana.

6. Hi djula ku seketela Mfumu wa Xikwembu Nkulukumba

Dondzrani Matewu 24:3, 14, mi gama mi bulisana hi swivutiso leswi:

Hi wini ntizro wa lisima lowu kombisaka leswaku a Mfumu wa Xikwembu Nkulukumba wu sungulile a ku fuma?
Xana u nga hlengelisa kuyini ka ntizro lowo?

Mfumu wa Xikwembu Nkulukumba wa fuma nakone siku dzra kuva wu fuma misava hinkwayu dzra tsrhindzrekela. Dondzrani Ba-Heberu 10:24, 25, mi gama mi bula hi xivutiso lexi:

I yini leswi mun’wana ni mun’wana wezru a faneliki ku swi yentxa leswi a ‘siku dzri tsrhindzrekelaka kusuhi’?

Mifoto: 1. Xidondzro xa Bibele xi kumeka ka mintlhanganu ya bandla ya Timboni ta Yehovha. 2. Xidondzro xolexo xa xin’we xi zrezrela mhunu lweyi xi nga mu tivikiki. — Loko a wo tiva ntxhumu wa kukazri lowu a wu ta pfuna ku huluxa wutomi bya vhanu, xana a wu ta yentxa yini?

LOKO MHUNU A KU VUTISA LESWI: “Ha yini a lembe dzra 1914 dzri li dzra lisima ka Timboni ta Yehovha?”

A wu ta mu hlamulisa kuyini?

NKATSRAKANYU

A wuprofeta bya Bibele ni xiyimu xa misava swi beka wumboni bya leswaku a Mfumu wa Xikwembu Nkulukumba wa fuma. Loko hi zrezra hi tlhela hi ya mintlhanganwini, hi kombisa leswaku ha kholwa ka swone.

Mpfuxeto

A buku dzra Daniel dzri vulavula hi minkama ya 7. Ku yentxeke yini a ku heleni ka minkama yoleyo?
I yini xi ku kholwisaka leswaku a Mfumu wa Xikwembu Nkulukumba wu sungule ku fuma hi 1914?
Xana u nga swi kombisa hi ndlela yini leswaku a Mfumu wa Xikwembu Nkulukumba wa fuma?

Xidondzro lexi xi hele hi:

Lwela leswi

Yentxa leswi djulekaka akuva u va muzrezri wa madzrungula lamanene.

Swin’wana:

Swin‘wana Leswi U Nga Swi Yentxaka

HANDZRISISA

Vona leswi va ta wudzrunguli ni van’wana va swi hlayiki mayelana ni ku txintxa ka mahanyela ku sukela hi 1914.

“Mahanyela Ma Hohloke Ngopfu Swinene” (Pfukani!, Abrili wa 2007)

Vona ndlela leyi wuprofeta lebyi kumekaka ka Matewu 24:14, byi txintxiki wutomi bya wanuna wa kukazri ha yone.

“A Ni Zrandzra Ngopfu Beisebol Ku Tlula Hinkwaswu!” (Xihondzro Xa Ku Zrindzra, N^o 3 2017)

Hi swi tivisa kuyini leswaku wuprofeta bya Daniel 4 byi vulavula hi Mfumu wa Xikwembu Nkulukumba?

“Mfumu Wa Xikwembu Nkulukumba Wu Sungule Dzrini Ku Fuma? (Xiyenge 1)” (Xihondzro Xa Ku Zrindzra,1 ka Otubru wa 2014)

Hi swi tivisa kuyini leswaku ‘minkama ya 7’ leyi ku khaneliwaka ha yone ka Daniel 4 yi hele hi 1914?

“Mfumu Wa Xikwembu Nkulukumba Wu Sungule Dzrini Ku Fuma? (Xiyenge 2)” (Xihondzro Xa Ku Zrindzra,1 ka Novhembru wa 2014)

a Vona tinhlokomhaka tibidzri ta wugamu ta xiyenge lexi liki “Handzrisisa” xa xidondzro lexi.