XIDONDZRO 39
Vonela Dzra Xikwembu Nkulukumba Hi Ngati
Ngati i ya lisima. Handle ka yone, a hi nge ti hanya. Swanga Mutumbuluxi, Xikwembu Nkulukumba a ni mfanelo ya ku beka nawu mayelanu ni matizrisela ya ngati. Xana a li yini hi ngati? Yi nga diwa kumbe ku txheliwa a mizrini? U nga swi tekisa kuyini swiboho leswinene mayelanu ni ngati?
1. Xana Yehovha a li yini hi ngati?
A minkameni ya ku tsraliwa ka Bibele, Yehovha a byele malandzra yake a ku: ‘A vutomi bya nyama hinkwayu i ngati ya yone.’ (Levitika 17:14) Ka Yehovha, a ngati yi yimela wutomi. Leswi wutomi byi nga nyiko ya ku xwenga ya Xikwembu Nkulukumba, a ngati na yone yi xwengile.
2. He wani matizrisela ya ngati lawa Xikwembu Nkulukumba a ma tsimbisaka?
Khale swinene, na Kriste a nge si na buya lani misaveni, Yehovha a a byele malandzra yake leswaku ma nga di ngati. (Dondzra Genesis 9:4 na Levitika 17:10.) A tlhele a tiyisekisa xileleto lexo loko a huvo leyi zrangelaka yi byele vakriste yi ku: ‘N’wi tsrhika . . . ngati.’—Dondzra Amintiṛo 15:28, 29.
Swi hlaya yini ku tsrhika ngati? Loko dotori o ku byela leswaku u fanela ku tsrhika byala, a wu nge ti dzri nwa, a hi swone? Kambe, xana a wu ta da swakuda leswi swekiwiki hi byala kumbe u yentxa hi ku byi nghenisa mizrini hi minsiha? Ni kutsrongo. Hi ku fanana, a xileleto xa Xikwembu Nkulukumba xa kuva hi tsrhika ngati, xi tlhamuxela leswaku a hi fanelanga ku yi nwa kumbe ku da nyama ya xihazri lexi fiki ni ngati ya xone. Nambi swakuda swini na swini leswi nga ni ngati a hi fanelanga ku swi da ni kutsrongo.
Swi li yini hi ku dahiwa ha yone? Madahela mambeni ma honisa hi ku kongoma a nawu wa Xikwembu Nkulukumba. Madahela ya kone ma nga ha patsra ku txheliwa ngati leyi tlhanganiki kumbe xin’wana xa swiyenge swa yone leswikulu, ku nga ma-célula ya libungu, ma-célula ya ku basa, maplaketa ni plasma. Swi nga yentxeka hi nga tiyiseki hi leswaku madahela ya kukazri ma yamukeleka hi ku ya hi nawu wa Xikwembu Nkulukumba kumbe im-him. Hi xikombiso, ma nga ha tizrisa mintxhumu ya yitsrongo swinene leyi susiwiki ka xin’wana xa swiyenge leswikulu swa ngati. Madahela mambeni ma tizrisa ngati ya lwa vabyaka hi ku kongoma. Hi wene u fanelaka ku titekela xiboho a ntsrhaku ka ku kambisisa mayentxela lawa hinkwawu.a—Ba-le-Galatia 6:5.
KELISISA
Kambisisa leswaku u nga swi tekisa kuyini swiboho mayelanu ni madahela lama tizrisaka ngati.
3. Hlawula ku dahiwa hi ndlela leyi taka nyonxisa Yehovha
U nga hlawulisa kuyini madahela lama twananaka ni vonela dzra Yehovha hi ngati? Vonani VHIDIYU, mi gama mi bulisana hi lisima dzra ku yentxa leswi landzrelaka.
Khongota u kombela wutlhazri.—Yakob 1:5.
Kambisisa minsinya ya milawu ya Bibele ni ndlela leyi yi tizraka ha yone.—Amaproverbia 13:16.
Lwela ku tiva madahela lama nga kone lomu u tsrhamaka kone.
Tiva madahela lama kalaka ma nga yamukeleki kwaku.
Tiyiseka leswaku a swiboho swaku swi ta ku siya na u ni lipfalu ledzri basiki.—Amintiṛo 24:16.b
Swi tive leswaku a ku na mhunu lweyi a fanelaka ku ku tekela swiboho a timhakeni leti, nambi nkataku, nkulu wa bandla kumbe mudondzrisi waku wa Bibele.—Ba-le-Roma 14:12.
Tsrala swiboho swaku leswaku vambeni va ta swi tiva.
4. Timboni ta Yehovha ti djula ku dahiwa hi mayentxela ya ku yampswa
Swa koteka ku namazrela milawu ya Yehovha mayelanu ni ngati, u va u dahiwa hi ndlela ya ku yampswa leyi nga tizrisiki ngati. Vonani VHIDIYU.
Dondzrani Tito 3:2, mi gama mi bulisana hi xivutiso lexi:
Loko hi bulisana ni vadotori, ha yini hi fanela ku va komba xitxhavu ni moya wa ku zrula?
Vakriste a va yamukeli |
Leswi i xiboho xa mukriste |
|---|---|
A. Plasma dzra ngati |
Swiyenge leswitsrongo swa plasma |
B. Ma-célula ya ku basa |
Swiyenge leswitsrongo swa ma-célula ya ku basa |
C. Maplaketa |
Swiyenge leswitsrongo swa maplaketa |
D. Ma-célula ya libungu |
Swiyenge leswitsrongo swa ma-célula ya libungu |
5. Loko swi vilela ku tizrisa swiyenge leswitsrongo swa ngati
A ngati yi ni swiyenge swa mune leswikulu, ku nga ma-célula ya libungu, ma-célula ya ku basa, maplaketa, ni plasma. Swiyenge leswi swi tlhela swi va ni swiyenge swinyingi leswitsrongo, leswi vitaniwaka swiyenge leswitsrongo swa ngati.c Swimbeni swa swiyenge leswo swi tizrisiwa hi vadotori akuva va daha mavabyi ha swone kumbe ku sivela ngati loko yi huma yi nga yimi.
A mhakeni ya swiyenge leswitsrongo swa ngati, mukriste mun’wana ni mun’wana a fanela ku titekela xiboho xake hi ku ya hi lipfalu dzrake ledzri dondzrisiwiki hi Bibele. Van’we va nga ha hlawula ku yala muzri kumbe madahela lama tizrisaka swiyenge leswitsrongo swa ngati. Vambeni, a lipfalu dzravu dzra va pfumelela ku dahiwa hi swiyenge leswitsrongo swa ngati.
Loko u teka swiboho, yanakanyisisa hi xivutiso lexi:
Ni nga mu tlhamuxelisa kuyini dotori leswaku ha yini ni pfumela kumbe ni nga pfumeli ku dahiwa hi swiyenge swa kukazri leswitsrongo swa ngati?
VAN’WE VA VUTISA LESWI: “Swi bihe kwini ku pfumela ku txheliwa ngati?”
U swi vonisa kuyini?
NKATSRAKANYU
Yehovha a djula leswaku hi nga tizrisi ngati hi ndlela ya ku biha.
Mpfuxeto
Ha yini Yehovha a ku a ngati yi xwengile?
Hi swi tivisa kuyini leswaku a xileleto xa Xikwembu Nkulukumba mayelanu ni ku tsrhika ngati xi hlaya ku va hi nga txheliwi yone?
U nga swi tekisa kuyini swiboho leswinene mayelanu ni madahela lama tizrisaka ngati?
HANDZRISISA
Xana u fanela ku yanakanya hi yini loko u teka swiboho mayelanu ni madahela lama tizrisaka ngati yaku?
“Swivutiso Swa Vadondzri” (Xihondzro Xa Ku Zrindzra, 15 ka Otubru wa 2000)
Xana u fanela ku yanakanya hi yini loko u teka xiboho mayelanu ni ku pfumela kumbe ku yala swiyenge leswitsrongo swa ngati?
“Swivutiso Swa Vadondzri” (Xihondzro Xa Ku Zrindzra, 15 ka Junyu wa 2004)
I yini lexi susumeteliki dotori wa kukazri ku yima ni vonela dzra Xikwembu Nkulukumba hi ngati?
“Ni Yime Ni Vonela Dzra Xikwembu Nkulukumba Mayelanu Ni Ngati” (Pfukani!, 8 ka Dezembru wa 2003)
Tiva ndlela leyi vakulu lava tizrelaka ka Tindzrawulo ta ku Vulavulisana ni Swipiritana va va pfunaka ha yone vamakwezru.
a Vona Xidondzro 35 lexi liki “Hi Nga Swi Tekisa Kuyini Swiboho Swa Wutlhazri?”
b Vona yinhla ya wu 5 leyi liki, “Loko swi vilela ku tizrisa swiyenge leswitsrongo swa ngati”; Dondzra Swin’wana 3, “Timhaka Ta Wudahu Leti Patsraka Ngati”; ni Vutirheli Bya Hina Bya Mfumo bya Janeru wa 2007, matluka 3-6.
c Vadotori van’wana va vona swiyenge swa mune leswikulu swa ngati na swi li swiyenge leswitsrongo. Xileswo, u fanela ku tiyiseka leswaku a dotori waku awa xi twisisa xiboho xaku xa leswaku a wu pfumeli ku txheliwa ngati leyi tlhanganiki kumbe ma-célula ya libungu, ma-célula ya ku basa, maplaketa kumbe plasma.