1-3. Xana vhanu va vutisa yini mayelanu ni lifu, nakone wukhongoti byi yangula hi ndlela yini?

A BIBELE dzri dumbisa leswaku siku dzrin’wana ‘ku fa ku nga ha vi kone’. (Apfuletelo 21:4) Ka Ndzrima 5, hi dondzre leswaku a xitizrulo xi yentxa swi koteka leswaku hi kuma wutomi lebyi nga helikiki. Kambe vhanu va ha fa. (Eklesiasta 9:5) Kutani ke, xin’wana xa swivutiso leswikulu lexi hi tihambaka xone hi lexi liki: Ku yentxeka yini ha hine loko hi fa?

² Hi swi djula swinene ku tiva nhlamulo ya xivutiso lexi xa lisima, ngopfu-ngopfu loko lweyi hi mu zrandzraka a fa. Hi nga ha tivutisa leswi: ‘Xana mhunu lweyi a ye kwini? Awa hi vona? A nga hi pfuna? Hi ta tlhela hi mu vona siku dzrin’wana?’

³ Wukhongoti byi yangula swivutiso leswo hi tindlela ta ku hambana. Byin’we byi dondzrisa leswaku lavanene va ya tilweni, ni leswaku lava yentxaka swa ku biha va ya pswha a tilweni. Byin’wana byi hlaya leswaku loko hi fa hi ndzruluka moya, hi ya hanya ni maxaka yezru lama fiki khale. Nakambe byin’wana byi hlaya leswaku ntsrhaku ka ku fa ni ku yavanyisiwa, a mhunu a tlhela a pswaliwa ka wubidzri kumbe a tlhelela a wuton’wini na a ni mizri wun’wana, kumbe na a li xihazri.

4. Hi yini mhaka yin’we leyi wukhongoti byinyingi byi yi dondzrisaka mayelanu ni lifu?

⁴ A wukhongoti byi dondzrisa mintxhumu leyi hambaniki kambe ku tala ka byone byi yima hi mhaka yin’we. Hi yini ya kone? Byi dondzrisa leswaku loko mhunu a fa, ko fa nyama ntsena kambe a moya wu ya mahlweni wu hanya. Xana swoleswo i ntiyiso?

XANA HI YA KWINI LOKO HI FA?

5, 6. Ku yentxeka yini ha hine loko hi fa?

⁵ Yehovha awa swi tiva leswi yentxekaka ha hine loko hi fa, xileswo a hi byela leswaku loko mhunu a fa, a wutomi byakwe bya hela. Lifu i ku hambana ni wutomi. Kutani loko mhunu a fa, matitwela ni miyanakanyu yakwe a swi yi hanya kumbeni.a Loko hi file a hi nge swi koti ku vona, ku yingela ni ku pimisa.

⁶ Hosi Salomoni a tsrale leswaku ‘vafi a va tivi ntxhumu’. Vafi a va nge swi koti ku zrandzra kumbe ku venga, nakone a ‘Xeyole kumbe Sizreni . . . a ke he na ntizro, nambi me makungu, ni ku tiva, nambi byi vutlhazri’. (Dondzra Eklesiasta 9:5, 6, 10.) Nakambe ka Amapsalma 146:4 a Bibele dzri hi byela leswaku loko mhunu a fa ‘a makungu yakwe’ ma hela.

LESWI YESU A SWI HLAYIKI MAYELANU NI LIFU

7. Xana Yesu a te yini mayelanu ni lifu?

⁷ Loko a feliwe hi munghanu wakwe lwenkulu, Yesu a byele vadondzrisiwa vakwe a ku: ‘Lazaro, nakulozri, e ku yetlela.’ Kambe Yesu a a nga djuli ku hlaya leswaku Lazaro a a li ku wiseni. Yesu a tlhele a ku: ‘Lazaro a file.’ (Yohan 11:11-14) Xileswo, Yesu a fananise lifu ni ku yetlela kumbe wuzrongo. A nga hlayanga leswaku Lazaro a a li tilweni kumbe a a ni maxaka yakwe lama fiki. Nakone a nga hlayanga leswaku Lazaro a a li ku pswheni a tilweni kumbe leswaku a a ta pswaliwa ka wubidzri swanga mhunu mumbeni kumbe xihazri. Hi ntiyiso wa kone, a swi fana ni loko Lazaro a li wuzrongweni lebyikulu. Khambi dzrimbeni mfuzri, Yesu a fananise lifu ni ku yetlela. Loko Yesu a pfuxe n’wana wa Yayiro, a te ‘a nga fanga; e ku khutsriyela’.​—Luka 8:52, 53.

8. Hi swi tivisa kuyini leswaku Xikwembu Nkulukumba a nga tumbuluxanga vhanu leswaku va fa?

⁸ Xana Xikwembu Nkulukumba a vumbe Adamu na Evha leswaku va hanya nkamanyana va gama va fa? Im-him! Yehovha a va vumbele ku tikholisa hi wutomi lebyi nga helikiki na va nga vabyi. Loko Yehovha a vumba vhanu a a navela leswaku va hanya hi la ku nga helikiki. (Eklesiasta 3:11) Vapswele a va nyonxi loko vanavu va duhwala va tlhela va fa. Yehovha a titwa hi ndlela leyi fanaka. Kutani ke, loko ku li leswaku Xikwembu Nkulukumba a hi vumbele ku hanya hi la ku nga helikiki, ha yini hi fa?

HA YINI HI FA?

9. Ha yini nawu lowu Yehovha a wu nyikiki Adamu na Evha a wu nga bindzri?

⁹ A xizrambeni xa Edeni, Yehovha a byele Adamu a ku: ‘A mizri hinkwayu ya xizramba u va da; kambe loko wu muzri wa ku tiva leswa hombe ni leswa ku biha, wone u nga ve da, hikusa siku ledzri u taka da, u ta fa.’ (Genesis 2:9, 16, 17) Nawu lowo a wu nga bindzri ku wu yingiseta nakone a wu li livaleni. Ntlhantakubidzri, Yehovha a a ni mfanelo ya ku byela Adamu na Evha leswi nga swinene ni leswi bihiki. Hi ku yingiseta Yehovha, a va ta kombisa leswaku va tibeka hansi ka wuhosi byakwe. A va ta tlhela va kombisa leswaku va tlangela hinkwaswu leswi a va nyikiki swone.

10, 11. a) Xana Sathana a kanganyise Adamu na Evha hi ndlela yini? b) Ha yini Adamu na Evha a va nge na ku tiyimelela ka leswi va swi yentxiki?

¹⁰ Lexi txhelanaka xizrami hi leswaku Adamu na Evha va hlawule ku ka va nga yingiseti Xikwembu Nkulukumba. Sathana a byele Evha a ku: ‘A! Xana Xikwembu Nkulukumba a ti: n’wi nga ve da muzri ni mun’we wa xizramba xana?’ Evha a hlamule a ku: ‘Hi nga da a mihandzru ya mizri ya xizramba: kambe mihandzru ya muzri lowu nga makazri ka xizramba yone Xikwembu Nkulukumba a ti: ‘N’wi nga ve da, n’wi nga ve mi khumba, suka n’wi fa.’’​—Genesis 3:1-3.

¹¹ Kolanu Sathana a hlamule a ku: ‘N’wi nga fe nikutsrongo: swa ku va leswi Xikwembu Nkulukumba a tivaka leswaku a siku ledzri n’wi daka, a mahlu yenu ma ta pfuleka, n’wi ta fana ni Xikwembu Nkulukumba, n’wi tiva leswa hombe ni leswa ku biha.’ (Genesis 3:4-6) Sathana a a djula kuva Evha a pimisa leswaku a nga swi kota ku tiyentxela swiboho ka leswinene ni leswa ku biha. Hi nkama lowu fanaka, a hembile mayelanu ni leswi a swi ta humelela loko Evha a nga yingiseti. Sathana a hlaye leswaku Evha a a nga ti fa, xileswo Evha a de mhandzru a tlhela a nyika nuna wakwe. Adamu na Evha a va swi tiva leswaku Yehovha a a va tsimbisile ku da mhandzru. Hi ku da kwavu, a va hlawula ku kanya nawu lowu nga livaleni ni lowu nga bindzrikiki. Handle ka leswo, va kombise leswaku a va nga mu bekeli xitxhavu Tatana wavu wa lizrandzru lwa nga matilweni. A va nge na ku tiyimelela ka leswi va swi yentxiki!

12. Ha yini Yehovha a vavisekile hi leswi Adamu na Evha va kalaka va nga mu yingisetanga?

¹² Yehovha a vaviseke ngopfu hi leswi vapswele vezru va ku sungula va kalaka va nga mu yingisetanga! A hi nge u mupswali lwa tikazratelaka ku wundla n’wana. Hi ku famba ka nkama, a tsrhika ku ku yingiseta, a yentxa leswi hambaniki ni leswi u mu dondzrisiki swone. A wu ta titwisa kuyini? Xana a wu nga ti vaviseka?

13. Xana Yehovha a a djula ku hlaya yini loko a ku ‘u ta buyela ntsrhuzrini’?

¹³ Leswi Adamu na Evha va kalaka va nga yingisetanga, va lahlekeliwe hi ndjombo ya ku hanya hi la ku nga helikiki. Yehovha a a byele Adamu a ku: ‘Hikusa u ntsrhuzri, u ta buyela ntsrhuzrini.’ (Dondzra Genesis 3:19.) Leswi hlayaka leswaku Adamu a a ta tlhela a va ntsrhuzri, ku fana ni loko a nga si na tumbuluxiwa. (Genesis 2:7) Ntsrhaku ka loko Adamu a dohile, a file nakone a nga ha vanga kone.

14. Ha yini hi fa?

¹⁴ Loko Adamu na Evha a va yingisete Xikwembu Nkulukumba, inha va ha hanya ni namunhla. Kambe leswi va nga mu yingisetangakiki, va dohile hi wugamu va fa. Xidoho xi fana ni mavabyi lama nga dahekikiki lawa hi ma kumiki ka vapswele vezru va ku sungula. Hinkwezru hi belekiwa hi li ni xidoho, ku nga leswi yentxaka hi fa. (Ba-le-Roma 5:12) Kambe lowu a hi wone nkongometo wa Xikwembu Nkulukumba hi vhanu. A nga samanga a djula leswaku vhanu va fa, mfuzri Bibele dzri li lifu i “nala”.​—1 Ba-le-Korinte 15:26.

NTIYISO WA HI NTSRHUNXA

15. Xana ntiyiso mayelanu ni lifu wu hi ntsrhunxa hi ndlela yini?

¹⁵ Ntiyiso mayelanu ni xiyimu xa vafi wu hi ntsrhunxa ka swihena swinyingi mayelanu ni vafi. Bibele dzri dondzrisa leswaku vafi a va kwati nambi ku twa ku vavisa. A hi nge na ku vulavula na vone, mfuzri na vone a va nge vulavuli na hine. Handle ka leswo, vafi a va nge hi pfuni, na hine a hi nge va pfuni. A va nge hi vavisi, xileswo a hi fanelanga hi va txhava. Nambitanu, wukhongoti byinyingi byi dondzrisa leswaku ku ni lomu vafi va yaka hanya kone ni leswaku hi nga va pfuna loko ho hakela mali ka vafundhisa kumbe ka tin’anga. Kambe loko hi tiva ntiyiso mayelanu ni vafi, a hi nge kanganyisiwi hi madzrimi lawo.

16. Hi wani madzrimi lawa wukhongoti byinyingi byi ma dondzrisaka mayelanu ni vafi?

¹⁶ Sathana a tizrisa wukhongoti bya madzrimi leswaku byi hi hembela, byi hi yentxa hi pimisa leswaku vafi va ha hanya. Hi xikombiso, wukhongoti byimbeni byi dondzrisa leswaku a nyama ya fa kambe a moya wu huma wu ya hanya kumbeni. Xana wukhongoti byaku na byone byi dondzrisa leswo, kumbe byi dondzrisa leswi Bibele dzri swi hlayaka mayelanu ni vafi? Ku hlaya ntiyiso, Sathana a tizrisa madzrimi leswaku a tsravukanisa vhanu na Xikwembu Nkulukumba.

17. Ha yini mhaka ya ku ya pswha tilweni yi li xizruku ka Yehovha?

¹⁷ Leswi wukhongoti byinyingi byi swi dondzrisaka swi hoxekile swinene. Hi xikombiso, byimbeni byi dondzrisa leswaku a vadohi va ta ya pswha tilweni hi la ku nga helikiki. Madzrimi lawo i xizruku ka Yehovha. A nge txhuki a pfumelela vhanu va xaniseka hi ndlela leyo! (Dondzra 1 Yohan 4:8.) Yanakanya hi mubeleki lweyi a layaka n’wanakwe hi ku mu hisa voko hi ndzrilo. A wu ta mu vonisa kuyini? A wu ta mu vona swanga mhunu wa nsele swinene, lweyi u nga djulikiki ku va munghanu wakwe. Hi leswi Sathana a djulaka hi titwisa xiswone ha Yehovha!

18. Ha yini hi nga fanelanga ku txhava vafi?

¹⁸ Wukhongoti byimbeni byi hi byela leswaku loko vhanu va fa, va ndzruluka mimoya. Wukhongoti lebyo byi djula ku hlaya leswaku hi fanela ku hlonipha nambi ku txhava mimoya yoleyo hikusa yi nga ha va vanghanu lavakulu kumbe valala lava txhavisaka. Vhanu vanyingi va ma kholwa madzrimi lawo. Va txhava vafi lakakuva va tlhela va va gandzrela a matsrhan’wini ya ku gandzrela Yehovha. Dzrimuka leswaku vafi a va voni ntxhumu nambi ku twa. Xileswo, a hi fanelanga ku va txhava. Yehovha i Muvumbi wezru. I Xikwembu Nkulukumba wa ntiyiso nakone hi fanela ku gandzrela yene ntsena.​—Apfuletelo 4:11.

19. Ku tiva ntiyiso mayelanu ni lifu swi hi pfunisa kuyini?

¹⁹ Loko hi tiva ntiyiso mayelanu ni lifu, hi ntsrhunxiwa ka madzrimi ya wukhongoti. Ntiyiso lowu wu hi pfuna ku twisisa swidumbiso leswi hlamalisaka leswi Yehovha a swi yentxiki mayelanu ni wutomi kun’we ni wumundzruku byezru.

20. Hi ta dondzra yini ka ndzrima leyi landzrelaka?

²⁰ Khale swinene, nandzra mun’wana wa Xikwembu Nkulukumba, Yobe, a navele leswi: ‘Loko fa nha mhunu lwe a fiki a nga tlhela a hanya.’ (Yob 14:14) Xana swi nga koteka hakunene ku va mhunu lweyi a fiki a tlhela a hanya? Nhlamulo leyi Xikwembu Nkulukumba a hi nyikaka a Bibeleni yi nyonxisa swinene. Hi ta yi vona ka ndzrima leyi landzrelaka.

1-3. I wukazrawa byini lebyi hinkwezru hi nga ka byone, nakone Yehovha a ta hi ntsrhunxa hi ndlela yini?

A HI NGE u tsremeliwe xikhatiso xa ku tsrhama djele wutomi byaku hinkwabyu na u nge na nandzru. A ku na ndlela ya kuva u humexiwa. Swi tikomba u heleliwe hi dumbo, nakone a ku na lexi u nga xi yentxaka. Kambe na u nga swi yimelanga, ku humelela mhunu lwa nga ni ntamu wa ku ku humexa nakone a dumbisa ku ku pfuna! Xana a wu ta titwisa kuyini?

² Hinkwezru hi swikazrawa swa lifu. Nambi hi ngo yentxa yini na yini, a hi nge dzri tsrutsrumi. Kambe Yehovha a ni ntamu wa ku hi ntsrhunxa ka lifu. Nakone a hi dumbisa leswi: ‘Nala lwe a taka helisiwa a vugan’wini, hi ku fa.’​—1 Ba-le-Korinte 15:26.

³ Yanakanya hi ntsrhunxeko lowu u taka wu twa loko lifu dzri nga ha li kone! Kambe Yehovha a nga ti helisa lifu ntsena. A ta tlhela a pfuxa ni lava fiki. Pimisa hi mabidzru ya mhaka leyo a wuton’wini byaku. A dumbisa leswaku lava fiki va ta tlhela va hanya. (Ezaya 26:19) Leswi, Bibele dzri swi vitana ku pfuxiwa.

LOKO HI FELIWA HI LWEYI HI MU ZRANDZRAKA

4. a) I yini lexi nga hi txhavelelaka loko hi feliwa hi xizro xa ndangu kumbe munghanu? b) A ku li vamani vanghanu lavakulu va Yesu?

⁴ Loko xizro xa ndangu kumbe munghanu wezru lwenkulu a fa, ha vaviseka hi tlhela hi va ni gome ledzrikulu. Hi sala hi nga khongoteleki. A hi nge na ku swi kota ku mu pfuxa. Kambe Bibele dzri hi nyika ntxhavelelo wa ntiyiso. (Dondzra 2 Ba-le-Korinte 1:3, 4.) A hi voneni xikombiso xin’we lexi kombaka leswaku Yehovha na Yesu va swi djula ngopfu ku pfuxa vazrandzriwa vezru lava fiki. Loko a li la misaveni, Yesu a a tolovela ku pfuxela Lazaro ni vamakwavu vaxisati, ku nga Marta na Mariya. A va li vanghanu lavakulu va Yesu. Bibele dzri li ‘Yesu afa a zrandzra Marta, ni makwavu, na Lazaro’. Kambe siku dzrin’wana Lazaro a file.​—Yohan 11:3-5.

5, 6. a) Yesu a titwise kuyini loko a vona maxaka ni vanghanu va Lazaro va dzrila? b) Ha yini swi txhavelela ku tiva ndlela leyi Yesu a titwiki ha yone mayelanu ni lifu?

⁵ Yesu a ye txhavelela Marta na Mariya. Loko Marta a twe leswaku Yesu awa buya, a hume handle ka doropa a mu tlhangaveta. A a tsrhave ngopfu hi ku vona Yesu, kambe a mu byele leswi: ‘Loko fa u kone, a makwezru a nha a nga fanga.’ Marta a a pimisa leswaku Yesu a a hlwele ngopfu. Ntsrhaku ka leswo, Yesu a vona makwavu Mariya na a dzrila. Loko a vona ku khumbeka kwavu, a dzrila hi ku vaviseka. (Yohan 11:21, 33, 35) A titwe ku fana na hine loko hi feliwa hi mhunu lweyi hi mu zrandzraka.

⁶ Swa hi txhavelela ku tiva leswaku Yesu a titwa ku fana na hine mayelanu ni lifu, mfuzri a fana ngopfu ni Tatana wakwe. (Yohan 14:9) Yehovha a ni ntamu wa ku helisa lifu hi la ku nga helikiki, nakone hi leswi a djulaka ku swi yentxa ku nga li khale.

‘LAZARO, HUMELA HANDLE!’

7, 8. Ha yini Marta a a nga swi djuli leswaku ku susiwa zribye a sizreni dzra Lazaro, kambe Yesu a yentxe yini?

⁷ Loko Yesu a tlhase a sizreni lani ntsrumbu wa Lazaro a wu bekiwe kone, a nyangwa a yi pfaliwe hi zribye ledzrikulu. Yesu a va byela a ku: ‘Susani zribye.’ Kambe Marta a a nga swi djuli hikusa ntsrumbu wa Lazaro a wu li sizreni ku dzringana mune wa masiku. (Yohan 11:39) A a nga swi tivi leswaku Yesu a a djula ku pfuna makwavu.

⁸ Hi loko Yesu a ku ka Lazaro: ‘Humela handle!’ Hi loko Marta na Mariya va vona xihlamaliso. ‘Kutani a mufi a huma, a milenge yakwe ni mavoko afa ma tsrimbiwe hi makapulana.’ (Yohan 11:43, 44) Lazaro a a tlhele a nyikiwa wutomi! A a tlhele a tlhanganisiwa ni maxaka ni vanghanu. Va kote ku tlhela va mu xingazra, va mu khumba va tlhela va vulavula na yene. A ku li hlolana ledzrikulu! Yesu a a pfuxe Lazaro.

‘NHWANYANA, NI LI KU WENE: PFUKA!’

9, 10. a) I mani lwa nyikiki Yesu ntamu wa ku pfuxa vafi? b) Ha yini madzrungula lama khanelaka hi ku pfuxiwa ka vafi ma li ya lisima ka hine?

⁹ Xana Yesu a pfuxe vhanu hi ntamu wakwe? Im-him. Na a nga si na pfuxa Lazaro, Yesu a khongote ka Yehovha, kutani Yehovha a mu nyika ntamu wa ku pfuxa Lazaro. (Dondzra Yohan 11:41, 42.) A hi Lazaro ntsena a pfuxiwiki. Bibele dzri khanela hi nhwanyana wa malembe ya 12 lweyi a a vabya swinene. Tatana wakwe Yayiro a a nge he na dumbo, kutani a tsratsriya Yesu leswaku a mu dahela n’wana. Yayiro a o va ni n’wana mun’we ntsena. Na a ha vulavula na Yesu, ku humelela wanuna mun’wana a ku: ‘A file n’wanaku; u nga ha kazrati mufundisa.’ Kambe Yesu a ku ka Yayiro: ‘U nga txhavi; pfumela ntsena; a ta hanyisiwa.’ Kutani va famba xikan’we a kaya kwakwe. Loko va li kusuhi ni ku tlhasa, Yesu a yingela vhanu na va dzrila. Yesu a va byela a ku: ‘N’wi nga dzrileni, hikuva a nga fanga; e ku khutsriyela.’ Vapswele va nhwanyana va hlamalisiwa hi leswi Yesu a a djula ku hlaya swone. Kutani Yesu a kombela leswaku hinkwavu va huma, a gama a ya ni vapswele lomu n’wana a a latiwe kone. Hi lizrandzru, Yesu a mu khoma hi voko a ku: ‘Nhwanyana, ndzri li ku wene: Pfuka!’ Yanakanya ku nyonxa loku vapswele va viki na kone loko hi ku kahlula a nhwanyana a pfuka, a sungula ku famba! Yesu a a va pfuxele n’wanavu. (Marka 5:22-24, 35-42; Luka 8:49-56) Ku sukela siku dzrodzro ku ya mahlweni, loko va vona nhwanyana wavu, a va dzrimuka leswi Yehovha a va yentxeliki swone hi ku tizrisa Yesu.a

¹⁰ Swanga hi leswi a va nga hetisekanga, lava Yesu a va pfuxiki va tlhele va fa. Kambe, madzrungula ya ku pfuxiwa kwavu ma ni lisima swinene hikusa ma hi nyika dumbo ledzri tiyiki. Yehovha a nyonxela ku pfuxa vafi, mfuzri a ta swi yentxa.

HI DONDZRA YINI KA MADZRUNGULA YA KU PFUXIWA KA VAFI?

11. Hi ku ya hi Eklesiasta 9:5, xana Bibele dzri hi dondzrisa yini ha Lazaro?

¹¹ Bibele dzri swi beka livaleni leswaku ‘a vafi a va tivi ntxhumu’. Lexi i xiyimu lexi Lazaro a a li ka xone. (Eklesiasta 9:5) Swanga hi leswi Yesu a swi hlayisiki xiswone, a swi fana ni loko Lazaro a a li ku yetleleni. (Yohan 11:11) A sizreni, Lazaro a a nga ‘tivi ntxhumu’ ni wun’we.

12. Hi swi tivisa ku yini leswaku Lazaro a pfuxiwile hakunene?

¹² Vhanu vanyingi va swi vonile loko Yesu a pfuxa Lazaro. Nambi valala va Yesu va swi tivile leswaku a hambe hlolana ledzri. Lazaro a tlhele a hanya. Leswo swi nyikele wumboni bya ku pfuxiwa kwakwe. (Yohan 11:47) Handle ka leswo, vhanu vanyingi va ye pfuxela Lazaro, leswi yentxiki va sungula ku kholwa leswaku nakunene Yesu a a zrumiwe ha Xikwembu Nkulukumba. Mhaka leyi yi va tsrone wuzrongo valala va Yesu, kutani va sungula ku djula ndlela ya ku mu dlaya​—yene kun’we na Lazaro.​—Yohan 11:53; 12:9-11.

13. Ha yini hi fanela ku kholwiseka ka leswaku Yehovha a ta va pfuxa vafi?

¹³ Yesu a hlaye leswaku ‘hinkwavu lava nga masizreni’ va ta pfuxiwa. (Yohan 5:28) Leswi swi hlaya leswaku hinkwavu lava fiki, Yehovha a va bekise miyanakanywini yakwe, ku patsra ni wutsrhoko-tsrhoko bya matsrhamela yavu. Xana Yehovha a nga swi kota leswo? Xiya leswaku a tilweni ku ni tinyeleti ta ntsrandzra-vahlayi. Bibele dzri li Yehovha a tiva mavito ya tone ha yin’we-yin’we. (Dondzra Ezaya 40:26.) Loko Yehova a dzrimuka mavito ya tinyeleti hinkwatu ha yin’we-yin’we, swa kholwisa leswaku a nga dzrimuka hi ku nabyala wutsrhoko-tsrhoko bya lava a taka va pfuxa. Xa lisima ka hinkwaswu i ku tiva leswaku i Yehovha a tumbuluxiki hinkwaswu, xileswo a ni ntamu wa ku tlhelisela vhanu a wuton’wini.

14, 15. Xana mazritu ya Yobe ma hi dondzrisa yini hi ku pfuxiwa ka vafi?

¹⁴ Yobe, wanuna wa lipfumelo, a a kholwa leswaku vafi va ta pfuka. A xuvile a va a ku: ‘Loko fa nha mhunu lwe a fiki a nga tlhela a hanya.’ A tlhele a byela Yehovha a ku: ‘Afa u ta ndzri vitana, afa ndzri ta ku yangula; afa u ta navela ntizro wa mavoko yaku.’ Ina, Yobe a a swi tiva leswaku Yehovha a zrindzrela hi manyawu nkama lowu ha wone a taka pfuxa vafi.​—Yob 14:13-15.

¹⁵ U titwisa kuyini hi dumbo dzra ku pfuxiwa ka vafi? U nga ha tivutisa leswi: ‘Ku nga va leswaku maxaka ni vanghanu vanga na vone va ta pfuxiwa?’ Swa txhavelela ku tiva leswaku Yehovha a xuva ku pfuxa vafi. A hi voneni lomu Bibele dzri liki lava pfuxiwiki va ta hanya kone ni leswaku i mani a taka pfuxiwa.

VA TA ‘YINGELA ZRITU DZRAKWE KUTANI VA TA HUMA’

16. Xana lava taka pfuxeliwa ku hanya a misaveni va ta va ni wutomi bya matsrhamela muni?

¹⁶ Lava pfuxiwiki masiku ntsrhaku va tlhanganisiwe ni maxaka yavu ni vanghanu, kola misaveni. Leswo swi ta tlhela swi yentxeka a nkameni lowu taka, kambe hi ndlela leyikulu. Ha yini? Hikusa lava taka pfuxeliwa a misaveni va ta va ni ndjombo ya ku hanya hi la ku nga gamikikiki, va nga ha fi. Tlhantakubidzri, va ta hanya a misaveni leyi hambaniki ngopfu ni yezru namunhla. Ku nga ti va ni tiyimpi, wugevengu, nambi mavabyi.

17. I vamani lava taka pfuxiwa?

¹⁷ Xana i vamani lava taka pfuxiwa? Yesu a te ‘Hinkwavu lava nga masizreni va taka yingela zritu dzrakwe, . . . va ta huma.’ (Yohan 5:28, 29) Apfuletelo 20:13 yi hi byela leswi: ‘A likhulu li humexa vafi lava [a]faka ve ku lone; ni ku fa ni Hades swi humexa vafi, lava faka ve ku swone.’ Ina, mawakawaka ya vhanu ma ta tlhela ma hanya. Mupostola Pawulo na yene a hlaye leswaku ku ta va ni ku pfuka ‘ku valulami ni le ku lavamfani’. (Dondzra Amintiṛo 24:15.) Valulami ni lavamfani ku hlayiwa vamani?

18. I vamani ‘valulami’ lava taka pfuxiwa?

¹⁸ ‘Valulami’ va patsra vatizreli va Yehovha lava nga ni lipfumelo, lava hanyiki na Yesu a nga si ta misaveni. Ka vone hi kuma Nowa, Abrahamu, Sara, Moxe, Rute, na Ester lava taka pfuxeliwa ku hanya la misaveni. U nga dondzra hi ta vavanuna ni vavasati va lipfumelo ka Ba-Heberu ndzrima 11. Xana vatizreli va ku dumbeka va Yehovha lava faka namunhla na vone va hlayiwa ‘valulami’? Ina. Xileswo, na vone va ta pfuxiwa.

19. ‘Lavamfani’ ku hlayiwa vamani? Xana Yehovha a ta va nyika mukhandlu wini?

¹⁹ ‘Lavamfani’, kumbe lava nga lulamangakiki, ku hlayiwa lava pfumaliki ndjombo ya ku tiva Yehovha. Nambi leswi va fiki, Yehovha a nga va dzrivalanga. A ta va pfuxa, a va nyika mukhandlu wa ku dondzra ha yene va va va mu tizrela.

20. Ha yini vambeni va nga ti pfuxiwa?

²⁰ Swi nga djula ku hlaya leswaku mani na mani lwa fiki a ta pfuxiwa? Im-him. Yesu a te ku ni lava nga tiki pfuxiwa. (Luka 12:5) I mani a taka tsrema leswaku manyana awa fanekeleka ku pfuka kumbe im-him? I Yehovha, muyavanyisi wa wugamu. Kambe a tlhele a beka Yesu ‘ku va muyavanyisi wa vahanyi ni wa vafi’. (Amintiṛo 10:42) Mun’wana ni mun’wana lweyi a taka yavanyisiwa swanga mubihi lweyi a nga djulikiki ku txintxa a nga ti pfuxiwa.​—Yana ka “Dondzra Swin’wana”, 19.

KU PFUXELIWA KU YA HANYA MATILWENI

21, 22. a) Xana swi hlaya yini ku pfuxeliwa ku ya hanya a matilweni? b) A ve mani wa ku sungula ku pfuxeliwa ku ya hanya a matilweni?

²¹ Bibele dzri tlhela dzri hi byela leswaku vambeni va ta ya hanya matilweni. Lava taka ya hanya matilweni va nyikiwa mizri ya moya nakone a va tlheleli a misaveni swanga vhanu va nyama kambe va ndzruluka vhanu va moya.

²² Yesu a ve mhunu wa ku sungula ku pfuxiwa hi ndlela leyi. (Yohan 3:13) Yehovha a pfuxe Yesu ntsrhaku ka masiku mazrazru na a dlayiwile. (Amapsalma 16:10; Amintiṛo 13:34, 35) Yesu a nga pfuxiwanga hi mizri ya nyama. Mupostola Petro a tlhamuxele leswaku Yesu ‘a dlayiwe nyameni, kambe a hanyisiwe a moyeni’. (1 Petros 3:18) Yesu a pfuxiwe swanga mhunu wa moya lwa nga ni ntamu swinene! (1 Ba-le-Korinte 15:3-6) Kambe Bibele dzri hlaya leswaku a a nga ti va yene ntsena.

23, 24. I vamani lava “ntlhambinyana” lava Yesu a vulavuliki ha vone, nakone i vangani?

²³ Loko a nga si fa, Yesu a byele valandzreli vakwe va ku dumbeka a ku: ‘Ndzri famba ndzri ya n’wi bekisela mbangu.’ (Yohan 14:2) Leswi swi hlaya leswaku van’wana ka valandzreli vakwe a va ta pfuxeliwa ku ya a matilweni leswaku va ya hanya na yene. I vangani? Yesu a hlaye leswaku a va ta va vatsrongo, ku nga “ntlhambinyana”. (Luka 12:32) Mupostola Yohane a ve ni xivoniso lexi mu kombiki ntsrengo wa vone. A vone Yesu a ‘yimi Nhaveni ya Siyoni [ya le matilweni], kun’we ni lava 144.000.’​—Apfuletelo 14:1, Testamente Ledrimpshwa Ni Mapsalma.

²⁴ Xana vakriste va 144.000 a va ta pfuxiwa siku muni? Bibele dzri hi byela leswaku a swi ta yentxeka ntsrhaku ka loko Yesu a sungule ku fuma matilweni. (1 Ba-le-Korinte 15:23) Swoswi hi hanya a nkameni wolowo, mfuzri vanyingi ka lava 144.000 va pfuxiwile va ya matilweni. Lava ha liki la misaveni a minkameni yezru, loko va fa va tekela ku pfuxeliwa ku ya hanya a matilweni. Nambitanu, ntalu wa vhanu va ta pfuxeliwa ku hanya a paradeyisini, la misaveni.

25. Hi ta dondzra yini ka ndzrima leyi landzrelaka?

²⁵ Ku nga li khale, Yehovha a ta ntsrhunxa vhanu hinkwavu ka lifu, mfuzri a dzri nge he ti va kone ni siku ni dzrin’we! (Dondzra Ezaya 25:8.) Kasi lava yaka matilweni va ya yentxa yini? Bibele dzri tlhamuxela leswaku va ta fuma na Yesu a Mfun’wini wa Xikwembu Nkulukumba. Hi ta dondzra leswi yengetelekiki hi ta mfumu lowo ka ndzrima leyi landzrelaka.