Xana Wutomi Byi Sungulise Kuyini?

‘A nhlovo ya wutomi yi le ku [Xikwembu Nkulukumba].’ (Amapsalma 36:9) Xana wa swi kholwa leswo? Vhanu van’wana va pimisa leswaku wutomi bye titumbulukela. Loko leswo a li ntiyiso, swi li hine he txhuka hi tumbuluka. Kambe loko Yehovha Xikwembu Nkulukumba a tumbuluxe wutomi, a a ni nkongometo wa kukazri, a hi swone ke?a Vona leswi Bibele dzri swi hlayaka mayelanu ni leswi wutomi byi sungulisiki xiswone ni swivangelo swa kuva hi kholwa mhaka leyo.

1. Xana tilo ni misava swi sungulise kuyini?

Bibele dzri li: ‘A ku sunguleni Xikwembu Nkulukumba a tumbuluxi tilo ni misava.’ (Genesis 1:1) Tintlhazri tinyingi ta pfumela leswaku tilo ni misava swi ve ni masungulo. Xana Xikwembu Nkulukumba a swi tumbuluxise kuyini? A tizrise moya wake—ku nga moya wa ku xwenga—akuva a hamba hinkwaswu leswi nga kone a tilweni ni la misaveni ku patsra ni swidzrimela, tinyeleti ni maplaneta.—Genesis 1:2.

2. Xikwembu Nkulukumba a yi hambele yini misava?

Yehovha a ‘misava a nga mi tumbuluxanga swa ku ka ndlela, kambe a mi vumbe akuva mi yakiwa’. (Ezaya 45:18) A hambe misava akuva yi va mbangu wa ku xonga wa ku hanya ka wone lani ku nga ni hinkwaswu leswi djulekaka akuva va hanya hi lani ku nga helikiki. (Dondzra Ezaya 40:28; 42:5.) Tintlhazri ti li a ku na planeta ni dzrin’we dzra ku fana ni misava. A va si na kuma planeta dzrin’wana ledzri nga ni hinkwaswu leswi mhunu a swi vilelaka akuva a hanya.

3. I yini lexi yentxaka vhanu va nga fani ni swihazri?

Ntsrhaku ka loko a hambe misava, Yehovha a tumbuluxe wutomi lebyi nga ka yone. Ku sungula a hambe minsinya ni swihazri. Hi ku landzrela ‘Xikwembu Nkulukumba a tumbuluxe mhunu hi xifaniso xakwe’. (Dondzra Genesis 1:27.) I yini lexi yentxaka vhanu va hambana ni swihazri? Hi leswaku leswi hi hambiwiki hi xifaniso xa Xikwembu Nkulukumba, hi nga kombisa matsrhamela yake ya ku fana ni lizrandzru ni wululami, nakone a hi hambe na hi ni wuswikoti bya ku dondzra tindzrimi, bya ku nyonxela mintxhumu ya ku khandhiwa ni wunanga, nakone ku hambana ni swihazri, ha swi kota ku gandzrela Mutumbuluxi wezru.

KELISISA

Vona wumboni lebyi kombisaka leswaku wutomi bye tumbuluxiwa ni leswaku wudzrunguli bya Bibele mayelanu ni ntumbuluku bya twisiseka. Dondzra leswi matsrhamela ya vhanu ma hi dondzrisaka swone hi Xikwembu Nkulukumba.

4. Wutomi bye tumbuluxiwa

Vhanu va dzrumisiwa hi mintxhumu leyi va yi khandhiki na va tekelela ntumbuluku. Kutani ke, hi mani lweyi a faneliwaka hi ku dzrumisiwa hi mintxhumu leyi nga khandhiwa ku sunguleni? Vonani VHIDIYU, mi gama mi bulisana hi xivutiso lexi landzrelaka:

VHIDIYU: Ku Dumba Xikwembu (2:43)

• I yini leswi tintlhazri ti nga swi tekelela ka ntumbuluku?

Yindlu yin’wana ni yin’wana yi khandhiwa yi tlhela yi yakiwa hi mhunu. Hi mani lweyi a khandhiki a tlhela a hamba mintxhumu leyi yi nga ka ntumbuluku? Dondzrani Ba-Heberu 3:4, mi gama mi bulisana hi swivutiso leswi landzrelaka:

• Ka mintxhumu leyi tumbuluxiwiki, hi yini leyi ku hlamalisaka ngopfu?

• Xana swa twala ku kholwa leswaku tilo ni misava ni hinkwaswu leswi nga ka swone swe tumbuluxiwa? Ha yini?

A wu swi tiva?

U nga kuma tinhlokomhaka ni mavhidiyu lama khanelaka hi mhaka leyi ka jw.org ka swiyenge leswi liki “Xana Swi Lo Endliwa?” ni “Mavonela Manyingi Mayelanu Ni Lomu Wutomi Byi Sukelaka Kone”.

‘Hikusa yindlu yini na yini yi ni muyaki wa yone kambe muyaki wa hinkwaswu hi ye Xikwembu Nkulukumba’

5. Wudzrunguli bya Bibele hi ntumbuluku bya twisiseka

VHIDIYU: Xana Leswi Swi Nga Tilweni Ne Misaveni Swe Tumbuluxiwa?—Xitlephu (3:51)

• Xana Bibele dzri dondzrisa leswaku misava ni leswi swi nga ka yone swi tumbuluxiwe hi 6 wa masiku ya 24 wa mawora?

• Xana u vona leswaku leswi Bibele dzri swi hlayaka hi ntumbuluku swa twisiseka? Ha yini u hlamula hi ndlela leyo?

Dondzrani Genesis 1:1, mi gama mi bulisana hi xivutiso lexi:

• Tintlhazri ti hlaya leswaku tilo ni misava swi ve ni masungulo. Xana leswi ti swi hlayaka, swi fanisa kuyini ni leswi wa ha ka ku swi dondzra a Bibeleni?

Van’wanyana va li kumbexana Xikwembu Nkulukumba a tumbuluxe swivumbiwa swa switsrongo swi gama swi titxintxa. Dondzrani Genesis 1:21, 25, 27, mi gama mi bulisana hi swivutiso leswi landzrelaka:

• Xana Bibele dzri dondzrisa leswaku Xikwembu Nkulukumba a hambe xivumbiwa xa xitsrongo xi gama xi titxintxa xi va hlampfi, xi va swihazri ni vhanu? Kumbe e yentxa hi ku tumbuluxa swivumbiwa hi ‘tinxaka’ ta swone?b

6. Mhunu a hlawuleke ngopfu ka swivumbiwa hinkwaswu swa Xikwembu Nkulukumba

Hine a hi fani ni swihazri leswi Yehovha a swi tumbuluxiki. Dondzrani Genesis 1:26, mi gama mi bulisana hi xivutiso lexi:

• Leswi hi hambiwiki xifanisweni xa Xikwembu Nkulukumba, xana wuswikoti byezru bya ku kombisa ntwelawusiwana, byi hi dondzrisa yini hi wumhunu bya Xikwembu Nkulukumba?

NKATSRAKANYU

Yehovha a tumbuluxe tilo ni misava ni hinkwaswu leswi hanyaka.

Mpfuxeto

• Xana Bibele dzri dondzrisa leswaku tilo ni misava swi sungulise kuyini?

• Xana Xikwembu Nkulukumba a tsrhike tinxaka ta leswi hanyaka swi titxintxa na swi sukela ka swivumbiwa swa switsrongo kumbe e swi tumbuluxa hinkwaswu?

• Ha yini vhanu va hlawuleke ngopfu ka swivumbiwa hinkwaswu?

HANDZRISISA

Vona swikombiso leswi nga kone ka ntumbuluku leswi kombaka leswaku ku ni mutumbuluxi.

“Xana Ntumbuluku Wu Hi Dondzrisa Yini?” (Pfukani!, Setembru wa 2006)

Vona ndlela leyi tatana a nga tlhamuxelaka n’wanake ha yone wudzrunguli mayelanu ni ntumbuluku.

“Yehovha . . . A Tumbuluxe Hinkwaswu” (2:37)

Xana mhaka ya leswaku swivumbiwa swe titumbulukela ya kumana ni Bibele?

“Xana Xikwembu Nkulukumba E Tizrisa Ku Txintxa Ka Mintxhumu Akuva A Tumbuluxa Wutomi?” (Leswi kumekaka ka jw.org)

Kambisisa ku vona leswaku mazrambu ya khale ni ku kambeta ka tintlhazri swi kombisa leswaku wutomi bye tumbuluxiwa kumbe bye titumbulukela.

A Origem da Vida—Cinco Perguntas Que Merecem Resposta (xibukwana)