Xana Minkhuvu Hinkwayu Ya Yamukeleka Ka Xikwembu Nkulukumba?

Yehovha a djula leswaku hi tikholisa hi wutomi, nambi ku pfana hi tihambela minkhuvu. Kambe xana maferiyadu ni minkhuvu hinkwayu swa yamukeleka ka Xikwembu Nkulukumba? Hi nga swi kombisisa kuyini leswaku ha mu zrandzra Yehovha a mhakeni leyi?

1. Ha yini minkhuvu yinyingi yi mu khunguvanyisa Yehovha?

U nga ha hlamalisiwa hi ku tiva leswaku minkhuvu yinyingi leyi humaka ka wuhedeni, a yi seketeliwi mbangu Bibeleni. Minkhuvu leyo yi nga ha va yi yelana ni wugandzreli bya madzrimi. Yi nga ha va yi yelana ni wudemona kumbe yi seketeliwe ka ndondzro ya leswaku a moya a wu fi. Yimbeni yi sukela ka mihivahivana kumbe ka ku kholwa ka tindjombo. (Ezaya 65:11) Yehovha a ma byela leswi malandzra yake: ‘Humani makazri kwavu . . . n’wi nga khumbeni leswa xambya.’—2 Ba-le-Korinte 6:17.a

2. Xana Yehovha a titwisa kuyini hi minkhuvu leyi dzrumisaka vhanu hi ndlela leyi hoxekiki?

Yehovha a li hi fanela ku tivonela ku wela ka ntlhamu wa ku ‘dumba mhunu’. (Dondzra Yeremiya 17:5.) Phela maferiyadu mambeni ma dzrumisa vafumi kumbe masotxha. Mambeni ma kulungela mimfungu ya tiko ni masiku ya ntsrhunxeko. (1 Yohan 5:21) Mambeni mfuzri, ma dzrumisa tinhlengeletanu ta politika ni ta ku hanyisana ka vhanu. Xana Yehovha a nga titwisa kuyini loko ho dzrumisa mhunu kumbe nhlengeletanu ya kukazri, ngopfungopfu loko yi lwisana ni nkongometo Wake?

3. I yini swi nga yentxaka leswaku minkhuvu yi nga yamukeleki?

Bibele dzri sola ‘ku popswa, mafexta [ya pongwe] ni ku nwa [ku tlula mpimu]’. (1 Petros 4:3) A minkhubyini yimbeni a vhanu a va lawuleki, nakone va tikhoma hi ndlela ya ku biha. Akuva hi tama hi va vanghanu va Yehovha, hi fanela ku fambela kule ni mahanyela lawo ya ku biha.

KELISISA

4. Tingawula minkhuvu leyi Yehovha a hi nyenyaka

Dondzrani Ba-le-Efesa 5:10, mi gama mi bulisana hi swivutiso leswi:

• Hi fanela ku zranga hi tiyiseka hi yini na hi nge si na hlengela ka feriyadu dzra kukazri?

• He wani maferiyadu lama tolovelekiki lomu u tsrhamaka kone?

• U vona leswaku maferiyadu lawo ma mu nyonxisa Yehovha?

Hi xikombiso, u sama u tivutisa leswaku Xikwembu Nkulukumba a pimisa yini hi minkhuvu ya ku tlangela masiku ya ku pswaliwa? A ku na mbangu a Bibeleni ku khaneliwaka hi mugandzreli wa Yehovha lweyi a samiki a tlangela siku dzra ku pswaliwa, kambe dzra khanela hi minkhuvu yibidzri ya ku tlangela masiku ya ku pswaliwa, leyi yentxiwiki hi vhanu lava a va nga mu tizreli. Dondzrani Genesis 40:20-22 na Matewu 14:6-10. Ntsrhaku, bulani hi swivutiso leswi:

• Xana minkhuvu leyibidzri ya masiku ya ku pswaliwa, yi fana hi yini?

• Hi ku ya hi dzrungula dzra Bibele, u vona leswaku Yehovha a titwisa kuyini hi masiku ya ku pswaliwa?

Swi nga yentxeka wa ha tivutisa leswi: “Xana Yehovha a ni mhaka hakunene loko ni hlengela ka nkhuvu wa ku pswaliwa ka mhunu, kumbe wumbeni lowu lwisanaka ni matsralwa?” Dondzrani Eksoda 32:1-8. Ntsrhaku, vonani VHIDIYU mi gama mi bulisana hi swivutiso leswi landzrelaka.

VHIDIYU: Maferiyadu Ni Minkhuvu Leyi Khunguvanyisaka Xikwembu Nkulukumba (5:07)

• Ha yini hi fanela ku tiyiseka hi leswi yamukelekaka ka Yehovha?

• Hi nga swi yentxisa kuyini?

Hi nga swi tivisa kuyini leswaku nkhuvu wa kukazri wa mu khunguvanyisa Xikwembu Nkulukumba kumbe im-him?

• Xana wu seketeliwe ka tindondzro leti lwisanaka ni Matsralwa? Akuva u swi gungula, kambisisa lomu wu sukeliki kone.

• Xana wu khuzela vhanu, tinhlengeletanu kumbe tiko hi ndlela leyi nga fanelangakiki? Hi dzrumisa Yehovha ku tlula mhunu kumbe ntxhumu wini na wini nakone hi dumba leswaku hi yene a taka lulamisa timhaka ta misava

  .

• Xana swihena ni mintizro ya kone ka minkhuvu leyo, swi lwisana ni milawu ya Yehovha? Hi fanela ku tsrhama na hi basile a mahanyeleni.

5. Pfuna vambeni ku hlonipha leswi u swi pfumelaka

VHIDIYU: Tlhamuxela Lipfumelo Dzraku Hi Lizrandzru (2:01)

Dondzrani Matewu 7:12, mi gama mi bulisana hi swivutiso leswi:

• Hi ku ya hi ndzrimana leyi, xana u fanela ku byela maxaka yaku lama ngeke vapfumeli leswaku a ma fanelanga ku tlangela feriyadu dzra kukazri?

• Xana u fanela ku yentxa yini akuva u tiyisekisa maxaka yaku leswaku nambileswi u nge tiki tipatsra na vone ka nkhuvu wa kukazri, wa va zrandzra u tlhela u zron’weka ha vone?

6. Yehovha a djula leswaku hi nyonxa

Yehovha a djula leswaku hi tikholisa hi minkama ya ku nyonxisa ni maxaka ni vanghanu vezru. Dondzrani Eklesiasta 8:15, mi gama mi bulisana hi xivutiso lexi:

• Xana ndzrimana leyi yi swi kombisisa kuyini leswaku Yehovha a djula hi nyonxa?

Yehovha a djula leswaku vhanu vake va tikholisa va tlhela va hungata xikan’we. Vonani VHIDIYU akuva mi vona ntiyiso wa mazritu lawo a tinhlengeletanwini tezru ta matiko.

VHIDIYU: Ku Kombisa Vamakwezru Malwandla A Tinhlengeletanwini Ta Matiko (5:40)

Dondzrani Ba-le-Galatia 6:10, mi gama mi bulisana hi swivutiso leswi landzrelaka:

• Xana swi djula kuva hi hlengela ka maferiyadu ya tiko swanga ndlela ya ku yentxela vambeni ‘leswinene’?

• I ku nyika ka muxaka muni loku nga ku yentxaka u nyonxa? Hi loko u sindzriseka ku nyikela hi leswi a nga siku dzra kukazri kumbe hi loko swi sukela mbilwini?

• Timboni tinyingi minkama yimbeni ti hambela vana xinkhubyana, nambi ku va nyika swihiwa na va nga swi yimelanga. Loko u ni vana, he yini mintxhumu ya ku hlawuleka leyi u nga va hambelaka yone?

NKATSRAKANYU

Yehovha a nyonxela kuva hi tikholisa ni maxaka ni vanghanu. Kambe a djula hi tingawula minkhuvu leyi mu khunguvanyisaka.

Mpfuxeto

• He swini swivutiso leswi hi nga tihambaka swone akuva hi kambisisa leswaku nkhuvu wa kukazri wa mu khunguvanyisa Yehovha kumbe im-him?

• Hi nga wu pfunisa kuyini ndangu wezru ni vanghanu ku twisisa swiboho swezru mayelanu ni maferiyadu?

• U swi tivisa kuyini leswaku Yehovha a djula hi nyonxa hi tlhela hi tikholisa?

HANDZRISISA

Pimisa hi maferiyadu ya kukazri lawa vakriste va nga hlengeliki ka wone.

“Ha Yini Timboni Ta Yehovha Ti Nga Hlengeli Ka Maferiyadu Ya Kukazri?” (Leswi kumekaka ka jw.org)

Vona mune wa swivangelo leswi hi kholwisaka leswaku ku tlangeliwa ka masiku ya ku belekiwa a ku yamukeleki ka Xikwembu Nkulukumba.

“Ha Yini Timboni Ta Yehovha Ti Nga Tlangeli Masiku Ya Ku Belekiwa?” (Leswi kumekaka ka jw.org)

Vona ndlela leyi vatsrongwana lava zrandzraka Yehovha va nga mu nyonxisaka ha yone hi masiku ya maferiyadu.

U Wa Lisima Ka Yehovha (11:36)

Vakriste va ntsrandzravahlayi va hlawule kuva va nga di Khisimusi. Xana va titwisa kuyini hi xiboho lexo?

“Va Kume Ntxhumu Wa Ku Yampswa” (Xihondzro Xa Ku Zrindzra, 1 ka Dezembru wa 2012)