XIDONDZRO 38
Tlangela Nyiko Ya Wutomi
Wutomi byi tale hi mintxhumu ya ku xonga ni ya ku nyonxisa leyi hi nga tikholisaka ha yone. Nambiloko hi kumana ni swikazratu, ku ni swa kukazri swa ku nyonxisa hi wutomi. Hi nga swi kombisa hi ndlela yini leswaku ha yi tlangela nyiko ya wutomi? Nakone he xini xivangelo xa lisima xa ku va hi yentxa leswo?
1. Ha yini hi fanela ku tlangela nyiko ya wutomi?
Hi fanela ku tlangela nyiko ya wutomi hikusa i nyiko leyi pfaka ka Papayi wezru wa lizrandzru Yehovha. Yene i ‘nhlovo ya vutomi’, leswi liki, hi yene a nga tumbuluxa wutomi. (Amapsalma 36:9) ‘Hi yene lwa nyikaka hinkwavu a vutomi ni hika ni hinkwaswu.’ (Amintiṛo 17:25, 28) Yehovha a hi nyike leswi hi swi vilelaka akuva hi hanya. Kambe ku tlula leswo, a hi nyika hinkwaswu leswi hi swi vileleka akuva hi nyonxela wutomi.—Dondzra Amintiṛo 14:17.
2. Hi nga mu kombisa kuyini Yehovha leswaku ha yi tlangela nyiko ya wutomi?
Ku sukela loko u ve khuzrini dzra mamana waku, Yehovha awa zron’weka ha wene. Mun’we wa vagandzreli va Xikwembu Nkulukumba, Davhida, a huhuteliwe ku hlaya leswi: ‘A mahlu yaku ma byi vonile vutule byanga.’ (Amapsalma 139:16) Yehovha a byi nyika lisima dzrikulu wutomi byaku. (Dondzra Matewu 10:29-31.) Swi mu vavisa ngopfu loko hi vomu mhunu a dlaya mumbeni kumbe a tisunga.a (Eksoda 20:13) Swi tlhela swi mu vavisa loko hi beka wutomi byezru kumbe bya vambeni a nghozini. Loko hi hlayisa wutomi byezru ni bya vambeni, hi komba Yehovha leswaku ha yi tlangela nyiko ya ku hlamalisa ya wutomi.
KELISISA
Kambisisa tindlela tin’wana leti u nga kombisaka ku tlangela kwaku a nyiko ya wutomi.
3. Hlayisa lihanyu dzraku
Vakriste lava tinyiketeliki va tizrisa leswi va nga na swone a wuton’wini byavu akuva va tizrela Yehovha. Va nyikela mimizri yavu ka Xikwembu Nkulukumba swanga gandzrelo. Dondzra Ba-le-Roma 12:1, 2, mi gama mi bula hi swivutiso leswi:
Hi ku ya hi tindzrimana leti, i yini lexi fanelaka ku ku susumetela ku hlayisa wutomi byaku?
He tini tindlela timbeni leti u nga yentxaka leswo ha tone?
4. U nga beki wutomi byaku ni bya van’wana a nghozini
Bibele dzri hi kutxa kuva hi tivonela ka swiyentxo leswi nga hi bekaka nghozini. Vonani VHIDIYU akuva u dondzra mintxhumu ya kukazri leyi u nga yi yentxaka leswaku u tisizrelela.
Dondzrani Amaproverbia 22:3, mi gama mi bulisana hi leswi wene ni vambeni mi nga swi yentxaka akuva mi tisizrelela . . .
a kaya kwaku.
loku u li ku tizreni.
loko u li ka mintlangu ya ku tiyisa mizri.
loko u li ku fambiseni ka movha kumbe xa ku famba ha xone.
5. Bekela lisima wutomi bya n’wana lwa nga siki na pswaliwa
Hi ndlela ya ku xonga, Davhida a vulavule hi leswi Yehovha a zron’wekisaka xiswone hi wutomi ni ku kula ka n’wana lwa nga siki na pswaliwa. Dondzrani Amapsalma 139:13-17, mi gama mi bulisana hi xivutiso lexi:
A matihlweni ya Yehovha, xana wutomi byi sungula loko wansati a kuma nyimba kumbe loko n’wana kutani a pswaliwile?
Yehovha a nyikele nawu ka Israyele wa khale lowu a wu sizrelela vamamana ni vanavu lava nga siki na pswaliwa. Dondzrani Eksoda 21:22, 23, mi gama mi bulisana hi swivutiso leswi landzrelaka:
Xana Yehovha a mu vonisa kuyini mhunu lweyi hi mphazamu a dlayaka n’wana lweyi a nga siki na pswaliwa?
Xana Yehovha a titwisa kuyini loko mhunu o dlaya n’wana lwa nga siki na pswaliwa ha vomu?b
Wene ke, u titwisa kuyini hi vonela dzra Xikwembu Nkulukumba a mhakeni leyi?
Nambi wansati lweyi a yi tlangelaka nyiko ya wutomi, a nga ha txhuka a vona leswaku ku xixa nyimba i ndlela ya ku huma ka timhaka. Dondzrani Ezaya 41:10, mi gama mi bulisana hi swivutiso leswi:
Loko wansati a sindzrisiwa ku xixa nyimba, a nga wu kuma kwini mpfunu? Ha yini u hlaya leswo?
VAN’WE VA LI: “A wansati a ni mfanelo ya ku hlawula loko a djula ku xixa nyimba. Phela ka, i mizri wake.”
I yini lexi ku kholwisaka leswaku Yehovha a nyika lisima wutomi bya mamana ni bya n’wana lwa nga siki na pswaliwa?
NKATSRAKANYU
Bibele dzri hi dondzrisa ku zrandzra, ku hlonipha ni ku hlayisa nyiko ya wutomi leyi Yehovha a hi nyikiki yone. Leswi swi patsra wutomi byezru ni bya vambeni.
Mpfuxeto
Ha yini wutomi bya mhunu byi li bya lisima ka Yehovha?
Yehovha a titwisa kuyini loko mhunu a dlaya mhunu mun’wana hi vomu?
I yini lexi u xi nyonxelaka ka nyiko ya wutomi?
HANDZRISISA
U nga mu tlangelisa kuyini Yehovha hi nyiko ya wutomi?
Kuma nhlamulo ya xivutiso lexi liki, Xana Xikwembu Nkulukumba a ta mu dzrivalela wansati lweyi a samiki a xixa nyimba?
“Xana Bibele Dzri Li Yini Hi Ku Xixa Nyimba?” (Leswi kumekaka ka jw.org)
Dondzra ndlela leyi Xikwembu Nkulukumba a titwaka ha yone hi wutomi loko u hlawula swihungatiso.
Swi li yini loko mhunu a va ni miyanakanyu ya ku tisunga? Vona ndlela leyi Bibele dzri nga pfunaka ha yone.
a Yehovha a zron’weka hi ndlela leyikulu hi lava nga ni mbilu ya ku tsrhoveka. (Amapsalma 34:18) A yi twisisa ngopfu miyanakanyu leyi nga yentxaka mhunu a djula ku tisunga nakone a djula ku mu pfuna. Akuva u vona ndlela leyi mpfunu wa Yehovha wu nga mu pfunaka ha yona mhunu lweyi a nga ni mimpimiso ya ku tisunga, dondzra nhlokomhaka leyi liki “Ni Djula Ku Fa Xana Bibele Dzri Nga Ni Pfuna Loko Ni Teliwa Hi Miyanakanyu Ya Ku Tisunga?” leyi kumekaka ka xiyenge Handzrisisa ka xidondzro xoxi.
b Lava samiki va xixa nyimba a va fanelanga va titwa nandzru ku tlula mpimu hikusa Yehovha a nga va dzrivalela. Akuva u kuma dzrungula ledzri yengetelekiki, vona nhlokomhaka leyi liki “Xana Bibele Dzri Li Yini Hi Ku Xixa Nyimba?” ka xiyenge lexi liki Handzrisisa ka xidondzro xoxi.