Xana A Wu Swi Tiva?

Xana mhunu a a yentxisa kuyini akuva a yendzra hi ngalawa a minkameni ya khale?

HAKANYINGI, a tingalawa ta ku teka vhanu ntsena a ti nga li kone a minkameni ya Pawulo. Akuva va teka liyendzro, vhanu hi ntolovelo a va vutisela leswaku kumbexana va tiva ngalawa ya van’wamabindzru kumbe ya nhundzru leyi a yi ya a mbangu wa kukazri ni leyi a yi pfumela ku teka vhanu. (Min 21:2, 3) Nambi loko a ngalawa yi nga kongomi lomu muyendzri a yaka kone a a yi khwela. Loko a tlhasa mpolweni ya kukazri a a djuletela a ngalawa yimbeni leyi a yi ta mu pfuna ku tama a tsrhindzrekela lomu a yaka kone.​—Min 27:1-6.

A ku yendzra hi ngalawa a ku yentxiwa hi nkama wa kukazri ndzreni ka lembe, nakone a ku nga li na masiku lama bekiwiki. Handle ka maxela lama nga liki manene, a ngalawa a yi nga suki loko vinyi va yone, lava landzrelelaka swiyilayila, ve txhuka va vona minhlolo, ya ku fana ni gwavava na dzri yimbelela kumbe ku vona ngalawa ya kukazri na yi tsrhovekile a nkingeni wa lwandle. Vinyi va ngalawa a va londzrovota a moya, xileswo, loko wu va pfuna a va gwimba a tsranga akuva va suka. Loko muyendzri a kuma ngalawa leyi a yi ta mu teka, a a ya ka vavundzramani ni ntsrhwalu wakwe, a ya yimela ku twa xitiviso xa ku suka ka ngalawa.

N’wamatimu Lione Casson a li: “A tiko dzra Roma a dzri ni mayentxela lawa a ma pfuna vhanu ku kuma ngalawa leyi taka va teka va nga zanga va vutisela. A mpolwe a ku kumeka lomu nambu wa Tiber wu dibaka kone. A doropeni dzra le Ostia a ku ni swikritori swinyingi, nakone ku tala ka swikritori leswo a swi lumba vinyi va tingalawa va mimbangu ya ku siyana-siyana va ku fana ni va le Narbone [swoswi ku tiviwaka swanga França], va le Carthage [swoswi ku tiviwaka swanga Tunísia]. . . ni va mimbangu yin’wana. Kutani loko mhunu a djula ku yendzra a swo djula ntsena leswaku a lavisa a xikritori xin’wana ni xin’wana lexi ngalawa ya xone a yi khaluta kumbe a yi ya lomu a a ya kone”.

Ku yendzra hi ngalawa swi va pfune ngopfu vhanu hikusa a swi kahlula. Kambe hi minkama ya ku tala Pawulo a tsrhovekeliwe hi ngalawa ka tiyendzro takwe ta wuzrumiwa.​—2Ko 11:25.