Xana Misava Leyi Yi Ta Hela?

Swi nga yentxeka u same u swi twa leswaku Bibele dzri li misava yi ta hela. (1 Yohan 2:17) I nga va leswaku swi tlhamuxela ku hela ka vhanu? Xana misava leyi hi yi kandzretelaka yi ta va hula ledzri nga liki na wutomi kumbe yi ta helisiwa hi ku helela?

NHLAMULO YA BIBELE KA SWIVUTISO LESWIBIDZRI I IM-HIM!

**I Yini Leswi Nga Tiki Hela?**

VHANU

Leswi Bibele dzri swi hlayaka: Misava leyi, Xikwembu Nkulukumba ‘a nga mi tumbuluxanga swa ku ka ndlela kambe a mi vumbi akuva mi yakiwa.’—EZAYA 45:18.

Tiva ledzri tsrandzreliwiki hi tinhava ni nhova.

MISAVA LEYI HI YI KANDZRETELAKA

Leswi Bibele dzri swi hlayaka: ‘Lixaka lin’wana la hundzra, kutani ku humelela lin’wana, kambe misava mi tsrhama hi la ku nga helikiki.’—EKLESIASTA 1:4.

LESWI SWI TLHAMUXELAKA SWONE: Hi ku ya hi Bibele, a misava leyi hi yi kandzretelaka yi nga ti helisiwa. Ku ta tsrhamiwa ka yone minkama hinkwayu. Xana i yini ku hela ka misava?

PIMISA HI LESWI: A Bibele dzri fanisa ku hela ka misava leyi ni leswi yentxekiki a masikwini ya Nowa. A nkameni lowu khalutiki, a misava a “mi tele tihanyi”. (Genesis 6:13) Kambe Nowa a a li wanuna wa ku lulama. Hi leswi yentxiki Xikwembu Nkulukumba a nga helisi Nowa ni ndangu wake, kambe a helisa vhanu lava ku biha hi ku tizrisa ndhambi. Mayelanu ni leswi yentxekiki a nkameni lowu khalutiki, a Bibele dzri li: ‘A misava ya nkama lowu[ya] mi suvisiwi hi leswo, hi ku fukumetiwa hi mati.’ (2 Petros 3:6) A ndzrimana leyi yi komba leswaku misava ya nkama wolowo yi helisiwile. Kambe hi ku kongoma i yini leswi helisiwiki? A ku vanga misava leyi hi yi kandzretelaka, kambe ku ve vhanu va ku biha lava a va tsrhama ka yone. Kutani loko Bibele dzri vulavula hi ku hela ka misava a dzri hlayi ku helisiwa ka misava leyi hi yi kandzretelaka, kambe dzri hlaya vhanu va ku biha lava hanyaka ka yone ni xiyimu xa mintxhumu lexi va xi hambiki.

**I Yini Leswi Taka Hela?**

SWIKAZRATU NI WUBIHI

Leswi Bibele dzri swi hlayaka: ‘Ku sala nkamanyana, lwemfani a ta va a nge he kone. U ta langusa mbangu lowu faka a tsrhami ku wone, kutani a ta va a nge he kone. Kambe lava ku simama va ta titekela misava, va nyonxa ku zruleni lokukulu.’—AMAPSALMA 37:10, 11.

Mifoto: 1. Vayivi lava tifuneketiki liso, va humaka xitolo ni mintxhumu leyi va yi yiviki. 2. Wanuna wa kukazri a xavaka mun’wana hi mala wa ku tala hi mali.

LESWI SWI TLHAMUXELAKA SWONE: Ndhambi ya le masikwini ya Nowa a yi byi heliselanga wugamu a wubihi. A ntsrhaku ka ndhambi, vhanu lava ku biha va tlhele va xanisa vhanu van’wana. Kambe ku nga li khale Xikwembu Nkulukumba a ta helisa wubihi. Hi lani mutsrali wa Amapsalma a hlayiki ha kone, ‘lwemfani a ta va a nge he kone’. Xikwembu Nkulukumba a ta helisa wubihi hi ku tizrisa Mfumu wakwe—ku nga Mfumu wa matilo lowu taka fuma vhanu va ku lulama a misaveni hinkwavu.

PIMISA HI LESWI:Xana lava fumaka misava swoswi va ta wu seketela Mfumu wa Xikwembu Nkulukumba? Swoswi Bibele dzri komba leswaku va nga ti yentxa tanu. Va ta lwa ni Mfumu wa Xikwembu Nkulukumba, ku nga ntxhumu lowu nge ke wutlhazri. (Amapsalma 2:2) Swi ta gamisa ku yini? Mfumu wa Xikwembu Nkulukumba wu ta helisa mimfumu hinkwayu ya vhanu, kambe wone wu ta ‘va kone hinkwayu minkama’. (Daniel 2:44) Kambe ha yini wuhosi bya vhanu byi fanela ku helisiwa?

SWA DJULEKA—Ku Helisiwa Ka Mafumela Ya Vhanu.

Leswi Bibele dzri swi hlayaka: ‘A mhunu lwa fambaka a nga na ku lulamisa mavangwa yakwe.’—YEREMIYA 10:23.

Vhanu lava khalutaka hi ka khumbi ledzri nga ni mazritu ya lava djulaka ku vhotiwa.

LESWI SWI TLHAMUXELAKA SWONE: Vhanu a va vumbeliwanga ku tifuma. A va swi koti ku fuma vhanu van’wana ni ku tlhantlha swikazratu swavu.

PIMISA HI LESWI: Buku dzra Britannica Academic dzri hlaya leswaku mimfumu ya tiko dzrin’wana ni dzrin’wana yi tikomba na yi nga swi koti ku “tlhantlha swizralanganya leswi nga kone misaveni hinkwayu, swa ku fana ni wusweti, ndlala, mavabyi, timhangu ta ntumbuluku ni tiyimpi kumbe tihanyi tin’wana”. Dzri tlhela dzri ku: “Van’wana . . . va kholwa leswaku lexi nga helisaka swizralanganya leswa ha kunene i ntsena mfumu wun’we lowu zrangelaka misava hinkwayu.” Kambe, nambi loko mimfumu hinkwayu ya vhanu yo tlhangana, misava a ya ha ta tama yi fumiwa hi vhanu lava kalaka va nga hetisekanga, lava hlulekaka ku tlhantlha swizralanganya leswi hlayiwiki la henhla. Mfumu wa Xikwembu Nkulukumba hi wone ntsena wu nga ni ntamu wa ku tlhantlha swizralanganya hinkwaswu swa misava hi lani ku nga helikiki.

Xileswo, hi ku ya hi Bibele, vhanu lavanene a va fanelanga ku txhava ku hela ka misava, ku nga xiyimu xa ku biha lexi hi hanyaka ka xone. Matsrhan’wini ya leswo, va fanela ku nyonxa hikusa misava leya khale ni leyi honekiki yi ta siviwa hi misava leyimpswha, leyi hlamalisaka ya Xikwembu Nkulukumba.

Xana hinkwaswu leswi swi ta yentxeka dzrini? Nhlokomhaka leyi landzrelaka yi ta nyikela nhlamulo leyi kumekaka a Bibeleni.