Tikazrateli Ku Kuma Mintxhumu Leyimpshwa Loko U Dondzra

Nkama lowu hi tilulamiselaka akuva hi dondzra, hi nga ha tivutisa leswaku i ‘I yini leswi ni yimeliki ku swi dondzra?’ I swinene ku dzrimuka leswaku nambiloko hi tiyimisele ku dondzra mhaka ya kukazri, a swi hlayi swone leswaku a ku na ntxhumu wumpshwa lowu Yehovha a djulaka leswaku hi wu dondzra. Hi nga swi twisisa hi ndlela yini leswi Yehovha a dzringisaka ku hi dondzrisa swone?

Khongota u kombela wutlhazri. Kombela ka Yehovha akuva a ku pfuna ku twisisa leswi a djulaka kuva u swi dondzra swoswi. (Yak. 1:5) U nga gameli ka leswi kutani u swi tivaka ntsena.—Amapr. 3:5, 6.

Pfumelela ntamu wa zritu dzra Xikwembu Nkulukumba wu tizra wuton’wini byaku. “A zritu dzra Xikwembu Nkulukumba dzra hanya.” (Heb. 4:12) Kutani, minkama hinkwayu loko hi dondzra Bibele, hi nga ha dondzra ntxhumu lowumpshwa nakone dzri nga hi pfuna hi tindlela ta ku hambanahambana a wuton’wini byezru. Kambe leswo swi to yentxeka ntsena loko hi pfumela leswaku hi vilela ku dondzra leswi Xikwembu Nkulukumba a hi dondzrisaka swone.

Tlangela hinkwaswu leswi Yehovha a swi tizrisaka akuva a hi dondzrisa. Swakuda swa moya leswi Yehovha a hi nyikaka swone swi fana ni ‘fexta dzra tinyama leti noniki’. (Eza. 25:6) U nga tluli ku dondzra timhaka leti u yanakanyaka leswaku a ti nge ti ku nyonxisa. Loko u dondzra timhaka toleto u ta va na u pfumelela kuva Xikwembu Nkulukumba a ku pfuna leswaku u va mhunu lwenene nakone u ta swi zrandzra ku dondzra hi timhaka toleto!