U Nga Hlweli Ku Babatisiwa

1. He swini swin’we swa swivangelo leswinene swa kuva u babatisiwa?

XANA wa mu zrandzra Yehovha Xikwembu Nkulukumba, lweyi a ku nyikiki xihiwa xin’wana ni xin’wana lexinene? Xana wa swi djula ku kombisa leswaku wa mu zrandzra? Ndlela leyinene ya ku yentxa leswo i ku tinyiketela kwake ni ku kombisa ku tinyiketela koloko hi kuva u babatisiwa. Mintxhumu leyibidzri yi ku yentxa u hamba xiyenge xa ndangu wa Yehovha. Swanga mabindzru, Papayi waku tlhelo munghanu waku a ta ku hlayisa a tlhela a ku kongomisa hikusa u lumba yene. (Amaps. 73:24; Eza. 43:1, 2) Handle ka leswo, loko u nyiketela wutomi byaku ka Yehovha u tlhela u babatisiwa u ta va ni mukhandlu wa ku hanya hi lani ku nga helikiki.—1 Pet. 3:21.

2. Hi ta vona yini ka xidondzro lexi?

² Xana ku ni lexi ku sivelaka kuva u babatisiwa? Loko swi li hi ndlela leyo, tiyiseka leswaku a u wuswaku, ku ve ni vhanu vanyingi lava na vone swi djuliki ku va va yentxa ku txintxa ka mahanyela yavu ni ka ndlela leyi a va pimisa ha yone leswaku va faneleka kuva va babatisiwa. Swoswi va tizrelaka Yehovha hi ku hiseka nakone na va nyonxile. U nga dondzra yini ka van’we lava babatisiwiki a dzaneni dzra ku sungula? A hi voneni swihinga leswi va lwisaniki na swone ni ku tlhela hi vona leswi hi nga swi dondzraka ka xikombiso xavu.

VASAMARIYA VA BABATISIWILE

3. He swini swihinga leswi Vasamariya swi nga yentxekaka va kumane na swone akuva va babatisiwa?

³ A minkameni ya Yesu, a Vasamariya a a li lixaka dzra wukhongoti lebyi a byi kumeka kusuhi ni khale ka Xikeme ni Samariya a n’walungu wa Yudeya. Na va nge si na babatisiwa, Vasamariya a va fanele va va ni wutivi lebyi heleliki hi Zritu dzra Xikwembu Nkulukumba. Vasamariya a vo pfumela leswaku i ntsena ntlhanu wa mabuku lawa ma huhuteliwiki ku nga Genesis ku ya ka Deuteronoma kumbexana ni buku dzra Yoxuwa. Nambitanu, Vasamariya a va yimela ku ta ka Mesiya hi ku ya hi xidumbiso xa Xikwembu Nkulukumba lexi kumekaka ka Deuteronoma 18:18, 19. (Yoh. 4:25) Akuva va babatisiwa, a va fanela ku pfumela leswaku Yesu i Mesiya lweyi a dumbisiwiki. “Vasamariya vanyingi” va yentxe swoleswo. (Yoh. 4:39) Van’wana swi nga yentxeka swi djule kuva va hlula xihlawuhlawu lexi a xi li kone a makazri ka Vasamariya ni Vayuda.—Luk. 9:52-54.

4. Hi ku ya hi Mintizro 8:5, 6, 14, xana van’we va Vasamariya va yangulise kuyini loko Filipi a va zrezrela?

⁴ I yini leswi pfuniki Vasamariya akuva va babatisiwa? Loko Filipi wa muevhangeli a va zrezrele hi “ta Kriste”, van’we ka Vasamariya “va yamukele zritu dzra Xikwembu Nkulukumba”. (Dondzra Mintizro 8:5, 6, 14.) Nambileswi Filipi a a li Muyuda, Vasamariya va mu yingisetile. Swi nga yentxeka va dzrimuke tindzrimana ta kukazri ta ntlhanu wa mabuku ya ku sungula lawa ma tsraliwiki ha Moxe lawa ma kombisaka leswaku Xikwembu Nkulukumba a nga na xihlawuhlawu. (Deut. 10:17-19) Hi ndlela ya kukazri, a va “zreya ndleve ka leswi Filipi a a swi hlaya” mayelanu na Kriste nakone swi ve livaleni kwavu leswaku Xikwembu Nkulukumba a a mu seketela Filipi. A tlhele yentxa mahlolana manyingi lawa a ma patsra ku daha lava va vabyaka ni ku hlongola mademona.—Mint. 8:7.

5. I yini leswi hi nga swi dondzraka ka Vasamariya?

⁵ Vasamariya a va ta va va pfumelele leswaku xihlawuhlawu xi va sivela ku yentxa nhluvuku kambe a va swi pfumelelanga leswo swi yentxeka. A Vasamaria a va hlwelanga ku babatisiwa ntsrhaku ka loko va tiyisekile leswaku Filipi a a va dondzrisa ntiyiso. Loko wudzrunguli bya Bibele byi tlhamuxela, byi li: “Loko Filipi a tlhase a va zrezrela madzrungula lamanene mayelanu ni Mfumu wa Xikwembu Nkulukumba ni vito dzra Yesu Kriste, vavanuna ni vavasati va mu kholwile kutani va babatisiwa.” (Mint. 8:12) Xana wa tiyiseka leswaku Zritu dzra Xikwembu Nkulukumba i ntiyiso ni leswaku a Timboni ta Yehovha ti hlula xihlawuhlawu nakone ti tikazratela ku komba van’wana lizrandzru dzra hakakunene swanga mfungu wa vakriste va ntiyiso? (Yoh. 13:35) Loko u tiyiseka u nga ha di nkama, teka xiboho na u dumba leswaku Yehovha a ta ku tovokisa.

6. U nga pfuneka hi ndlela yini ka xikombiso xa Ruben?

⁶ Ruben wa le Alemanha, a kulisiwe ka ndangu lowu a va li Timboni ta Yehovha. Nambitanu, na a ha li mumpshwa a a ni ku ganaganeka ka leswaku Yehovha a kone hakakunene. Xana a hlule ku ganaganeka koloko hi ndlela yini? Loko a xiye leswaku a ni ku ganaganeka mayelanu ni mhaka leyo a vone swi yampswa ku dondzra hi yone. A te: “Ka dondzro yanga ya ximhunu ni vone leswaku a ni fanele ku hlula ku ganaganeka koloko hi ku tiva leswi a nga ntiyiso ni leswi a nga madzrimi.” Swi djule kuva ni dondzra tinhlokomhaka leti khanelaka hi ku titumbulukela ka mintxhumu hi ku phindhaphindha. Rubeni a dondzre buku ledzri liki: “Existe um Criador Que Se Importa com Você?” Buku ledzri dzri mu pfune ngopfu swinene Ruben. Kutani yene a tibyele leswi: “Impela Yehovha i wa hakakunene.” Hi nkama lowu a a yendzrela ntsindzra wa misava hinkwayu, Ruben a hlamale ngopfu lakakuva a yengesele ku tlangela kwake loko a vona wumun’we bya wumakwezru a misaveni hinkwayu. Loko a tlhelele a Alemanha, Ruben a babatisiwile na a ni 17 wa malembe. Loko u ni ku ganaganeka ka kukazri mayelanu ni leswi u swi dondzriki, hamba wusetxhi ka mabuku yezru. U nga susa ku ganaganeka koloko hi ku va ni “wutivi bya ntiyiso”. (Efe. 4:13, 14) Loko u dondzra hi mimfambu mayelanu ni lizrandzru ni wumun’we lebyi vhanu va Yehovha va byi kombisaka misaveni hinkwayu ni ku vona leswo na swi yentxeka a bandleni dzraku, ku tlangela kwaku ka lizrandzru dzra wumakwezru ku ta yengeseleka.

SAWULO WA LE TARSO A BABATISIWILE

7. He wani mayanakanyela lawa Sawulo swi djuliki leswaku a ma lulamisa?

⁷ Vona xikombiso xa Sawulo wa le Tarso. Sawulo a a yentxa nhluvuku lowukulu a wukhongotini bya Xiyuda nakone a wupfisiwe hi ku ya hi wukhongoti lebyo. (Gal. 1:13, 14; Filp. 3:5) Hi nkama lowu Vayuda a va vona vakriste swanga madukwa, Sawulo a va xanise hi ndlela ya nsele kutani hi ndlela ya kukazri a a tibyela leswaku a yentxa ku zrandzra ka Xikwembu Nkulukumba. (Mint. 8:3; 9:1, 2; 26:9-11) Akuva Sawulo a pfumela ka Yesu ni ku tlhela a babatisiwa swanga mukriste a swi djula kuva na yene a tiyimisela ku xanisiwa.

8. a) I yini lexi pfuniki Sawulo akuva a babatisiwa? b) Hi ku ya hi Mintizro 22:12-16, xana Ananiya a mu pfunise kuyini Sawulo? (Tlhela u vona ni mufoto.)

⁸ I yini lexi pfuniki Sawulo akuva a babatisiwa? Loko Yesu a vulavule na Sawulo na a li tilweni ku ve ni ku vaninga lokukulu loku yentxiki Sawulo a nga ha voni. (Mint. 9:3-9) Ku dzringana masiku mazrazru a titsrone swakuda nakone a yanakanyisise ngopfu swinene hi leswi a swa ha ku humelela. Nakunene, Sawulo a kholwisekile leswaku Yesu a a li Mesiya ni leswaku valandzreli vake a va li ka wukhongoti bya ntiyiso. Swi nga yentxeka Sawulo a tisolile hi leswi a seketeliki ku dlayiwa ka Stefanu! (Mint. 22:20) Ntsrhaku ka masiku mazrazru, mudondzrisiwa lweyi a vitaniwaka Ananiya, hi ndlela ya lizrandzru a mu dahe matihlo a tlhela a mu kutxa kuva a babatisiwa hi ku hantlisa. (Dondzra Mintizro 22:12-16.) Sawulo hi ku titsrongahata a yingisete Ananiya a va a babatisiwa.—Mint. 9:17, 18.

9. I yini leswi u nga swi dondzraka ka Sawulo?

⁹ Ku ni leswi hi nga swi dondzraka ka Sawulo. A a ta va a pfumelele ku tikulisa ni ku txhava vhanu ku mu sivela ku babatisiwa kambe a nga swi pfumelelanga leswo swi yentxeka. Sawulo a txintxe hi ku helela a wutomi byake loko a pfumele ntiyiso mayelanu na Kriste. (Mint. 26:14, 19) Sawulo a a tiyimisele ku va mukriste nambileswi a a swi tiva leswaku a a ta xanisiwa. (Mint. 9:15, 16; 20:22, 23) Ntsrhaku ka loko a babatiswile, a tame a dumba leswaku Yehovha a a ta tama a mu pfuna ku hlula swikazratu swa ku siyanasiyana. (2 Kor. 4:7-10) I ntiyiso leswaku loko u babatisiwa swanga Mboni ya Yehovha u ta kumana ni mindzringo leyi nga dzringaka lipfumelo dzraku kambe u ta va ni wa ku ku pfuna. Minkama hinkwayu u nga tiyiseka leswaku Yehovha na Yesu Kriste va ta ku seketela.—Filp. 4:13.

10. Xana u nga pfuneka hi ndlela yini ka xikombiso xa Anna?

¹⁰ Anna a kulele ka lixaka dzra Xikurdu a Europa Oriental. Ntsrhaku ka loko mamana wake a babatisiwile, Anna a sungule ku dondzra Bibele na a ni 9 wa malembe hi ku pfumeleliwa hi Papayi wake. Kambe swizro leswin’wana hinkwaswu swa ndangu swi sungule ku mu pfukela nkama lowu a nga sungula ku dondzra Bibele ni Timboni ta Yehovha. Maxaka yake a ma swi teka ku li wumphunta ku tsrhika wukhongoti lebyi a byi li bya ntumbuluku wake. Na a ni 12 wa malembe, a kombele Papayi wake akuva a mu pfumelela ku babatisiwa. Papayi wake a a djula ku tiva leswaku xiboho lexi a xi sukela kwake kumbe a ku ni lweyi a a mu sindzrisa. Kutani Anna a hlamula a ku: “Na mu zrandzra Yehovha”, xileswo Papayi wake a pfumelile kuva a babatisiwa. Ntsrhaku ka loko a babatisiwile, Anna a poyileliwe hi tindlela tinyingi a tlhela a khomiwa hi ndlela ya ku biha. Mun’we ka maxaka yake a mu byele leswi: “Swa yampswa ku va ni mahanyela ya ku biha kumbe ku dzraha ku tlula kuva Mboni ya Yehovha.” Xana Anna a lwisane ni ndzringo lowo hi ndlela yini? A te: “Yehovha a ni pfune kuva ni tiya nakone vapswele vanga va ni seketele ngopfu.” Anna a tsrale makhambi lawa a voneki voko dzra Yehovha na dzri mu pfuna. Minkama hinkwayu a a pfa a lavisa lomu a tsraliki kone akuva a nga dzrivali ndlela leyi Yehovha a mu pfuniki ha yone. Loko u txhava ku kanetiwa, dzrimuka leswaku Yehovha a ta ku pfuna na wene.—Heb. 13:6.

KORNELIYU A BABATISIWILE

11. I yini leswi a swi ta va swi yentxe Korneliyu a hlwela ku babatisiwa?

¹¹ A Bibele dzri tlhela dzri hi nyika xikombiso xa Korneliyu. Yene a a li “muzrangeli wa masotxha”, leswi liki a a zrangela kolomu ka 100 wa masotxha ya le Roma. (Mint. 10:1) Hi ndlela leyo, swi nga yentxeka a a ni ndhuma a mugangeni ni le wusotxhweni. Korneliyu “a a yentxela swisiwana mintxhumu yinyingi leyinene”. (Mint. 10:2) Yehovha a zrumele mupostola Petro akuva a zrezrela Korneliyu madzrungula lamanene. Xana xikhundla lexi Korneliyu a a li na xone xi mu yentxe a hlwela ku babatisiwa?

12. I yini leswi pfuniki Korneliyu akuva a babatisiwa?

¹² I yini lexi pfuniki Korneliyu akuva a babatisiwa? Bibele dzri li: “A a txhava Xikwembu Nkulukumba a tlhela a mu gandzrela yene ni ndangu wake hinkwawu”, nakone Korneliyu a a khongota ka Xikwembu Nkulukumba minkama hinkwayu. (Mint. 10:2) Loko Petro a zrezrele Korneliyu madzrungula lamanene, yene kun’we ni ndangu wake va pfumele ka Yesu Kriste nakone hi ku kahlula va babatisiwile. (Mint. 10:47, 48) Handle ka ku ganaganeka, Korneliyu a a tiyimisele ku hamba ku txintxa kun’wana ni kun’wana loku vilelekaka akuva a gandzrela Yehovha kun’we ni ndangu wake.—Yehoš. 24:15; Mint. 10:24, 33.

13. I yini leswi u nga swi dondzraka ka Korneliyu?

¹³ Ku fana na Sawulo, Korneliyu a a ta va a pfumelele kuva xikhundla lexi a a li na xone xi mu sivela ku va mukriste kambe a nga swi pfumelelanga leswo swi yentxeka. Xana swi djula kuva u yentxa ku txintxa lokukulu a wuton’wini byaku akuva u kota ku babatisiwa? Loko swi li hi ndlela leyo, Yehovha a ta va mupfuni waku. A ta ku tovokisa loko u tikazratela ku tizrisa minsinya ya milawu ya Bibele a wuton’wini byaku.

14. U nga pfuneka hi ndlela yini ka xikombiso xa Tsuyoshi?

¹⁴ Tsuyoshi wa le Japão swi djule kuva a txintxa ntizro wake akuva a kota ku babatisiwa. Tsuyoshi a a li mupfunisi wa diretori wa xikole xa kukazri lexi a xi nyikiwa lisima lani a ku dondzrisiwa vhanu ku lulamisela swiluva. Loko swi nga koteki kuva diretori a va kone a swilahlweni Tsuyoshi hi yene a a mu pfaleta ka swihena swa Xibuda leswi a swi yentxiwa. Kambe loko Tsuyoshi a dondzre ntiyiso, swihena leswo a swi ta mu sivela kuva a babatisiwa. Kutani a titekele xiboho xa ku kala a nga ha patsreki ka swihena swa Xibuda. (2 Kor. 6:15, 16) Ntsrhaku ka leswo, Tsuyoshi a bule ni diretori wake mayelanu ni mhaka leyi. Ku game ku yentxeka yini? Swi kotekile kuva Tsuyoshi a tama a tizra na a nga ha patsreki ka swihena swoleswo. Ntsrhaku ka loko a hete kolomu ka lembe na a sungule ku dondzra Bibele,a a babatisiwile. Loko swi djula kuva u txintxa ntizro waku akuva u nyonxisa Xikwembu Nkulukumba, a ta mi nyika leswi mi swi vilelaka wene kun’we ni ndangu waku.—Amaps. 127:2; Mat. 6:33.

VAKORINTE VA BABATISIWILE

15. He swini swikazratu leswi Vakorinte va kumaniki na swone leswi a swi ta va sivela ku babatisiwa?

¹⁵ A vhanu lava a va hanya ka doropa dzra Korinte wa khale a va zrandzra mintxhumu leyi vonekaka nakone a va ni mahanyela ya ku biha. Vhanu vanyingi lava a va hanya ka mbangu wolowo, a va hlawula ku hanya hi ndlela leyi a yi nga fambisani ni ku zrandzra ka Xikwembu Nkulukumba. Ku hanya a makazri ka vhanu lava nga ni mahanyela lawa, a ku ta va xikazratu ka lava a va ta yamukela madzrungula lamanene. Nambitanu, loko mupostola Pawulo a tlhase ka doropa dzroledzro a zrezra madzrungula lamanene mayelanu na Kriste, “Vakorinte vanyingi lava yingeliki madzrungula lamanene va ndzruluke vapfumeli va va va babatisiwa”. (Mint. 18:7-11) Kutani Hosi Yesu Kriste a humelele a xivonisweni a ku: “Ni ni vhanu vanyingi a doropeni ledzri.” Xileswo, Pawulo a tame a zrezra ka mbangu lowo ku dzringana lembe ni hamfu.

16. I yini leswi pfuniki van’we va Vakorinte ku hlula swikazratu akuva va babatisiwa? (2 Vakorinte 10:4, 5)

¹⁶ I yini leswi pfuniki Vakorinte akuva va babatisiwa? (Dondzra 2 Vakorinte 10:4, 5.) A Zritu dzra Xikwembu Nkulukumba ni moya wa ku xwenga swi va pfune ku hamba ku txintxa a wuton’wini byavu. (Heb. 4:12) Lava yamukeliki madzrungula lamanene a Korinte va tsrhike mahanyela yavu ni swiyentxo swavu swa ku biha swa ku fana ni ku popswa, ku yiva ni ku yentxa timhaka ta tinkuku ni vavanunakulobye.—1 Kor. 6:9-11.b

17. U nga dondzra yini ka Vakorinte?

¹⁷ Xiya leswaku nambileswi Vakorinte van’wana a va fanela ku hlula mahanyela ya ku biha, a va tibyelanga leswaku a swi ta va kazratela kuva va va vakriste. Hi ku kahlula va tikazratele ku nghena hi nyangwa leyitsrongo leyi yisaka a wuton’wini lebyi nga helikiki. (Mat. 7:13, 14) Xana u lwa akuva u hlula mahanyela ya ku biha kumbe xiyentxo xa ku biha akuva u babatisiwa? U nga kazrali, tama u lwa! Khongota ka Yehovha u kombela moya wa ku xwenga akuva wu ku pfuna ku hlula ku navela ku yentxa leswa ku biha.

18. U nga pfuneka hi ndlela yini ka xikombiso xa Monika?

¹⁸ Monika wa le Geórgia, a lwe ngopfu akuva a tsrhika mavulavulela ya nhlambha ni ku tsrhika ku hungata hi mintxhumu ya ku biha, akuva a kota ku yentxa nhluvuku a tlhela a babatisiwa. A li: “Ku sukela a wumpshweni byanga a ni pfuniwa hi xikhongoto. Yehovha a a swi tiva leswaku ni djula ku yentxa leswinene nakone minkama hinkwayu a a ni pfuna a tlhela a ni kongomisa.” Monika a babatisiwe na a ni 16 wa malembe. Xana ku ni swiyentxo swa kukazri leswi u fanelaka u swi tsrhika akuva u tizrela Yehovha hi ndlela leyi yamukelekaka? Yana mahlweni u mu kombela a ku nyika ntamu akuva u yentxa ku txintxa koloko, Yehovha a ta ku pfuna hi moya wake wa ku xwenga.—Yoh. 3:34.

LIPFUMELO DZRAKU DZRI NGA SUSA NI TINHAVA

19. I yini leswi nga ku pfunaka ku hlula swikazratu leswi fanaka ni tinhava? (Tlhela u vona ni mufoto.)

¹⁹ Tiyiseka leswaku Yehovha awa ku zrandzra nakone a djula leswaku u hamba xiyenge xa ndangu wake. Lowo i ntiyiso, swi nge na mhaka ni swikazratu leswi u kumanaka na swone ku ya tlhasa loko u babatisiwa. Yesu a byele ntlawa wa vadondzrisiwa vake va le dzaneni dzra ku sungula a ku: “Loko lipfumelo dzrenu dzro dzringana ni mbewu ya sinapi, mi ta swi kota ku byela nhava leyi mi ku: ‘Suka hi lani u ya lahaya’, yi va yi suka, nakone a xi kone xi taka mi hlula.” (Mat. 17:20) Lava yingeliki mazritu ya Yesu a va ha ku pfumela kwake, xileswo a lipfumelo dzravu a dzra ha fanela ku kula. Kambe Yesu a va tiyisekise leswaku loko va ya mahlweni va kulisa lipfumelo dzravu, Yehovha a a ta va pfuna ku hlula swikazratu leswi fanaka ni tinhava. Na wene, Yehovha a ta ku pfuna!

20. Xana swikombiso swa vakriste va le dzaneni dzra ku sungula ni swa le minkameni yezru leswi hi dondzriki ha swone ka xidondzro lexi swi ku pfune hi ndlela yini?

²⁰ Loko u xiya swikazratu leswi ku sivelaka kuva u babatisiwa, swi lulamise hi ku kahlula. Kuma ntxhavelelo ni ntamu ka swikombiso swa vakriste va le dzaneni dzra ku sungula ni swa le minkameni yezru. Ingiki swikombiso swavu swi nga ku nyika ntamu swi tlhela swi ku tiyisa akuva u tinyiketela ka Yehovha u tlhela u babatisiwa. Lexi i xiboho xa lisima lexi u nga xi tekaka!