Yobu

3 Inyuma y’ivyo ni ho Yobu yateranura akanwa, agatangura guhamagarira akabi ku musi wiwe+. 2 Yobu rero avuga ati:

 3 “Umusi navukiyeko uragapfa+,

Na rya joro umuntu yavuga ngo: ‘Umuntu w’umugabo yasamwe inda!’

 4 Uwo musi, nucike umwiza.

Imana ntikawurondere iri iyo hejuru,

Eka n’umuco w’umurango ntugakayanganire kuri wo.

 5 Umwiza n’igitutu kizitanye nibiwusabe uvyegukire.

Igicu c’imvura nikibe hejuru yawo.

Ibitera umusi gucura umwiza nibiwutere ubwoba+.

 6 Iryo joro, umuzimagiza nuricakire+;

Ntirigahimbarwe mu misi y’umwaka;

Ntirikinjire mu gitigiri c’amezi*.

 7 Iryo joro ga yemwe, niricike ingumba;

Ntihakagire akamo k’umunezero karyinjiramwo+.

 8 Abavuma imisi nibarivume,

Barya biteguriye gukangura Lewiyatani*+.

 9 Inyenyeri z’agahwibi karyo nizicure umwiza;

Niririndire umuco ariko ntuboneke;

Kandi ntirikabone imishwarara y’umutwenzi.

10 Kuko ritugaye imiryango y’inda ya mama+,

Ngo gutyo rihishe amaso yanje ivyago.

11 Kubera iki ntapfuye nkiva mu gitereko+?

Kubera iki ntavuye mu nda ngaca ncikana?

12 Kubera iki ibibero vyansanganiye,

Kandi kubera iki nahawe amabere+ ngo nonke?

13 Kuko ubu mba nariryamiye singire inkomanzi+;

Mba narisinziririye rero; mba niruhukiye+

14 Hamwe n’abami be n’abajanama b’isi+,

Barya biyubakira ibibanza vy’umusaka+,

15 Canke hamwe n’abaganwa bafise inzahabu,

Barya buzuza amazu yabo ifeza;

16 Canke, nka kurya kw’inda ikorotse mu mpisho+, simba narabayeho,

Nka kurya kw’abana batabonye umuco+.

17 Hariya ababisha baba baretse umudugararo+,

Kandi hariya abo inguvu zaheranye baba biruhukiye+.

18 Imbohe ziritekaniye zose hamwe;

Ntizicumva ijwi ry’uwuzihindagiza ku bikorwa+.

19 Abato n’abahambaye hariya ni cokimwe+

N’umushumba aba abohowe kuri shebuja.

20 Kubera iki iha umuco uwuri mu vyago,

Igaha n’ubuzima ab’umutima udundumiwe+?

21 Kubera iki hari abarindira urupfu, ariko ntiruze+,

Naho baguma bimba baruhiga kuruta uko bahiga itunga ryanyegejwe?

22 Barya banezerwa akamwemwe kakabasya,

Barigina kubera ko baronse imva.

23 Kubera iki iha umuco umuntu w’umugabo, uwo inzira yiwe yahishijwe+,

Uwo Imana ikikuza uruzitiro+?

24 Kuko iminiho yanje yitangira imbere ibifungurwa vyanje+,

Amaborogo yanje na yo akarindimuka+ nk’amazi;

25 Kuko natinye ikintu giteye ubwoba, none kinjeko;

Kandi ico nari mfitiye ubwoba ni co kinshikiye+.

26 Sinari mbuze amaganya, canke ngo mbure inkomanzi,

Eka sinari nduhutse, yamara ivyago biraje.”