Nehemiya
5 Ariko haba amaborogo+ akomeye y’abantu n’abagore babo, bidogera bene wabo b’Abayuda+. 2 Hari abavuga ngo: “Abahungu bacu n’abakobwa bacu tubatangako ingwati kugira turonke intete, turye maze tubandanye kubaho+.” 3 Hakaba n’abavuga ngo: “Amatongo yacu n’imirima yacu y’imizabibu n’amazu yacu tubitangako ingwati+ kugira ngo turonke intete mu gihe c’amapfa.” 4 Hari n’abavuga ngo: “Twaraguranye amahera y’ikibuguro+ c’umwami ku matongo yacu n’imirima yacu y’imizabibu+. 5 Yamara umubiri wacu ni cokimwe n’umubiri wa bene wacu+; abahungu bacu ni cokimwe n’abahungu babo, mugabo ehe abahungu bacu n’abakobwa bacu turiko tubagira abashumba+, kandi hari bamwe mu bakobwa bacu bamaze kugirwa abashumbakazi; nta co dushoboye gukora kuko amatongo yacu n’imirima yacu y’imizabibu vyegukira abandi.”
6 Nkimara kwumva amaborogo yabo n’ayo majambo, nca ndashavura cane. 7 Nuko ndabirimbura mu mutima wanje, maze ntangura gutatira+ abanyacubahiro n’ivyegera vy’abatware, ndababwira nti: “Muriko mwaka inyungu y’umurengera+ ku ngurane, umwe wese akayaka mwene wabo.”
Vyongeye, ntunganya ikoraniro rinini kubera bo+. 8 Maze ndababwira nti: “Twebwe ubwacu twaragize uko dushoboye tugaruza+ bene wacu b’Abayuda bari baragurishijwe ku mahanga; none namwe muce mugurisha bene wanyu+, kandi bagurishwe kuri twebwe?” Baca bacika nk’ibiragi, ntibaronka ico bavuga+. 9 Nongera mvuga nti: “Ico kintu muriko murakora si ciza+. Mbega ntimukwiye kugendera mu gutinya+ Imana yacu+ kubera iceyi+ c’amahanga, ari bo bansi bacu+? 10 Na jewe nyene na bene wacu n’abasuku banje turatanga ku ngurane amahera n’intete muri bo. Ndabinginze tureke ukwo kuguranira inyungu+. 11 Ndabinginze uno musi mubasubize amatongo yabo+, imirima yabo y’imizabibu, imirima yabo y’imyelayo n’amazu yabo, n’ic’ijana c’amahera n’ic’intete, n’ic’umuvinyu mushasha n’ic’amavuta mubaka bwa nyungu.”
12 Nuko bavuga bati: “Turabisubiza+, kandi nta co tubarihisha+. Turagira nk’uko nyene uvuze+.” Mpamagara rero abaherezi maze ndabarahiza yuko bokora bisunze iryo jambo+. 13 Vyongeye, nkunkumura igice c’impuzu yanje co ku gikiriza maze mvuga nti: “Umuntu wese atazoshitsa iri jambo, uku azobe ari ko Imana y’ukuri imukunkumura ave mu nzu yiwe no mu bintu vyiwe yaronse; kandi uku azobe ari ko akunkumurwa, asigare agaragara.” Ishengero ryose rica rivuga riti: “Amen+!” Maze batangura gushemeza Yehova+. Nuko abantu bakora bisunze iryo jambo+.
14 Ikindi kandi: Kuva umusi yanshinga kuba buramatari+ wabo mu gihugu ca Yuda, kuva ku mwaka ugira mirongo ibiri+ gushika ku mwaka ugira mirongo itatu na kabiri+ wa Aritazeruzi+ umwami, uko ari imyaka cumi n’ibiri, jewe na bene wacu ntitwariye umukate ugenewe buramatari+. 15 Ariko ba buramatari ba kera banyitangiye imbere bari bararemereje abantu, bakaguma babaka shekeli mirongo ine z’ifeza ku musi ku musi zigenewe umukate n’umuvinyu. Vyongeye, abasuku babo bariganza ku bantu+. Mugabo jewe sinagize gutyo+ kubera ugutinya Imana+.
16 Bisubiye, narafashije mu gikorwa c’uru ruhome+, kandi nta tongo twironkeje+; abasuku banje bose bama bakoranirizwa ng’aho ku bw’igikorwa. 17 Abayuda n’ivyegera vy’abatware, abagabo ijana na mirongo itanu, be n’abaza kuri twebwe bavuye mu mahanga yari irya n’ino yacu barya ku meza yanje+. 18 Ku bijanye n’ivyategurwa ku musi ku musi, nategurirwa ishūri imwe n’intama zitandatu z’indobanurwa, n’inyoni, rimwe mu misi cumi na ho ngategurirwa ubwoko bwose bw’umuvinyu+, nkawutegurirwa ari mwinshi. Naho vyari ukwo, sinasavye umukate ugenewe buramatari, kuko igikorwa cari kuri aba bantu cari kiremereye. 19 Ewe Mana yanje, uze unyibuke+ ku bw’ivyo nagiriye aba bantu vyose+, ungirire iciza+.