Imigani

23 Niwicara ngo usangire ibifungurwa n’umwami, uze urimbure neza ibiri imbere yawe+, 2 kandi uze wishire imbugita mw’izosi nimba ufise ameru+. 3 Ntuhahamire ivyibo vyiwe binovera, kuko ari ibifungurwa vy’ibinyoma+.

4 Ntucumukure kugira uronke ubutunzi+. Heba ubwenge bwawe+. 5 Mbega wabukubitijeko amaso, kandi ari ubusa+? Kuko butabura kwimerera amababa nk’ay’inkona, bukaguruka bwerekeza mu majuru+.

6 Nturye ibifungurwa vy’uwo wese ari n’ijisho ridatanga+, canke ngo uhahamire ivyibo vyiwe binovera+. 7 Kuko ameze nka kurya kw’umuntu yaharûye mu mutima wiwe+. Akubwira ngo: “Niwirire, winywere,” mugabo umutima wiwe utari kumwe nawe+. 8 Ikimanyu cawe wariye, uzokidahwa, kandi uzoba wapfishije ubusa amajambo yawe ahimbaye+.

9 Ntuvugire mu matwi y’ikijuju+, kuko kizosuzugura amajambo yawe y’ubwenge+.

10 Ntiwigize inyuma urubibe rwa kera+, kandi ntiwinjire mw’itongo ry’impfuvyi*+. 11 Kuko Umucunguzi wabo akomeye; ubwiwe azoburana nawe urubanza rwabo+.

12 Nuzane umutima wawe ku ndero, n’ugutwi kwawe ku majambo y’ubumenyi+.

13 Ntiwime indero umwana+. Umukubise inkoni ntazopfa. 14 Ukwiye rero kumukubita inkoni, kugira urokore ubuzima bwiwe ubukize ukuzimu+.

15 Mwananje, umutima wawe niwaba inkerebutsi+, umutima wanje, emwe, umutima wanje, uzonezerwa+. 16 Kandi amafyigo yanje azokwigina, iminwa yawe niyavuga ukugororoka+.

17 Umutima wawe ntiwumvire agashari abacumuzi+, ahubwo nutinye Yehova burinde bwira+. 18 Kuko ari ho uzogira kazoza+, kandi icizigiro cawe ntikizorandurwa+.

19 Nawe ga mwananje, niwumve ube inkerebutsi, kandi uyobore umutima wawe mu nzira+.

20 Ntube mu banywi b’umuvinyu ba cane+, mu baryi b’inyama b’abakunzi b’inda+. 21 Kuko imborerwa n’umukunzi w’inda bazoja mu bworo+, kandi uguhunyiza kuzokwambika umuntu imishambara+.

22 Umviriza so yakuvyaye+, kandi ntusuzugure nyoko wawe ngo ni uko gusa ashaje+. 23 Gura ukuri+, ntukugurishe; be n’ubukerebutsi n’indero be n’ugutegera+. 24 Se w’umugororotsi ntazobura kunezerwa+; uwuvyaye umwana w’inkerebutsi na we nyene azomuhimbarirwa+. 25 So wawe na nyoko wawe bazohimbarwa, kandi nyoko wawe yakwibarutse azonezerwa+.

26 Mwananje, numpe umutima wawe, kandi ayo maso yawe ahimbarwe n’inzira zanje+. 27 Kuko umumaraya ari icobo kirekire+, kandi umugore w’umunyamahangakazi ni iriba ryaga. 28 Ni ukuri, arabunda nka kurya kw’umwambuzi+; kandi agwiza ibihemu mu bantu+.

29 Ni nde ari n’amagorwa? Ni nde akonyokewe? Ni nde ari n’amahane+? Ni nde ari n’amaganya? Ni nde ari n’ibikomere ata mvo? Ni nde afise amaso y’indubaruba? 30 Ni abamara umwanya muremure ku muvinyu+, abinjira guserangura barondera umuvinyu uvanze+. 31 Ntiwihweze umuvinyu iyo utukuriye, iyo ubiragira mu gikombe, iyo ushororoka. 32 Amaherezo yawo ukomora nk’inzoka+, ukarekura ubumara nk’imamba+. 33 Amaso yawe azobona ibintu bitabaho, n’umutima wawe uvuge ibintu bigoramye+. 34 Ntuzobura kumera nk’umuntu aryamye mu nda y’ikiyaga, mbere nk’umuntu aryamye kw’isonga ry’inkingi y’ubwato+. 35 “Bankubise, sinarwara; bampuraguye, sinabimenya. Nzovyuka ryari+? Nzosubira kurondera wundi mukeyi+.”