Ezekiyeli
24 Ijambo rya Yehova ryongera kunzako mu mwaka ugira icenda, mu kwezi kugira cumi, ku musi ugira cumi w’ukwo kwezi, riti: 2 “Mwana w’umuntu, niwiyandikire izina ry’uyu musi, uyu musi nyene. Umwami wa Babiloni yitaye kuri Yeruzalemu uyu musi nyene+. 3 Tunganya imvugo y’akagani ku vyerekeye ya nzu y’ingarariji+, uvuge ku biberekeye uti:
“‘Ibi ni vyo Umukama Segaba Yehova avuze: “Shirako ya nkono y’umunwa munini; yishireko, uyisukemwo n’amazi+. 4 Yegeranirizemwo ibipande+, igipande ciza cose, itako n’urutugu; yuzuze mbere n’amagufa mezameza. 5 Nihatorwe intama nziza kuruta izindi+, kandi munsi ya nya nkono urundeyo ingegene mu muzingi. Togotesha ibipande vyayo, uteke n’amagufa yayo hagati muri yo+.”’”
6 “Ibi rero ni vyo Umukama Segaba Yehova avuze: ‘Kiragowe ca gisagara c’ibikorwa vy’ugusesa amaraso+, ya nkono y’umunwa munini, ingese zayo zikaba ziri muri yo, zikaba zitayivuyemwo! Kurayo ibipande biri muri yo, kimwe ku kindi+; ntihagire ubupfindo ipfindirwako+. 7 Kuko amaraso yaco ari neza na neza hagati muri co+. Cayashize hejuru ku rutare hakayangana kandi hagaragara. Nticayasutse hasi, ngo apfukwe n’umukungugu+. 8 Kugira ngo mvyure ubushangashirwe ku bwo guhōra+, nashize amaraso yaco hejuru ku rutare hakayangana kandi hagaragara, ngo ntapfukwe+.’
9 “Ibi rero ni vyo Umukama Segaba Yehova avuze: ‘Kiragowe ca gisagara c’ibikorwa vy’ugusesa amaraso+! Nanje rero ikirundo c’inkwi ngira ndakigire kinini+. 10 Gwiza ingegene. Cana umuriro. Togotesha inyama zishe zinoge. Suka umufa wose, amagufa na yo ashuhe cane. 11 Yitereke ku makara yayo igaragara kugira ngo ishuhe; umujumpu wayo utegerezwa kurungura, kandi ubuhumane bwayo butegerezwa kuyagira hagati muri yo+. Ingese zayo nizitokombere+. 12 Erega ni ukuruhira ubusa! Yarateye uburuhe, mugabo ingese zayo nyinshi ntiziyivamwo+. Yiterere mu muriro n’ingese zayo!’
13 “‘Mu buhumane bwawe habayemwo ubushirasoni+. Ni co gituma nabwirijwe kuguhumanura, mugabo ntiwahumanutse ubuhumane bwawe+. Ntuzokwongera kuba uwuhumanutse gushika ntururuje ubushangashirwe bwanje ku bikwerekeye+. 14 Jewe Yehova ndavuze+. Ivyo bizoba ata kabuza+, kandi nzogira ico nkoze. Sinzobifata minenegwe+, eka sinzokwumva akagongwe+ canke ngo nicuze+. Bazogucira koko urubanza nk’uko inzira zawe ziri+, nk’uko kandi ivyo ukora biri,’ ni ko Umukama Segaba Yehova avuze.”
15 Ijambo rya Yehova ryongera kunzako, riti: 16 “Mwana w’umuntu, ehe ngira nkwake ca kintu gihimbaye+ mu maso yawe biciye ku cago+; ntiwikubite ku gikiriza canke ngo urire canke ngo amosozi yawe adengere+. 17 Nunihe udakurako umunwa. Ntugandarire abapfuye+. Niwizingireko icambarwa cawe co mu mutwe+, wambare inkweto* zawe ku birenge+. Ntupfuke ubwanwa bwo haruguru+, kandi nturye umukate w’abantu+.”
18 Maze mu gitondo mbwira abantu, amaherezo ku mugoroba umugore wanje arapfa. Nuko mu gitondo nkora nk’uko nari nategetswe. 19 Hanyuma abantu baguma bambaza bati: “Mbega ivyo bintu uriko urakora ntutubwira ingene bitwerekeye+?” 20 Nanje ndababwira nti: “Ijambo rya Yehova ryanjeko, riti: 21 ‘Bwira inzu ya Isirayeli uti: “Ibi ni vyo Umukama Segaba Yehova avuze: ‘Ehe ngira mpumanye aheranda hanje+, ubwishime bw’inkomezi zanyu+, ca kintu gihimbara amaso yanyu+ kikaba n’ico umutima wanyu ugirira impuhwe; kandi abahungu banyu n’abakobwa banyu mwasize inyuma, bazogwishwa n’inkota+. 22 Namwe muzobwirizwa kugira nk’uko nagize. Ntimuzopfuka ubwanwa bwo haruguru+, kandi ntimuzorya umukate w’abantu+. 23 Ibitambara vyanyu vyo mu mutwe bizoba ku mitwe yanyu, inkweto zanyu na zo zibe ku birenge vyanyu. Ntimuzokwikubitagura canke ngo murire+; muzobwirizwa kuborera mu makosa yanyu+, kandi ntimuzobura kuniha, umwe wese anihira uwundi+. 24 Kandi Ezekiyeli yababereye imburizi+. Muzokora ibihwanye n’ivyo yakoze vyose. Nivyashika+, muzobwirizwa rero kumenya yuko jewe ndi Umukama Segaba Yehova+.’”’”
25 “Nayo wewe ga mwana w’umuntu, mbega ku musi nzobaka iboma ryabo, ca kintu ciza bigina, ca kintu gihimbara amaso yabo+ kikaba n’ico umutima wabo wipfuza, abahungu babo n’abakobwa babo+, mbega 26 kuri uwo musi si ho uwucitse kw’icumu azoza kuri wewe kugira ngo atume amatwi yumva+? 27 Kuri uwo musi akanwa kawe kazoteranurirwa uwo yacitse kw’icumu+, uvuge, ntusubire kuba ikiragi+; uzobabera koko imburizi+, kandi bazobwirizwa kumenya yuko jewe ndi Yehova+.”